1 Me yibi buch u lan e bin wugem nge aningeg e duw me yoʼor e gidii ni chuw ko fare galasia, maki yib ba togopluw nga fithikʼ fapi gidiiʼ, ni arame ri yoʼor e rachaʼ ni mapʼ riy.

2 Ma piʼin be togopluw e nliiʼraed min tuluf raed nga wuruʼ fare binaw, ma ranoed ko fare pilung ko fapi Lamanites.

3 Me yibi buch ni ra nomeged rogon ni ngar kʼaringed fapi Lamanites ni ngar mael gaed ngakʼ fapi Nephites; machane musap gaed, fapi Lamanites e rrus gaed nib gel, ma arame dar motoyil gaed ko thin rokʼ fa piʼin nra chuwgaed.

4 Machane yibi buch u lan e bin wugem nge nelʼ e duw ko fare lung ko fapi tapuf-oloboch, ma immoy boech e gidiiʼ nra chuwgaed ko fapi Nephites nga ranoed ko fapi Lamanites; mar cheaggaed ngakʼ fatin baʼaram ngar kʼaringed e damomuw ngakʼ fapi Lamanites ngar togopluw gaed ngakʼ fapi Nephites; ma yaed gubin nra falʼeged rograed ko mael e re duw nem.

5 Ma lan e bin wugem nge medilip e duw marbaed ngakʼ fapi Nephites ko mael, mar tabab niged e muruwel ni ngan cham nga nimʼ; arragon, ni arame lan e bin wugem nge meruk e duw ko fare lung ko fapi tapuf-oloboch me yog nra suweyed fare binaw nu Zarahemla; arragon, ni gubin e pi binaw, ni arame yaen nge madaʼ ko fare binaw ni bay nga charen fare binaw ni Galwog.

6 Ma fapi Nephites nge fapi salthaw ku Moronihah e ni tuluf raed ngar madaʼ gaed ko fare binaw ni Galwog;

7 Ma ireram e gin ni ra noemow niged yaed riy ni ngar togopluw gaed ko fapi Lamanites, u baʼani ngael e day, nge yaeni madaʼ nga baʼani ngek; ni palgen e boed napʼan e milekag ni nge tay ba Nephite u lan rebo rran, u mathil ko gin ni kar tayed ma kar noemow niged e salthaw roraed riy ni ngar matangiyed e nam roraed ni bay nga leluʼoch.

8 Ere aram rogon ni fa piʼin nra chuw gaed ko fapi Nephites, u dakean e ayuw ko salthaw ni yoʼor ko fapi Lamanites, mar koeled gubin i tafen fapi Nephites u lan fare nam ni bay nga yimuch. Ma gubin e pinnʼey e nrinʼ u lan e bin wugem nge meruk nge bin wugem nge mereb e duw ko fare lung ko fapi tapuf-oloboch.

9 Me yibi buch nu lan e bin nelʼ i ragag e duw ko fare lung ko fapi tapuf-oloboch, ma Moronihah nge salthaw rokʼ e yog nra sulweged boʼor yang ko binaw; arragon, boʼor riy ko fapi binaw ni mul nga lan paʼ fapi Lamanites e ra sulweged.

10 Me yibi buch nu lan e bin nelʼ i ragag nge taʼareb duw ko fare lung ko fapi tapuf-oloboch make yog ni mʼing u lukungun gubin i taferaed ni kar sulweged.

11 Ere waer ney ni tay fapi Nephites, nge yamʼ ni aw nga fithikʼraed, e faʼan manga boech ma dabi buch ni faʼanra dariy e ngongol roraed nib kireb nge fananikan u fithikʼraed; arragon, ni bay u fithikʼ e piʼin ni yaed be yoeg ni yaed bamang ko fare galasia rokʼ Got.

12 Ma ri bachan e fare ufʼuf ko pi gumʼirchaʼ roraed, nge bachan e falaʼab roraed, arragon, ri bachan e thibthib roraed ngakʼ e piʼin gafgow, ni yaed be tel e ggan roraed rokʼ e piʼin ni yaed be yimʼ ko makʼiy, ma yaed be tel e mad roraed rokʼ e piʼin dariy e mad roraed, ma yaed be bat nag linglingin e piʼin walagraed ni sobutʼaenʼ, ma yaed be muning nag e tin nib thothup banʼen, ma yaed be fek yathin fare nangaenʼ ko prophecy nge yiʼiy, ma yaed be mathang pogofan, nge matgael, nge baen, nge moroʼroʼ, nge iling, ma kar puwgaed ngalang nga fithikʼ e togopluw, ma yaed be chuw nga ranoed nga lan fare binaw ku Nephi, nga fithikʼ fapi Lamanites—

13 Nge bachan e ngongol roraed ni rib kireb, nge ufanthin roraed nga gelingraed, min pagraed ni yigoʼ yaed nge chigelingraed; ere deyog ni ngar monʼog gaed, min gafgow nagraed min liiʼraed, me tuluf raed fapi Lamanites, nge yaeni madaʼ ko ngiyalʼ ni ke chugur ni mul paʼraed ko gubin e binaw ni taferaed.

14 Machane musap gaed, Moronihah e machib nag boʼor banʼen ngakʼ fapi gidiiʼ ni bachan e denen roraed, nge ku aram rogon ngakʼ Nephi nge Lehi, ni lʼagruw i pagael ni fak Helaman, nra machib nigew boʼor banʼen ngakʼ fapi gidiiʼ, arragon, ra prophesy niged boʼor banʼen ngoraed ni morngaʼagen e pi denen roraed, nge mang e ra yib riy ngoraed ni faʼanra dabra kalgaed ngaenʼraed ko pi denen roraed.

15 Me yibi buch ni arame ra kalgaed ngaenʼraed, ma nʼumngin i napʼan nra kalgaed ngaenʼraed mar tabab gaed ko monʼog.

16 Ya napʼan ni guy Moronihah ni kar kalgaed ngaenʼraed me mʼagaenʼ ngay ni nge powiʼiyraed iyaen u bang ngo bang, nge rebo binaw ngo reb, nge yaeni madaʼ ko ngiyalʼ ni ke mʼing u lukungun e chugum roraed nge pi binaw roraed ni ke sul ngoraed.

17 Ere aray rogon ni mus e bin nelʼ i ragag nge taʼareb e duw ko fare lung ko fapi tapuf-oloboch.

18 Me yibi buch nu lan e bin nelʼ i ragag nge lʼagruw e duw ko fare lung ko fapi tapuf-oloboch, me Moronihah e dakiyog ni nge koel tafen fapi Lamanites.

19 Ere ratileged i tanmeg rogon ni ngar sulweged e yungin ni ke magaey ko pi binaw roraed, ya rib yoʼor fapi Lamanites me math liyiben ngakʼ fapi Nephites ni ngar gelgaed ngoraed; ere Moronihah e tay gubin e salthaw rokʼ ko muruwel ni ngar matangiyed e yungin baʼaram ni kar sulweged.

20 Me yibi buch, ni ri gel e murus ko fapi Nephites ni bachan e kari yoʼor fapi Lamanites, ma richey mar waer gaed, min yitʼ raed nga butʼ, min liiʼraed, min gatheayraed.

21 Arragon, me tabab iyib ngaenʼraed fapi prophecy ku Alma, nge fapi thin ku Mosiah; mar guyed ni yaed bogi gidiiʼ ni kar ʼelʼel niged laniyaenʼraed, ma kar nʼigedfan fapi motochiyel rokʼ Got;

22 Ma kar thil gaed ma kar yitʼed fapi motochiyel ku Mosiah, ara renʼen ni ke motochiyel nag Somoel ngakʼ ni nge piiʼ ngakʼ fapi gidiiʼ; mar guyed ni pi motochiyel roraed e ke kireb, ma kar manged bogi gidiiʼ nib kireb, ni arame kar kireb gaed ni boed fapi Lamanites.

23 Ere bachan e denen roraed me tabab i lich gidiiʼen fare galasia; ma daki michaenʼraed ko fare nangaenʼ ko prophecy nge nangaenʼ ko yiʼiy; mar guyed ni fare pufthin ku Got e ke wup nga oewchraed.

24 Mar guyed ni kar moʼowaer gaed, ni woed pi walagraed, ni fapi Lamanites, ma fare Kan ni Thothup ku Somoel e ke tileg i ayuwegraed; arragon, ke chuw roraed ya fare Kan ni Thothup ku Somoel e dar mapaer u lan e temple ni de thothup—

25 Ere fare Somoel e tileg i ayuwegraed u dakean gelingin nib maʼangʼang ma dariy e puluw riy, ya kar mulgaed kar awgaed nga ba dodow ni dakuriy e mich roraed ma denen ni tinoewey; mar kar guyed ni fapi Lamanites e kar riyoʼor gaed ngoraed, ma faʼanra dabra chichiʼiyed yaed ngakʼ Somoel ni Got roraed ma thingar ra mʼaed ni dabisiy.

26 Ya musap gaed, kar guyed ni gelingin fapi Lamanites e ke taʼareb rogon nga gelingraed, ni woed beeʼ nge beeʼ. Ere aray rogon ni kar mulgaed nga fithikʼ e biney e denen nib ubchiyaʼ; arragon, aray rogon ni kar moʼowaer gaed, ni bachan e denen roraed, u lan buchʼuw e duw.