1 Me yibi buch ni kulan e re duw ney, e musap gaed, Nephi e piiʼ fare gilʼ e tapuf-oloboch nga paʼ beeʼ nib moʼon ni Cezoram fithingan.

2 Ya bachan e motochiyel roraed nge am roraed e ni yarmiy u lungun e gidiiʼ ni yoʼor, ma piʼin ma melʼeg e kireb e yaed bayoʼor ngakʼ e piʼin ma melʼeg e felʼ, ere kar loel gaed ko kireb ni ngan gatheayraed, ya fapi motochiyel e ke kireb.

3 Arragon, dawori mus aray; ku yaed bogi gidiiʼ nib ʼelʼel laniyaenʼraed, ni dabki yog ni ngan gagyeg nagraed u dakean e motochiyel ara justice, ma kemus ni ngan gatheayraed.

4 Me yibi buch ni Nephi e kari ngochngochaenʼ ni bachan e denen roraed; me pag fare gilʼ e tapuf-oloboch, me ognag ir ni nge machib nag fare thin rokʼ Got u lan gubin e tin ni kubay e rran rokʼ, nge walagen ni Lehi e ku aram rogon ngakʼ, ni ngki rinʼ u lan gubin e tin kubay e rran rokʼ;

5 Ya ke yib ngaenʼraed fapi thin ni weliy e chitamangrow i Helaman ngorow. Ma baʼaray e pi thin ni weliy:

6 Musap gow, gal fakag, gube athapeg ni ngam tayew u wunʼmew ni ngam koelew falan fapi motochiyel rokʼ Got; ma gu baʼadag ni ngam weliyew ko gidiiʼ e pi thin ney. Musap gow, kug piiʼ ngomew e ngachol ni fithingan e gal ni mʼon i chitamangdaed ni rabow nga wuruʼ fare binaw nu Jerusalem; ma kug rinʼ e biney ya napʼan ni nge yib ngaenʼmew fithingmew, me yog ni ngar bow ngaenʼmew; ma napʼan ni yow ra yib ngaenʼmew ma nge yib ngaenʼmew e pi muruwel rorow; ma napʼan ni ke yib ngaenʼmew rogon e pi muruwel rorow me yog ni ngam nangew rogon ni kanoeg, ma kun yoloey, morngaʼagrow ni yow ba mangil.

7 Ere, gal fakag, gubaʼadag ni ngam rinʼew e tin nib mangil, ni nge yog ni nga noegmew, min yoloey morngaʼagmew nib mangilʼ, ni woed ni kanoegrow ma kan yoloey morngaʼagrow nib mangil.

8 Ere chiney o gal fakag, musap gow ku bay boech ni gube athapeg ni ngam rinʼew, nib athap ni, gomanga siy mu rinʼew e pinnʼey ni ngam ʼuf gow, ma ngam rinʼew e pinnʼey ni ngam chaʼariyew ba falaʼab nu tharmiy ni fan ngomew e, arragon, falaʼab ni manechubog, ma darma mʼay ngab yang; arragon, ni gomanga yog ngomew fare tawaʼath ni thʼabi gaaʼ ko yafos ni manechubog, niʼir e rayog ni ngad lemniged ni kan piiʼ ngakʼ e pi chitamangdaed.

9 O mu tayew u wunʼmew, mu tayew u wunʼmew, gal fakag, ni fapi thin ni weliy fare pilung i Benjamin ngakʼ e pi gidiiʼ ney; arragon, mu tayew u wunʼmew ni dakuriy rebi kanawoʼen ara banʼen nga bayang ni rayog ni nge thap e gidiiʼ riy, ma kemus nu dakean fare bayul ni rachaʼen Yesus Kristus, niʼir e bay yib; arragon, mu tayew u wunʼmew ni bay yib ni nge bayuliy e fayleng.

10 Ma ngam tayew u wunʼmew fapi thin ni yoeg Amulek ngakʼ Zeezrom, u lan fare binaw nu Ammonihah; ya ke yoeg ngakʼ ni fare Somoel e rriyulʼ ni ra yib ni nge bayuliy e gidiiʼ rokʼ, ma gathi nge yib ni nge bayuliyraed nga fithikʼ e pi denen roraed, ya nge bayuliy ko pi denen roraed.

11 Ma bay e gelingin rokʼ ni ke piiʼ e en Chitamangiy ni nge bayuliyraed u fithikʼ e pi denen roraed ni bachan e kalngaenʼ; ere ke lʼoeg e pi angel rokʼ ni ngar weliyed morngaʼagen rogon e kalngaenʼ, niʼir e ma yib nag gelingin fare Tabiyul, ni nge thapegraed ni poloʼ.

12 Ere chiney, gal fakag, mu tayew u wunʼmew, mu tayew u wunʼmew ni fare war ni Tabiyul rodaed, niʼir Kristus, ni fachaʼ ni Fak Got, e thingar mu ufungew e dayif romew nga dakean; ya napʼan ni fare moʼoniyanʼ e nge piiʼ e nifeng rokʼ nib gel, arragon, nifngin e yokoʼ rokʼ, arragon, u napʼan ni gubin e nʼuw ni ays nge yokoʼ rokʼ nib gel e nge aw ngomew, ma dariy gelingin ni nge miliymew iyaen nga butʼ ko fare dodow ko gafgow ni dariy nʼumngin i napʼan, ni bachan fare malang ni kam dumow gow nga dakean, niʼir ba dayif nib miyuluy, nib dayif ni faʼanra toey e gidiiʼ e naʼun nga dakean ma dabi puth nga butʼ.

13 Me yibi buch ni ireray e pi thin ni fil Helaman ngakʼ faga pagael ni fak; arragon, boʼor bogi banʼen ni fil ngorow ma dan yoloey, nge ku boech banʼen nib yoʼor ni kan yoloey.

14 Ere ratayew u wunʼrow e thin rokʼ; ere ranow iyaen, ni yow be koel falan e pi motochiyel rokʼ Got, ni ngar filew fare thin rokʼ Got u fithikʼ gubin e gidiiʼ ku Nephi, nra tabab gow ko fare binaw ni Galwog;

15 Ngo roem iyaen ko fare binaw nu Gid; ngo fare binaw nu Gid iyaen ko fare binaw nu Mulek;

16 Ma ranow u rebo binaw ngo reb, nge yaeni madaʼ ko ngiyalʼ ni ka ranow u fithikʼ gubin fapi gidiiʼ ku Nephi ni yaed bay nga lan fare binaw ni bay nga yimuch; ngu roem iyaen nga lan fare binaw nu Zarahemla, nga fithikʼ fapi Lamanites.

17 Me yibi buch ni rib mangingʼ e machib nra tayew, ni arame ra athkuyew laniyaenʼ fa piʼin nra chuw gaed ko fapi Nephites, ni arame rabaed ngar pogofay niged e pi denen roraed min tawfe nagraed u dakean e kalngaenʼ, ma ku chingiyalʼ nem mar suloed ko fapi Nephites ni ngar falʼeged e pinʼen ni kar kireb niged.

18 Me yibi buch ni Nephi nge Lehi e ra machib nigew fapi Lamanites u fithikʼ e mangingʼ nge matʼawon, ya bay gelingrow nge matʼawngirow ni kan piiʼ ngorow ni nge yog ni ngar nonow, ma kun piiʼ ngorow e nʼen ni ngar weliyew—

19 Ere ranonow me mat banʼen u oewchen fapi Lamanites, me michaenʼraed, ni arame yaeni gaman e meruk e biyuʼ fapi Lamanites ni ur moyed u lan fare binaw nu Zarahemla nge binaw nib liyeg nni tawfe nagraed u dakean e kalngaenʼ, me michaenʼraed nib kireb fapi yalen e pi chitamangraed.

20 Me yibi buch ni Nephi nge Lehi e ranow u roem i yaen ko fare binaw ku Nephi.

21 Me yibi buch ni fekrow ba ulung i salthaw ko fapi Lamanites nga ninʼrow nga kalbus; arragon, ni ku ireram fare kalbus ni yinʼ fapi tapigpig rokʼ Limhi i Ammon nge walagen nga langgin.

22 Ma napʼan ni ke yoʼor e rran ni kaninʼrow nga kalbus ni dan piiʼ garow, ma musap gaed, ma ranoed nga lan fare kalbus ni ngan fekrow ni ngan liiʼrow.

23 Me yibi buch ni Nephi nge Lehi e gowa ke liyegrow e nifiy, ni arame dar mathʼ loren roraed ni ngar math gaed ngorow ya yaed be rus ni yaedra yikʼ. Machane, Nephi nge Lehi e daryikʼ gow; ma ur moyew ni gowa yow ba sakʼiy u lulukungun e nifiy ma darur yikʼ gow.

24 Ma napʼan ni ruguyew nib liyegrow baelʼ i nifiy, ma darur yikʼ gow, me athamgil laniyaenʼrow.

25 Ya kar guyew ni fapi Lamanites e dar thog roraed ni ngar math gaed ngorow; ara dar thog roraed ni ngar chugur gaed ngorow, ma kar sakʼiy gaed ni gowa kar maʼay gaed ni ke mat banʼen u oewchraed.

26 Me yibi buch ni Nephi nge Lehi e ra kan gow nga mʼon mar tabab gow ko numon ngoraed, ni yow be gaʼar: Dab murus gaed, ya musap gaed, ri Got e ke dag ngomed e re maʼangʼang ney, ni be dag riy ngomed ni dabiyog ni ngam koeled gamow ngam liiʼed gamow.

27 Ere musap gaed, napʼan ni kar weliyew e pi thin ney, me rur e butʼ nib almarin, nge pi yungi rungrung ko fare kalbus e rurrur ni gowa nge puth nge aw nga butʼ; machane musap gaed, de puth nga butʼ. Ere musap gaed, piʼin ni bay u kalbus e ngiyalʼ nem e fapi Lamanites nge fa piʼin nra chuw gaed ko fapi Nephites.

28 Me yibi buch ni upnguy raed bangi manileng nib lumor, me yibi aw bangi murus nga dakeanraed nib almarin.

29 Me yibi buch ni yib ba lam ngoraed u dakean farengi manileng nib lumor, nibe gaʼar: Mu kalgaed ngaenʼmed, mu kalgaed ngaenʼmed, ma dab kum gayed rogon ni ngam liiʼed e tapigpig rog ni kug lʼoegrow nga fithikʼmed ni ngar weliyew e thin nib mangil.

30 Me yibi buch u napʼan ni rrungʼaged e re lam ney, mar nanged ni gathi lingan e dirraʼ, ara balam nib wagagaey lingan, ya musap gaed, balam nib sumunguy mab achig, ni gowa ba kathkath, ma be rich nga laniyaenʼ raed—

31 Machane yug aram rogon nib lam nib achichig, ma musap gaed, ri rurug e butʼ nib almarin, ma fayungi rungrung ko fare kalbus e kirur bayay, ni gowa nge puth nge aw nga butʼ; ma musap gaed farengi manileng nib lumor, ni ke upnguyraed e de chuw—

32 Ma musap gaed fare lam e ki yib bayay, nibe gaʼar: Mu kalgaed ngaenʼmed, mu kalngaenʼgaed, ya fare gilʼilungun nu tharmiy e ke chugur iyib; ma dab kum gayed rogon ni ngam liiʼed e tapigpig rog. Me yibi buch ni ke rur e butʼ bayay, me rur fayungi rungrung.

33 Ma kiyib fare lam bayay ko yan dalip yay, me yoeg e thin nib maʼangʼang ngoraed ni dabiyog ni nge weliy e gidiiʼ; ma fayungi rungrung e ki rurrur bayay, me murur e butʼ ni gowa nge pil nge waer.

34 Me yibi buch ni fapi Lamanites dabkiyog ni ngar miil gaed ni bachan farengi manileng nib lumor ni ke upnguy raed; arragon, ma ku dakur mithmith gaed ni bachan e murus ni yibi aw nga dakeanraed.

35 Ma chiney e bay beeʼ u fithikʼraed nni gargeleg nib Nephite, niki immoy bingyalʼ nib mang ko fare galasia rokʼ Got ma chiney e ke chuw roraed.

36 Me yibi buch ni chel u butʼ, me sap, me guy u fithikʼ farengi manileng nib lumor oewchen Nephi nge Lehi; me guy, nibe gael raʼen oewchrow, ni boed oewchen e pi angel. Me guy ni kar pugew oewchrow ngalang ngar sap gow nga tharmiy; ni yow bay ni gowa yow be non ara yow be welthin ngakʼ beeʼ ni kar guyew.

37 Me yibi buch ni re moʼon ney e non nib gaaʼ laman ngakʼ fare ulung i gidiiʼ, ni ngar chelgaed ngar sap gaed. Ere muguyed, nni piiʼ gelingraed mar chelgaed u butʼ ngar sap gaed; mar guyed oewchen Nephi nge Lehi.

38 Mar gaʼar gaed ngakʼ fare moʼon: Musap, mang e be wupfan ko gubin e pinnʼey, ma miniiʼ e be non e gal moʼon nem ngakʼ?

39 Chiney e fithingan fare moʼon e Aminadab. Ere gaʼar Aminadab ngoraed: Yow be non ko pi angel rokʼ Got.

40 Me yibi buch ni fapi Lamanites e ragaʼar gaed ngakʼ: Mang e nggu rinʼed, me chuw e rengi manileng ney nib lumor nibe upnguy daed?

41 Me gaʼar Aminadab ngoraed: Thingar mu kalgaed ngaenʼmed, mi gimed pining fare lam, ni aram rogon nge yaeni madaʼ ko ngiyalʼ ni ke michaenʼmed ngakʼ Kristus, niʼir e fil Alma morngaʼagen ngomed, nge Amulek, nge Zeezrom; ere napʼan ni gimed rarinʼ e biney, ma farengi manileng nib lumor nibe upnguymed e ra chuw.

42 Me yibi buch ni yaed gubin nra tabab gaed ko meibil ngakʼ fachaʼ ni laman e ke rurug e butʼ; arragon, ra meybil gaed nge madaʼ ko ngiyalʼ ni farengi manileng nib lumor e ke mʼay ngab yang.

43 Me yibi buch u napʼan nra sapsap gaed, mar guyed ni farengi manileng nib lumor e ke mʼay ngab yang ni daki upnguy raed, ma musap gaed, mar ruguyed nib liyeg raed, arragon ni yaed gubin, nib liyeg raed baelʼ i nifiy.

44 Ma Nephi nge Lehi e yow bay u lan e sabol roraed; arragon, nib liyeg raed e nifiy; arragon, ni gowa yaed bay u lulukungun e nifiy nibe dramrom, machane darur yikʼ gaed, ara yikʼ fayungi rungrung ko fare kalbus; ere ra suggaed ko falfalaenʼ ni dabiyog i weliy rogon ma kur suggaed ko rir.

45 Ere musap gaed, fare Kan ni Thothup rokʼ Got e yib nga butʼ u tharmiy, me yaen nga lan gumʼirchaʼraed, ma gowa ke sug lan ngorngor raed ko nifiy, mar weliyed e thin nib maʼangʼang.

46 Me yibi buch ni yib balam ngoraed, arragon, balam nib sumunguy, ni gowa be kathkath, nibe gaʼar:

47 Paer e gapas, paer e gapas romed, ni bachan e mich romed ngakʼ fachaʼ ni Fakag Ni rib Tʼuf rog, ni immoy u napʼan nni sunmiy e fayleng.

48 Ere chiney, e napʼan ni rrungʼaged e rennʼey mar puged oewchraed ngalang ni ngar guyed e gin be yib fare lam riy; ere musap gaed, ruguyed e tharmiy ni ke mab; me yib e angel nga butʼ u tharmiy ngar pigpig gaed ngoraed.

49 Ma gonpon dalip miriʼay e gidiiʼ ni ruguyed mar rungʼaged e pinnʼey; min piningraed ni nga ranoed iyaen ma dabki balyangaenʼraed, ara maerwaereanʼ raed.

50 Me yibi buch ni ranoed iyaen, mar pigpig gaed ngakʼ fapi gidiiʼ, ni yaed be wereg thin u gubin yang iyaen gubin e pinʼen ni kar rungʼaged ma kar guyed, ni arame tin yoʼor ko fapi Lamanites e michaenʼraed ngoraed, ni bachan e pi pow ni ke mʼug ngoraed.

51 Ma oren e piʼin ni michaenʼraed e ratayed e pi talin e mael roraed nga butʼ, nge ku aram rogon ko pi fananikan roraed nge fare yalen ko pi chitamangraed.

52 Me yibi buch ni nra piiʼed fapi binaw roraed ngakʼ fapi Nephites.