Mehn Kapehse

Pwuhk en Mormon iei ehu pwuhk sarawi me rasohng Paipel. Iei poadoapoad ehu me pid duwen sapwellimen Koht doadoahk kan ong mehn kawahko nan wehin Amerika oh audaudiki unsek en rongamwahu poatoapoato.

Pwuhk wet ntingdier sang rehn soukohp tohto ni duwen ngehn en kokohp oh kaudiahl. Mormon me wia soukohp oh soupoad men me ntingihdi oh oaralapiada arail mahsen kan pohn kohl pileit kan. Poadoapoad wet kasalehda duwen pwihn en aramas riau. Ehu kohdo sang nan Serusalem nan pahr 600 Mwohn Krais oh mwuri tohrohrpeseng wiahda wehi riau, me adaniki Mehn Nihpai oh Mehn Leimen. Ehu pwihno kohdo mwowehsang ni ahnsou me Kauno ketin kapingada lokaiah kan ni Doulik en Papilon. Pwihn wet kin adaniki Mehn Sared akan. Mwurin sounpar kid kei, koaros kamwomwala ihte me luhwehdi Mehn Leimen kan, oh irail iei kisehn kadaudoken mehn Indian kan nan Amerika.

Poadoapoad me keieu kesempwal nan Pwuhk en Mormon iei ahnsou me Kauno Sises Krais ketin pwarohng oh kalohkehng mehn Nihpai kan mwurinte E ketin iasadao. E ketin kasalehda padahk kan en rongamwahuo, duwen koasondi en komourla, oh mahsanihong aramas akan dahme irail pahn anahne wia pwe irail en alehdi popohl nan mour wet oh komour soutuk nan mour me pahn kohdo.

Mwurin Mormon eh kaimwseklahr eh nting kan, e ahpw kihongehr poadoapoado rehn nah pwutak Moronai, me kapatahiongehr ekei pein eh koasoi kan oh ekihla pileit kan ni Aul en Kumora. Nan Septempe 21, 1823, Moronaiohte, me wialahr aramas lingaling oh iasada, pwarohng Soukohp Sosep Smith oh kaweidiki duwen poadoapoad en kawao oh duwen e pahn kawehwehdiong ni mahsen en wai.

Pileit ko ahpw kohieng Sosep Smith, me kawehwehdier sang ni kisakis oh manaman en Koht. Poadoapoad wet ntingdahr nan lokaia tohto nin duwen eh wia kadehde kapw oh kapatapat me Sises Krais iei Sapwellimen Koht ieiaso oh me koaros me pahn kohdo Reh oh peikiong kosonned kan oh tiahk sarawi kan en Sapwellime rongamwahu pahn komourla.

Soukohp Sosep Smith koasoia duwen poadoapoad wet ni eh nda: “I ndaiong riei kan me Pwuhk en Mormon iei pwuhk me keieu pwung nan sampah, oh wia takai poahsoan en atail lamalam, oh aramas pahn karanihala Koht sang ni ar pahn momouriki padahk en kaweid kan me mih loale sang [padahk en] pwuhk teikan.”

Pwe en patehng Sosep Smith, Kauno ketin piladahr aramas ehk-emen en pein kilang kohl pileit ko oh wia sounkadehde kesempwal kei ong mehlel oh sarawi en Pwuhk en Mormon. Ntingdi en arail kadehdeh kan iang patehng met ni oaralape “Kadehde en meh Silimeno” oh “Kadehde en meh Welimeno.”

Se luke aramas koaros sang wasa koaros en wadek Pwuhk en Mormon, oh en doandoaropwe nan mohngiongarail kan rohng me mih loale, oh peki rehn Koht, Sahm Soutuk, ni mwaren Krais ma pwuhk wet mehlel. Irail me idawehn kaweid wet oh peki ni pwoson pahn alehda kadehdepen eh mehlel oh manaman sang ni manaman en Ngehn Sarawio. (tehk Moronai 10:3–5.)

Irail kan me pahn alehda kadehde sarawi wet sang Ngehn Sarawi pahn pil esehda sang ni manamanohte me Sises Krais iei Soukomour en sampah, me Sosep Smith iei Sapwellime sounkaudiahl oh soukohp ni imwin rahn akan, oh me Mwomwohdiso en Sises Krais en Souleng en Imwin rahn akan iei wehin Kauno me pwurehngehr wiawihda pohn sampah, kaukaunopohng Ketido Keriau en Mesaiao.