Pasiuna

Ang Basahon ni Mormon usa ka basahon sa balaang kasulatan sama sa Biblia. Usa kini ka talaan sa mga gibuhat sa Dios sa karaang mga lumulupyo sa Amerika ug naglangkob sa kahingpitan sa walay kataposang ebanghelyo.

Ang basahon gisulat sa daghan nga karaang mga propeta pinaagi sa espiritu sa pagpanagna ug pagpadayag. Ang ilang mga pulong, nga gisulat sa mga palid nga bulawan, gikutlo ug gipamubo pinaagi sa usa ka propeta nga tigsaysay nga ginganlan og Mormon. Ang talaan naghatag og usa ka asoy sa kaagi sa duha ka dagkong sibilisasyon. Ang usa miabot gikan sa Jerusalem niadtong 600 B.C. ug sa wala madugay nabahin sa duha ka nasod, nga nailhan isip mga Nephita ug mga Lamanita. Ang uban una kaayong miabot sa diha nga gilibog sa Ginoo ang mga pinulongan didto sa Tore sa Babel. Kini nga pundok nailhan nga mga Jaredita. Human sa liboan nga katuigan, ang tanan nalaglag gawas sa mga Lamanita, ug sila usa sa mga katigulangan sa mga American Indian.

Ang labing mahinungdanon nga hitabo nga natala sa Basahon ni Mormon mao ang kaugalingong pagpangalagad ni Ginoong Jesukristo taliwala sa mga Nephita human dayon sa Iyang pagkabanhaw. Nagpahimutang kini sa mga doktrina sa ebanghelyo, naglatid sa plano sa kaluwasan, ug nagpahibalo sa mga tawo unsa gayod ang kinahanglan nilang buhaton aron maangkon ang kalinaw niini nga kinabuhi ug mahangtoron nga kaluwasan sa kinabuhing moabot.

Human nakompleto ni Mormon ang iyang mga sinulat, gihatag niya ang asoy ngadto sa iyang anak nga si Moroni, kinsa midugang og pipila ka pulong nga iyang kaugalingon ug gitagoan ang mga palid sa Bungtod sa Cumorah. Niadtong Septyembre 21, 1823, ang mao nga Moroni, nga usa na ka nahimaya, ug nabanhaw nga binuhat, mipakita kang Propeta Joseph Smith ug mitudlo kaniya mahitungod sa karaan nga talaan ug sa gitakda nga paghubad niini ngadto sa pinulongan nga Iningles.

Sa takda nga panahon ang mga palid gitugyan ngadto kang Joseph Smith, kinsa mihubad niini pinaagi sa gasa ug gahom sa Dios. Ang talaan karon namantala na sa daghang pinulongan isip bag-o ug dugang nga saksi nga si Jesukristo mao ang Anak sa buhing Dios ug nga ang tanang moduol Kaniya ug mosunod sa mga balaod ug sa mga ordinansa sa Iyang ebanghelyo maluwas.

Kabahin niini nga talaan si Propeta Joseph Smith miingon: “Ako mipahibalo sa kaigsuonang mga lalaki nga ang Basahon ni Mormon mao ang labing tukma sa bisan unsa nga basahon dinhi sa yuta, ug mao ang sukaranan sa atong tinuohan, ug ang tawo mas maduol sa Dios pinaagi sa pagsunod sa iyang mga lagda, kay sa bisan unsa nga basahon.”

Agi og dugang ni Joseph Smith, ang Ginoo miandam og laing napulog usa ka tawo nga makatan-aw mismo sa bulawang mga palid ug mahimo nga talagsaong mga saksi sa kamatuoran ug sa kabalaan sa Basahon ni Mormon. Ang ilang sinulat nga mga pagpamatuod nalakip dinhi isip “Ang Pagpamatuod sa Tulo ka Saksi” ug “Ang Pagpamatuod sa Walo ka Saksi.”

Nagdapit kami sa tanang katawhan sa tanang dapit sa pagbasa sa Basahon ni Mormon, sa pagpamalandong diha sa ilang mga kasingkasing sa mensahe nga anaa niini, ug dayon sa pagpangutana sa Dios, ang Amahan sa Kahangtoran, sa ngalan ni Kristo kon ang basahon tinuod ba. Kadtong mosunod niini nga pamaagi ug mangutana inubanan sa pagtuo makaangkon og pagpamatuod sa kamatuoran ug kabalaan niini pinaagi sa gahom sa Espiritu Santo. (Tan-awa sa Moroni 10:3–5.)

Kadtong makabaton niining balaanon nga pagsaksi gikan sa Balaang Espiritu mahibalo usab pinaagi sa sama nga gahom nga si Jesukristo mao ang Manluluwas sa kalibotan, nga si Joseph Smith mao ang Iyang tigpadayag ug propeta niining kataposang mga adlaw, ug Ang Simbahan ni Jesukristo sa mga Santos sa Ulahing mga Adlaw mao ang gingharian sa Ginoo nga sa makausa pa gitukod pag-usab dinhi sa yuta, sa pagpangandam sa Ikaduhang Pag-anhi sa Mesiyas.