1 Te mau parau tā Iakoba, te taea’e o Nephi, i parau atu i te mau ta’ata o Nephi, i muri a’e i te pohera’a o Nephi :

2 I teienei, e tō’u mau taea’e here, ’o vau nei o Iakoba, mai te au i te hōpoi’a tā te Atua i tu’u mai iā’u nei, nō te fa’a’ohipa māite i tō’u nei tōro’a ma te pāpū, ’e ’ia tāmā vau i tō’u nei mau ’ahu i tā ’outou mau hara, i haere mai ai au i roto i te hiero i teie nei mahana ’ia ti’a iā’u ’ia fa’a’ite atu ia ’outou i te parau a te Atua.

3 ’E ’ua ’ite ho’i ’outou iho ē, ’ua itoito vau i te rave i te ’ohipa nō tō’u nei tōro’a ; ’āre’a rā i teie nei mahana ’ua rahi atu te teiaha o tō’u hina’aro ’e tō’u mana’o tapitapi nō te maita’i o tō ’outou vārua, i tō te mau mahana i ma’iri a’enei.

4 Inaha ho’i, ’ua ha’apa’o ’outou i te mau parau a te Fatu tā’u i tu’u atu ia ’outou na ē tae roa mai i teienei.

5 Inaha rā, ’a fa’aro’o mai na ’outou iā’u nei, ’e ’ia ’ite ho’i ’outou ē, nā roto i tāna tauturura’a, ’oia ’o tei ’ī i te mau mana ato’a ’e Tei Hamani i te ra’i ’e te fenua nei, e ti’a ai iā’u ’ia fa’a’ite atu ia ’outou i tō ’outou iho mau mana’o, ’e nō te aha ho’i ’outou i ha’amata ai i te rave i te hara ; e hara vi’ivi’i roa ho’i te reira iā’u nei, ’oia ïa, e mea vi’ivi’i ato’a ho’i i te Atua.

6 ’Oia ïa, ’ua ’oto roa tō’u nei vārua i te reira ’e ’ua rurutaina ho’i au i mua i te aro o Tei Hamani iā’u ma te ha’amā, i te mea e mea ti’a iā’u ’ia fa’a’ite atu ia ’outou i te mau ’ohipa ’ī’ino i roto i tō ’outou ’ā’au.

7 ’E ’ua ’oto roa ato’a vau i te mea ē, ’ua tītauhia iā’u ’ia parau ’ū’ana atu ia ’outou i mua i tā ’outou mau vahine ’e tā ’outou ho’i mau tamari’i, e mea marū roa ho’i te ’ā’au o te tahi pae o rātou, ’e te vi’ivi’i ’ore ho’i i mua i te Atua, ’e ’ua māuruuru ho’i te Atua i te reira ;

8 E tē mana’o nei au ē, i haere mai rātou i ni’a nei nō te fa’aro’o i te parau au a te Atua, ’oia ïa, te parau ’o tē fa’aora i te vārua mamae ra.

9 Nō reira, ’ua ’oto roa tō’u ’ā’au i te mea ’ua tītauhia vau, nā roto i te fa’auera’a ’eta’eta i roa’a mai iā’u nō ’ō mai i te Atua ra, i te a’o atu ia ’outou mai te au i tā ’outou mau hara, ’ia fa’arahi i te mamae ’o tei mamae ra, ’eiaha rā nō te tāmāhanahana ’e nō te fa’aora i tō rātou ra mau puta ; ’e ’o tei ’ore i mamae ra, e ’ore ïa rātou e rave i te fa’a’amu’a i te parau au a te Atua ; e pātiahia rā tō rātou vārua, ’e e puta ho’i tō rātou ’ā’au marū i te tipi rahi ra.

10 ’Āre’a rā, rahi noa atu ā te ’ohipa, e mea ti’a roa iā’u ’ia rave mai te au i te mau fa’auera’a tu’utu’u ’ore a te Atua, ’e ’ia fa’a’ite atu ho’i ia ’outou i tā ’outou mau ’ohipa ’ī’ino ’e te mau ’ohipa vi’ivi’i, i mua i te mau ta’ata ’ā’au mā, ’e te ’ā’au ’oto, ’e i raro a’e ho’i i te hi’ora’a o te mata ha’avā o te Atua Manahope ra.

11 Nō reira, e mea ti’a roa iā’u ’ia parau atu ia ’outou i te parau mau, mai te au i te parau pāpū a te Atua ra. Inaha ho’i, te pure noa ra vau i te Fatu, ’e ’ua tae mai ra te parau iā’u, i te nā-’ō-ra’a mai ē : E Iakoba, ananahi e haere mai ’oe i roto i te hiero, ’e ’a fa’a’ite atu ai i te parau tā’u e hōro’a atu ia ’oe i teie nei mau ta’ata.

12 ’E i teienei, inaha, e tō’u mau taea’e, teie ïa te parau tā’u e fa’a’ite atu ia ’outou na, ’ua ha’amata te tahi pae o ’outou i te ’imi i te ’auro, ’e te ’ārio, ’e te mau huru ’ōfa’i metalo faufa’a roa, ’e ’ua ’ī ho’i teie nei fenua i te reira huru tao’a, ’o te fenua ho’i teie i fafauhia nō ’outou e nō tō ’outou ra hua’ai.

13 ’E ’ua ha’amaita’i mai te rima o te Atua ia ’outou ma te māuruuru rahi, i roa’a ai ia ’outou te mau tao’a e rave rahi ; ’e nō te mea ’ua rahi tā ’outou i tā tō ’outou mau taea’e, ’ua fa’ateiteihia ’outou i te te’ote’o o tō ’outou ’ā’au, ’e nō te moni rahi o tō ’outou mau ’ahu, i ’eta’eta ai tō ’outou ’ā’au e i teitei ai ho’i tō ’outou upo’o, ’e ’ua hāmani ’ino ’outou i tō ’outou mau taea’e, nō te mea ’ua mana’o ’outou ē, ’ua hau tō ’outou maita’i i tō rātou.

14 ’E i teienei, e tō’u mau taea’e, tē mana’o ra ānei ’outou ē, ’ua ti’ahia ’outou i te Atua i taua mea ra ? Inaha, tē parau atu nei au ia ’outou na, ’Aita roa. ’Ua fa’ahapa rā ’oia ia ’outou, ’e mai te mea e onoono ā ’outou i taua mau mea ra, e tae vave mai ïa tāna mau ha’avāra’a i ni’a iho ia ’outou.

15 ’Āhiri ’oia e fa’a’ite mai ia ’outou ē, e ti’a iāna ’ia hi’o i roto ia ’outou ’e ’ia ’ite i tā ’outou mau ’ohipa ’ī’ino, ’e e ti’a ho’i iāna ’ia tā’iri mai ia ’outou i raro i te repo, i te hi’ora’a hō’ē o tōna ra mata !

16 ’Āhiri ’oia e fa’aora ia ’outou i teie nei mau ’ohipa ’ī’ino ’e i teie nei ’ohipa vi’ivi’i. ’E ’āhiri ’outou e fa’aro’o i te parau nō tāna ra mau fa’auera’a, ’e ’eiaha e fa’ati’a i teie nei te’ote’o o tō ’outou ’ā’au ’ia ha’amou i tō ’outou mau vārua !

17 ’A feruri i tō ’outou mau taea’e mai tā ’outou e feruri ia ’outou iho na, ’e ’a aroha atu i te mau ta’ata ato’a ’e ’a hōro’a noa atu ho’i i tā ’outou tao’a, ’ia riro ato’a rātou ’ei feiā tao’a mai ia ’outou te huru.

18 ’E nā mua ’outou e ’imi ai i te tao’a, ’a mata na ’outou i te ’imi i te bāsileia o te Atua.

19 ’E ’ia roa’a ia ’outou te ti’aturira’a i te Mesia ra, e roa’a ato’a ïa ia ’outou te tao’a rahi, mai te mea e ’imi ’outou i te reira ; ’e ’ia ’imi ho’i ’outou i te reira nō te hina’aro ’ia fa’atupu i te maita’i—’oia ho’i, nō te fa’a’ahu i te feiā taha’a noa, ’e nō te fa’a’amu i te feiā po’ia, ’e nō te fa’ati’amā i te feiā tītī, ’e nō te hōro’a i te tauturura’a i te feiā ma’i ’e te feiā ’ati.

20 ’E i teienei, e tō’u mau taea’e, ’ua paraparau atu vau ia ’outou nō ni’a i te te’ote’o ; ’e ’o ’outou ’o tei hāmani ’ino i tō ’outou ta’ata tupu, ’e tei hāmani ’ino iāna nō te te’ote’o o tō ’outou ’ā’au i te mau mea tā te Atua i hōro’a mai nā ’outou, e aha ïa tā ’outou parau i te reira ?

21 ’Aita ānei ’outou e mana’o nei ē, e mea vi’ivi’i te reira mau mea i mua iāna ’o Tei Hamani i te ta’ata ato’a ra ? Hō’ē ā faufa’a rahi tō te tahi ta’ata ’e te tahi i mua i tōna ra mata. Nō te repo ho’i te mau ta’ata ato’a ; hō’ē noa iho ho’i tumu ’oia i hāmani ai ia rātou ato’a, ’oia ho’i, ’ia ha’apa’o rātou i tāna mau fa’auera’a ’e ’ia fa’ahanahana iāna ē a muri noa atu.

22 ’E i teienei, e fa’aoti au i te parau atu ia ’outou na nō ni’a i teie nei te’ote’o. ’E ’āhiri ’aita, e mea ti’a ïa iā’u ’ia paraparau atu i te tahi hara rahi a’e ia ’outou na, ’ua ’oa’oa rahi ïa tō’u ’ā’au ia ’outou.

23 Nō tā ’outou rā mau hara rahi roa i riro ai te parau a te Atua ’ei hōpoi’a rahi nā’u. Inaha ho’i, tē nā ’ō mai ra te Fatu : ’Ua ha’amata teie nei feiā i te rave i te mau ’ohipa ’ī’ino ; ’aita ho’i rātou i māramarama i te mau pāpa’ira’a mo’a ; ’e ’ua tītau rātou i te fa’ati’a ia rātou iho ’ia rave i te mau ’ohipa tai’ata, nō te mau mea i pāpa’ihia nō ni’a ia Davida ’e tāna ra tamaiti ia Solomona.

24 Inaha, e rave rahi tā Davida ’e tā Solomona mau vahine ’e te mau vahine tāvini ho’i, ’e e mea vi’ivi’i ho’i te reira i mua iā’u, tē nā reira mai ra te Fatu.

25 Nō reira, tē nā ’ō mai ra te Fatu : ’Ua arata’i mai au i teie nei feiā i rāpae i te fenua nō Ierusalema, nā roto i te mana o tō’u nei rima, ’ia ti’a iā’u ’ia fa’atupu i te tahi ’āma’a parauti’a iā’u nei nō te hua’ai o tē ōpū o Iosepha ra.

26 Nō reira, ’aita roa vau, ’o te Fatu te Atua, e fa’ati’a ’ia rave teie nei feiā i te mau mea i ravehia e te feiā i tahito ra.

27 Nō reira, e tō’u mau taea’e, ’a fa’aro’o mai iā’u, ’e ’a ha’apa’o na ho’i i te parau a te Fatu : ’Eiaha roa ho’i te hō’ē ta’ata i rotopū ia ’outou na e rave maori rā hō’ē noa iho vahine ; ’e te mau vahine tāvini ra ’eiaha roa ïa ’outou e rave i te hō’ē a’e.

28 ’Ua ’oa’oa ho’i au, ’o te Fatu te Atua, i te vahine vi’ivi’i ’ore ra. ’E e mea vi’ivi’i te tai’ata i mua iā’u nei ; tē nā reira mai ra te Fatu Sabaota.

29 Nō reira, ’ia ha’apa’o teie feiā i tā’u mau fa’auera’a e ti’a ai, tē nā reira mai ra te Fatu Sabaota ra, ’e ’ia ’ore rātou e nā reira e ’anatemahia te fenua nō rātou.

30 ’E ’ia hina’aro vau i te fa’atupu i te hua’ai nō’u ra, e fa’aue atu ïa vau i tō’u ra mau ta’ata ; ’ia ’ore rā vau ’ia nā reira, e ha’apa’o ïa rātou i teie mau mea nei, tē nā reira mai ra te Fatu Sabaota ra.

31 Inaha ho’i, ’ua ’ite a’enei au, ’o te Fatu, i te mamae, ’e ’ua fa’aro’o a’enei ho’i au i te ’oto o te mau tamāhine a tō’u nei mau ta’ata i te fenua ra nō Ierusalema ; ’oia ïa, i te mau fenua ato’a o tō’u ra mau ta’ata, nō te mau ’ohipa ’ī’ino ’e te mau ’ohipa vi’ivi’i a tā rātou ra mau tāne.

32 ’E tē nā ’ō mai ra te Fatu Sabaota, ’aita roa vau e fa’ati’a ’ia tae noa mai ā te ’oto o te mau tamāhine nehenehe a teie nei mau ta’ata, ’o tā’u i arata’i mai i rāpae i te fenua nō Ierusalema iā’u nei, nō te mau tāne o tō’u nei mau ta’ata, tē nā reira mai ra te Fatu Sabaota.

33 ’E e’ita roa ho’i rātou e arata’i ’ē atu i te mau tamāhine a tō’u nei mau ta’ata i te tītīra’a ra nō tō rātou ’ā’au marū, maori rā e fa’autu’a atu vau ia rātou i te tahi ’anatemara’a rahi ē tae noa atu i tō rātou ha’amoura’a ; e ’ore ho’i rātou e tai’ata mai tā te feiā i tahito ra, tē nā reira mai ra te Fatu Sabaota.

34 ’E i teienei, inaha, e tō’u mau taea’e, ’ua ’ite ’outou ē, ’ua hōro’ahia mai teie nei mau fa’auera’a i tō tātou ra metua tāne ia Lehi ; nō reira, ’ua ’ite ’ē na ’outou i te reira i te mātāmua, ’e ’ua fa’ahapa-rahi-hia ’outou ; i te mea ē, ’ua rave ’outou i teie mau mea ’o tā ’outou i ’ite ’eiaha e rave.

35 Inaha, ’ua rahi atu tā ’outou mau ’ohipa ’ī’ino i tā tō tātou ra mau taea’e, i tā te mau ’āti Lamana. ’Ua ha’amāuiui ’outou i te ’ā’au ’o tā ’outou mau vahine marū, ’e nō tō ’outou hi’ora’a ’ino i mua ia rātou i ’ore ai tā ’outou mau tamari’i i ti’aturi ia ’outou ra ; ’ua tae roa atu ho’i te ta’i o tō rātou ’ā’au i ni’a i te Atua nō ni’a ia ’outou. ’E nō te pāpū maita’i o te parau a te Atua i tae mai i raro nei ia ’outou ra, i ’oto rahi ai te mau ta’ata e rave rahi, mai te mea ra ē, i pātiahia na rātou i te mau puta hōhonu ra.