1 Inaha rā, ’ua hina’aro vau, ’o Iakoba, ’ia parau atu ia ’outou ’o tei mā te ’ā’au. Hi’o atu i te Atua ma te mana’o pāpū, ’e ’a pure atu iāna ma te fa’aro’o rahi, ’e nāna e tāmāhanahana mai ia ’outou i roto i tō ’outou mau ’ati, ’e nāna ho’i e tauturu mai ia ’outou, ’e e fa’atae mai i te fa’autu’ara’a i ni’a ia rātou ’o tē tītau ’ia ha’amou ia ’outou.

2 E ’outou ato’a tei mā te ’ā’au, ’a fa’ateitei mai i tō ’outou upo’o i ni’a ’e ’a fāri’i mai i te parau ’oa’oa a te Atua, ’e ’a rave i te fa’a’amu’a i tōna ra aroha ; ’ua ti’a ho’i ïa ia ’outou, ’ia mau pāpū tō ’outou ’ā’au, ē a muri noa atu.

3 ’’Ē, ’auē ho’i ē, ’auē ho’i ē, ’outou ’aore i mā te ’ā’au, ’o tei vi’ivi’i i teie nei ā mahana i mua i te aro o te Atua ; ’ia ’ore ’outou e tātarahapa e ’anatemahia te fenua nei nō ’outou na ; e nā te mau ’āti Lamana, ’o tei ’ore i vi’ivi’i mai ia ’outou na, ’āre’a rā ’ua ’anatemahia rātou i te ’anatemara’a rahi, e tā’iri ia ’outou ē tae noa atu i te ha’amoura’a.

4 ’E e tae vave mai te tau, ’ia ’ore ’outou e tātarahapa, e riro ïa tō ’outou fenua ’āi’a ia rātou ra ; ’e nā te Fatu te Atua e arata’i ’ē atu i te feiā parauti’a mai rotopū atu ia ’outou na.

5 Inaha, ’ua riro tō ’outou mau taea’e te mau ’āti Lamana ’ei mea parauti’a a’e ia ’outou, ’e ’o rātou ho’i tā ’outou i au ’ore nō tā rātou ’ohipa vi’ivi’i ’e te ’anatemara’a i tae mai i ni’a i tō rātou ra mau ’iri ; ’e ’aita ho’i i mo’e ia rātou te fa’auera’a a te Fatu, ’o tei hōro’ahia mai i tō tātou ra hui tupuna—’o tei nā ’ō mai ē, ’ia rave rātou hō’ē noa iho vahine, ’e te mau vahine tāvini ra, ’eiaha roa ïa ’ia ravehia, ’e ’eiaha ato’a ho’i te mau ’ohipa tai’ata ’ia ravehia i rotopū ia rātou ra.

6 ’E i teienei, tē ha’apa’o nei ā rātou i taua fa’auera’a ra ; nō reira, nō tō rātou fa’aro’o ’e te ha’apa’o maita’i i teie nei fa’auera’a, ’aita roa te Fatu te Atua e ha’amou ia rātou, e aroha mai rā ’oia ia rātou ; ’e tē vai ra te tau e riro mai rātou ’ei feiā ha’amaita’ihia.

7 Inaha, ’ua here te mau tāne i tā rātou mau vahine, ’e ’ua here te mau vahine i tā rātou mau tāne ; ’e ’ua here tā rātou mau tāne ’e tā rātou mau vahine i tā rātou mau tamari’i ; ’e nō te mau ’ohipa ’ī’ino ho’i a tō rātou ra mau metua, i tupu ai tō rātou ti’aturi ’ore ’e te ’ino’ino ia ’outou ; nō reira, e aha atu ho’i tō ’outou maita’i i tō rātou i mua i te aro o Tei Hamani ia ’outou ?

8 E tō’u mau taea’e ē, tē mata’u ra vau, ’ia ’ore ’outou ’ia tātarahapa i tā ’outou mau hara, e hau atu te ’uo’uo o tō rātou ’iri i tō ’outou, ’ia fa’ati’ahia ’outou e rātou ato’a i mua i te terōno o te Atua ra.

9 Nō reira, e hōro’a atu vau i te hō’ē fa’auera’a ia ’outou na, ’o te parau ïa a te Atua, ’e ’eiaha roa ’outou e fa’a’ino fa’ahou ia rātou nō te huru ’ere’ere o tō rātou iri ; ’e ’eiaha ho’i ’outou e fa’a’ino fa’ahou ia rātou nō tā rātou ra mau ’ohipa vi’ivi’i ; ’ia ha’amana’o rā ’outou i tā ’outou iho mau ’ohipa vi’ivi’i, ’e ’ia ha’amana’o ho’i ē, nō tō rātou mau metua i tae mai ai tō rātou huru vi’ivi’i.

10 Nō reira, ’ia ha’amana’o ’outou i tā ’outou mau tamari’i, ’e te ’oto rahi tā ’outou i fa’atupu i roto i tō rātou ’ā’au nō te hi’ora’a ha’apa’o ’ore tā ’outou i rave i mua ia rātou ; ’e ’oia ato’a, ’ia ha’amana’o ’outou ē, nā tā ’outou mau ’ohipa vi’ivi’i e ha’amou i tā ’outou mau tamari’i, ’e e ha’apu’ehia ïa tā rātou ra mau hara i ni’a i tō ’outou upo’o i te mahana hope’a ra.

11 E tō’u mau taea’e ē, ’a fa’aro’o mai na i tā’u nei mau parau ; ’a fa’aaraara i te mau mana’o o tō ’outou na vārua ; ’a fa’a’āueue ia ’outou iho, ’e ’ia ara mai ’outou i te ta’oto o te pohe ra ; ’a tātara ia ’outou iho i te mau ’ati o hade ra, ’ia ’ore ’outou ’ia riro ’ei mau melahi nā te diabolo ra, ’a hurihia ai i raro i taua roto auahi ra ’e te gopheri, ’oia ho’i te pohe piti ra.

12 ’E i teienei, ’ua parau vau, ’o Iakoba, e rave rahi atu ā mau mea i te mau ta’ata o Nephi ra, ma te fa’aara atu ia rātou i te ’ino nō te poreneia, ’e te ti’a’ā, ’e te mau huru hara ato’a ra, ma te fa’a’ite atu ho’i ia rātou i te mau utu’a ’ino rahi nō te reira.

13 ’Aita e ti’a ’ia pāpa’ihia i ni’a iho i teie nei mau ’api te hānere o te tufa’a o te mau parau a teie nei mau ta’ata, ’o tē tupu noa ra i te rahi ; i ni’a rā i te mau ’api rarahi ra ’ua pāpa’ihia te mau mea e rave rahi i ravehia e rātou ra, tā rātou mau tama’i, e tā rātou mau mārōra’a, ’e te hau o tō rātou ra mau ari’i.

14 ’Ua parauhia teie nei mau ’api, te mau ’api a Iakoba, ’e ’ua hāmanihia te reira e te rima o Nephi ra. ’E tē fa’aoti nei au i teie nei mau parau.