1 Taraia ngkai, e na koro bukina bwa Ngai ae Iakobwa, I a tia ni beku mwaaka ni kabwarabwara nakoia au botanaomata, (ao I aki kona ni koroi ni kabane kanoan au taeka, ibukin kaangaangan korean ara taeka iaon taian bwaatua) ao ti ataia bwa taeka ni kabane ake ti koroi iaon taian bwaatua a na teimatoa.

2 Ma a na bua ni kabane bwaai ake ti aki koroi i aon taian bwaatua ma ni mauna nako; ma ti kona ni koroi taeka tabeua i aon taian bwaatua, are a na kona iai natira ma tarira aika a tangiraki ni karekea mai iai ataan taekara teutana, ke taekaia aia bakatibu—

3 Ao ti kimwareirei ni karaoan te bwai aio; te botumwaaka ni beku ni koroi taeka iaon taian bwaatua, ma te kaantaninga bwa a na butimwaei tarira aika a tangiraki ma natia ma te kaitau inanoia, ao a na reiakin n te kimwareirei n tiaki te rawawata, ke n te aki rau n nano, n ongo taekaia aia moan kaaro.

4 Bwa bon aio bukin korean bwaai aikai, bwa a na ataia ae ti ataa taekan Kristo, ao ti kariaria rokon mimitongina i nanon bubua n ririki i mwaain rokona; ao tiaki ti ngaira aika ti kariaria rokon mimitongina, ma burabeti aika a tabu ni kabane ake a maiu imwaira.

5 Taraia, a kakoaua Kristo ao a neboa te Tama n arana, ao ti neboa naba te Tama n arana. Ao ibukin aio are ti kaawakina iai ana tua Mote, bwa e buoki tamneira ma rabwatara ni kairia nakoina; ao e a tia n tabuaki ibukin karaoan ae raoiroi iroura ibukin te waki aio, n aron are a tia n taekinaki nakon Aberaam i nanon te rereua bwa e na ongeaba nakon ana tuatua te Atua ao e na anga natina ae Itaaka, are ti te arona ma te Atua ngke e anga Natina are Te Rikitemanna.

6 Mangaia ae ti ukoukori kanoan aia taeka burabeti, ao a mwaiti kaotioti ma tamnein taeka ni burabeti; ao n nooran kakoaua aikai ao e a reke iroura te kaantaninga, ao a aki kai kamwaeaki ara onimaki, ao ti a kona n tuatua n aran Iesu ao a na iri ara taeka taian aroka, ke taian maunga, ke naon marawa.

7 E ngae n anne ao e a kaoti mamaarara nakoira te Uea ae te Atua bwa ti aonga n ataia bwa bon man ana akoi, ao man ruona nakoia kaain te aonaba are a reke iai iroura te mwaaka ni karaoi bwaai aikai.

8 Taraia, a korakora ma ni kamimi ana mwakuri te Uea. E kaangaanga reken te atatai ibukin aan ana mwakuri aika a raba; ao e aki kona te aomata n atai aron ana mwakuri nako. Ao akea te aomata ae kona n atai kanoan ana mwakuri ma ti ngkana a kaotaki nakoina; ngaia are, taari, tai tannako man taian kaotioti aika mai iroun te Atua.

9 Bwa taraia, e riki te aomata nako aon te aonaba ni mwaakan ana taeka, ae te aonaba are karikaki ni mwaakan ana taeka. Mangaia ae ngkana e kona te Atua ni karika te aonaba man ana taeka, ao n riki te aomata n ana taeka, bukin teraa ngkai e na aki kona n tautaekana te aonaba, ke bwaai ake e a tia ni kariki ni baina ake a mena iaona, n aron nanona ma kukureina?

10 Mangaia ae tariu, kam na tai kaeta te Uea, ma kam na ongeaba n taian reirei mai irouna. Bwa taraia, kam ataia ae e reirei ma te wanawana, ma te tuaraoi, ma te nanoanga ae korakora, n ana taeka ni kabane.

11 Mangaia ae tariu aika kam tangiraki, kam na raoiakinaki nakoina rinanon te mwakuri ni kamaiu iroun Kristo, ae Natina ae Te Rikitemanna, bwa kam aonga ni karekea te mangauti, n aron mwaakan te mangauti mai iroun Kristo, ao kam na riki bwa ana moan uaa Kristo nakon te Atua, n tia ni karekea te onimaki ma te kaantaninga ae tamaroa man te mimitong are irouna i mwain rokona nakon te aonaba n rabwata.

12 Ao ngkai ngkami aika kam tangiraki, kam na tai miimi ngkai I tuangkami bwaai aikai; bwa e aera ngkai ti na aki taekina ana mwakuri ni kamaiu Kristo, ao ni karekea kororaoin taekana, ao ni karekea naba taekan te mangauti ma te aonaba n taai aika a na roko?

13 Taraia, tariu, ane e na taetae ni burabeti, ke e taetae ni burabeti bwa aonga n oota iai aomata ni kabane; bwa e taekina te koaua te Tamnei ao e aki kewe. Mangaia ae ke taekin bwaai ngkai, ma aika a na roko; mangaia ae a kamatataaki bwaai aikai nakoira, ibukin kamaiuan tamneira. Ma taraia, tiaki ti ngaira taan kakoauai bwaai aikai; bwa e a tia naba te Atua n taetae nakoia burabeti ni kawai.

14 Bwa taraia, Iutaia bon aomata aika a bonotaninga; ao a aki kakoauai taeka aika mataata, ao a tiringiia burabeti, ao a ukoukori bwaai aika a aki atai nanoia. Mangaia ae ibukin matakia, ae te mataki ae reke man taraan bwaai aika akea manenaia, ao a na riai ni bwaka; bwa e a tia n anaa ana oota te Atua mai irouia, ao e a anganiia bwaai aika a mwaiti aika a aki kona n oota iai, ngkai a tangiri, ao e karaoia te Atua ngkai a tangiria, bwa aonga ni bwaka.

15 Ao ngkai, Ngai ae Iakobwa, I a kairaki iroun te Tamnei bwa N na taetae ni burabeti; bwa I kona n noori n aron ana kairi te Tamnei are mena inanou, bwa ni bwakaia Iutaia ao e na aki butimwaea te atibu are a kona ni katei aia kateitei aika a matoatoa.

16 Ma taraia, n aron are taekinaki i nanon koroboki aika tabu, e na riki ni korakora te atibu aio, ao te kabanea, ao aan te kateitei ni koaua, are a na kateitei iaona Iutaia.

17 Ao ngkai, ngkami aika tangiraki e na kanga ni kona ni kateitei i aona ma ni karikiia bwa maninginingin aia kateitei i mwin aki butimwaean an te kateitei ni koaua?

18 Taraia tariu aika kam tangiraki, N na kabwaranakoa te bwai ae kamimi aio nakoimi; ngkana I aki ioioaki man matoatoau n te tamnei ma ni bwaka ibukin korakoran rawawatau ibukimi.