1 Asin ngonian ta uminagi an panahon na sa ika-tulong gatos asin anom na pulo may tulong taon an manga Nephite nagpaduman na kaibahan an saindang manga hukbo tanganing makiralaban sa manga Lamanite, hali sa daga kan Desolation.

2 Asin ta uminagi an panahon na an manga hukbo kan manga Nephite inaralaw pabalik giraray duman sa daga kan Desolation. Asin mantang sinda pagal pa, sarong bagong hukbo kan manga Lamanite an uminabot sa sainda; asin nagkaigwa sinda nin makuring ralaban, sagkod na nasakop kan manga Lamanite an siudad kan Desolation, asin dakol na manga Nephite an ginaradan, asin dakol na manga bihag an dinarara.

3 Asin an manga natada nagdurulag asin uminiriba sa manga nag-eerok sa siudad kan Teancum. Ngonian an siudad kan Teancum nasa gilid sa may baybayon; asin idto harani man sa siudad kan Desolation.

4 Asin idto huli ta an manga hukbo kan manga Nephite nagduman sa manga Lamanite kaya sinda nagpoon nang madaog; ta kun bako kaidto, an manga Lamanite dai kutana magkakaigwa nin kapangyarihan sa sainda.

5 Alagad, totoo, na an manga paghukom kan Dios madadaog an masusumbikal; asin huli sa masusumbikal kaya an masumbikal napapadusahan; huli ta an manga masusumbikal an nagbubukag kan manga puso kan manga aki nin tawo sa pagpabulos nin dugo.

6 Asin ta uminagi an panahon na an manga Lamanite nagharanda na sa pagsalakay kan siudad kan Teancum.

7 Asin ta uminagi an panahon na sa ika-tulong gatos asin anom na pulo may apat na taon an manga Lamanite sinalakay an siudad kan Teancum, tanganing saindang masakop man an siudad kan Teancum.

8 Asin ta uminagi an panahon na sinda suminibog asin inalaw pabalik kan manga Nephite. Asin kan mahiling kan manga Nephite na suminibog na an manga Lamanite sinda sa giraray nagpaabaw-abaw kan saindang sadiring kusog; asin sinda naglakaw sa sadiri nindang kusog, asin sinadiri ninda giraray an siudad kan Desolation.

9 Asin ngonian an gabos na manga bagay na ini nangyari na, asin igwang ribo-ribong ginadan sa lambang lado, sa manga Nephite asin siring man sa manga Lamanite.

10 Asin ta uminagi an panahon na an ika-tulong gatos asin anom na pulo may anom na taon an nakalipas na, asin ta nagpasiring giraray an manga Lamanite sa manga Nephite tanganing magralaban; alagad an manga Nephite dai nagsosorolsol kan manga karaotan na saindang naginibo, kundi maigot na nagdanay sa saindang kasumbikalan.

11 Asin ta dai nanggad mailadawan kan dila, ni an tawo makasurat nin sarong tamang ladawan kan makangingiring paghilingon na dugo asin manga garadanan na nasa katiripunan nin manga tawo, kan manga Nephite asin kan manga Lamanite; asin lambang puso pinatagas, kaya ikinawili ninda an danay na pagpabulos nin dugo.

12 Asin ta dai pa sagkod nuarin nagkaigwa nin siring kadakula na kasumbikalan sa gabos na manga aki ni Lehi ni sa gabos na harong kan Israel, sunod sa manga tataramon kan Kagurangnan, na siring sa katiripunan kan manga tawong ini.

13 Asin ta uminagi an panahon na an manga Lamanite sinakop an siudad kan Desolation, asin ini huli ta orog kadakol an bilang ninda ki sa bilang kan manga Nephite.

14 Asin ta sinda man suminalakay laban sa siudad kan Teancum, asin ta inalaw paluwas an manga nag-eerok saiya, asin ta kadakol an dinarang manga bihag maging babae asin manga aki, asin ta sinda inatang bilang manga dulot sa saindang manga dios-diosan.

15 Asin ta uminagi an panahon na sa ika-tulong gatos asin anom na pulo may pitong taon, an manga Nephite naanggot huli ta an manga Lamanite inatang an saindang manga babae asin saindang manga aki, kaya sinda suminalakay laban sa manga Lamanite na labi-labi kadakula an kaanggotan, sagkod na dinaog ninda giraray an manga Lamanite, asin inaralaw ninda paluwas sa saindang manga daga.

16 Asin an manga Lamanite dai nagsalakay giraray sa manga Nephite sagkod sa ika-tulong gatos asin pitong pulo may limang taon.

17 Asin sa taon na ini sinalakay ninda an manga Nephite sa bilog nindang kapangyarihan asin dai sinda mabilang huli sa kadakulaan kan saindang bilang.

18 Asin magpoon kan panahon na ini dai na nagkaigwa nin kapangyarihan an manga Nephite sa manga Lamanite, kundi nagpoon na mapahali sinda siring sa hamog sa atubangan kan aldaw.

19 Asin ta uminagi an panahon na an manga Lamanite suminaralakay laban sa siudad kan Desolation; asin ta nagkaigwa nin sarong makuring ralaban sa daga kan Desolation, na kun sain dinaog ninda an manga Nephite.

20 Asin ta nagdurulag giraray sinda paharali sa atubangan ninda, asin ta nagduruman sinda sa siudad kan Boaz; asin duman nanindogan sinda laban sa manga Lamanite na igwa nin labi-labing pagkaisog, kaya dai sinda nadaog kan manga Lamanite sagkod na sinda suminaralakay giraray sa ika-duwang ulit.

21 Asin sa ika-duwa nindang pagduman, an manga Nephite inaralaw asin ginaradan nin sarong labi-labi kadakulang panggagadan; an saindang manga babae asin an saindang manga aki inatang sa manga dios-diosan.

22 Asin ta uminagi an panahon na an manga Nephite nagdurulag giraray paharayo sa saindang atubangan, iniriba ninda an gabos na nag-eerok duman magi sa manga banwaan asin manga barrio.

23 Asin ako, si Mormon, huli ta nahihiling na madali nang maagaw kan manga Lamanite an daga, kaya ako nagduman sa bulod kan Shim, asin ta kinua an gabos na kasuratan na itinago ni Ammaron sa Kagurangnan.