1 Totoo na ako, si Moroni, tinatapos na an kasuratan kan sakuyang ama, na si Mormon. Totoo, ako igwa pa alagad dikit sanang manga bagay na isusurat, manga bagay na ipinagboot sakuya kan sakuyang ama.

2 Asin ngonian ta uminagi an panahon na pagkatapos kan makuri asin dakula na ralaban sa Cumorah, totoo, an manga Nephite na nakadulag sa banwaan na pasiring sa sur linamag kan manga Lamanite, sagkod na sinda gabos narumpag.

3 Asin an sakuyang ama ginadan man ninda, asin ako na sanang saro an natada na magsurat kan mamundo na kasaysayan kan pagkarumpag kan sakuyang manga tawo. Alagad totoo, sinda napara na, asin sakuyang inuutob an katugonan kan sakuyang ama. Asin ta kun ako saindang gagadanon, dai ko aram.

4 Kaya sakuyang isusurat asin itatago an manga kasuratan sa daga; asin ta kun sain man ako paduman bakong mahalaga.

5 Totoo, an sakuyang ama ginibo an kasuratan na ini, asin saiyang isinurat an katuyohan kaini. Asin totoo, sakuya man na isusurat ini kun igwa pang masusuratan sa manga plake, alagad ako dai na; asin ta dai ako nin metal, huli ta ako nagsosolo. An sakuyang ama ginadan sa ralaban, asin an gabos na sakuyang manga manunungod, asin ta dai akong manga amigo ni madudumanan; asin ta kun sagkod nuarin tutugotan kan Kagurangnan na ako mabuhay dai ko aram.

6 Totoo, apat na gatos na taon na an nakalipas magpoon kan pagpadigdi kan satuyang Kagurangnan asin Paraligtas.

7 Asin totoo, an manga Lamanite linamag an sakuyang manga tawo, an manga Nephite, magpoon sa sarong siudad pasiring sa ibang siudad asin maghali sa sarong lugar pasiring sa ibang lugar, sagkod na sinda dai na; asin ta dakula an saindang pagkadaog; iyo, dakula asin makangangalas an pagkarumpag kan sakuyang manga tawo, an manga Nephite.

8 Asin totoo, an kamot kan Kagurangnan iyo an naggibo kaini. Asin totoo man, na an manga Lamanite nagraralaban man sa saro saro; asin an ibabaw kan bilog na daga na ini sarong daing katapusan na garadanan asin pagpabulos nin dugo; asin daing siisay man na nakakaaram kan katapusan kan gera.

9 Asin ngonian, totoo, dai na ako mataram pa manunungod sa sainda, huli ta dai na nin nag-eerok sa ibabaw kan daga, kun bako an manga Lamanite asin manga mahabon.

10 Asin daing siisay man na nakakaaram kan totoong Dios kundi idtong manga disipulos ni Jesus, na nagpawalat sa daga sagkod na an kasumbikalan kan manga tawo labi na kadakula na dai itinugot kan Kagurangnan na sinda makaibahan kan manga tawo; asin kun sinda man nasa ibabaw kan daga daing siisay man na tawo an nakakaaram.

11 Alagad totoo, an sakuyang Ama asin ako nahiling sinda, asin ta sinda naglingkod sa samuya.

12 Asin an siisay man na mag-ako kan kasuratan na ini, asin dai ini isikwal huli sa manga kakulangan na nasa laog kaini, siya makakaaram nin orog pang darakula na manga bagay ki sa kaini. Totoo, ako si Moroni; asin ta kun puwede pa kutana, sakuyang boot na ipaaram an gabos na manga bagay sa saindo.

13 Totoo, sakuyang tinatapos na an pagtaram manunungod sa manga tawong ini. Ako an aki ni Mormon, asin an sakuyang ama gikan ki Nephi.

14 Asin ta ako iyo man an nagtatago kan kasuratan na ini para sa Kagurangnan; an manga plake kaini daing halaga, huli sa tugon kan Kagurangnan. Huli ta totoong saiyang sinabi na daing siisay man na makakakua kan manga ini tanganing magkinabang; alagad an manga kasuratan duman dakula an halaga; asin an siisay man na magdara kaini sa liwanag, siya bebendisionan kan Kagurangnan.

15 Huli ta daing siisay man na magkakaigwa nin kapangyarihan na magdara kaini sa liwanag kun dai idto itao saiya kan Dios; huli ta ipinagboboot kan Dios na ini gibohon na an katuyohan iyo sana an saiyang kamurawayan, o an karahayan kan manga suanoy asin idtong haloy nang iwinaragas na katipan na manga tawo kan Kagurangnan.

16 Asin ta paladan siya na madara kan bagay na ini sa liwanag; huli ta dadarahon ini hali sa kadikloman pasiring sa liwanag, sunod sa tataramon kan Dios; iyo, idto dadarahon hali sa daga, asin idto magliliwanag sa kadikloman, asin maabot sa kaaraman kan manga tawo; asin idto magigibo sa paagi kan kapangyarihan kan Dios.

17 Asin kun igwa man nin manga sala iyan manga sala na nin tawo. Alagad totoo, na dai kaming naaaraman na sala; siring man naaraman kan Dios an gabos na manga bagay; kaya an siisay man na magsikwal, kaipuhan na paaramon siya ta tibaad nasa pagalaman siya kan kalayo kan impiyerno.

18 Asin siya na magsabi: Ipahiling sa sakuya, o ika papadusahan—kaipuhan na mag-ingat siya ta tibaad an saiyang pinagboboot iyo idtong ipinagbabawal kan Kagurangnan.

19 Huli totoo, na an maghatol nin basang siya hahatolan man nin basang; huli ta sunod sa saiyang gibo an saiyang kabayadan; kaya siya na nagpapadusa papadusahan man, kan Kagurangnan.

20 Hilingon kun ano an sinasabi kan banal na kasuratan—an tawo dai magpadusa ni siya maghatol; huli ta an paghatol sakuya, sabi kan Kagurangnan, asin an pagbalos sakuya man, asin ta ako an mabayad.

21 Asin siya na magpaluwas nin kaanggotan asin pagsuhay tumang sa gibo kan Kagurangnan, asin tumang sa katipan na manga tawo kan Kagurangnan na kairiba sa harong kan Israel, asin magsabi: Samuyang rurumpagon an gibo kan Kagurangnan, asin an Kagurangnan dai na marurumdoman an saiyang tipan na saiyang ginibo sa harong kan Israel—an siring nasa pagalaman na paludon asin iapon sa kalayo;

22 Huli ta an daing-kasagkuran na katuyohan kan Kagurangnan magpapadagos, sagkod na an gabos na saiyang ipinangako mautob.

23 Basahon an manga propesia ni Isaias. Totoo, ako dai makakasurat kan manga idto. Iyo, totoo sakuyang sinasabi sa saindo, na idtong manga santo na nagkagaradan na enot sakuya, na tagsadiri kan dagang ini, magkukurahaw, iyo, hali sa kabokabo sinda magkukurahaw sa Kagurangnan; asin sagkod na an Kagurangnan nabubuhay saiyang marurumdoman an tipan na saiyang ginibo sa sainda.

24 Asin saiyang aram na an saindang manga pamibi, na idto para sa saindang manga katugangan. Asin saiyang aram an saindang pagtubod, huli ta sa saiyang pangaran nakakahali sinda nin manga bulod; asin sa saiyang pangaran nagigibo ninda na an daga mayugyog; asin sa paagi kan kapangyarihan kan saiyang tataramon nagibo ninda na an manga karsel na magkagaraba sa daga; iyo, maski an naglalaad na hurno dai sinda naano, ni an lumalaw na manga hayop ni an mararang manga halas, huli sa kapangyarihan kan saiyang tataramon.

25 Asin totoo, an saindang manga pamibi para man sa saiya na tutugotan kan Kagurangnan na magluluwas kan manga bagay na ini.

26 Asin daing siisay man na kaipuhan na magsabi na dai an manga ini maabot, huli ta an manga ini maabot nanggad, huli ta ini sinabi na kan Kagurangnan; huli ta hali sa daga an manga ini maluwas, sa paagi kan kamot kan Kagurangnan, asin daing makakapugol kaini; asin maabot ini sa aldaw na kun nuarin sasabihon na an manga milagro nahali na; asin maabot ini na siring sa sarong nagtataram na hali sa gadan.

27 Asin maabot ini sa aldaw na an dugo kan manga santo magkukurahaw sa Kagurangnan, huli kan hilom na pagkasararo asin kan manga gibo kan kadikloman.

28 Iyo, ini maabot sa aldaw na kun nuarin an kapangyarihan kan Dios iindahan, asin an manga simbahan magiging maati asin magiging mapaabaw-abaw sa pagkaharo-haralangkawon kan saindang manga puso; iyo, sagkod sa aldaw na kun nuarin an manga namamayo kan manga simbahan asin an manga paratukdo mag-iitaas sa pagkaharo-halangkawon kan saindang manga puso, sagkod sa saindang pag-uri na kabali sa saindang manga simbahan.

29 Iyo, ini maabot sa aldaw na kun nuarin igwang madadangog nin manga manunungod sa manga sulo, asin manga bagyo, asin manga alisngaw nin aso sa ibang manga daga;

30 Asin igwa man nin madadangog manunungod sa manga gera, asin manga huring-uding manunungod nin manga gera, asin manga linog sa manlaen-laen na rona.

31 Iyo, ini maabot sa aldaw na kun nuarin igwa na nin dakulang manga kaatian sa ibabaw kan kinaban; magkakaigwa nin manga garadanan, asin harabonan, asin kaputikan, asin manga darayaan, asin manga karaksotan, asin gabos na paagi nin karumpotan; kun nuarin kadakol na an masarabi, Gibohon ini o gibohon iyan, asin idto bako na mahalaga, huli ta an Kagurangnan maandurog kaiyan sa huring aldaw. Alagad herak man sa siring, huli ta sinda nasa apdo nin kapaitan asin nasa gapos nin karaotan.

32 Iyo, idto maabot sa aldaw na kun nuarin igwa na nin manga simbahan na ipapatindog na masabi: Padigdi sa sakuya, asin huli sa saindong kuwarta kamo mapapatawad kan saindong manga kasalan.

33 O kamong masumbikal asin maraksot asin manga sutil na tawo, ngata ta nagpatindog kamo nin manga simbahan sa saindong manga sadiri tanganing makinabang? Ngata ta binago nindo an banal na tataramon kan Dios, tanganing magdara kamo nin sumpa sa saindong manga kalag? Magdangog, maghiling kamo sa manga kapahayagan kan Dios; huli ta totoo, an panahon maabot sa aldaw na iyan na kun nuarin an gabos na manga bagay na ini kaipuhan na mautob.

34 Totoo, an Kagurangnan nagpahiling sakuya nin darakula asin makangangalas na manga bagay manunungod kaidto na madali nang umabot, sa aldaw na iyan na kun nuarin an manga bagay na ini umabot na sa saindo.

35 Totoo, ako nagtataram sa saindo na garo kamo yaon digdi, alagad dai man kamo. Alagad totoo, si Jesu-Cristo ipinahiling kamo sakuya, asin ta sakuyang aram an saindong ginigibo.

36 Asin ta sakuyang aram na kamo nagraralakaw sa pagkaharo-halangkawon kan saindong manga puso; asin ta dai na kundi diit na sana na dai iniitaas an saindang sadiri sa pagkaharo-halangkawon kan saindang manga puso, sa pagsulot nin marahay-rahay na gubing, sa pang-uri, asin manga pagpasuruhay, asin pasararampihan, asin manga pang-uusig, asin gabos na paagi nin manga karaotan; asin an saindong manga simbahan, iyo, sagkod an lambang saro, naging maati huli sa kapaabaw-abawan kan saindong manga puso.

37 Huli ta totoo, kamo namomoot sa kuwarta, asin sa saindong pagkabuhay, asin an saindong marahay-rahay na gubing, asin an pagsamno kan saindong manga simbahan, orog pa sa saindong pagkamoot sa dukha asin sa nangangaipo, sa naghihilang asin nagtitios.

38 O kamong manga kaatian, kamong manga parasagin-sagin, kamong manga paratukdo, na saindong ipinapabakal an saindong sadiri sa kun ano an nararaot, ngata ta saindong inatian an banal na simbahan kan Dios? Ngata ta kamo nasusupog na saindong akoon an pangaran ni Cristo? Ngata ta dai nindo inisip na orog kadakula an halaga kan daing katapusan na kaogmahan ki sa kasakitan na dai na nanggad magagadan—huli sa pag-omaw kan mundo?

39 Ngata ta saindong sinasamno an saindong sadiri kaidtong daing buhay, alagad natitios an nagugutom, asin an nangangaipo, asin an daing gubing, asin an naghihilang asin nagsasakit na umagi sa saindo, asin dai nindo riparohon.

40 Iyo, ngata ta saindong pinatindog an saindong hilom na manga karumpotan tanganing makakua nin pakinabang, asin pinangyari na an manga balo magmundo sa atubangan kan Kagurangnan, asin man an manga ilo na magmundo sa atubangan kan Kagurangnan, asin man an dugo kan saindang manga kamagurangan asin kan saindang manga agom na lalaki na magkurahaw sa Kagurangnan hali sa daga, para sa pagbalos sa saindong manga payo?

41 Totoo, an espada nin pagbalos nakabitin sa tangod nindo; asin an panahon madali nang umabot na saiyang ipagbabalos an dugo kaidtong manga santo sa saindo, huli ta dai na niya matitios an saindang manga pagkurahaw.