1 Asin ngonian, magdarangog, ako boot na magtaram nin dikit sa manga natada kan manga tawong ini na nakaligtas, kun ini boot kan Dios na itao sainda an sakuyang manga tataramon, tanganing makaaram sinda kan manga bagay manunungod sa saindang manga kamagurangan; iyo, ako nagtataram sa saindo, kamo na natada kan harong kan Israel; asin ini an manga tataramon na sakuyang sasabihon:

2 Maaraman nindo na kamo kaiba sa harong kan Israel.

3 Maaraman nindo na kamo kaipuhan na magsorolsol, o dai kamo makakaligtas.

4 Maaraman nindo na saindong kaipuhan na ibugtak an saindong manga armas na pang-gera, asin dai na mawili sa pagpabulos nin dugo, asin dai na idto pagkuahon giraray, sagkod na an Dios an magboot sa saindo.

5 Maaraman nindo na kamo kaipuhan na umabot sa pakaaram kan saindong manga magurang, asin magsorolsol kan saindong manga kasalan asin manga karaotan, asin magturubod ki Jesu-Cristo, na siya an Aki kan Dios, asin ta siya ginadan kan manga Judio, asin sa kapangyarihan kan Ama siya nabuhay giraray, na kun sain saiyang nakua an kapangganahan sa lulubngan; asin man sa saiya an rara nin kagadanan nahalon na.

6 Asin saiyang pinangyari an pagkabuhay-liwat kan manga gadan, na kun sain an tawo mabangon tanganing magtindog sa atubangan kan saiyang hukoman.

7 Asin saiyang pinangyari an pagtubos kan mundo, na kun sain an siisay na makua na daing sala sa atubangan niya sa aldaw nin paghukom itinao saiya na mag-erok sa atubangan kan Dios sa saiyang kahadean, tanganing magkanta nin daing-ontok na manga pag-omaw kairibahan an manga koro sa itaas, sa Ama, asin sa Aki, asin sa Espiritu Santo, na sarong Dios, sa sarong kamugtakan na maogma na daing katapusan.

8 Kaya magsorolsol, asin magpaburunyag sa pangaran ni Jesus, asin mangapot sa ebanghelio ni Cristo, na ihahanda sa atubangan nindo, bako sana sa kasuratan na ini kundi sa manga kasuratan na maabot man sa manga Gentil na hali sa manga Judio, na kun arin na kasuratan mahali sa manga Gentil pasiring sa saindo.

9 Huli ta totoo, ini isinurat sa katuyohan na kamo magturubod kaidto; asin kun kamo magturubod kaidto maturubod man kamo kaini; asin kun kamo magturubod kaini saindong maaaraman an manunungod sa saindong manga kamagurangan, asin man an manga makangalas na manga gibo na pinahiling sa paagi kan kapangyarihan kan Dios sa katiripunan ninda.

10 Asin ta saindong maaaraman man na kamo manga tada kan bunga ni Jacob; kaya kamo kabilang sa manga tawo kan enot na tipan; asin ta kun mangyari na kamo magturubod ki Cristo, asin magkaburunyagan, enot sa tubig, dangan sa kalayo asin sa Espiritu Santo, nagsusurunod sa halimbawa kan satuyang Paraligtas, sunod duman na saiyang ipinagboot sa satuya, saindo ining ikakarahay sa aldaw nin paghukom. Amen.