1 Asin ngonian sakuyang tinatapos an sakuyang kasuratan manunungod kan pagkarumpag kan sakuyang manga tawo, an manga Nephite. Asin ta uminagi an panahon na kami nagduruman sa atubangan kan manga Lamanite.

2 Asin ako, si Mormon, nagsurat nin sarong surat sa hadi kan manga Lamanite, asin nagmawot saiya na tugotan kami na tiriponon an samuyang manga tawo sa daga kan Cumorah, sa gilid kan bulod na inaapod na Cumorah, asin ta duman kami makikilaban saiya.

3 Asin ta uminagi an panahon na an hadi kan manga Lamanite itinugot sa sakuya an bagay na sakuyang minawot.

4 Asin ta uminagi an panahon na kami nagpaduman sa daga kan Cumorah, asin nagpatindog kami kan samuyang manga tolda sa palibot kan Bulod Cumorah; asin idto nasa daga nin kadakol na manga tubig, manga salog, asin manga burabod; asin digdi kami nagkaigwa nin paglaom na madaog an manga Lamanite.

5 Asin kan tulong gatos asin walong pulo may apat na taon an nakalipas, samuya nang nagkatiripon an gabos na natada kan samuyang manga tawo sa daga kan Cumorah.

6 Asin ta uminagi an panahon na kan samuyang magkatiripon an gabos kan samuyang manga tawo sa daga kan Cumorah, totoo ako, si Mormon, nagpoon na maggurang; asin huli ta aram ko na iyo na idto an huring paghinguha kan sakuyang manga tawo, asin huli ta ako pinagbotan kan Kagurangnan na dai ko pagpabayaan an manga kasuratan na ipinanunod kan samuyang manga kamagurangan, na manga banal, na mahulog sa manga kamot kan manga Lamanite, (huli ta an manga Lamanite raraoton an manga idto) kaya ginibo ko an manga kasuratan na ini hali sa manga plake ni Nephi, asin itinago sa bulod kan Cumorah an gabos na manga kasuratan na ipinagkatiwala sa sakuya kan kamot kan Kagurangnan, apuera sana kaining diit na manga plake na sakuyang itinao sa aki kong si Moroni.

7 Asin ta uminagi an panahon na an sakuyang manga tawo, kaibahan an saindang manga agom na babae asin manga aki, nahiling an manga hukbo kan manga Lamanite na nagpapaduman sa sainda; asin, saindang hinalat na labanan an manga idto na igwa kaidtong makuring pagkatakot sa kagadanon na minapano kan manga daghan kan gabos na masumbikal.

8 Asin ta uminagi an panahon na sinda nakilaban sa samuya, asin an lambang kalag napano nin takot huli sa kadakolan kan saindang manga bilang.

9 Asin ta uminagi an panahon na linabanan ninda an sakuyang manga tawo kan saindang espada, asin kan busog asin kan pana, asin kan patok, asin kan gabos na palaen-laen na armas na pang-gera.

10 Asin ta uminagi an panahon na an sakuyang manga tawo nagkagaradan, iyo sagkod idtong sakuyang sampulong ribo na sakuyang kaibahan, asin ta ako natumba na nalugadan sa katahawan; asin ta ako naagihan ninda na dai man tinapos an sakuyang buhay.

11 Asin kan sinda makaagi asin gadanon an gabos kan sakuyang manga tawo apuera sa duwang pulo may apat sa samuya, (kaiba si Moroni an sakuyang aki) asin kami na nakaligtas sa pagkagadan kan samuyang manga tawo, nahiling kinaagahan, kan an manga Lamanite nakabalik na sa saindang manga kampo, hali sa tuktok kan Bulod Cumorah, an sampulong ribo kan sakuyang manga tawo na nagkagaradan, na sakuyang pinanginginotan.

12 Asin samuya man na nahiling an sampulong ribo kan sakuyang manga tawo na pinanginginotan kan sakuyang aki na si Moroni.

13 Asin totoo, an sampulong ribo ni Gidgiddonah nagkagaradan, asin siya man nasa tahaw.

14 Asin si Lamah nagadan kaiba an saiyang sampulong ribo; asin si Gilgal nagadan kaiba an saiyang sampulong ribo; asin si Limhah nagadan kaiba an saiyang sampulong ribo; asin si Jeneum nagadan kaiba an saiyang sampulong ribo; asin si Cumenihah, asin si Moronihah, asin si Antionum, asin si Shiblom, asin si Shem, asin si Josh, nagkagaradan kaibahan an saindang manigsarampulong ribo.

15 Asin ta uminagi an panahon na igwa nin sampulo pa na nagadan sa espada, na kaibahan an saindang manigsarampulong ribo; iyo, sagkod kan gabos kan sakuyang manga tawo, apuera kan duwang pulo may apat na sakuyang kaibahan, asin man magkapirang nakadulag pasiring sa manga nasion sa sur, asin an magkapira na uminiba sa manga Lamanite, nagkagaradan; asin an saindang manga laman, asin manga tulang, asin dugo nagkalat sa ibabaw kan daga, ta binayaan kan manga kamot kaidtong manga naggaradan sainda tanganing malapa sa ibabaw kan daga, asin maagnas asin magbalik sa saindang inang daga.

16 Asin an sakuyang kalag namundo nin makuri huli sa manga nagkagaradan na sakuyang manga tawo, asin ako nagtangis:

17 O kamong manga magagayon, tano ta kamo suminuhay sa manga paagi kan Kagurangnan! O kamong manga magagayon, tano ta isinikwal nindo idtong Jesus, na nagtindog na bukas an manga takyag sa pag-ako sa saindo!

18 Totoo, kun kamo dai naggiribo kaini, dai kutana kamo nagkagaradan. Alagad totoo, kamo nagkagaradan, asin ta ako nagmumundo kan saindong pagkawara.

19 O kamong manga magagayon na manga aking lalaki asin manga aking babae, kamong manga ama asin manga ina, kamong manga agom na lalaki asin manga agom na babae, kamong manga magagayon, tano ta kamo nagpakararaot!

20 Alagad totoo, dai na kamo, asin sa sakuyang manga pagmundo dai na man madadara an saindong pagbalik.

21 Asin an aldaw madali nang umabot na an saindong pagkamortal kaipuhan nang magsulot kan pagka-imortal, asin ining manga hawak na ini na nag-aagnas na sa pagkalapa madali nang maging daing-pagkalapang manga hawak; asin dangan kamo matindog sa atubangan kan hukoman ni Cristo, tanganing hukoman sunod sa saindong manga gibo; asin ta kun kamo manga matatanos, dangan kamo mapalad kaibahan kan saindong manga magurang na nagkaerenot na sa saindo.

22 O kun kamo nagsorolsol na bago uminabot ining makuring pagkarumpag sa saindo. Alagad totoo, ta dai na kamo, asin an Ama, iyo, an Daing-Kasagkuran na Ama kan kalangitan, aram an saindong kamugtakan; asin siya magibo sa saindo sunod sa saiyang kasuripotan asin pagkaherak.