1 Me chelechang eak mo rokir a rekord er ngak el kirel a ngemedir a rechedak el rechedal a Nephi. Meng dilubech el uaitiang, aki mle blechobech el merael ruchei er a rechedal a Laman.

2 Me ngak el Mormon a lilchesii a babier el mo er a merreder er a rechedal a Laman, el mle soak a le kengei er kemam me bo le sebechemam el mo mengideb er a rechedemam el mo er a beluu er a Cumorah, er bita er a ked el mle ngklel a Cumorah, e seikid e a kimo kaumekemad.

3 Me a dilubech a uaitiang, a King er a rechedal a Laman a kilengei er ngak sel tekoi el mle soak.

4 Meng dilubech a waitiang, me a ki mirrael blechobech el mo er a beluu er a Cumorah, me a ki mlekedechor a tento er kemam el meliuekl er a ked el Cumorah; el mla er a beluu el betok a ralm erngii me a chomoachel, me a madedok; meng tiakid a kimulureng el kmo ngmo erngii a ungil techall el kibo mesisiich er a rechedal a Laman.

5 Me a bocha lemerek edei el dart me a okai me a euang el rak, eaki mla mengideb er a rokui el mlo medechel el chedemam el mei er a beluu er a Cumorah.

6 Meng dilubech a uaitiang, tiael bocha le mechudel er rokui el di mo tang a rechedemam er a beluu er a Cumorah, e ngak el Mormon el chudelang; e mle medengei el kmo ngulebongel klakoderir a rechedak, e mla modurech er a Rubak el diak bechei a uldelid er a redemmam el rekord, el mle chedaol, me le bo er a chimorir a rechedal a Laman, (le rechedal a Laman a mo tomall) me a uchul ngak a rirellii tiael rekord lousbech a tibereberk el kloklel a Nephi, e milart er a chelsel a ked er a Cumorah rokui el rekord el mloterkokl er ngak er a chimal a Rubak, el di mlo ikakid el mekesai el tibereberk el klalo el ngak a ngilai er msa ngelekek el Moroni.

7 Meng dilubech a uaitiang, a rechedak me a rebecherir me a rengelekir er chelechang a mocha chomes er a resoldau er a rechedal a Laman, el blechobech e merael bedul tir; meng mlortir sel dakt er a kodall el ngii a momui er a rengrir a rokui el dengerenger, er a longiil er tir meremang.

8 Me a dilubech a uaitiang, tir a mle oldechelakl er kemam, me a rokui el ngar a di mlomui er a dakt le tir a mle imong lobdois.

9 Meng dilubech a uaitiang, tir a silkeuakl el me oldechelakl er a rechedak lolab a oles me a balech me a medal, me a otilech, me a betok el teletelel a klekedall er a mekemad.

10 Meng dilubech cho uaitiang, a rechedak a di melteber oi, me a truich el telael lulbengkek, me ngak a miltemall er a delongelir; me tengelakl er ngak e dimlak el nguu a klengar er ngak.

11 Mi tia er a le merekong el meleber er a rokui el chedak el di mlo medechel a reluich me a teuang er kemam, (el ta ertir a ngelekek er a Moroni) e kemam el silobel er a kodellir a rechedemam, a ulemes er a boel kukuk, er a lleta rechedal a Laman el mo er a ongeuidel er tir, el ngar bebul a ked er a Cumorah, a retruich el telael er a rechedak el di mleriou, el ngak a mlaer mederir.

12 Me a ki direk el milsterir a retruich el telael lulba medal omrael a ngelekek er a Moroni.

13 Ka momes, me a retruich el telael er a Kidkidonah el mla meriou, mengii a ngar er a delongelir.

14 Me a Lamah mla meriou lobengkel a truich el telael er ngii; me a Gilgal a mla meriou ngii me a truich el telael er ngii; me a Limhah mla meriou ngii me a truich el telael er ngii; me a Jeneum a mla meriou lobengkel a truich el telael er ngii; me a Kumenaiha me a Moronihah, me a Antionum, me a Shiblom, me a Shem, me a Josh a mla meriou lobenterir a retruich el telael a dertang.

15 Me a dilubech a uaitiang, te mlaerngii a lmuut el truich el mleriou er a oles lobenterir a retruich el telael a dertang; oi, el molmuut er a rokui el chedak, el di mlo medechel tirkei el le lluich me a teuang el ulebengkek me a resesei el chiliis el mo er a beluu er a dims, me a resesei el chiliis el mo er a rechedal a Laman, a di mleriou; me a techel a bedengir me a chiuesir me a resechir a di medechel er bebul a chutem, el mlechoit er a chimorir tirkei lulmekeuad er tir, el mo mechut er bebul a chutem, el moel mengelngill lelmuut el mo er a derrir er a chutem.

16 Me a renguk a di miltiud er a klengit el reng le rulkeuad el chedak, me ak lilangel:

17 Ea, kemiu el ungil chad, ko mlekera e moer cheroid er a rolel a Rubak! Ea kemiu el ungil chad, ko mlekera e mlo oltngakl er a Jesus, el mlo dechor e chodars a chimal lomekedong er kemiu!

18 Kamosang, a lemlak bo mrellii tiang eng dimlak bom rebet, ak lmangel er a riid er kemiu.

19 Ea kemiu el ungil el sechal ngalek me a redil ngalek, kemiu el chedam me a rechedil, kemiu el bechiil sechal me a rebechiil redil ko mlekera e mla ruebet.

20 Endi kamosang ko mla merael, me a kentil a renguk a diak el sebechel lolluut er kemiu.

21 Me a sils a merekung el mad el bedengiu a loia diak el mad, me a ikang el bedengiu el chelechang merael mo mechut a diak lokor el di mochu diak boel mechut el bedengiu; e sola e kiriu el mo dechor er a medal a kingall er a kerrekeriil er a Kristo, el mo mukerrekeriil kirel a ureriu; me a lsekum e kau a mle melemalt, ekau a mo er a klengeltengat lobenterir a redemam el di mla merael ruchei er kau.

22 Ea, chomko ko mlo ouchel a rengmiu ruchei er tiael klou el tellemall er a le mei er kemiu. Endi kamosang, ko mla merael, ea Edam, oi, a Diak a Ulebngelel Edam er a babeluades a medengei a blekerdeliu; meng mo omes er kemiu loltirakl er a lemeltel me a klechubechub er ngii.