1 Kamomes, ngak el Moroni a mo rokui a rekord er a demak el Mormon. Cho momes eng di mekesai el tekoi a bo kuluches, el ngii el tekoi a le dilung er ngak a demak.

2 Me chelechang eng dilubech el uaitiang, a uriul er a klou el meringel klodechelakl er a Cumorah, a domes ea rechedal a Nephi el chiliis el mo er a beluu er a dims a blo losiik er tir a rechedal a Laman el milekodeterir er rokui.

3 Me a demak mete direk el mlekodir, meng di mlo ngak el tang a kiliei el mo meluches er a mekngit a rengud er ngii el cheldechedechal a telemellir a rechedak. Endi kamosang, te mla nguemed, me ak mo oltaut a tikingel a demak. Malta ete mo mekodkak, ng diak a klemedengei er ngak.

4 Me a le uaisei ak mo meluches e moemart a rekord er a chelsel a chutem; e diak kudengei el kmo ak moerker, endi diak a belkul.

5 Kamosang, a demak a rirellii tiang el rekord, e lilchesii a mo belkul. Me a kumes eng direk el soak el luchesii a le ngarngii a mededaes er a ikang el tibereberk el klalo, endi diak, e direk el dikea chidudes, leng dingak el ta kung. A demak a mla mad er a mekemad, me a rokui el chedak, e dikea resechelik, me a diak kudengei el kmo ak mo erker; e diak kudengei el kmo, a Rubak ng soal mechikak mekngar el mo oingerang.

6 A domes, eng mla chengelakl euang el dart el rak er a le mlei er ngii a Rubak er kid, e Osobeled.

7 Me a domes ea rechedal a Laman a mla mdechemeterir a rechedak er a rechedal a Nephi, nga er a ta er a beluu el mo er a ta ra beluu, me a basio el mo er a basio, el mo lolekngemed er tir; meng kmal mle klou el tellemall a mlei er tir; oi, ng mle klou e mengasireng a tellemall el mlei er a rechedak el rechedal a Nephi.

8 Kamomes, ng chimal a Rubak a kildmeklii tiang. Me a de luut lomes a rechedal a Laman a mla mo ditir el kaumekemad; me a bebul tiael beluu er rokir a di meliuekl a kodall me a chitel a rasech; meng dikea medengelii a ulebengelel a mekemad.

9 Me chelechang dikea tikingek el kirir, leng dekea ngodech, tedi rechedal a Laman me a remerechorech a ngarngii er bebul a bluu er rokir.

10 Meng dikea remedengelii a merang el Dios, ng di roderchelel a Jesus el di kiliei er a beluu, endi lesa el klunga delngerenger er a rechad ea Rubak a dimlak le kengei el mechititerir me le teloi er a rechad; me a altae te ngarkeltang er bebul a beluu e diak a chad el medengei.

11 Endi bo modengei, a demak me ngak a mla mesterir, me tullisechakl er kemam.

12 Me ngikei el mo mesang tiael rekord, e diak bo loltuub el kirel a telemall el nga er a chelsel, ngikei a lmuut el mo medengei a meklou el tekoi er a ikang. Kamorrenges, ngak a Moroni; okmo ng sebechek, ea kucholt er kemiu a rokui el tekoi.

13 Kamorrenges, ak mo rokir a cheldecheduch el kirir tirkang el chad. Ngak a ngelekel a Mormon, me a demak a mle rasech el mo er a Nephi.

14 Me ngak ngikei el mlo omart aikang el rekord el mo er a Rubak; a ikang el tibereberk el klalo el di ngii a diak a belkul, ngellechul a Rubak a uchul. Le ngii a mera el dilung el kmo, ng diak a mo melai el kirel omengereker; endi a rekord a kmal klou a ultutelel; me ngikei el me nguu el mo ochotii er a llomes, a Rubak a mo omekngeltengat er ngii.

15 Leng diak a moerngii a klisiichel mo nguu el me ochotii er a llomes a lak lemei er ngii loiak a Dios; le Dios a soal a bole mekedmokl el diomtab osenged el kirel a klungiolel, me a lechub eng klungiolir a rulebriid er a irechar el chedal a Rubak loiak a telbiil.

16 Meng ngeltengat ngikei el nguu tiael tekoi el mei er a llomes; leng mo tuobed er a ilkolk el mo er a llomes, loltirakl a tikingel a Dios; oi, ng mo mengai el tuobed er a chutem, e mo tuobed a didiichel ngar er a ilkolk, el mei er a klemedengei er a rechad; el mo mekedmokl loiak a klisiichel a Dios.

17 Me a lsekum eng moerngii a cheleuid eng cheleuid er a chad. Endi kamorrenges, ng diak a kimodengelii el ngelsengesel; endi di Dios a medengei a rokui el tekoi; me a le uaisei e ngikei loltuub bolodengei, leng moel mo er a kengaol nguil a beluu er a ringel.

18 Me ngikei el kmo: Mochotii er ngak, le llak e, kau a mo mechelebed – bole kerekikl leng moel dulii sel mekull er a Rubak.

19 Le kamosang, ngikei el meringel a loukerrekeriil, a lmuut el mo er a meringel kerrekeriil; leng mo uduudel loltirakl er a urerel; me a le uaisei e ngikei el mengelebed a lmuut el mo mechelebed er a Rubak.

20 Mrenges a lolekoi chedaol llechukl el kmo, a chad a diak le kirel mengelebed, me a lechub e loukerrekeriil; le kerrekeriil a kirek, a Rubak a dmung, me a melaitechei meng direk el kirek, meng ngak a mo mengkad.

21 Me ngikei el mo melekoi a ngasechreng me a ultok lomtok er a urerel a Rubak e omtok er a rechad er a telbiil er a Rubak, el tir a chad er a blai er a Israel, e mo melekoi el kmo: Aki mo tomellii a urerel a Rubak, me a Rubak a diak boel lletkii a telbilel kiltmeklii el mo er a blai er a Israel ngikei a ngar er a kengaol kirel kung el mo meteber e obidokl el mo er a ngau;

22 Le uldesuel a Rubak el kirel a mo cherechar a di merael, el di merekmo rokui el telbilel a mo mekedmokl.

23 Mosuub a ulochel a Isaia. Momes, ng diak el sebechek lelmuches. Oi, mrenges a kulekoi er kemiu, el kmo tirkei el santo el di mla merael ruchei er ngak, el lulebang tiael beluu, a mo lmangel, oi, me a lenga er a chebechab e te mo lemangel mo er a Rubak; me a Rubak el di ngar a diak bo lobes er a telbiil el le kildmeklii ngii me tir.

24 Meng medengei a nglunguchir el mlo kirir a rodam er tir. E medengei a klaumerang er tir, leng mle ngeklel a uchul e te ngilukl a rois; me a ngeklel a uchul e te rirelii a bluulechad el mo melmesim; me a klisiichel a tikingel a mlo uchul ea kelebus a di mlebiou er a chutem; oi, mo lmuut er a melbang el nguil ollaol e dimlak le metemall, me a ka le tebelik el charm, me a lechub el lomekodall a bengechel bersoech, leng klisiichel a tekingel a uchul.

25 Me morrenges, a nglunguchir a direk el mlo kirel ngikei el Rubak a mo kongei meng mo ocholt a ikang el tekoi.

26 Meng diak a kirel melekoi el kmo ng diak le mei, leng ngulterekokl el mei, le Rubak a mla dulii; leng me tuobed er a chelsel a chutem, er a chimal a Rubak, e diak a sebechel lokebir; meng mei er sel sils el mo erngii a tekoi el kmo a tekoielchelid a mla mo merek; meng mei el di uaia mla mad el chad a mengedecheduch.

27 Meng diak el okor el mei a sils el resechir a resanto mo lemangel el mo er a Rubak, le berrotel cheldebechel me a ureor er a ilkolk.

28 Oi, ng diak el okor el mei a sils el klisiichel a Dios a mo motngakl, me a ikelesia mo mekikiongel e mo ngarbab er a keldidai el reng, me a direk el sils el merreder er a ikelesia me a resensei a mo ngarbab er a keldidai el reng, el mo mechechei er tirkei el ngar er a ikelesia er tir.

29 Oi, ng diak lokor el mei a sils el mo morenges chisel a seseb, me a iolt, me a chetechat er a cheroid el beluu;

30 E direk el mo morenges a mekemad, me a chisel a mekemad, me a desiu er a kakerous el beluu.

31 Oi, ng diak el okor el mei a sils el mo erngii a klou el kikiongel er bebul a bluulechad; e mo klou omekeuad er a rechad, me a omerechorech, me a blulak, me a omengeblad, me a tekoi er a deleboes, me a betok el teletelel a mekngit; mete mo betok a melekoi el kmo, mrellii tiang, me a lechub ebo mrellii sei, eng diak a belkul, le Rubak a mo ngosuterir er a uriul klebesei. Endi alii er a rouaisei, le tir a ngar er a osul a cheluuached me a chelsel ochulel a delengerenger.

32 Oi, ng diak el okor el mei a sils, el mo ngar ngii a ikelesia el mo dechor, el mo melekoi el kmo: Mei er ngak, lolab a ududiu e bo le mengubet a kentmiu.

33 Ea kemiu el dengerenger e mekididai a rengmiu e medecherecher chikliu el chad, ngera me ko mla mekedechor a ikelesia er kemiu losiik omengerker? Ngerang me ko mla ngmodech a chedaol tikingel a Dios, meng mo di kemiu el ochau a dellebeakl er a klengar el mei er a reng er kemiu? Ka bo momtab, e momes ocholt er a Dios; le kamosang, a taem a mei, e sel sils ea ikang er rokui el tekoi a di mo tmaut.

34 Kamorrenges, a Rubak a mla ocholt erngak a meklou e mengasireng el tekoi el kirel a ikei el di kmeed kung mei, er sei el sils el ikang el tekoi a mo duubech er a delongeliu.

35 Kamorrenges, ngak a melekoi er kemiu el di uaia chomngar er tiang, e diak komngar er tiang. Endi kamosang, a Jesus Kristo a mla olecholt er kemiu el merngak, me a kmedengei chomoruul.

36 Me a kmedengei el kmo kemiu a merael ngar er a keldidiul a rengmiu; meng diak, el kmal di mekesai er kemiu a diak el belkuuk er a klengarbab el reng er tir, me toubail a meringelchad el bail, e ngar er a chelechei el reng me a klautok, me a blechechelingaol reng, me a ulecheracheb, me a betok el teletelel a mekngit; me a ikelesia er kemiu, oi, el moel lmuut er a redertang a mla mo kikiongel le keldidiul a rengmiu.

37 Le kamosang, ko kmal betik a rengmiu er a udoud, me a klokliu, me a ungil biliu, me a besiichel a ikelesia er kemiu, el kuk ngaruchei er a beltkil a rengmiu el mo er a remechebuul, me a diak a ngerang er tir, me a resmecher, me a rengar er a ringel.

38 Ea kemiu el kikiongel, el di belsiochel er a ikrel, kemiu el sensei lolterau er kemiu er a ikei el mo mechut, ngera me ko mla kikingelii a chedaol ikelesia er a Dios? Ngerang me ko merur el mo oungakl er a ngeklel a Kristo? Ngerang meng diak momdasu el kmo ngelmuut el klou a belkul a diak a ulebengelel klengar, er a diak a ulebngelel klengit el reng el chetengakl er a bluulechad a uchul?

39 Ngerang me kau omsiich er kau er a diak a klengar er ngii el tekoi, e mechititerir a resongerenger, me a remechebuul, me a remeau, me a resmecher me a rengar er a ringel el mengelakl er kau, e diak mosterir?

40 Oi, ngera me ko meruul a berrotel el mekngit a rolel el omengereker, me nguchul ea remelakl el dil a mo lemangel er medal a Rubak, me a rediak a demerir me a derrir el ngalek a direk el mo lemangel er medal a Rubak, me a direk el resechir a redemerir me a rebecherir a lemangel mo er a Rubak el ngar er a chutem el kirel omelaitechei el mei er a btelemiu?

41 Kamrenges, a saider el mo mlaitechei a mla mesmechokl er bebmiu; meng di kmeedku a belsechel mo mlaitechei er kemiu a resechir a resanto leng dikea le bechititerir me di llangel.