1 Behlaeʼ cu xuʼulsic in tsícbalic bix xuʼulsabic in cahal, u palal Nefi, bey úchic túnoʼ púdzoʼon tu tánil tiʼ u palal Laman.

2 Ten Mormon tiʼn dzíbtah, humpʼél huʼun tiʼ u nohchil u palal Laman, tiʼn kátah tiʼ u páhtalil c múchʼquiʼntiʼc c cahal tiʼ u luʼumil Cumora, teʼeloʼ c baʼatel tu contraoʼob.

3 Bey úchic túnoʼ le u nohchil u palal Laman tu dza ten baʼax tiʼn kátah tiʼ.

4 Bey túnoʼ hoʼopʼ c bin tiʼ u luʼumil Cumora, t wáʼalcunsah c cúchbil tanah tu baʼpach tu muʼulil Cumora le luʼumoʼ yan yaʼab haʼ tiʼ. Tiʼiʼ dzíbotiʼc caʼachiʼ c ganartiʼc u palal Laman.

5 Cah dzoʼoc u maʼn trecientos ochénta y cuatro haʼaboʼob dzoʼoc c molic tulácal yalab c ét cahaloʼob tiʼ u luʼumil Cumora.

6 Bey úchic túnoʼ, le cah dzoʼoc láh molic yétel c múchʼquiʼntiʼc c cahaleʼ tiʼ u luʼumil Cumora, heʼel túnaʼ ten Mormon, sén chʼíhaʼanen; in wohél tún leloʼ u dzoʼoc baʼatel cun antah tiʼn cahal, tu túxtaheʼn tún Yumtsil maʼ in chaʼic u lúbul tu kaboʼob u palal Lamanoʼob u sagrado dzíboʼob maʼnahaʼan tiʼ c nohoch tataoʼob, (tumen le u palal Lamanoʼoboʼ heʼu kascuntiʼcoʼobeʼ) tiʼn mentah tulácal le dzíboʼobaʼ tiʼn chʼaʼah tiʼ le u laminaoʼob Nefi, ca tiʼn taacah tu caʼanal mul luʼumil Cumora, tulácal u úchben dzíboʼob le baʼax úchaʼanoʼoboʼ dzaʼabaʼan tiʼn kab tumen Yumtsil, baʼaleʼ le dzeʼedzec laminaoʼobaʼ tiʼn kubah tu kab in pal Moroni.

7 Úchic tún beyoʼ in cahaleʼ, yétel u coʼoleloʼob yétel u palaloʼob, behlaʼeʼ tu yilahoʼob u baʼatel maʼcoʼob u palal Lamanoʼoboʼ tán u taloʼob tu yókoloʼoboʼ, beyoʼ yan tiʼoʼob humpʼél u nohoch sahquiʼl tiʼ químiloʼ, le cu chupic u pucsiʼkal tulácal le sén kasaʼanoʼoboʼ, tu paʼtahoʼob u kuchuloʼob.

8 Bey talicoʼob túnoʼ u baʼatel toʼon, tulácal pixaneʼ h haʼak yól tumen tu yiloʼob hach sén yaʼabachoʼob.

9 Bey úchic u dzic yókol in cahal u tadz maʼscaboʼob, u arco cheʼ, u flecha, u bát, yétel u heʼheʼlásil u maʼscab.

10 Bey úchic u láh quínsaʼal in maʼcoʼob, bey, le diez mil maʼcoʼob yanoʼob tiʼn wétel caʼachoʼ tenoʼ h lúben chúmucoʼob úch ten lob, u palal Lamanoʼob h maʼnoʼob tuʼux yaneʼn, bey túnoʼ maʼ tu luʼsoʼob in cuxtaliʼliʼ.

11 Le cah dzoʼoc u maʼnoʼob chúmuc ichiloʼoneʼ, dzoʼoc u láh quínsicoʼob in wét cahaloʼobeʼ, h pʼaʼat chén veintiʼcuatro tiʼ toʼoneʼ, (ichililoʼobaʼ in pal Moroni). Chén toʼoneʼ cuxaʼanoʼoneʼ maʼ u yalab in wét cahaloʼobiʼ, t ilah tu yókol u caʼanal luʼumil Cumora le diez mil in wét cahaloʼob quiʼmenoʼoboʼ.

12 Bey xan t ilah le diez mil tiʼin wét cahaloʼob u nohchiloʼob letiʼ in pal Moroni.

13 Heʼel túnaʼ le u diez mil Gidgidona dzoʼoc tún u lúbuloʼob, letiʼeʼ dzoʼoc u lúbul chumuc ichiloʼobeʼ.

14 Lamah dzoʼoc u lúbul yétel u diez mil, Gilgal yétel u diez mil, Limhah yétel u diez mil, Jeneum yétel u diez mil, dzoʼoc u lúbul xan Cumeniah, Moroniah, Antiʼonum, Shiblom, Sheʼm, Jox, huhuntúleʼ yétel u diez miloʼob.

15 Bey úchic túnoʼ ulak diez nohchil maʼcoʼob u lúbuloʼob tu yoʼolal tadz maʼscab, cada huntúleʼ yétel u diez mil, bey, tulácal in cahaleʼ lúboʼob, chén le veintiʼcuatro yanoʼob tiʼn wételeʼ yétel dzeʼedzecoʼobeʼ púdzoʼob tiʼ u nohol luʼumileʼ, yétel humpʼít maʼnoʼob ichil u palal Laman; u bakeloʼob, u baqueloʼob u kiʼikeloʼob cu pʼaʼatal yókol teʼ luʼumoʼ, pʼat tumen u kaboʼob le maʼx quínsaʼaboʼob utiaʼal u tuʼubtal yétel saʼatal teʼ luʼumoʼ utiaʼal ca sunacoʼob tu tánil u maʼmaʼil le luʼumaʼ.

16 In pixaneʼ xetʼcahiʼ yétel yahil, tu yoʼolal in wét cahaloʼob químoʼoboʼ ca awátnaheʼn:

17 In quiʼichquelem cahal, bix úchic u páhtal a pʼatiʼc u bel Yumtsil! In quiʼichquelem cahal bix páhchahic a léchintiʼqueʼex Jesus, le maʼx u heʼmaʼh u kaboʼob utiaʼal ca u kameʼex!

18 Heʼel túnaʼ wá maʼ úch a betiʼqueʼex beyoʼ, maʼ bín lúbiʼqueʼexiʼ, heʼel túnaʼ, behlaʼeʼ dzoʼoc a lúbuleʼex, teneʼ quiʼn wokol tu yoʼolal a saʼatiʼqueʼex.

19 In quiʼichquelem xíbil palaleʼex, xchʼup palaleʼex, teʼex tatatsileʼex, maʼmaʼtsileʼex, teʼex íchantsileʼex, yétel teʼex átantsileʼex, in quiʼichquelem cahal, bix úchic u páhtal a lúbuleʼex!

20 Heʼel túnaʼ dzoʼoc a saʼataleʼex, in yayah ólal maʼ tu páhtal u bétiʼc a caʼa tasiqueʼex.

21 Séb bín kuchuc u kinil tiʼ le wíncliloʼ yan u sutuba utiaʼal maʼ tu químil, letiʼeʼ wíncliloʼ cu sutiʼc maʼ bín pátac u kastaliʼ; bey túnoʼ bin kuchuqueʼex wáʼalacabal tu tánil Cristo ca juzgartaaqueʼex heʼebix meyahniqueʼexeʼ, wá toh a cuxtaleʼexeʼ yan a kamiqueʼex bendicionoʼob yétel a tataeʼex anhioʼob yáxeʼ.

22 Quexieʼ wá ca kex a wóleʼex antes ca anaqueʼex a xuʼulsaʼaleʼex! Baʼaleʼ heʼel túneʼ bihaʼaneʼex, le Tataoʼ, Yum, le Tata minaʼan u xul yan teʼ caʼanoʼ, u kahól bix aniqueʼex, Letiʼeʼ bín u bet tiʼ teʼex heʼebix a náhaltmeʼexeʼ; yétel justiʼcia wá cu debereʼ, beyxann wá cu debereʼ hu chʼaic ótsilil tiʼ teʼexeʼ.