1 Heʼel túnaʼ, in kát in wáʼal dzeʼedzec baʼaloʼob tiʼ u yalab le cah pʼataanaʼ wá Hahal Dios cu dzic in tʼan tiʼoʼob, utiaʼal ca pátac yoheltiʼcoʼob baʼaloʼob tiʼ u tataoʼob, beyoʼ teʼex quiʼn tʼanqueʼex, teʼex u yalab le u tanah Israel, lelaʼ letiʼ le tʼanoʼob quiʼn wáʼalic teʼexaʼ;

2 Ohélteʼex u tanaheʼex Israel.

3 Ohélteʼex kabét u kexic a wóleʼex, wá maʼeʼ maʼ tu páhtal yantal teʼex salvacion.

4 Oheʼlteʼex yan a pʼatiʼqueʼex u nuʼucul a baʼateleʼex maʼ u quiʼmaʼccunsic a wóleʼex a wéquiʼqueʼex kiʼik, bey xan maʼ a sut a maʼcheʼex u nuʼucul baʼatel, chén cu u páhtal a sut a maʼcheʼexeʼ wá Hahal Dios cu yaʼalic teʼex.

5 Oheʼlteʼex yan a kuchui a wohélteʼex u caʼansahil a tataeʼex, ca kex a wóleʼex tiʼ tulácal a kebaneʼex a kasiʼleʼex bey xan ca creerteʼex tiʼ Jesucristo u Pal Hahal Dios le maʼx quínsaʼab tumen le Judioʼoboʼ, baʼaleʼ tu yoʼolal u páhtalil le Tataoʼ caʼ liksaʼab, bey túnoʼ yan páhtalil yókol le mucnaloʼ, beyoʼ tu lúksah u yah ólalil le químiloʼ.

6 Dzoʼoc u betiʼc ca úchuc le caʼa cuxtal ichil le quiʼmenoʼoboʼ, tu yoʼolal leloʼ le maʼcoʼob bín caʼa cuxlacoʼob utiaʼal ca xiʼicoʼob tu tánil u cúchilil juicio maʼc.

7 Bey xan dzoʼoc u dzic u salvacionil le yokolcaboʼ, tu yoʼolal leloʼ, tu kinil u juicioil maʼqueʼ, cu páhtal u cahtal maʼc tiʼcnal Hahal Dios tu reino wá minaʼan culpail tiʼeʼ, utiaʼal humpʼél quiʼmaʼc ólal minaʼan u xul, utiaʼal u kay quiʼmaʼc ólal minaʼan u xul yétel u múchʼul le kayoʼob teʼ caʼanoʼ tiʼ le Tataoʼ, yétel tu Pal, yétel xan tiʼ le u Hahil Pixanoʼ, letiʼoʼob huhuntúliliʼ Dios.

8 Tu yoʼolaleʼ kex a wóleʼex yétel oc haʼneneʼex tu kabaʼ Jesus, yétel ca a chʼaʼic a betiʼqueʼex u caʼansahil Cristo, le bín eʼesaʼac teʼexoʼ, maʼ chén tiʼ le u dzíbiloʼobaʼ, beyxann tiʼ le u dzíbil le Judioʼoboʼ cu bin tiʼ maʼcoʼob maʼ judioʼobiʼ, le dzíbiloʼobaʼ bín talac tiʼ teʼex.

9 Tumen heʼel túnaʼcu dzíbtaaloʼob utiaʼal ca creerteʼex le heʼeloʼ, wá ca creerteʼex tiʼ le heʼeloʼ bín a creerteʼex tiʼ le heʼelaʼ; yétel wá ca creertiʼqueʼex le heʼelaʼ bín a wohélteʼex yoʼolal a tataeʼex, bey xan tulácal baʼaloʼob cu haʼaksic yól maʼc úch ichiloʼob tumen u páhtalil Hahal Dios.

10 Yan a wohéltiʼqueʼex xan, teʼexeʼ u yalab u palaloʼob Jacob, tu yoʼolal leloʼ xocaʼaneʼex ichil le yáx cahil tiʼ le promesaoʼ, wá ca creertiʼqueʼex Cristoeʼ yétel a kamiqueʼex oc haʼ, yáxileʼ ich haʼ, cu dzocoleʼ yétel kák yétel le Hahil Pixahoʼ, ca bisicabaeʼex heʼebix tu betiʼl c Salvadoreʼ, heʼebix tu yaʼalileʼ cu bin teʼex utsil tu kinil u juicioil maʼc. Amen.