1 Beʼoraʼ quiʼn tʼan tu yoʼolal le maʼxoʼob maʼ u creertiʼcoʼob Cristo.

2 Heʼel túnaʼ ca creertiʼqueʼex wá yan u kuchul u kinil u xímbateʼex, heʼel túnaʼ le cah chícpahac Yumtsil, heʼeleʼ, letiʼ nohoch kin le cah u codzuba le luʼum bey humpʼél codzbil huʼun, le baʼax yan yókoloʼ yan u yíbil tumen humpʼélkák bey letiʼ nohoch kin le can bisaʼaqueʼex tu tánil le u Tamaʼn Hahal Dios; bín a wáʼaleʼex wá tún minaʼan Dios?

3 Lailiʼ ca wáʼal maʼ hah Cristoeʼ heʼ wá u páhtal a pactiʼqueʼex u Tamaʼn Hahal Dios? Ca tuclic wá heʼel u páhtal a cuxtal tu tseleʼ quex hach a wohél yan a kebaneʼex tiʼ? Ca tucliqueʼex wá bín pátac u yantal teʼex quiʼmaʼc olal ca cuxlaqueʼex tu tsél le sagrado Máxoʼ, yan tiʼ a pixaneʼex u mukyah a kebaneʼex tuʼux ta kascunteʼex u tʼan maʼntadz?

4 Heʼel túnaʼ, quiʼn wáʼalic teʼex heʼ a wuʼuyicabaeʼex maʼs yah ta wóleʼex tu tsel huntúl toh yétel sagrado Dios bey ca kahóltiʼc a kasiʼl tu tánil Letiʼoʼ, maʼs que a cuxtal yétel le pixanoʼob yan le ichil infiernooʼ.

5 Tumen heʼel túnaʼ, le can betaac a wilic minaʼan a nokeʼ tu tánil Dios, u glorialil Dios u yutsil Jesucristo, cu tʼaʼabal ta wókoleʼex le kák maʼ tu tʼuʼupul tiʼ teʼex.

6 Oh teʼex maʼ ta creertiʼqueʼex mixbaʼaleʼ, sut a wóleʼex tiʼ Yumtsil, kaʼam kát tiʼ le Tata tu kabaʼ Jesus, beyoʼ min wáleʼ ca caxtiʼcabaeʼex yétel mix humpʼél kebanil, beyoʼ saqueʼex, hadzutseʼex yétel puroeʼex, dzoʼoc a pʼoʼoboleʼex tumen u kiʼikel le Tamaʼnoʼ, utiaʼal le nohoch dzoʼoc kin.

7 Beyxan quiʼn wáʼalic tiʼ le maʼxoob ichileʼex ca wáʼaliqueʼexeʼ minaʼan u tʼan Hahal Dios yétel maʼc, ca wáʼaliqueʼexeʼ dzoʼoc u xuʼululeʼ minaʼan bix u yeʼesicubaeʼ, mix tʼan tiʼ caʼanal, mix u yaʼalaʼal le baʼax bín úchucoʼ, mix u dzaʼacal maʼc, mix u páhtalil u tʼan ich heʼheʼlas tʼanoʼob, mix u naʼatiʼc heʼheʼlas tʼan.

8 Heʼel túnaʼ, quiʼn wáʼalic le maʼx aʼalic de que minaʼan le baʼaloʼobaʼ, maʼ u kahól u evangelioil Cristo; bey túnoʼ maʼ u xocmaʼhoʼob le sagrado dzíboʼob, wá u xocmaʼheʼ maʼ tu naʼatahiʼ.

9 Beyoʼ, c xocmaʼh wá Dioseʼ lailiʼ Letiʼ maʼ tu kexic u yólal hoʼolheʼaqueʼ, mix behlaʼeʼ, mix maʼntadz, letiʼeʼ maʼ tu kexpahal yétel minaʼan u yochʼel u kexil.

10 Baʼaleʼ, wá dzoʼoc a dzic ta tuculeʼex huntúl dios cu kexpahaleʼ, tuʼux yan u yochʼel u kexeʼ, bey túnoʼ dzoʼoc a dziqueʼex ta tuculeʼex tiʼ huntúl dios maʼ huntúl Dios cu mentiʼc baʼaloʼob cu haʼaksic yól maʼcoʼ.

11 Baʼaleʼ heʼel túnaʼ bín in caʼah in weʼes tech huntúl u Diosil baʼaloʼob cu haʼaksic yól maʼcoʼob, heʼeleʼ; u Diosil Abraham u Diosil Isaac yétel u Diosil Jacob, letiʼeʼ le mismo u Dios mentmaʼhil le caʼanoʼob le luʼum yétel tulácal baʼax yaniʼ.

12 Heʼel túnaʼ, letiʼ h ment Adan, tu yoʼolal Adaneʼ h tal le u lúbul maʼcoʼ, tu yoʼolal lúbiʼc maʼqueʼ h tal Jesucristo, letiʼeʼ, le Tata yétel le Pal; tu yoʼolal Jesucristoeʼ h tal le salvacion tiʼ le maʼcoʼ.

13 Tu yoʼolal u salvacionil maʼqueʼ, h tal tu yoʼolal Jesucristoeʼ, cu caʼa sut tu caʼatén tu tánil Hahal Dios, heʼeleʼ, tiʼ le heʼelaʼ yan salvacion tiʼ tulácal maʼcoʼob, tu yoʼolal químic Cristo úch u caʼa cuxtaloʼ, tu yoʼolal lelaʼ cu tal humpʼél salvacion tiʼ humpʼél wenel minaʼan u xul, tuʼux cu áhal tulácal maʼcoʼob tu yoʼolal u páhtalil Dios le can uʼuyaʼac le trompetaoʼ; bín hókoc nuctacoʼob bey xan meheʼntacoʼob, cu binoʼob tu tánil Letiʼ, cu wáchʼaʼaloʼob tiʼ le u kaxil le químil minaʼan u xuloʼ letiʼ le u químil le wíncliloʼ.

14 Cu dzoʼocoleʼ cu tal tu yókoleʼ u juicioil le Máx maʼaloboʼ; teʼ kinoʼ le maʼx kasaʼanoʼ yan u pʼátal ichil u kasiʼl, letiʼ le utsoʼ cu pʼátal ichil u le baʼal utsoʼ, le maʼx quiʼmaʼc yóleʼ cu pʼátal ichil u quiʼmaʼc ólal, le ótsileʼ cu pʼátal ichil u ótsilil.

15 Behlaʼ túneʼ, tulácal teʼex dzoʼoc u tucliqueʼex huntúl Dios maʼ tu páhtal u betiʼc baʼal cu haʼaksic a wóleʼex, in dzíbotiʼc xan in kát teʼex: Dzoʼoc wá u yúchul tulácal le baʼaloʼob tu yaʼalahoʼ? Dzoʼoc wá u kuchul u xul? Heʼel túnaʼ, quiʼn wáʼalic teʼexeʼ maʼ; Dioseʼ maʼ u xuʼuls u betiʼc u Diosil cu betiʼc baʼal cu haʼaksic yól maʼc.

16 Heʼel túnaʼ maʼ wá tún hadzuts tiʼ toʼoneʼex le baʼaloʼob u betmaʼh Diosoʼ? Heʼeleʼ, maʼx tún heʼ u páhtal u naʼatiʼc u meyhil Dios le cu haʼaksic yól maʼc?

17 Máx bín u yaʼal maʼ humpʼél baʼal cu haʼaksic yól maʼc, tu yoʼolal u tʼaneʼ anchah le caʼanoʼob yétel luʼum; tu yoʼolal u páhtalil u tʼaneʼ h mentaab maʼc yétel le luʼumoʼ, yétel u páhtalil u tʼaneʼ dzoʼoc u yúchul yaʼab baʼal cu haʼaksic yól maʼc?

18 Máx bín u yaʼal Jesucristoeʼ maʼ tu mentah nucuch baʼaloʼob cu haʼaksic yól maʼquiʼ? Anchah xan yaʼabach nucuch baʼaloʼob cu haʼaksic yól maʼc h mentaab tumen u kab u apostoloʼobil.

19 Wá tún mentaab baʼaloʼob cu haʼaksic yól maʼqueʼ, baʼaxtén tún dzoʼoc u pʼatiʼc Dios u betiʼc u Diosil yétel le baʼal cu betiʼc u haʼaksic u yól maʼc wá beyxannoʼ huntúl Máx maʼ tu kexpahaliʼ? Heʼel túnaʼ quiʼn wáʼalic teʼex, Letiʼeʼ mix bikin cu kexpahal; wá beyoʼ cu xuʼulul u betiʼc u Diosil, letiʼeʼ maʼ tu xuʼulul u bet u Diosil, letiʼeʼ u Diosileʼ le baʼaloʼob cu haʼaksic yól maʼc.

20 U baʼax oʼolalil u xuʼulul u mentiʼc le baʼaloʼobaʼ ichil u palal maʼcoʼobeʼ tumen cu cuxtaloʼob baʼaleʼ maʼ tu creertiʼcoʼob, yétel cu náchtaloʼob tiʼ u tohil beh, mu kahóloʼob le Dios cu deber u dzic u yóloʼob tiʼ.

21 Heʼel túnaʼ, quiʼn wáʼalic teʼex le maʼx cu creertiʼc tiʼ Cristoeʼ, wá minaʼan mix humpʼél duda tiʼeʼ, heʼel bucaʼah baʼal bín u kát tiʼ le Tataoʼ tu kabaʼ Cristo bín dzaʼabac tiʼ, letiʼ le promesa cu dzaʼabac tiʼ tulácal, tac tu xul le luʼumaʼ.

22 Tumen heʼel túnaʼ, bey tu yaʼalah Jesucristo u Pal Hahal Dios tiʼ maʼx tu yéyahoʼob le cun pʼaʼataloʼoboʼ, heʼeleʼ, bey xan tiʼ tulácal le yéyaʼanoʼob, tu xiquiʼn le yaʼabach maʼcoʼob: Xeneʼex tiʼ tulácal yókolcab a caʼansiqueʼex in caʼansahilaʼ tiʼ tulácal maʼcoʼob;

23 Le maʼx cu creertiʼc yétel cu yoc haʼeʼ cu salvartiʼcuba, le maʼx maʼ tu creertiʼquiʼ bín túxtaac ca pʼataac ich ehoʼchʼeʼenil.

24 Le heʼelaʼ le baʼaloʼob cun u yeʼes tiʼ le maʼcoʼob cu creertiʼcoʼob: Tiʼn kabaʼeʼ cu hoʼsicoʼob táncab tulácal quiʼsinoʼob, bín u yaʼaloʼob ichil túmben tʼanoʼob, yan u maʼchʼacoʼob canoʼob, wá ca u yukoʼob baʼal cu quínsic maʼqueʼ maʼ tún úchul mixbaʼal tiʼoʼob, cu dzic u kaboʼob yókol kohaʼanoʼobeʼ bín dzaʼacacoʼob.

25 Le maʼx cu creertiʼc in kabaʼ minaʼan mix humpʼél duda tiʼeʼ, teneʼ bín in caʼa aʼal tiʼeʼ tulácal in tʼanoʼob tac xan tu xulil le luʼumaʼ.

26 Heʼel túnaʼ, maʼx heʼ u páhtal u baʼatel tu contra u meyhil Yumtsil? Máx heʼel u páhtal u yaʼalic maʼ hah u tʼanoʼobeʼ? Máx bín líkiʼc tu contra tiʼ tulácal u páhtalil u muk Yumtsil? Máx bín pʼectiʼc u meyahoʼob Yumtsil? Máx bín u pʼect u palaloʼob Cristo? Tuculneʼex, tulácaleʼex teʼex ca pʼectiʼqueʼex le baʼaloʼob u mentmaʼh Yumtsil, tumen yan u haʼakal a wóleʼex yétel yan a xuʼulsaʼaleʼex.

27 Bey túnoʼ, maʼ a pʼectiʼqueʼex maʼ u haʼakal a wóleʼex, yáxeʼ uʼuyeʼex u tʼanoʼob Yumtsil, káteʼex tiʼ c Tataoʼ tu kabaʼ Jesus le baʼaxoʼob kabét teʼex. Maʼ anac teʼex dudaeʼ, baʼaleʼ creerteʼex, cáhseʼex heʼebix úch kinoʼobeʼ, nadzabaeʼex tiʼ Yumtsil yétel tulácal a pucsiʼkaleʼex, meyahteʼex a salvacioneʼex teʼex bey sahaqueʼexoʼ yétel ca quiʼquiʼlanquiʼl tu tánil letiʼ.

28 Anac teʼex naʼatiʼl tu kinil le can ilaʼac baʼax ca betiʼqueʼex; luʼs tiʼ teʼex tulácal kas; maʼ a kátiʼqueʼex mixbaʼal utiaʼal ca a quiʼmaʼccuns a wóleʼex ich kasiʼl, baʼaleʼ káteʼex yétel hach tu hahil a wóleʼex xmaʼ duda ca a wáʼaleʼex maʼ tiʼ le baʼax kasoʼ, beyoʼ ca pátac a meyahtiʼqueʼex le hahil Dios cuxaʼanoʼ.

29 Ilawileʼex a wochaʼeʼex wá maʼ toh a cuxtaliʼ, ilawileʼex maʼ chaʼic a hanteʼex le u sagrado hanal Cristooʼ wá maʼ a pʼatmeʼex a kebaneʼex xaniʼ, baʼaleʼ ilawileʼex a mentiʼqueʼex tulácal baʼaloʼob yétel utsil cuxtal tu kabaʼ Jesucristo u Pal Dios cuxaʼanoʼ, wá bey ca beteʼex maʼntadzoʼ, tac tu xuloʼ, minaan u baʼax oʼolalil a hoʼsaʼaleʼex.

30 Heʼel túnaʼ, quiʼn tʼaniqueʼex bey tán in tʼaniqueʼex ichil quiʼmenoʼobeʼ; tumen in wohél bín anac teʼex in tʼanoʼob.

31 Maʼ a tucultiʼqueʼex kas tiʼn wókol, mix in tata tu yoʼolal maʼ perfectoʼoniʼ, mix le maʼcoʼob dzoʼoc u dzíbtiʼcoʼob antes tiʼ letiʼoʼ, baʼaleʼ dzaeʼex gracia tiʼ Dios, le maʼx tu yeʼesah tiʼ teʼex c baʼax maʼ perfectoaʼ, utiaʼal a caniqueʼex a nohochcunsic a naʼatiʼleʼex maʼs tiʼ c naʼatiʼl toʼon.

32 Heʼel túnaʼ dzoʼoc c dzíbtiʼc le dzíbil tʼanoʼobaʼ heʼebix c naʼatiʼleʼ, tiʼ u dzíbíl Egipcio kexpahaʼan, beyoʼ maʼnahaʼan ichiloʼon huhumpʼítiʼl kexpahaʼaniʼ, heʼebix cu bin c tʼaneʼ.

33 Wá hach chowáctac c laminaoʼobeʼ dzoʼoc c dzíb ichil Hebreo, baʼaleʼ le Hebreo dzoʼoc xan u kexpahal, wá caʼach ca c dzíbt ich Hebreoeʼ behlaʼ maʼ tán a caxtiʼqueʼex mix humpʼél baʼal maʼ dzíbtaan tu beliʼ tiʼ le c dzíbtiʼcaʼ.

34 Baʼaleʼ Yumtsileʼ yohel le baʼaloʼob dzoʼoc c dzíbtiʼcoʼ, yétel mix humpʼél cah yohel bix c tʼan, tu yoʼolal leloʼ letiʼeʼ u dzamaʼh toʼon u modoil dzaʼabal naʼatiʼl tiʼ c tʼanoʼob.

35 Cu dzíbtaal le baʼaloʼobaʼ utiaʼal ca u saccunt c nok tu yoʼolal u kiʼikel le c sucuʼunoʼob tún cuxtaloʼob baʼaleʼ maʼ tu creertiʼcoʼobiʼ.

36 Heʼel túnaʼ, le baʼaxoʼob t dzíboltah tu yoʼolal c sucuʼunoʼob, heʼeleʼ, heʼ u caʼa sut u naʼatiʼloʼob tiʼ Cristo, ca úchuc heʼebix u betiʼc u oracionoʼob tulácal le maʼcoʼob hach maʼalob h cuxlahoʼob teʼ luʼumaʼ.

37 C Yumtsil Jesucristoeʼ ca u dza tiʼoʼob le baʼax cu kátiʼcoʼoboʼ heʼebix cu bin u feil; Dios le Tata cu kaʼahsic le baʼax u prometertmaʼh tu tanah Israel, yétel ca u dza tiʼoʼob humpʼél bendicion minaʼan u xul tu yoʼolal u feil tu kabaʼ Jesucristo. Amen.