1 Ket ita, adtoy, kayatko ti makisarita iti natda kadagitoy tao a naispal, ket no ipalubos ti Dios nga awatenda dagiti balikasko, tapno ammuenda dagiti banag maipapan kadagiti ammada; wen, agsaritaak kadakayo, dakayo a natda iti balay ti Israel ket dagitoy ti balikas nga isawangko:

2 Ammuenyo a kamengkayo iti balay ti Israel.

3 Ammuenyo a masapul nga agbabawikayo, wenno saankayo a maisalakan.

4 Ammuenyo a masapul nga idissoyo dagiti armasyo iti gubat, ket saanyon a ragsaken ti panagayus ti dara, ket saanyo nga usaren manen ida malaksid no ibilin ti Dios kadakayo.

5 Ammuenyo a masapul a maammuanyo ti maipanggep kadagiti ammayo, ket ibabawiyo amin a basol ken kinadakesyo, ket mamatikayo ken ni Jesucristo, nga isu ti Anak ti Dios, ket pinatay dagiti Hudio, ket babaen ti pannakabalin ti Ama nagungar manen, ket iti dayta nagun-odna ti balligi iti tanem; ket kasta met a gapu kenkuana naparmek ni patay.

6 Ket inyegna a mapasamak ti panagungar dagiti natay, ta nasken nga agungar ti tao tapno sumaklang iti pangukoman.

7 Ken inyegna ti pannakatungpal ti pannakasubbot ti lubong, tapno iti dayta asino man a masarakan nga awan mulitna iti sangona iti aldaw ti panangukom maipalubos kenkuana ti panagnaedna iti imatang ti Dios iti pagarianna, nga agkanta nga agnanayon iti panangidaydayaw a makidanggay kadagiti koro dagiti agkankanta iti ngato, iti Ama, ken iti Anak, ken iti Espiritu Santo, a maymaysa a Dios, iti naragsak a kasasaad nga awan patinggana.

8 Ngarud agbabawikayo, ken agpabuniagkayo iti nagan ni Jesus, ket agkammatalekkayo iti ebanghelio ni Jesucristo, a maisaadto iti sangoyo, saan laeng nga iti daytoy a kasuratan ngem iti pay kasuratan a maited kadagiti Gentil manipud kadagiti Hudio, isu ti kasuratan nga aggapunto kadagiti Gentil a maiturong kadakayo.

9 Ta adtoy, naisurat daytoy gapu iti panggep a mamatikayo koma iti dayta; ket no mamatikayo a patienyo met daytoy; ket no patienyo daytoy maammuanyo ti maipapan kadagiti ammayo, ken kasta met dagiti nakaskasdaaw nga aramid a naited babaen ti pannakabalin ti Dios kadakuada.

10 Ket maammuanyo met a dakayo ti natda iti bukel ni Jacob; ngarud dakayo ti naibilang kadagiti tao iti umuna a katulagan; ket no mamatikayo ken ni Cristo, ken mabuniagan, umuna babaen ti danum, kalpasanna ti apuy ken ti Espiritu Santo, a sumurot iti pagulidanan ti Mangisalakantayo, babaen iti dayta nga imbilinna kadatayo, isunto ti mangitag-ay kadakayo iti aldaw ti pannakaukom. Amen.