1. Lutzan luʼ que ayina, Moroni, cxel nkʼoʼna tuʼmal tuʼn tel baj twiʼ storya te nmana, Mormón. Lutzan luʼ, niʼxake cosas chi bel ntzʼibana, aj tzaj tmaʼn nmana wecyʼ.

2. Banttzan, que tbajlenxa aj matij bix nach kʼoj tuj Cumora, lutzan luʼ, i jayetke nefitas cyuʼn lamanitas aj otak chi tzokpaj tuj tnam tcubil kʼij asta cynaj tzaʼnx cytenca.

3. Bix nmana ax o cyim tuʼn cykʼab lamanitas, bixma chin cyajtena njunalxa tzʼibal tiʼj storya tiʼj kʼuchbil te ntanmya, ix lutzan luʼ, maʼ chi cub naj, bix wecyʼ nchin nela twitz tmandamyent nmana. Bix ntiʼ loʼn wuʼna ka chin bel biyoʼna bix ka miʼn.

4. Cyjaʼtzan jluʼ, cbel ntzʼibana bix chi belax weʼwana ke storya tjakʼ txʼotxʼ; bix ntiʼ wajbila tiʼj ti tkal cbajel wiʼja.

5. Lutzan luʼ, oʼ bant cytenke storya luʼ tuʼn nmana, bix oʼ cub ttzʼiban aj tnabil cyiʼj, bix lutzan luʼ, ax icyx wecyʼ jaʼcawla cub ntzʼibana, nokat at tcubix cyuj sleʼw cʼuxbil; per ntiʼ, mix tuj cʼuxbil, tuʼnj njunalxa tina. Oʼ cyim nmana tuj kʼoj, icyxtzaʼn cyakilkaj nxjalya, bix mitiʼke wamigoya jatuma baʼn nxiʼya; bix jteʼ tyemp ctzajal tkʼoʼn Kajaw wecyʼ tuʼn wankʼina, ntiʼ loʼn wuʼna.

6. Lutzan luʼ, maʼ tzicyʼxa cyaj syent abkʼi tul lenxa Kajaw bix Clol.

7. Bix lutzan luʼ, ajke lamanitas maʼ choc lapeʼ tiʼj ntanmya tuʼn cycub, ajke nefitas ma chicyʼ tuj jun tnam bix tuj juntl tnam, tuj jun ligar bix juntl ligar, asta que mi jun cyaj ankʼin; bix matij t-xiʼlen aj cycublen tzʼak; icytzanjo, matij bix nim ma kʼuchj ntanmya, ajke nefitas.

8. Bix lutzan luʼ, tuʼn tkʼab Kajaw oʼ bant j-ajo, bix ajke lamanitas ax nchi kʼojl junke cyiʼj juntlke; bix cyakil tuj tnam ntiʼ ntak jun tuʼmal baʼn masque oʼcx jun tuʼmal nach, nbaj biʼyon bix aj tuʼn tel chicyʼ; bix mi jun loʼn tuʼn jtoj ban tel baj twiʼ kʼoj.

9. Bix lutzan luʼ, ya miʼn chin yolantla cyiʼj, tuʼnj ya miaʼl juntl mas que oʼcxka lamanitas ateʼx bixke alekʼ tuj país.

10. Bix mitiʼ juntl alcye tuʼn toc tzkin tej Dios ax toc sino que oʼcxka txnaʼkʼtzben Jesús, que iten tuj tnam asta tchʼiy nim tnachal, que ntiʼ o tkiy kman tuʼn ten mástl cyxol tnam; bix mijun loʼn tuʼn ka teʼ bixmo tzʼinanka twitz txʼotxʼ.

11. Ix lutzan luʼ, aj nmana bix kina oʼ chi kila, bix oʼ ko tzaj kʼolbeʼna cyuʼn.

12. Bix alcyej ma tcʼam storya luʼ, bixmi ma tzʼel ticʼan cyjaʼw oc t-xiʼ tmaʼn que at tnachal tuj, oc celal tnicyʼ cyiʼj cosas matij cywitzkej jluʼ. Lutzan luʼ, akina Moroni; bix ka jaʼca bant, cxel nyecʼana cyakilka cosas cyeya.

13. Lutzan luʼ, tucʼtzan jluʼ cxel ncoʼlana tuʼn nyolana tiʼj tnam luʼ. A kina tcʼwaʼl Mormón bix aj nmana a elna let tiʼj Nefi.

14. Bix a kina aj cxel ewante storya luʼ te nabil te Kajaw; ajke sleʼw cʼuxbil jatuma chi canetl bix ntiʼ tajblan, nok tuʼn tmandamyent Kajaw. Tunj ax toc o tkʼamanta que mi jun jaʼca tikʼ tuʼn tcanet tbanl tiʼj; bix aj storya nim tajblan, bix ctzajal cyiʼwlaʼn aj cjawatz kʼinte tuʼn tchicʼbat.

15. Tuʼnj mi jun at tipamal tuʼn tjatz tiʼn twitz kʼijlal ka miyaʼ kʼoʼn ma tzaj tuʼn Dios; tuʼnj tajbil Dios tuʼn tbant tucʼ aj tuʼmal tuʼn toc cʼujletkʼa, bixmo baʼn te ojtxa bix cyjaʼtzan tuj nim tyemp tsipan tib tnam tziyin maj tuʼn Kajaw.

16. Bix cyeʼyax aj cjawatz kʼinte cyej cosas luʼ twitz kʼijlal; tuʼnj chelatz tuj klolj asta tuj spicyʼan, según tyol Dios: icytzanjo, chi jawatz tuj txʼotxʼ bix chi kopal tuj klolj bix chi pol tuʼn tel cynicyʼ tnam tiʼj; bix cbantel tuʼn tipamal Dios.

17. Bix ka atka ttzacaj, akatzan ttzacaj xjaljo. Ix lu luʼ, ntiʼ loʼn kuʼn ka at ttzacajil; atzan te Dios loʼn tuʼn cyakilke cosas. Cyjaʼtzan jluʼ, cwentan oc tib aj ma tzʼel ticʼan nyaʼyaj tten tuj tnachal tuʼn t-xiʼ tuj kʼakʼ te infierno.

18. Bix alcyej ma txiʼ tmaʼn: yecʼantza wecyʼ, mu octzan chi cabnela, cwentan oc tib, nyaʼyaj nxiʼ tsamaʼn aj xjan oʼ tmanta Kajaw.

19. Tuʼnj lutzan luʼ, alcyej ma tzʼoc ten xtisal tucʼ tnachal, ax tucʼtnachal cocal tuj xtis; según ajke tbinchben, ax icyx chojbil te; aj tuʼmal cyjaʼw alcyej ma caban juntl tuʼn, ax oc ccabanel tuʼn Kajaw.

20. Lutzan luʼ aj ncymanta Tuʼjal: Aj xjal mitiʼ tuʼn tcaban juntl tuʼn mix tuʼn t-xtisan; tuʼnj wewa jwisyo, chitzan Kajaw, bix ax wecyʼ aj t-xel, bix a kina chin chojal.

21. Bix alcyej ma takʼ kʼoj bix moybil tiʼj tbinchben Kajaw, bix tiʼj tnam te tziybil tucʼ Kajaw, que a jajo te Israel, bix ma txiʼ tmaʼn: Cbel kkʼuchan tbinchben Kajaw, bix cbelax naj tiʼj tcʼuʼj Kajaw aj tziybil bann tuʼn tucʼ ja te Israel, aj xjal ajo taʼ tuj tnachal jaca tuʼn tkʼuchat bix tuʼn t-xiʼ kʼot tuj kʼakʼ;

22. Tuʼnj ajke tnabil Kajaw bann tiʼj, cucx cxel asta oc cyel twitz cyakilkaj ttziybil.

23. Chi xnakʼtzana wena cyiʼj yol aj aun tyempc kʼunj tuʼn Isaías. Luluʼ, milay tuʼn tcub ntzʼibana. Icytzanjo, lutzanluʼ, cxel nmaʼna que alcyekaj sant oʼ chulxa nej nwitz, oʼ tzʼoc cyetzan txʼotxʼ lu, cxel cytxʼolbaʼn tuj schʼibil, icytzanjo, asta max tuj puj cxel cytxʼolbaʼn tuj schʼibil te Kajaw; bix n-ankʼin Kajaw, cpol tcʼuʼj tiʼj aj tziybil bant tuʼn cyucʼal.

24. Bix tekʼa loʼn tuʼn ajke t-orasyon, bix loʼn tuʼn que i bant te baʼn cye termano. Bix loʼn tuʼn aj cyocslabil, tuʼnj tuj tbi iyucchke witz; bix tuj tbi o chi nikʼan txʼotxʼ; bix nok tuʼn tipamal tyol bant tuʼn cycub kʼuchj pres; icytzanjo, mix jorna ncʼant wena takʼ tnachal cyiʼj, mixke txcup chol xjal, mixke labaj, nok tuʼn tipamal tyol.

25. Bix lutzan luʼ ajke t-orasyon ax oʼ chi jax te baʼn tej aj otak txiʼ tkʼoʼn Kajaw tuʼn tjatz tiʼn twitz kʼijlal ajke cosas luʼ.

26. Bix mijun baʼn tuʼn t-xiʼ tmaʼn que miʼn chi jatz, pwes ocla cbantel, tuʼnj oʼ tmanta Kajaw; tuʼnj tuj txʼotxʼ chi jawatz tuʼn tkʼab Kajaw, bix mijun baʼn tmakan; bix chi jawatz tuj jun tyemp jatuma ckʼunjtel que oʼ chi weʼ tuʼn cybant binchben nim cyipamal; bix lonxa icytzanj cy-yolal jun cyiʼj cyimna.

27. Bix atzanj kʼij, aj cychicyʼel ke sant chischʼil wena te Kajaw, nok tuʼnj tuʼmal moybil tuj ewj bixke binchben tuj klolj.

28. Icytzanjo, chi jawatz tuj kʼij oc tel icʼat tipamal Dios; bixke glesya otak chi ẍwaʼjax bix otak cheʼx mal tuj nimbil te cyanma; icytzanjo, tuj kʼij ajke kʼil twitz bixke maystra cye glesya nok ganaka tuʼn nimbil te cyanma, asta tuʼn cypon tuj tuʼmal tuʼn cykʼojan cyiʼjkaj teʼc tiʼj cyex cye glesya.

29. Icytzanjo, chi jawatz tuj kʼij oc tkʼunj que tzul kʼakʼ, kʼakab bix sib cyuj tnam stranjer;

30. Bix oc cy-yoltel tiʼj kʼoj, oc ckʼunjtel tiʼj kʼoj bix cyaknab cyuj nim ligar.

31. Icytzanjo, chi jawatz tuj kʼij jatuma ctel nim tuj najbil twitz txʼotxʼ cyakil; ctel biʼyon, alkʼan, nokten, slaʼjan, tnachal tuʼn tbant tucʼ xuʼj bix tucʼ xinak bix nicyʼca wikal twitz il cye taʼw; jatuma nimka chi kʼamal tiʼj cyjaʼw; Bant jluʼ tuʼna, bixmo cbantel jcyin tuʼna, bix ntiʼ tajbil tiʼj, tuʼnj tujxa twiʼpan kʼij oc cjawil kʼin tuʼn Kajaw alcyej ma bant tuʼn, per ¡Becyʼbil cywitz, tuʼnj teʼ tuj tcʼayal, bix tuj takʼal tnachal!

32. Icytzanjo, atzanjo tuj kʼij aj otak chi bant glesyas cxel cymaʼn: Cytzaja wiʼja, que tuʼn tlaj cypwaka oc chi najsetal twitz cyila.

33. ¡Aya tnam nach, binchal twitz il bix cyiw tbakal twiʼ! ¿Ti kuʼn ma bant glesyas cyuʼna tuʼn tcyaj cyganara? ¿Ti kuʼn maʼ tzʼel cyiʼna tiblal tyol te sant Dios, ajo ckʼol sentens tiʼj cyanmiya? Lutzan luʼ, chi tencaya ximal tiʼj aj ntyeʼcʼan Dios; pwes cpol tyemp, tuj kʼij ajo, aj oc tel twitz cyakilkaj cosas luʼ.

34. Lutzan luʼ, oʼ tzaj tyecʼan Dios wecyʼ ajke cosas matij bix cyeʼyaxka tiʼj aj cbajel, tuj kʼij oc cyjaw canetkej cosas ajo cyxola.

35. Lutzan luʼ, nchin yolana lonxa icytzan ateʼya nwitza, bix min tzʼinankaya. Per lutzan luʼ, oʼ tzaj tyecʼan Jesucristo wecyʼ, bix loʼn wuʼna aj cybinchbena.

36. Bix loʼn wuʼna que nchi beta según nimbil te cyanmiya; bix ntiʼke oʼcx niʼcʼxa ntiʼ ncheʼx mal tuʼn nimbil te cyanma, tuʼn cypon tuj tuʼmal tuʼn tajblan xbalan kʼinan cyuʼna bix tuʼn cypona tiʼj tuʼn toc cykʼojleʼna, xcyʼakbil, tnachal, moybil bix nicyʼca wik tnachal. Bix aj cyglesya, icytzanjo, ntiʼ toc tajlal, maʼ chi ẍwajax nok tuʼn nimbil te cyanmiya.

37. Tuʼnj lutzan luʼ cʼujlaʼn pwak cyuʼna, aj cykinmaʼbla, aj cyxbalana nim twiʼ bix aj tiblal cyglesya, más cʼujlaʼn cyuʼna twitz tuʼn toc cycʼujlaʼna ke meba, ke nim cyajbil tiʼj tijil, ke yab bixkej nchi apan taʼw.

38. ¡Akaya najna, xmeletzʼ, maestros, nxiʼ cycʼayan cyiba tuj tnachal! tiʼ kuʼn maʼ baj cyẍwaʼjsana aj Glesya sant te Dios ¿Ti kuʼn nchi jaw chʼiwbaya tiʼj tuʼn t-xiʼ cyiʼna tbi Cristo cyibaja? Ti kuʼn que tuʼntlaj aj schʼibil te twitz txʼotxʼ ntiʼ nxiʼ cynaʼna tiʼj que mas matij tipamal jun tchi-al miʼn tzʼel baj twiʼ, twitz jun taʼw que mi jtojx tuʼn tel baj twiʼ?

39. Ti kuʼn nbaj cyachana aj jun ntiʼ tankʼbil, sinbargo, ncykiya que aj jun n-el tcʼuʼj, jun nim tajbil tiʼj tijil, sliʼnc tiʼj, yab, bix n-apan taʼw nnoc lakʼeʼ cytxlaja, bix ntiʼ nxiʼ cybiʼna?

40. Icytzanjo, ti kuʼn nbaj cybinchana twitz cyila nim taʼw tuj ewj tuʼn tcyaj cyganara, bix nxiʼ cykʼoʼna ligar cyeke meba xuʼj bixke cʼwaʼlbaj meba tuʼn cy-okʼ twitz Kajaw, bix que max twitz txʼotxʼ aj tchicyʼel cyman bix cychmil nchi kanan tiʼj t-xel te kajaw tibaj cywiʼya?

41. Lutzan luʼ, aj spada te xtis yoʼl cyibaja; bix jorat tzul kʼij jatuma aj cychicyʼel sant cxelal tuʼn cyiʼja, tuʼnj miʼn tzicyʼxtl tuʼn, tuʼn tapanta aj schʼiʼbil tuj nimtl tyemp.