Capítulo 9
Tcawbil Moroni cyeke miyaʼ ocslaʼn cyuʼn. Aj tyol ax toc tiʼj Cristo. Toc tbi egipcio binchaʼntl te acʼaj aj cyyolbil nefitas.
1. Bix jaʼla ax chin yolila cyiʼjkaj ntiʼ ocslaʼn cyuʼn tiʼj Cristo.
2. Lutzan luʼ, ¿Oc cocax cyocslaʼna tiʼj kʼij oc tul lol keʼ— luluʼ, oc tjaw canet Kajaw, icytzanjo, aj kʼij matij jatuma aj txʼotxʼ oc celal baj kʼojl icytzan jun tiʼ tkal baltzʼiʼn tiʼj jun xcoʼt, bixke tiʼchak tkal at tuj oc chelal txʼitl tuʼn taw cyak, icytzanjo, aj kʼij ajo chi xel kʼiʼna twitz tNeʼl Dios — tons cxeltzan cymaʼna que ntiʼ Dios?
3. ¿Oc cwel cyeʼwna Cristo, bixmo jaʼca cyila aj tNeʼl Dios? Cha naʼnxa tiʼj jaʼcpa chiankʼina tucʼal, que ax toc at cypaja? ¿Chi xiʼmanxa tiʼj jaʼca chitena tuj tzalajibil, oc cyankʼina tucʼ aj xjal sant j-ajo ix toc taʼw tiʼj cyanmiya que akeya at cypaj tiʼj tbajlen cybetzʼana ke tley tuj cyakil tyemp?
4. Lutzan luʼ, ax toc cxel nmaʼna cyeya que más mebakaya, oc cyankʼina ttxlaj Dios Sant bix ax toc, aj oc txiʼ cyyecʼana cynachala twitzkʼa, que ka ma chankʼina tucʼ anma taʼtuj sentens tuj infierno.
5. Tuʼnj lutzan luʼ, aj oc t-xi yecʼat cytzʼlincbila twitz Dios, bix ax icyx ttzalajibil Dios, bix aj tsantal Jesucristo, nim ccʼantel jun tkan kʼakʼ miʼn yupj cyucʼala.
6. Cyajtz maktzʼaja, pwes, akeya miyaʼ ocslal, cyajtz maktzʼaja tucʼ Kajaw; chi txocana axxax toc te Mambaj tuj tbi Jesús, tuʼntzan cytena miyaʼ tuj ẍwaʼj, tuj tbanal, cyeʼyax kaya bix sakkeya, tuj aj matij bix twiʼpan kʼij, pwes ya otak chi baj txʼajoʼna tuʼn tchicyʼel Neʼl.
7. Bix ax nchin yolana cyucʼala, ajke nnel cyicʼana aj nkʼunj tuj ewj tuʼn Dios, bix nxiʼ cymaʼna que oʼ tzʼel baj twiʼjo, que ntiʼtlke nchi kʼunj bix nchi yecʼat tuj ewj, mixkej jun tyemp nchi kʼunj, mixke oyaj, mixke kʼanbil, mix tuʼn cyyolan cyuj cyyol, mix tuʼn tel cynicʼ tiʼj yolbil te juntl.
8. Lutzan luʼ, cxel nmaʼna cye alcyej ma tzʼel ticʼan kej cosas ajo, mi tiʼ loʼn tuʼn aj bangelyo te Cristo; icytzanjo, minaʼx tjaw tschʼiʼn ajke tuʼjal; bix ka oʼ chi jaw tschʼiʼn, nti nnel tnicyʼ cyiʼj.
9. Pwes ¿Ntiʼ njaw kschʼiʼn que Dios axjo te ew, te jaʼla bix te jun majx, bix aj te tiʼj ntiʼ tuʼn tmeltzʼaj mix t-xlecal tuʼn tmeltzʼaj?
10. Bix jaʼla, ka oʼ txiʼ cyxiʼmana tiʼj jun dios nmeltzʼaj, bix al iʼj nmeltzʼ aj t-xlecamal, tons oʼ txiʼ cyxiʼmana tiʼj jun dios aj jun dios miyaʼ tuʼn cybant binchben nim tipamal.
11. Per lutzan luʼ que cxel nyecʼana cyeya jun dios binchal nim tipamal, icytzanjo, aj Dios te Abrahán, bix aj Dios te Isaac, bix aj Dios te Jacob; bix ax Dios aj binchanta cyaʼj bix txʼotxʼ, bix tzaʼnx cytenca cosas at cyuj.
12. Lutzan luʼ, tuʼnkʼa tzaj tkʼoʼnkʼa Adán, bix tuʼn Adán cub tzʼak xjal. Bix nok tuʼn tlaj tcublen tzʼak xjal, ul Jesucristo, icytzanjo, aj Mambaj bix Cʼwaʼlbaj; bix tuʼn Jesucristo ul colbil tiʼj xjal.
13. Bix tuʼntzan tlaj aj colbil tiʼj xjal, aj ul tuʼn Jesucristo, ncheʼx kʼit te juntl el ttxlaj Kajaw; icytzanjo, tuʼntzanjo nchi colet cyakilka xjal, tuʼnj tcyimlen Cristo ntakʼ aj juntl el itzʼbil, que tuʼnjo ntzaj colbil tiʼj jun witzicyʼ e junmajx, al iʼjal cyakilka xjal chi jawal cyʼisj, nok tuʼn tipamal Dios, oc tkʼajt chun; bix chelatz ke matij, tzanx nuch, bix chi poltzan twitz xtisbil, coletnaka bix libraka tiʼj takʼal camacy te junmajx, nok oʼcx jun camacy te xumlalbaj.
14. Tons octzan ckʼunjtel jwisyo te Sant cyibaj; tons atzan tyempjo aj taʼ tuj nach, ax tuj nach ctel bix aj tbanal cucx cxel tiʼn tuj t-xtis; alcyej ntzalaj cucx ctel tuj tzalajibil, bix alcyej taʼ tuj najna ax ctel tuj najna.
15. Bix jaʼlatzan, tzaʼnx cytencaya ajke otak txiʼ cyxiʼmana tiʼj jun Dios milay bant binchben nim tipamal tuʼn, waja txiʼ nkaʼnna cyeya: ¿Oʼ chicyʼ baj ajke cosas maʼ chin yolana tiʼj? ¿Maʼpala pon tuʼn tel baj twiʼ? Lutzan luʼ, cxel nmaʼna que naʼx; bix naʼx txiʼ tcoʼlan Dios tuʼnj ka miyaʼ Dios binchal nim tipamal.
16. Lutzan luʼ, ¿Miyaʼ cyeʼyaxka tuj kwitz ajke cosas oʼ chi bant tuʼn Dios? Icytzanjo, bix alcye jaʼca tzʼel tnicyʼ cyiʼj binchben cyeʼyax tuʼn Dios?
17. Alcye ckʼamal tiʼj que miyaʼ jun binchben nim tipamal que nok tuʼn tyol at cyaʼj bix txʼotxʼ; que nok tuʼn tyol baj binchaʼn xjal tiʼj tpuʼjal txʼotxʼ, bix nok tuʼn tipamal tyol ibant binchben nim cyipamal?
18. ¿Bix alcye ckʼamal te que ntiʼ xbant nimke matij binchben nim cyipamal tuʼn Jesucristo? Bix ax atke nim binchben matij ibant tuʼn cykʼab txnaʼkʼtzben apóstol.
19. Bix katzan ibant binchben nim cyipamal, ¿Titzan kuʼn oʼ cyaj tkʼoʼn Dios tuʼn mi toc Dios cye binchben nim cyipamal; bix cucx toc te jun Xjal milay meltzʼaj? Lutzan luʼ, cxel nmaʼna que mi jtojx tuʼn tmeltzʼaj; nokattzan icyjo, tons jaʼca txiʼ tcoʼlan tuʼn toc te Dios; mas nlay txiʼ tcoʼlan tuʼn toc te Dios, bix ajo a jun Dios cye binchben nim cyxiʼlen.
20. Bix aj tuʼmal ti kuʼn nxiʼ tcoʼlan tuʼn cybant binchben nim tipamal cyxol cycʼwaʼl xjal, tuʼntzanj nchi cub tzʼak tuj ntiʼ cyocslabil, bix nnel cyiʼn cyib cyiʼj be jikan bix ntiʼ cytzkiʼn Dios aj al iʼjal tuʼn t-xiʼ keʼ cycʼuʼj.
21. Lutzan luʼ, cxel nmaʼna que alcyej ma tzʼocx tocslaʼn tiʼj Cristo, bix miʼn tuʼn tbaj tcʼuʼj tiʼj, nok nicyʼpunx txiʼ tkaʼnan te Mambaj tuj tbi Cristo, oc ctzajal kʼoʼn te; bix aj tziybil ajo nxiʼ cyxola cyakil, asta max ttxaʼnla txʼotxʼ.
22. Tuʼnj lutzan luʼ, cyjaʼtzan tma Jesucristo, aj tCʼwaʼl Dios, cyeke txnaʼkʼtzben aj attak tuʼn cycyaj ten, icytzanjo, bix ax cye tzaʼnx cytenca txnaʼkʼtzben, ocybi xjal cyakilxa; Cyxiʼya tuj cyakil twitz txʼotxʼ bix cypacbanxa bangelyo cye tzaʼnx cytenca xjal;
23. Bix alcyej ma txiʼ tocslaʼn bix ma biyan, oc ccoletal, bix alcyej ntiʼ ma txiʼ tocslaʼn oc cxel tuj sentens.
24. Bix ajke techaklil cucx chi bel yecʼat cyekej cxel cyocslaʼn: Tuj nbicyʼa celax cylajoʼn nicyʼca demonio; oc chi yolal cyiʼj acʼaj yol; cjawal cycʼuʼn labaj, bix ka matxiʼ cycʼaʼn jun ti tkal tuʼn cynaj mintiʼ cbajel cyiʼj; cbel cykʼoʼn cykʼab cyibaj yab, bix chi kʼanattel.
25. Bixla cyej ma txiʼ tocslaʼn tiʼj nbicyʼa, bix miʼn baj chʼin tcʼuʼj, cxel nkʼoʼna cyakil nyola ax toc te, banwtla max ttxaʼnla txʼotxʼ.
26. Bix lutzan luʼ, ¿Alcyej jaʼca tzicyʼx tuʼn aj tbinchben Kajaw? ¿Alcye jaʼca cuʼ teʼwan tyol? ¿Alcye cjawal weʼ tiʼj tipamal Kajaw matij wena? ¿Alcye celal icʼan te tbinchben Kajaw? Alcye celal icʼan cye tcʼwaʼl Cristo? Chi tencaya ximal te, cyakilkaya aj nnel cyicʼana tbinchben Kajaw, tuʼnj oc cjawal naj cynabila bix chi cymela.
27. Cyjaʼtzan jluʼ, miʼn tzʼel cyicʼana bix miʼn jaw naj cynabila, tnejal cybinxa tyol Kajaw, bix cykananxa te Mambaj, tuj tbi Jesús, ajke cosas at til cyeya. Miʼn baj cycʼuʼja, mas cyocslanxa; bix tzaj keʼ cyuʼna icytzan cyuj kʼij ojtxa, bix cytzaj lakʼeʼya tiʼj Kajaw tucʼ cyakil cyanmiya, bix chakʼnana tiʼj cyexa cycolbila tucʼ tchi bix luʼlbil twitzkʼa.
28. Ten cynabila cyiʼj kʼij oc toc preba cyiʼja; cyiʼn ela nicyʼca tnachal cyiʼja; miʼn txiʼ cykaʼnna tuʼn tkʼajen cyajbila tiʼj cychibajala, sino que cykananxa jun tuʼmal cyij, tuʼntzan mi t-xiʼ cykʼon cyiba tiʼj jun tnachal tuʼn dyablo, sino que tuʼn t-xiʼ cykʼoʼn cyibaʼ te Dios ax toc n-ankʼin.
29. Cycwentan oc cyiba tuʼn mi cybiyana aj nyaʼ tuʼmal; ten cycwenta tuʼn mi cyoc tena tiʼj sacramento te Cristo miyaʼ ax toc, tnejal chi binchana tiʼj tuʼn cybant cosas cyuʼna tuj tbanal, bix tuj tbi Jesucristo, aj tcʼwaʼl Dios n-ankʼin; bix ka icy ma bant cyuʼnajo, bix ka baʼnkaya asta oc tjapan baj twiʼ mi jun tuʼmal tuʼn cyel icʼana.
30. Lutzan luʼ, nchin yolana lonxa icytzan nchin yolana cyxol cyimna; tuʼnj loʼn wuʼna cye cxel cybiʼna nyola.
31. Miʼn chinx cykʼoʼna tuj sentens tuʼn tlaj nnachila, mix nmana tuʼn tlaj te, mixkej aj oʼ chi tzʼibanxa tnejal twitz; más baʼn, cykʼonxa chjonta te Dios, que oʼ tzaj tyecʼan knachala, tuʼntzan tbant cyuʼna tuʼn cyoca más nim baʼn kwitza kecyʼ oʼ koca.
32. Bix lutzan luʼ, oʼ chi cub ktzʼibana ajke storya luʼ, ax loʼn kuʼna, tuj knabila, ix kyola a tbi kuʼna Egipcio binchan juntl el; bix oʼ cheʼx kkʼoʼna, bix oʼ chi cub kmeltzʼuʼna ax tzaʼn koyolana.
33. Bix nokat mas tijtlekej kplanchtla, owla cub ktzʼibana tuj Hebreo; per ax oʼ cub kmeltzʼuʼna aj Hebreo; bix nokattzan cub ktzʼibana tuj Hebreo, lutzan luʼ, ntiʼwla ma canet ttzacaj kstorya cyuʼna.
34. Per loʼn tuʼn Kajaw ajke cosas oʼ chi cub ktzʼibana, bix mijun tnam loʼn kyolbil tuʼn; cyjaʼtzan jluʼ, oʼ chi bant tuʼmal tuʼn, tuʼn t-xi kʼot cyuj txkantl yol.
35. Bix nchi cub tzʼibatj cosas luʼ tuʼn ttxʼajet kxbalana tiʼj cychicyʼel kermaniya aj oʼ chi cub tzʼak tuj ntiʼ ocslaʼn Jesucristo cyuʼn.
36. Bix lutzan luʼ, ajke cosas o kajbecyʼa cyiʼj kermaniya, icytzanjo, bix aj tuʼn taʼjal tuj acʼaj aj cynabil tiʼj Cristo, junx taʼ tucʼ cy-orasyon cyakil sant oʼ ch ankʼin tuj tnam.
37. Bix tzaj tkʼoʼn Jesucristo mojtzabil tiʼj cy-orasyon según aj cyocslabil; bixj Dios aj Mambaj pon tiʼj tcʼuʼj aj o bant tiʼj tuʼn tucʼ ja te Israel, bix chi tzaj tcyʼiwlaʼn te junmajx según cyocslabil tuj tbi Jesucristo. Icytzan tenjo.