1 Afei emi, Moroni, merekyerɛw dza muhu dɛ oye; na merekyerɛw dze ama m’enuanom Lamanfo na mepɛ dɛ wohu dɛ ber a woyii Christ ne mbaa ho nsɛnkyerɛdze kyerɛe no, bɛyɛ mfe ahaanan eduonu na no mboree botwaa mu koree ana.

2 Na sɛ mekã nsɛm kakra bi a ɔbɛyɛ afotu ama hom wie a mobɔsɔw dɛm kyerɛwsɛm yi ano.

3 Hwɛ, mutu hom fo, dɛ sɛ hom kenkan dɛm ndzɛmba yi, na sɛ ɔyɛ Nyame ne nyansaa dɛ hom kenkan a, hom nkaa mbrɛ Ewuradze n’ehumbɔbɔr a ɔwɔ ma adasamba no tse, fitsi ber a wɔbɔɔ Adam mpo dze besi ber a hom nsa bɛkã dɛm ndzɛmba yi na hom adwendwen ho wɔ hom akoma mu.

4 Na ber a hom nsa bɛkã dɛm ndzɛmba yi no, mutu hom fo dɛ hom mbisa Nyankopɔn, Onnyiewiei Egya no wɔ Christ ne dzin mu, dɛ sɛ dɛm ndzɛmba yinom nnyɛ nokwar a; na sɛ hom dze nokwar akoma bisa, pra hom akoma mu, na hom nya gyedzi wɔ Christ no mu a, ɔnam Sunsum Krɔnkrɔn no tum do bɛda nokwar a ɔwɔ mu no edzi akyerɛ hom.

5 Na ɔnam Sunsum Krɔnkrɔn no tum do, hom botum ehu nokwar a ɔwɔ ndzɛmba nyinara mu.

6 Na adze biara a ɔyɛ papa no si pi na ɔyɛ nokwar; dɛm ntsi, biribiara nnyi hɔ a ɔyɛ papa a okwetsir Christ, mbom ɔgye to mu dɛ ɔwɔ hɔ.

7 Na ɔnam Sunsum Krɔnkrɔn no tum do, hom bohu dɛ ɔwɔ hɔ; dɛm ntsi mutu hom fo dɛ mma hom mmpow Nyankopɔn no tum no, na ɔdze tum yɛ edwuma dɛ mbrɛ adasamba hɔn gyedzi tse no, ɔtse dɛmara ndɛ nye ɔkyena, dze kesi afebɔɔ.

8 Na mutu hom fo bio, m’enuanom, dɛ mma hom mmpow Nyankopɔn n’akyɛdze, na ɔdɔɔ sõ, na ne nyina fi Nyame kor noara. Na dɛm akyɛdze yi nam akwan horow pii do dzi dwuma; na mbom ɔyɛ Nyame kor noara na odzi dwuma wɔ ne nyina mu; na Nyankopɔn no Sunsum na ɔda no edzi kyerɛ nyimpa ma ɔyɛ mfaso ma hɔn.

9 Na hwɛ, Nyankopɔn dze no Sunsum no ama nyimpa kor dɛ ɔnkyerɛkyerɛ enyansasɛm;

10 Na Sunsum kor noara so ɔdze ama kor so dɛ ɔmfa nkyerɛkyerɛ nyimdzee.

11 Na Sunsum kor noara so dze gyedzi kɛse ma kor; na kor so ɔma no ayarsa akyɛdze.

12 Na bio, obi so ɔdze ma no ama ɔdze aayɛ etumdze akɛse;

13 Na bio, obi so ɔdze ma no ama ɔdze aahyɛ nkɔm wɔ ndzɛmba nyina ho;

14 Na bio, obi so ɔdze ma no ama ɔdze eehu sor abɔfo nye esunsum a wɔsom;

15 Na bio, obi so, kasa horow nyinara.

16 Na bio, obi so, kasa horow na kasa fofor ahorow ne nkyerɛase.

17 Na Christ no Sunsum do na dɛm akyɛdze yi nyina nam ba; na ɔma nyimpa biara dodow biara dɛ mbrɛ ɔpɛ.

18 Na mu tu hom fo, m’enuanom adɔfo, dɛ hom nkaa dɛ akyɛdze biara a oye no fi Christ hɔ ba.

19 Na mu tu hom fo, m’enuanom adɔfo dɛ hom nkaa dɛ ɔtse dɛm ndeda, ndɛ na afebɔɔ, na dɛ dɛm akyɛdze yi a makã ho nsɛm nyinara no, a ɔyɛ sunsum mu adze no, mbertsentsen a wiadze da ho wɔ hɔ yi worinnyi no akwa da, gyedɛ ɔnam adasamba hɔn ekyingye do.

20 Dɛm ntsi, ɔwɔ dɛ gyedzi ba; na sɛ gyedzi nya ba a nna ɔwɔ dɛ enyidado so ba; na sɛ enyidado nya ba a ɔwɔ dɛ ayamuyie so ba.

21 Na gyedɛ hom nya ayamuyie ɔno wonnkotum agye hom nkwa wɔ Nyankopɔn n’ahenman no mu; dɛmara so na sɛ hom nnyi gyedzi a wonnkotum agye hom nkwa wɔ Nyankopɔn n’ahenman no mu; nna sɛ hom nnyi enyidado so a hom runntum nnya nkwagye.

22 Na sɛ hom nnyi enyidado a nna ɔwɔ dɛ hom nya abagura; na osian emumuyɛ ntsi na abagura ba.

23 Na Christ kãa no nokwar mu kyerɛɛ hɛn egyanom dɛ: Sɛ hom wɔ gyedzi a hom botum ayɛ ndzɛmba a ohia nyinara ama me.

24 Na afei mekasa kyerɛ asaase n’ano n’ano nyinara dɛ sɛ da bi ɔba no dɛ Nyame no tum nye n’akyɛdze yew wɔ hom mu a, nna osian hom ekyingye ntsi.

25 Na sɛ ɔba no dɛm a adasamba ndue; na obiara nnyi hom mu a ɔyɛ dza oye, oho, kor mpo nnyi hɔ. Osiandɛ sɛ nyimpa kor wɔ hom mu na ɔyɛ dza oye a, ɔdze Nyame no tum nye n’akyɛdze bɛyɛ edwuma.

26 Na hɔn a wobeyi dɛm ndzɛmba yinom akwa na woewu wondue, osiandɛ wobowu wɔ hɔn bɔn mu, na worunntum nngye hɔn nkwa wɔ Nyankopɔn n’ahenman mu; na mekã iyi dɛ mbrɛ Christ ne nsɛm no se; na minndzi ator.

27 Na mu tu hom fo ma hom akaa dɛm ndzɛmba yi; na mber no reba ntsɛm a hom bohu dɛ minndzi ator, na hom bohu me wɔ Nyankopɔn n’asɛndzipon hɔ; na Ewuradze Nyankopɔn bɛse hom dɛ: Ana mannda me nsɛm edzi annkyerɛ hom, wɔ dza dɛm nyimpa yi kyerɛwee no mu, tse dɛ mbrɛ obi retsẽatsẽa mu fi ewufo mu, nyew, tse dɛ mbrɛ obi rekasa fi huntuma mu mpo!

28 Meda dɛm ndzɛmba yi edzi dze hyɛ nkɔnhyɛ nyinara mã. Na hwɛ, obefi daapem Nyankopɔn n’anomu epue; na n’asɛm bohwira mu efi ebusuasantsen kesi ebusuasantsen kor so do.

29 Na Nyankopɔn bɛma hom ehu dɛ dza makyerɛw yi yɛ nokwar.

30 Na mutu hom fo bio dɛ hom mbra Christ hɔ, na hom nsuo akyɛdze pa nyinara mu yie, na mma hom mmfa hom nsa nnkã akyɛdze bɔn anaa dza ɔyɛ fĩ.

31 Nyan, na soɛr fi huntuma mu, O Jerusalem; nyew, na hyɛ wo ntar fɛɛfɛw, O Zion babaa; hyɛ wo stake horow no dzen na tserɛw w’ahẽ mu afebɔɔ, amma w’enyim enngu ase bio, ama Onnyiewiei Egya no n’ahyɛmu a ɔnye wo dzii no aahyɛ mã, O Israel fifo.

32 Nyew, hom mbra Christ hɔ, na hom ndzi mu wɔ no mu, na hom mpow dza ɔnnyɛ Nyame su nyina; na sɛ hom pow dza ɔnnyɛ Nyame su nyina na hom dze hom ahom nye hom adwen nye hom ahoɔdzen nyina dɔ Nyankopɔn a, nna n’adom bɔdɔɔ sõ wɔ hom do, na ɔnam n’adom no do hom edzi mu wɔ Christ mu; na sɛ ɔnam Nyankopɔn n’adom do hom dzi mu wɔ Christ mu a, hom runntum mmpow Nyankopɔn no tum no.

33 Na bio, sɛ ɔnam Nyankopɔn n’adom do hom dzi mu wɔ Christ mu, na hom ammpow no tum a nna hom nam Nyankopɔn n’adom a ofi Christ no bɔgyaa a wɔkãa gui dza ɔtseew homho wɔ Christ mu, ɔyɛ ahyɛmu a Egya no nye hom dzii a hom benya hom bɔnfakyɛ ma hom bɛyɛ krɔnkrɔn a nkekãa biara nnyi ho.

34 Na afei menye hom ridzi nkra, hom nantseyie. Ɔrennkyɛr na makɔhom wɔ Nyankopɔn ne paradise no mu ekodu dɛ mo sunsum nye me nyimpadua bɛsan akã abɔmu ayɛ kor, na wɔdze me afa wimu konyimdzi mu, ma menye hom ebehyia wɔ Jehovah kokroko, Onnyiewiei Ɔtsɛmbuafo no a obu enyikamfo nye ewufo atsɛn no n’enyigye asɛndzipon no enyim. Amen.