1 Kunantaq, noqa Moroni huk chikanta qelqani allin rikch’ariwasqanta; wawqeykuna lamanitakunamantaq qelqani. Cristoq hamusqanmanta señal qosqa kasqanmanta tawa pachak ishkay chunka watamanta aswanña pasasqanta yachanankutan munayman.

2 Kay qelqakunatataq intuykusaq, qankunaman anyakuypi chikan simikunata rimarisqay pataman.

3 Qankunata anyakuyman, kay imaymanakunata ñawinchaqtiykichis, Yayapi kay ñawinchanaykichisqaq allin yuyay kanqa chayqa, Adan kamasqa kasqanmantapacha, kay imaymanakunata chaskinaykichis p’unchawkama runakunaq wawankunawan imayna khuyapakuq Wiraqocha kasqanta yuyarinaykichispaq; soqoykichispitaq kayta yuyaymanaychis.

4 Kay imaymanakunata chaskiqtiykichistaq, Wiñay Tayta Yayata, Cristoq sutinpi tapunaykichista anyaykichisman, manachus cheqaq kay imaymanakuna kasqanmanta; cheqaq sonqowan tapunkichis, cheqaqtapuni munaspa, Cristopi iñispa chayqa, Paymi chaypa cheqaqninta yachachisunkichis Qollanan Nunaq atiyninwan.

5 Qollanan Nunaq atiyninwantaq, llapa imaymanakunaq cheqaqninta yachayta atinkichis.

6 Imapas allin kaqqa, chaninmi cheqaqtaqmi; chhaynaqa, manan imapas allin kaqqa Cristota mananchanchu, ichaqa Pay kasqantan reqsichin;

7 Qollanan Nunaq atiyninwan Pay kasqanta yachanaykichispaq; chhaynaqa, qankunatan anyaykichis Yayaq atiyninta mana mananchanaykichispaq; atiywanmi Pay llank’an, runakunaq wawankunaq iñiyninkuman hina, kaqllataq kunan p’unchawpas, paqarinpas wiñay-wiñaypaqpas.

8 Yapamantataq anyakuykichis wawqeykuna, Yayaq qoyninkunata ama mananchanaykichispaq; askhan qoyninkuna, kaq Yayallamantataqmi hamunku. Askha manerakunapitaqmi kay qoykuna qokun, ichaqa kaq Yayallan llapanpi llank’an; Yayaq Nunanpa watukuyninwantaq runakunaman qosqa, paykunapaq allin kananpaq.

9 Hukman Yayaq nunanwan qosqa kan, yachaysapa simita yachachinanpaq;

10 Hukmantaq yachay rimayta kikin Nunawan yachachinanpaq;

11 Hukmantaq ancha hatun iñiyta; hukmantaq alliyachiy qoykunata kikin Nunawan.

12 Yapamantataq, hukman ancha hatun milagrokunata ruwananpaq;

13 Hukmantaq llapan imaymanakunamanta unanchananpaq;

14 Hukmantaq angelkuna rikuyta, sirviq nunakunatawan;

15 Hukman imaymana laya simikunata;

16 Hukmantaq simikuna hamut’ayta, imaymana simikunapiwan;

17 Kay llapan qoykunataq Cristoq Nunanmanta hamun; sapanka runakunamantaq chaykuna hamun askha kutin, Paypa munasqanman hina.

18 Anyaykichismantaq ancha munasqay wawqeykuna, Cristomanta sapanka allin qoykuna hamusqanta yuyarinaykichispaq.

19 Anyaykichismantaq ancha munasqay wawqeykuna, qayna p’unchawpas kunan p’unchwpas, wiñaypaqpas kaqlla Pay kasqanta yuyarinaykichista; kay rimarisqay nunapi llapan qoykunataq, mana hayk’aqpas qollunqachu, pacha sayanankamapuni, ichaqa, runakunaq wawankunaq mana kreyiyninkuraykulla.

20 Chhaynaqa, kananpunin iñiy; iñiy kananpuni chayqa, suyakuypas kananpunin; suyakuypas kananpuni chayqa, khuyapakuypas kananmi.

21 Mana khuyapakuyniyoq kaqtiykichisqa, manan imaynatapas Yayaq qhapaq-suyunpi qespichisqa kawaqchischu; manataqmi Yayaq qhapaq suyunpi qespichisqa kayta atiwaqchischu mana iñiyniyoq kaqtiykichisqa; nitaq atiwaqchischu mana suyakuyniyoq kaqtiykichisqa.

22 Mana suyakuyniyoq kaspaykichisqa llakikuypin kankichis; millay ruwaykunaraykutaqmi llakikuy hamun.

23 Cheqaqtapunin taytanchiskunata Cristo nirqan: Iñiyniyoq kankichis chayqa, noqapaq allin kasqan llapan imaymanakunatan ruwayta atiwaqchis, nispa.

24 Kunantaq hallp’aq llapan k’uchunkunaman rimarini—p’unchaw chayamunqa qankuna puramanta Yayaq atiynin horqosqa kananpaq chayqa, mana kreyiyraykun kanqa.

25 Ay! runakunaq wawankunamanta khayna kanqa chayqa; manan pipas allin ruwaq qankuna purapi kanqachu, manan hukllapas. Qankuna purapi allin ruwaq huk runa kanqa chayqa, Yayaq atiyninwan qokuyninpiwanmi llank’anqa.

26 Ay! kaykunata wikch’uspanku wañuqkunamanta, huchankupin wañunku, manataq Yayaq qhapaq-suyunpi qespichisqa kayta atinkumanchu; Cristoq rimayninkunaman hinataq rimarini, manataqmi llullakunichu.

27 Kay imaymanakuna yuyarinaykichispaqtaq anyakuykichis; usqhayllan pacha hamushan mana llullakusqayta yachanaykichispaq. Yayaq taripana tiyananpin rikuwankichis; Wiraqocha Yayataq nisunkichis: Manachu qankunaman rimayniyta willarqaykichis, kay runaq qelqasqan kaqta? wañusqakunamanta qaparimuq hina, ari, ñut’u hallp’amanta rimariq hinapuni? nispa.

28 Unanchaykuna hunt’akunanpaqmi kay imaymanakunata willani. Wiñay Yayaq siminmantataq lloqsimunqa, rimaynintaq khuywimunqa rimarimunqa huk miraymanta huk mirayman.

29 Yayataq qhawachisunkichis chay qelqasqay cheqaq kasqanta.

30 Yapamantataq anyakusaykichis, Cristoman hamunaykichispaq, sapanka allin qoymantataq hap’ipakuychis, amataq llamiychischu millay qoyta, nitaq qhelli kaqtapas.

31 Rikch’ariy, ñut’u hallp’amantataq sayariy O Jerusalen; ari, ancha sumaq p’achaykikunatataq churakuy O Sionpa ususin; takarpuykikunata kallpachay, wiñaypaqtaq lindaykikunata hatunyachiy, manaña astawan tutayachisqa kanaykipaq, qanwan Wiñay Taytaq ruwasqan rimanakuykuna hunt’akunanpaq, O Israelpa wasin.

32 Ari, Cristoman hamuychis, Paypitaq hunt’achisqa kaychis, llapan mana-yaya-kaymantataq mananchakuychis. Llapan manayaya-kaymanta mananchakunkichis, llapan atiyniykichiswan, yuyayniykichiswan, kallpaykichispiwantaq Yayata munakunkichis chayqa, chaninmi qankunapaq grasian chanin kanqa; grasianwantaq Cristopi hunt’asqa kanaykichispaq. Yayaq grasianwan hunt’asqa Cristopi kankichis chayqa, manan imaynatapas atiynin mananchayta atiwaqchischu.

33 Yapamantataq—Yayaq grasianwan Cristopi hunt’a kankichis, manataq atiyninta mananchankichischu chayqa, Cristopi qollanachisqan kankichis Yayaq grasianwan, Cristoq yawarnin sut’uchiywan; chaytaq Taytaq rimanakuyninpi huchaykichiskuna panpachanapaq, qollanantaq wakinaykichispaq, mana qhelliyoq.

34 Kunanqa llapamantan kacharparikuni. Asllamanmi Yayaq kusi-pawqarninpi samaq risaq, nunay runa-kurkuywan huñunakunankama; atipayniyoqtaq wayranta apamusqa kasaq, ancha hatun Jehovaq, kawsaqpa wañusqakunaqpiwan Wiñay Taripaqpa sumaq taripananpa ñawpaqenpi qankunawan tupanaypaq. Hinataq kachun.