1 Kunantaq unuchanamanta rimarisaq. Hamawt’akuna, kurakkuna, yachacheqkunapiwan unuchasqa karqanku; manataqmi unuchakurqankuchu allin ruruta apamuspanku chaypaq hina mana kaqtinkuqa.

2 Manataqmi pitapas unuchanapaq chaskirqakuchu, p’akillisqa sonqowan p’akillisqa nunapiwan mana hamuqtinkuqa; llapan huchankunamanta kutirimusqankuta iñeqkuna-huñuman sut’inchaqtinku.

3 Manataq pipas unuchaypi chaskisqachu karqan, ichaqa, Cristoq sutinta churakuspanku tukukuykama Pay serviyta churakuqtillanku.

4 Unuchayman chaskisqa kasqanku pataman, Qollanan Nunaq atiyninwan llank’asqa maqchisqa ima kasqanku patamantaqmi, Cristoq iñeqkuna-huñunpa runankunawan yupasqa karqanku; sutinkutaq qelqasqa karqan; Yayaq allin rimayninpa yuyarisqan mikhuchisqanpiwan kanankupaq; cheqaq ñanpi paykunata kachinapaq, pasaqllapuni yayaman-rimarikunankupaq, iñiyninku ruwaq tukuqpiwan Cristoq ruwasqankunallapi k’irarikunankupaq.

5 Pasaqllataq iñeqkuna-huñu huñunakurqan, sasinankupaq, yayaman-rimarikunankupaq, nunankuq alli-kayninmanta rimanakunankupaqwan.

6 Pasaqllataq huñunakurqanku Wiraqocha Jesus yuyariypi, t’antamanta vinomantawan qonakunankupaq.

7 Allintapunitaq qhawakurqanku paykuna purapi mana millay ruway kananpaq; millay ruwashaqta tariqkunatataq, iñeqkuna-huñumanta kinsa runakuna paykunata hamawt’akunaq ñawpaqenpi huchacharqanku, manataq yuyayninkuman kutirimurqankuchu, nitaq huchankuta willarqankuchu chayqa, pichasqan sutinku karqan, manañataq Cristoq llaqtanwan yupasqachu karqanku.

8 Ichaqa, sapa kutin yuyayninkuman kutirimuqtinku, panpachaytataq cheqaqtapuni mashkarqanku chayqa, panpachasqan karqanku.

9 Huñunakuyninkutaq iñeqkuna-huñuq pusasqan karqan, Nunaq ruwayninkunaman, Qollanan Nunaq atiyninman hina. Yachachinankupaq, anyanankupaq, yayaman-rimarikunankupaq, mañakunankupaq, takinankupaqwan hina Qollanan Nunaq atiynin paykunata pusasqanman hinan ruwasqa karqan.