1 Taytay Mormonpa qelqan, noqa Moroniman qelqasqan; serviyniyman waqyasqa kasqay pataman hinan noqaman qelqasqa karqan. Khaynatataq noqaman pay qelqamuwarqan:

2 Ancha munasqay churiy Moroni, anchatapunin kusikuni, Wiraqocha Jesucristoyki qanmanta yuyarisqanmanta; serviyninman, qollanan llank’ayninman ima waqyasqasuykimantawan.

3 Pasaqllataqmi yayaman-rimarikuyniykunapi qanmanta yuyarini, pasaqllataq Taytaman rimarikuni, Qollanan Churin Jesuspa sutinpi, mana-tukukuyniyoq sumaq kayninwan, grasianpiwan waqaychanasuykipaq, sutinpi iñiypi tukukuykama takyanaykipaq.

4 Kunantaq churiy, anchatapuni llakichiwasqanmanta rimariyki, llakichiwanmi qankuna purapi churanakuykuna hatarisqan.

5 Cheqaq kaqta yacharqani chayqa, churanakuykunan qankuna purapi kasqa karqan, huch’uy erqeykichiskuna unuchakunankumanta.

6 Kunanqa churiy, k’uchiy-k’uchi llank’anaykitan munani, qankuna puramanta kay millay pantay horqosqa kananpaq; khayna kananpaqmi kay qelqata qelqarqani.

7 Qanmanta kaymanta yachasqay patamanmi Wiraqochata kaykunamanta tapurqani. Wiraqochaq rimaynintaq noqaman chayamuwarqan Qollanan Nunaq atiyninwan:

8 Cristoq, Qespicheqniykiq, Wiraqochaykiq Yayaykiq ima rimayninta uyariy. Pachamanqa hamurqani manan chaninkunata yuyayman kutirimunankupaq waqyaqchu, ichaqa, huchasapakunatan. Qhali kaqkunaqa manan hanpikamayoqta nesitankuchu, ichaqa onqoqkunallan; chhaynaqa, huch’uy erqekunaqa qhalin kanku, manan huchallikuyta atinkumanchu; chhaynaqa, noqapin Adanpa ñakaynin paykunamanta horqosqa, manataq paykunapi ima kallpayoqchu; sirkumsision kamachisqa-simitaq noqapi tukukun, nispa.

9 Khaynatan Yayaq rimayninta Qollanan Nuna willawarqan; chhaynaqa, ancha munasqay churiy, yachanin Yayaq ñawpaqenpi huch’uy erqekunata unuchay ancha millay kasqanta.

10 Kayta yachanaykipaqtaq nisayki—yuyayman kutirimuyta, unuchakuytawan umallikuqkunaman, huchallikuq atiqkunaman ima yachachiyta; ari, tayta-mamakunata yachachiy yuyayninkuman kutirimunankupaq, unuchasqa kanankupaq, huch’uy erqechankuna hina ullpuykukuq kanankupaq, hinataq huch’uy erqechankunawan llapanku qespichisqa kanqaku.

11 Manataqmi huch’uy erqechankunaqa yuyayman kutirimuyta, nitaq unuchakuytapas nesitankuchu. Unuchayqa, yuyayman kutirimunapaqmi, kamachiykuna hunt’anapaq, huchakuna panpachanapaq.

12 Ichaqa, huch’uy erqechakunaqa Cristopin kawsanku, kay pachaq qallariyninmantapacha; mana chay hinaqa wakin runakunaman k’irarikuq Yayan Yaya, kambiyaq Yayataq, runakuna akllaq. Hayk’a huch’uy erqechakunan mana unuchayniyoq wañurqanku!

13 Chhaynaqa, huch’uy erqechakuna mana unuchakuyniyoq mana qespichisqa kayta atinkumanchu chayqa, mana tukukuyniyoq supay wasimanchá rirqanku.

14 Qanta nisayki—unuchakuyta huch’uy erqechakuna nesitanankuta yuyaqqa, p’ushqo hayaqepi, millay ruwaypa watayninpiwanmi kashan; mana iñiyniyoqmi, mana suyakuyniyoq, ni khuyapakuyniyoq ima; chhaynaqa, chay hinata yuyashaqtin wañunqa chayqa, supay wasimanmi rinqa.

15 Ancha millaypunin chay millay ruway, unuchanarayku huch’uy erqechata Yaya qespichinan yuyay, hukkaqtaq wañunan mana unuchayniyoq kaqtin.

16 Ay! khaynata Wiraqochaq ñanninkunata waqllichiq runamanta; chinkanqan pay, yuyaninman mana kutirimunqachu chayqa. Mana manchakuspan rimarini Yayamanta atiyniyoq kaspa; manataqmi manchakunichu runa imatapas ruwayta atisqanmanta; hunt’asqa munakuyqa llapan manchakuytan qarqon.

17 Khuyapakuyniyoq hunt’ataq kashani, chaytaq wiñay-wiñaypaq munakuy; chhaynaqa, llapan erqekunaqa rikcha’y purallan kawanku; hinaqa hunt’asqa munakuywanmi huch’uy erqechakunata munakuni; rikch’ay purallataq llapanku kanku, qespiymanta malliqkuna.

18 Yachanin Yaya mana wakin runakunaman k’irarikuq Yaya kasqanta, nitaq kambiyaq kasqanta; ichaqa, mana kambiyaqmi, wiñaymanta wiñayman.

19 Huch’uy erqechakunaqa, manan yuyayman kutirimuyta atinkumanchu; chhaynaqa, ancha millay millaypunin paykunaman Yayaq ch’uya khuyapakuyninkuna mananchay; Paypin llapanku kawsanku khuyapakuyninrayku.

20 Huch’uy erqechakunaqa unuchakunankun nispa niqqa, Cristoq khuyapakuynintan mananchan, yanqapaqtaq Cristoq ñak’ariyninta, qespichiyninpa atiyninta ima kachin.

21 Ay! chhayna runakunamanta, wañuypa, supay wasiq ima ch’ikinpi, mana kutirimuyniyoq muchuyninpi iman kashanku. Mana manchakuspan rimani, Yayan kamachimuwarqan. Chaykunata uyariy kasuytaq, mana chayqa, qan kontran sayanqaku Cristoq taripanan tiyananpi.

22 Llapan huch’uy erqechakunaqa Cristopin kawsanku, mana kamachisqa-simiyoq kaqkunapas. Kutichikapuypa atiyninqa hamunmi, llapa mana kamachisqa-simiyoq kaqkunaman; chhaynaqa, mana kondenasqa kaq, utaq mana kondenasionpa ukhunpi kaqqa, manan yuyayman kutirimuyta atinmanchu; hina kaqmanqa manan imapaqpas unuchay servinchu—

23 Ichaqa, asikuymi Yayaq ñawpaqenpi Cristoq khuyapakuyninkunata, Qollanan Nunaq atiynintawan mananchay, wañusqa ruwaykunapi kunfiyansata churaypiwan.

24 Churiy, manan kayqa kananchu; yuyayman kutirimuyqa, kondenasion, ukhupi kaqkunapaq, p’akisqa kamachisqa-simiq ñakaynin uhkupi kaqkunapaqwanmi.

25 Yuyayman kutirimuypa ñawpaq kaq rurunqa unuchakuymi; unuchakuytaq hamun iñiywan kamachiykuna hunt’ayman; kamachiykuna hunt’aytaq huchakuna panpachayta apamun.

26 Huchakuna panpachaytaq k’umurikuyta, llanp’u sonqotawan apamun; k’umurikuy llanp’u sonqoraykupiwantaq Qollanan Nunaq visitaynin hamun; chay Kallpachaqtaq suyakuywan, hunt’asqa munakuypiwan hunt’an; chay munakuytaq takyan k’uchi kaywan yayaman-rimarikuyman, Yayawan llapan qollanankuna tiyanankupaq tukukuy hamunankama.

27 Churiy, yapamantan qelqamusayki, asllaman lamanitakuna kontra mana risaqchu chayqa. Kay llaqtaq utaq nephitakunaq anchayayninkun qolluyninkuta apamunqa, yuyayninkuman mana kutirimunqakuchu chayqa.

28 Paykunarayku yayaman-rimarikuy churiy, paykunaman yuyayman kutirimuy hamunanpaq. Ichaqa, manchakunin paykunawan churanakuyta Nuna qollusqanta; kay hawa hallp’apitaq paykunaqa mashkashanku, Yayamanta hamuq kallpata atiytawan urmachiyta; Qollanan Nunatataq mananchashanku.

29 Chhayna hatun yachayta qarqospankuqa churiy, usqhayllan wañunanku, unanchaqkunaq rimasqanku unanchaykuna, kikin Qespicheqninchispa rimasqanpiwan hunt’akunanpaq.

30 Qanñayá allinlla churiy, qanman qelqanay utaq yapamanta qanwan tupanaykama. Hinataq kachun.