1 Kunantaq noqa Moroni huk chikan simikunata qelqani, iñiymanta, suyakuyniyoq kaymanta, khuyapakuymantawan taytay Mormonpa rimasqanmanta; khaynatan runakunaman rimarirqan, yupaychanankupaq ruwasqanku sinagogapi paykunaman yachachishaqtin:

2 Kunantaq noqa Mormon, qankunaman rimariykichis ancha munasqay wawqeykuna; Tayta Yayaq, Wiraqochanchis Jesucristoq ima grasianwan, qollanan munayninpiwan, noqaman qoyninpa waqyayninrayku kay pachapi qankunaman rimarinaypaq kacharisqa kani.

3 Chhaynaqa, qankunaman, iñeqkuna-huñumanta kaqkunaman rimariyman, sumaqllata Cristota qatikuqkunaman, kunan pachamanta ñawpaqman hanaqpachapi paywan samanaykichiskama, Wiraqochaq samariyninman haykuyta atinaykichispaq, chanin suyakuyta chaskiqkunaman.

4 Kunanqa wawqeykuna, kaykunataqa qankunamanta taripani, runakunaq wawankunawan sumaqlla purisqaykichisrayku.

5 Yuyarishanin Yayaq rimayninta: Ruwayninkunapin paykunata reqsinkichis; ruwayninku allin kan chayqa, paykunapas allinmi kanku, nispa nisqanta.

6 Yayataq nirqan, huk runa millay kaspaqa, manan allin kaqta ruwayta atinmanchu; huk qokuyta munachin utaq Yayamanpas rimarikun mana cheqaq sonqowan chayqa, manan imatapas payman qonchu.

7 Manan chaninchaypaqchu paypaq yupasqa.

8 Huk runa millay kaspa qokuyta qon chayqa, rimapakuspan qon; chhaynaqa, qoytapas qhepachikapunman karqan hinan paypaq yupasqa, hinataq Yayaq ñawpaqenpi millay pay yupasqa.

9 Chhaynallataqmi huk runapaq millaypaq yupasqa, mana cheqaq sonqowanchu yayaman-rimarikunqa chayqa; ari, manataqmi imatapas payman qonchu; manan chhayna runataqa Yaya chaskinchu.

10 Chhaynaqa, huk runa millay kaspaqa manan allin kaqta ruwayta atinmanchu, manataqmi allin qoyta qonqachu.

11 Huk p’oshqo pukyuqa, manan allin unuta qoyta atinmanchu, manataqmi huk allin pukyupas p’oshqo unuta qoyta atinmanchu; chhaynaqa, saqraq warman huk runa kaspaqa manan Cristota qatikuyta atinmanchu; Cristota qatikuqtintaq, mana saqraq warman kayta atinmanchu.

12 Chhaynaqa, llapan allin imaymanakunaqa Yayamantan hamun; millay kaqtaq supaymanta. Yayaq awqanmi saqraqa, pasaqllataq Pay kontra maqanakun, inkitantaq munachintaq huchallikuyman, pasaqlla chay millay kaqta ruwanapaqwan.

13 Ichaqa, Yayamanta kaqqa, allin kaq ruwaymanmi pasaqlla munachin inkitantaq; hinataq, allin ruwayman, Yaya munayman, Pay serviymanwan munachiq inkitaqpiwanqa, Yayaq qosqanmi.

14 Chhaynaqa, ancha munasqay wawqeykuna, Yayamantan nispa millay kaqta taripayta, utaq Yayamanta allin kaqta saqramantan nispa taripaytawan qhawakuychis.

15 Qhawariychis wawqeykuna, qankunamanmi qosqa kan taripanaykichispaq, allinta millay kaqmanta yachanaykichispaq. Imayna taripaytaq sut’ipuni, p’unchawpa k’anchayninchu laqha tutamanta sut’in hinapuni, k’apak yachaywan yachanaykichispaq.

16 Sapanka runamanmi Cristoq nunan qosqan, allinta mana allinmanta yachananpaq; chhaynaqa, qhawachiykichismi imayna taripanata. Allin ruwayman munachiq, Cristopi iñiymanwan inkitaq imaymanaqa, Cristoq atiyninwan qoyninpiwan apachisqan; chaywan Yayamanta kasqanta hunt’asqa yachaywan yachanaykichispaq.

17 Ichaqa, millay ruwayman, Cristopi mana kreyiyman, Pay mananchayman, Yayata mana serviymanwan runata imapas inkitan chayqa, hunt’asqa yachaywanmi yachawaqchis supaymanta kasqanta. Khaynatan supay llank’an, manan pitapas allin kaq ruwayman inkitanchu, manan, manan hukllatapas; nitaq angelninkunapas, nitaq payman watasqa kaqkunapas.

18 Kunanqa wawqeykuna, Cristoq k’anchayninwan taripanaykichispaq k’anchayta reqsisqaykichista rikuspaqa, pantasqa taripayta ama ruwanaykichispaq qhawakuychis; chay taripasqaykichis kikin taripaywan taripasqan kankichis.

19 Chhaynaqa, mañakuykichis wawqeykuna, Cristoq k’anchayninpi k’uchiy-k’uchi mashkanaykichista, allin kaqta millay kaqmanta yachanaykichispaq; sapanka allin kaqmanta hap’ipakunkichis, manataq chayta kondinankichischu chayqa, cheqaqtapunin Cristoq wawan kankichis.

20 Kunanri wawqeykuna imaynan atikunman, sapanka allin kaqmanta hap’ipakunaykichispaq?

21 Kunanqa, chay iñiyman hamuni, chaymanta rimarisaq nispa nisqayman. Nisaykichismi imaynata sapanka allin kaqmata hap’ipakuy atinaykichista.

22 Llapan imaymanakunata Yaya yachaspa, wiñay-wiñaymanta wiñay-wiñaypaq kaspa, runakunaq wawankunaman sirvinanpaq angelkunata kachamurqan, Cristoq hamunanmanta willanankupaq; Cristopi llapan allin imaymanakuna hamunanmanta.

23 Yayapas, kikin siminwan unanchaqkunaman willarqan, Cristoq hamunanmanta.

24 Imaymana manerakunapin Pay willarqan runakunaq wawankunaman allin kaq imaymanakunata; llapan allin kaqkunataq Cristomanta hamun, mana chayqa, urmasqan runakuna karqanku, manataq ima allin kaqpas paykunaman hamuyta atinmanchu.

25 Chhaynataq, angelkunaq sirviyninwan, Yayaq siminmanta llapan lloqsimuq rimayninkunapiwan, Cristopi iñiyniyoq kayta runakuna qallarirqanku. Khaynatataq iñiywan sapanka allin imaymanakunata hap’irqanku; khaynataq karqan Cristoq hamunankama.

26 Pay hamusqan patamanpas, sutinpi iñiywan runakuna qespichisqa karqanku, iñiywantaq Yayaq churinkuna wakinku. Cristochu cheqaqtapuni kawsan chhaynatan kay rimaykunata taytanchiskunaman rimarirqan: Imatapas allin kaqta iñiywan sutiypi Taytamanta mañakunkichis, chaskinaykichispaq kreyispa chayqa, qankunapaq ruwasqan kanqa, nispa.

27 Chhaynaqa ancha munasqay wawqeykuna, qollurqanchu milagrokuna, hanaqpachaman Cristo wichapusqarayku, Yayamanta runakunaq wawankunawan khuyapakuyniyoq kasqan derechuta Yayaq paña makinpi tiyaspa mañakunanpaq?

28 Kamachisqa-simiq imapaq kasqantan Pay kutichirqan, Paypi iñiyniyoq llapan kaqkunatataq mañakun; Paypi iñiyniyoq kaqkunataq sapanka allin kaqman ratakunqaku; chhaynaqa, runakunaq wawankunaq imarayku sayasqankutan Pay amachan, wiñaypaqtaq hanaqpachakunapi Pay tiyan.

29 Kayta Pay ruwaqtinchu milagrokuna qollurqan ancha munasqay wawqeykuna? Manan nisaykichismi; manataqmi angelkuna runakunaq wawankunaman serviyta tatirqankuchu.

30 Payman watasqan paykuna kanku, kamachiyninpa rimayninkunaman hina servinankupaq, iñiysapakunaman, yaya hina imaymanapi yuyaypiwan kaqkunaman qhawachikuspanku.

31 Paykunaq ima ruwanankutaq, yuyayman kutirimunankupaq runakunaman waqyananku, runakunaq wawankunaman Taytaq rimanakuyninta hunt’anankupaq ruwanantawan ruwanankupaq; runakunaq wawankunaq chawpinpi ñanta allichanankupaq, Wiraqochaq akllasqankunaman Cristoq rimayninta willaspa, Paymanta sut’inchanankupaq.

32 Khaynata ruwaspataq Wiraqocha Yaya ñanta allichan, runakunaq puchun Cristopi iñiyniyoq kanankupaq, atiyninman hina paykunaq sonqonkupi Qollanan Nuna kananpaq ch’usaq kananpaq. Khaynatan Tayta wakichin, runakunaq wawankunawan ruwasqan rimanakuyninkunata.

33 Cristotaq nirqan: Noqapi iñiyniyoq kankichis chayqa, noqapi chanin kasqan imatapas ruwanaykichispamqi atiyniyoq kankichis, nispa.

34 Nillarqantaqmi: Yuyayman kutirimuychis hallp’aq llapan k’uchunkuna, noqamantaq hamuychis sutiypitaq unuchakuychis, noqapitaq iñiychis qespichisqa kanaykichispaq, nispa.

35 Kunantaq, ancha munasqay wawqeykuna, qankunaman kay rimasqay imaymanakuna cheqaq chayqa, qhepa p’unchawpitaq Yaya qhawachikusunkichis atiywan, ancha hatun kusiqellpupiwan kay imaymanakuna cheqaq kasqanta, cheqaqtaq chayri, tukukurqanchu milagrokunayoq p’unchaw?

36 Qollurqankuchu angelkuna runakunaq wawankunaman rikhurimuymanta? Utaq, qhepachirqanchu paykunamanta Qollanan Nunaq atiyninta? Utaq, Paychu, pacha kanankama, utaq hallp’a sayanankama, utaq kay pachapi huk runa kaqtin qespichisqa kananpaq?

37 Manan nisaykichismi; iñiywanmi milagrokuna ruwakun; iñiywanmi runakunaq wawankunaman angelkuna rikhurimunku, servinku ima; chhynaqa, kay imaymanakuna kayta tukukapun chayqa, ay runakunaq wawankunamanta, mana kreyiyraykun kay, yanqapaqtaq llapanpas.

38 Cristoq rimayninman hinaqa, manan pipas qespichisqa kayta atinmanchu, sutinpi mana iñiyniyoq kaspaqa; chhaynaqa, kay imaymanakuna tukukapun chayqa, tukukapurqanmi iñiypas; millaytaqmi runaq imayna kaynin, manapas qespichiy kanmanchu karqan hinan paykuna kanku.

39 Ichaqa, ancha munasqay wawqeykuna, aswan allin imaymanakunatan qankunamanta suyani, Cristopi iñiyniyoq kasqaykichistan yuyani llanp’u sonqoyoq kasqaykichisrayku; Paypi mana iñiyniyoq kaqtiykichisqa, manan allinchu kankichis iñeqkuna-huñunpa runankunawan yupasqa kanaykichispaq.

40 Yapamantataq ancha munasqay wawqeykuna, suyakuymanta qankunaman rimayta munayman. Imaynataq iñiyniyoqri kawaqchis, mana suyakuyniyoq kaspaykichisri?

41 Imapitaq suyakuyniyoqri kanaychis? Nisaykichismi, Cristoq ñak’ariyninwan, kawsariyninpa atiyninpiwan suyakuyniyoqmi kanaykichis wiñay kawsayman hatarichisqa kanaykichispaq; kaytaq Paypi iñiyniykichisrayku, promesaman hina.

42 Chhaynaqa, iñiyniyoq huk runa kan chayqa, suyakuyniyoq kaytan nesitan; mana iñiywanqa manan ima suyakuypas kanmanchu.

43 Yapamantataq niykichis, manan runaqa iñiyniyoq ni suyakuyniyoqpas kanmanchu, k’umurikuq, llanp’u sonqoyoqpiwan mana kaspaqa.

44 Chhayna kaqtinqa, yanqapaqmi iñiynin suyakuyninpas, manan pipas Yayaq ñawpaqenpi chaskisqachu, ichaqa k’umurikuq, llanp’u sonqoyoqllapiwan. Huk runa k’umurikuq, llanp’u sonqoyoq ima kan, Qollanan Nunaq atiyninwantaq rimarin Jesus Cristo kasqanta chayqa, khuyapakuyniyoqmi pay kanan; mana khuyapakuyniyoqchu chay runa chayqa, manan imapaschu pay; chhaynaqa, khuyapakuyniyoqmi pay kanan.

45 Unaytapunin khuyapakuy ñak’arin, sumaq sonqoyoqmi, manan chikikunchu, manataq punkipakunchu, manataq paypatachu mashkan, manataq usqhaylla phiñarichisqachu, manataq ima millaytapas yuyaykunchu, manataqmi millay ruwaypipas kusikunchu, ichaqa, cheqaqpin kusikun; llapan imaymanakunata ñak’arin, llapan imaymanakunata kreyin, llapan imaymanakunata suyan, llapan imaymanakunatataq awantan.

46 Chhaynaqa, ancha munasqay wawqeykuna, mana khuyapakuyniyoq kankichis chayqa, mana imayoqmi kankichis; khuyapakuyqa manan hayk’aqpas kayta qollunchu. Chhaynaqa, llapanmanta aswan hatun kaq khuyapakuyman rataychis; llapanmi urmanan—

47 Ichaqa, khuyapakuyqa Cristoq ch’uya munakuyninmi, wiñaypaqtaq qhepan; qhepa p’unchawpi chay khuyapakuyniyoqwan tarisqa kaqqa, allillanmi paywan kanqa.

48 Chhaynaqa ancha munasqay wawqeykuna, Taytaman rimarikuychis sonqoykichispa llapan atiyninwan, Churin Jesucristoq cheqaq qatikuqkunaman qosqan kay munakuywan hunt’asqa kanaykichispaq; Yayaq churinkuna wakinaykichispaq; rikhurimuqtin Pay hina kananchispaq, imayna kasqanta hinan Payta rikusun; kay suyakuyniyoq kananchispaq, Pay ch’uya kasqanta hina ch’uyanchasqa kananchispaq. Hinataq kachun.