1 Ancha munasqay churiy, yapamantan qanman qelqamuni, kawsashaqraq qasqayta yachanaykipaq; ichaqa, huk chikantan qelqamuni chay millay kaqmanta.

2 Ancha millay maqanakuytan lamanitakunawan maqanakurqani, manataq chaypi atiparqaykuchu. Archeantus q’anchinawan urmarqan, Lurampas, Emronpas; ari, ancha askhatan akllasqa runanchiskunamanta chinkarqayku.

3 Kunanqa churiy, manchakunin kay llaqtata lamanitakuna qolluchinankumanta; manan yuyayninkuman kutirimunkuchu, paykuna pura phiñarikuymantaq paykunata pasaqlla supay inkitan.

4 Pasaqllan paykunawan llank’ashani; k’araqtapuni Yayaq rimayninta paykunaman rimariqtiytaq khatatatanku noqa kontrataq phiñarikunku; mana k’araqta rimariqtiytaq sonqonkunta chay kontra rumiyachinku; chhaynaqa, manchakunin Wiraqochaq Nunan paykunawan tupapakuyta qollusqanta.

5 Anchatapunin phiñarikunku, chhaynataq noqaman rikch’ariwan, manapas wañuyta manchakunkumanchu hina; paykuna pura munanakuytapas chinkachirqankun; yawarmanta, ayniypi qoymantawantaq ch’akisqalla kanku.

6 Kunanqa ancha munasqay churiy, rumiyarqankuña chaypas, haku k’uchiy-k’uchi llank’asun; llank’ayta tatisun chayqa kondenasionmanmi apamusqa kaswan; kanmi ruwananchis ruwana, kay llink’i wasipi kananchiskama, llapan chaninchaypa awqanta atipananchispaq, Yayaq qhapaq-suyunpi nunanchista samachinanchispaq.

7 Kunanqa huk chikantan qelqani kay runakunaq ñak’ariyninkunamanta. Amoronmanta yachayta chaskisqayman hinaqa, Sherrisah pukaramanta apasqanku askha piñaskunayoqmi lamanitakuna kanku; chaypitaq karqan qharikuna, warmikuna, wawakunapiwan.

8 Chay warmikunaq qosankuta, wawankunaq taytankutataq paykuna wañuchisqaku karqan; warmikunamantaq qosankuq aychanta mikhuchinku, wawakunamantaq taytankuq aychanta; manataq unuta paykunaman qonkuchu, ichaqa, huk chikallanta.

9 Kay lamanitakunaq ancha hatun millay millayña kaqtinpas, manan atipanchu Moriantumpi kaq runanchiskunaqta. Askhatan lamanitakunaq ususinkunamanta piñasta hina hap’isqaku karqan; llapan imaymanakunamanta aswan sumaq aswan munasqa kasqan ch’uya-kayta, llunp’aq-kaytawan paykunamanta qechusqanku patamantaq—

10 Kay ruwasqanku patamantaq, aswan millaytapuni paykunata wañuchirqanku, wañunankukama runa-kurkunkuta ñak’arichispanku; kay ruwasqanku patamantaq, k’ita uywakuna hina aychankuta rakrarqanku, rumiyasqa sonqonkurayku. Kaytataq ruwanku qharillaña kasqankuta qhawachinankupaq.

11 Ancha munasqay churiy, imaynatan khaynaniraq runakuna, mana ima runayasqa kaqkuna—

12 (Huk chikan watakunallataq pasarqan, paykunataq runayasqa, ancha sumaq runakuna karqanku).

13 Ichaqa churiy, imaynatan ancha hatun millay-millanapi kusikuyninku kaq kay hina llaqta atinman—

14 Imaynatan suyaswan, taripanapi noqanchis kontra Yaya makinta samarichinanta?

15 Waqanmi sonqoy: Ay kay llaqtamanta. Taripaypi lloqsimuy O Yaya, huchankunata, millay ruwayninkunata, millay-millanankunatawantaq uyaykimanta pakay!

16 Yapamanta churiy—askha ikmakuna ususinkunapiwanmi kan, Sherrisahpi qhepaqkuna; lamanitakunaq mana apasqanku puchu mikhuykunapiwan, hinataq Zenephiq awqasuyun paykunata apasqa karqan, may atisqankumanpas mikhunarayku puripakunankupaq paykunata saqespa; askha paya warmikunataq ñanpi yuyayninkuta chinkachispanku wañunku.

17 Noqawan kaq awqasuyutaq mana ancha kallpayoqchu; lamanitakunaq awqasuyunkunataq Sherrizah noqa ima chawpipi kashan; Aaronpa awqasuyunman ayqekuqkunataq millay-millay kayninkupi urmarqanku.

18 O llaqtaypa qhelli kayninku. Mana qallalla kayniyoq mana khuyapakuyniyoqpiwan paykuna kanku. Huk qharillan kani, huk qhariq kallpanllayoqtaq kani, manañataqmi astawan kamachiyniykunata kallpaychayta atinichu.

19 Kallpasapan millay ruwayninkupi wakipunku, kushka purataq uywa hina kanku, mana pitapas saqespa, ni machutapas ni waynatapas; imaymanapitaq kusikunku, allin kaqllapitaq mana; kay hallp’a patapi warminchiskuna wawanchiskunaqpiwan ñak’ariyninkutaq imaymanata atipan; ari, manan simi willayta atinmanchu, manataqmi qelqakuyta atikunmanchu.

20 Kunanqa churiy, manañan astawan kay millaymanta rimarinichu. Yachankin kay runakunaq millay-kayninkuta; yachankin mana ima teqsiyoq kasqankuta, mana munayniyoq; millay ruwayninkutaq lamanitakunaqta atipan.

21 Qhawariy churiy, manan paykunarayku Yayamanta mañakunichu, Paypas k’irikuwanman.

22 Ichaqa churiy, Yayamanmi qanta rekomendayki, Cristopitaq konfiyani qespichisqa kanaykimanta; Yayamantaq rimarikuni kawsayniykita qhepachinanpaq, kay runakuna Payman kutinankuta rikunaykipaq, utaq lliwtapuni qollunankutapas rikunaykipaq; yachanin paykuna wañunankuta, yuyayninkuman kutirispa Payman mana kutirikuqtinkuqa.

23 Paykuna chinkanqaku chayqa, Jareditakuna hinan kanqa, sonqonkuq munapakuyninkurayku, yawarta, aynipi kutichiytawan mashkaspanku.

24 Wañunqaku chayqa, yachanchismi askha wawqenchiskunamanta lamanitakunaman huñunakusqankuta, askhapiwantaq paykunaman huñunakunqaku; chhaynaqa, huk chikallantapas qelqay mana wañuchisqa kanki, noqataq wañuchisqa kasaq manañataq rikusaykiñachu chayqa; ichaqa, konfiyanin asllaman qan rikuyta, qollanan qelqakunan kan qanman haywanaypaq.

25 Churiy, iñiysapa Cristopi kay, amataqyá qelqasqay imaymanakuna qanta llakichichunchu, wañuyman urayachinasuykipaq; ichaqa, Cristoñayá qanta hoqarichun, ñak’ariyninkuna wañuyninpiwantaq, taytanchiskunaman runa-kurkun qhawachiy, khuyapakuynin, unay ñak’ariyninpiwan kusiqellpunpi wiñay kawsayninpi ima suyakuypiwan umaykipi wiñaypaq samachun.

26 Hanan hanaqpachapi tiyanayoq Taytanchis Yayaq grasian, llapan imaymanakuna Payman watasqa kanankama paña makinpi tiyaq Wiraqocha Jesucristonchispa grasianpiwan qanwan kachun, wiñaypaqtaq qanwan tiyachun. Hinataq kachun.