1 Vacami cʼa, yitzijon chirij ri kasanic chuxeʼ yaʼ. Can kitzij vi chi ri e Runimakul y ri Teuchunelaʼ y ri Tijonelaʼ xekasex chuxeʼ yaʼ. Y man xekasex ta chuxeʼ yaʼ chek queriʼ, can xaxe vi xquikʼalajirisaj chi e rucʼamon chic richin yekasex chuxeʼ yaʼ.

2 Chukaʼ man xequicʼul ta ri vinakiʼ richin yekasex chuxeʼ yaʼ, xaxe vi paxinek cánima, y chʼuchʼuj ri cuxlabal, y vi xquikʼalajirisaj chiquivech ri vinek ri e cʼo chupan ri Kʼataj chi can xtzolin vi pe quicʼuʼx chupan ronojel ri quimac.

3 Man xecʼul ta cʼa ri vinakiʼ ri man xquiqʼuen ta ka pa quiviʼ ri rubiʼ ri Cristo, riqʼuin jun covilej rayibel richin niquisamajij cʼa rijaʼ, cʼa pa ruqʼuisibel.

4 Tok rijeʼ e kasan chic chuxeʼ yaʼ, y ri ruchukʼaʼ ri Uxlabixel kajinek chic pa quiviʼ, y e ruchʼajchʼojirisan chic jariʼ tok rijeʼ xeʼajilex quiqʼuin ri vinakiʼ richin ri Rukʼataj ri Cristo. Cʼa cʼariʼ, xeyac can ri quibiʼ, richin queriʼ yenatex rijeʼ, y richin queriʼ xqueʼilix apon roma ri utzilej ruchʼabel ri Dios. Riqʼuin cʼareʼ, xquecʼojeʼ can chupan ri chojmilej bey, richin queriʼ junelic xtiquitakej rubanic ri lokʼolej chʼoven. Chukaʼ, xtiquicukubaʼ quicʼuʼx xaxe riqʼuin ri rutzil ri Cristo. Jacʼa rijaʼ ri Tzʼucunel y achojiqʼuin cukul vi ri quicʼuʼx.

5 Chukaʼ ri Kʼataj xquimol quiʼ binakel richin yemevayin y niquiben lokʼolej chʼoven riqʼuin ri Dios. Chukaʼ richin yetzijon ka chiqivech chirij ri rutzil quivech ri quicʼaslemal.

6 Chukaʼ xquimol quiʼ binakel richin chi yecʼuluman apon riqʼuin ri caxlan vey y ri ruyaʼal ruvech utzilej kʼayis richin ri runatabal ri Ajaf Jesús.

7 Chukaʼ rijeʼ can xquichajij vi quiʼ, richin queriʼ man noc ta ri itzel chiquicojol. Cʼo cʼa bey tok xnabex chi cʼo jun ri xuben can ri itzel. Cʼa cʼariʼ, oxiʼ jiquibanelaʼ richin ri Kʼataj xcʼatzin chi xquisuju rijaʼ chiquivech ri e Runimakul. Vi xa man xtzolin ta pe rucʼuʼx ri vinek aj mac y man xukʼalajirisaj ta ri rumac, ja cʼariʼ tok xyoj el ri rubiʼ, y man xajilex ta chic chiquicojol ri ruvinak ri Cristo.

8 Jacʼa chironojel mul tok xtzolin pe quicʼuʼx, y xquicʼutuj ri cuyubel mac riqʼuin kitzij rayibel, jariʼ tok xecuyutej.

9 Ri vinakiʼ ri e cʼo chupan ri Kʼataj xequibanalaʼ ri quimolojriʼil achiʼel cʼa ri rusamaj ri Uxlabel y riqʼuin ri ruchukʼaʼ ri Uxlabixel. Roma can xbanatej vi achiʼel cʼa xeyukex roma ri ruchukʼaʼ ri Uxlabixel, stapeʼ cʼa xechʼabalin, o xepixaban, o xechʼo akʼanij riqʼuin ri Dios, o xecʼutun akʼanij, o xebixan.