1 Jareʼ jun vuj richin ri nataʼ Mormon, tzʼiban pe chuve yin Moroni. Xutzʼibaj can chuve tok xa jubaʼ quinoyox pe pa ri lokʼolej samaj. Jariʼ cʼa tok xutzʼibaj can chuve y quereʼ xubij:

2 Moroni, rat at nucʼuajol nucʼuʼxlan, janíla yiquicot cʼa, roma ri Avajaf Jesucristo at runatan, y at royon pe chupan ri lokʼolej rusamaj y ri chojmilej rubanobal.

3 Yin yatinnataj jutakel chupan ri lokʼolej nuchʼoven Nincʼutuj cʼa akʼanij chire ri Dios ri Tataʼixel pa rubiʼ ri Lokʼolej Rucʼajol Jesús chi rijaʼ, roma ri jumul nimalej ránima y rutzil, xcaruchajij na roma yatiqueʼ chupan ri cukubabel cʼuʼx riqʼuin ri rubiʼ rijaʼ, cʼa pa ri ruqʼuisisbel.

4 Vacami cʼa nucʼajol, yin yichʼo aviqʼuin chirij ri nuyaʼ janíla nubis. Can yibison vi cʼa roma yeyacatej tak tojojenic chiʼicojol.

5 Vi kitzij cʼa ri nunaben, e banon can chiʼicojol rix tojojenic chirij ri kasanic chuxeʼ yaʼ quichin ri tak ivalcʼual.

6 Vacami cʼa nucʼajol, ninvajoʼ chi can yasamej vi chi utzil richin navelesaj el iviqʼuin re nimalej etzelal reʼ. Xa roma cʼariʼ tok nintzʼibaj re vuj reʼ.

7 Tok cʼa oc riʼ xinvetamaj chirij ronojel reʼ, chaʼnin xincʼutuj akʼanij chire ri Ajaf pa ruviʼ re cʼayeval reʼ. Cʼa cʼariʼ, ri ruchʼabel ri Ajaf xokaʼpe viqʼuin, roma ri ruchukʼaʼ ri Uxlabixel, y quereʼ xubij chuve:

8 Tavacʼaxaj cʼa ri ruchʼabel ri Cristo ri Lokʼolej Avelesanel, ri Avajaf, y ri a Dios. Can kitzij vi chi xipe chuvachʼulef richin xenvoyoj pe chupan ri tzolibel cʼuʼx ri aj maquiʼ y man ta ri e choj. Ri e tzʼaket man nicʼatzin ta ri akʼomanel chique, xaxe cʼa chique ri yavaʼiʼ. Quereʼ cʼa, ri tak alcʼualaʼ e tzʼaket, roma xa man yetiquir ta yemacun. Romariʼ tok ri etzelanic richin ri Adán xa elesan chic el pa quiviʼ voma yin, richin queriʼ manek ruchukʼaʼ pa quiviʼ, y ri pixaʼ richin ri chʼajchʼojirinen chʼacul qʼuisisnek chic viqʼuin yin.

9 Queriʼ cʼa ri Uxlabixel xukʼalajirisaj chinuvech ri ruchʼabel ri Dios. Roma cʼariʼ nucʼajol, yin vetaman chi janíla nixovaj ri Dios vi yeʼikasaj ri tak ivalcʼual chuxeʼ yaʼ.

10 Can kitzij vi ninbij chive chi can xqueʼatijoj vi ri avinak chire re naʼoj reʼ, ja ri tzolibel cʼuʼx y ri kasanic chuxeʼ yaʼ quichin ri yeʼejkalen y ri yetiquir yemacun. Queʼatijoj cʼa ri teʼej tataʼaj chi titzolin pe quicʼuʼx y quekasex chuxeʼ yaʼ, y tiquichʼutinirisaj quiʼ achiʼel ri tak calcʼual y xa jariʼ tok xquecolotej pe quiqʼuin ri tak calcʼual.

11 Ri tak calcʼual can man nicʼatzin ta chique chi nitzolin pe quicʼuʼx, ni ta chukaʼ yekasex chuxeʼ yaʼ. Can kitzij vi chi nibanatej ri kasanic chuxeʼ yaʼ roma ri tzolibel cʼuʼx richin yekʼajer ri pixaʼ, y queriʼ yecuyutej ri mac.

12 Jacʼa ri tak alcʼualaʼ xa can e qʼues vi riqʼuin ri Cristo, cʼa pa rutiquiribel pe re ruvachʼulef. Vi man ta queriʼ, ri Dios xa man ta choj, y jalatajinek ta, y man ta junan yerutzʼet cʼa ri vinakiʼ, ¡roma xa can janíla vi qʼuiy tak alcʼualaʼ e caminek chic tok cʼa manjaniʼ tiquicʼul ri kasanic chuxeʼ yaʼ!

13 Queriʼ cʼa, vi ta manek banel richin yecolotej ri tak alcʼualaʼ tok cʼa manjaniʼ tiquicʼul ri kasanic chuxeʼ yaʼ, rijeʼ can cʼo vi ta chi yebe pa ri xibalbay man qʼuisel ta.

14 Can kitzij vi ninbij chive chi ri nunojij chi ri tak alcʼualaʼ nicʼatzin cʼa ri kasanic chuxeʼ yaʼ chique, can cʼo vi chupan ri yaʼal richin ri qʼueyilel y chupan ri ruximibal ri etzelal. Rijaʼ manek cʼa ri cukubabel cʼuʼx riqʼuin, ni ri oyobenic pa ránima, ni ri lokʼokʼebel. Roma cʼariʼ, vi rijaʼ nicamisex tok cʼa nunojij na queriʼ na queriʼ, cʼo chi nibe pa xibalbay.

15 Roma can cʼayef vi ri etzelal richin nunojij chi ri Dios nucol jun ti alcʼual roma ri kasanic chuxeʼ yaʼ, y ri jun chic cʼo chi nicom jumul roma vi xa man xucʼul ta el ri rukasanic chuxeʼ yaʼ.

16 Joʼoc quivech ri niquijel queriʼ ri rubeyal ri Ajaf, roma can xquesach vi jumul vi man xtitzolin ta pe quicʼuʼx. Can kitzij vi chi yichʼo riqʼuin vuchukʼaʼ, roma cʼo viqʼuin ri rukʼatbel tzij ri Dios. Man ninxibij ta viʼ roma ri nitiquir nuben jun vinek, roma ri tzʼaket ajovabel xa nrelesaj el ronojel ri xibinriʼil.

17 Yin in nojinek cʼa riqʼuin ri lokʼokʼebel y jariʼ ri tzʼaket ajovabel. Que cʼareʼ, conojel ri tak alcʼualaʼ e junan chinuvech yin. Roma cʼariʼ, yenvajoʼ ri tak alcʼualaʼ riqʼuin ri tzʼaket ajovabel y rijeʼ e junan checonojel y yecʼuluman apon riqʼuin ri colotajic.

18 Yin vetaman cʼa chi ri Dios can choj vi y man ja ta rijaʼ jun vinek jalatajinek, xa man jalatajinek ta jumul, tibe kʼij tibe sek.

19 Ri tak alcʼualaʼ xa man yetiquir ta nitzolin pe quicʼuʼx. Roma cʼariʼ, can itzel vi tok nixilkʼotix can ri chʼajchʼoj tak joyovabel richin ri Dios chiquivech. Roma can e qʼues vi riqʼuin rijaʼ roma ri rujoyovabal.

20 Achique cʼa nibin chi ri kasanic chuxeʼ yaʼ nicʼatzin cʼa chique ri tak alcʼualaʼ xa can nuxilkʼotij vi ri joyovabel richin ri Cristo y nuxovaj rutojbalil mac uxben y ri ruchukʼaʼ ri lokʼolej elesanic pa mac.

21 Joʼoc quivech ri queriʼ niquiben roma xa jubaʼ chic nrajoʼ man niquicʼulvachij ri camic, ri xibalbay, y ri kʼaxomal jumul. Jareʼ ninbij riqʼuin ri vuchukʼaʼ. Queriʼ cʼa rubin can ri Dios chuve. Tivacʼaxaj cʼa utz re chʼabel reʼ y tinimaj, o can xquejiquiban vi cʼa chivij chuvech ri rukʼatbel tzij ri Cristo.

22 Can kitzij vi cʼa chi checonojel ri tak alcʼualaʼ e qʼues riqʼuin ri Cristo, y man e cʼo ta can pa ri rukʼaʼ ri pixaʼ. Ri ruchukʼaʼ ri lokʼolej elesanic pa mac e ruchapon conojel ri man yaʼon ta ri pixaʼ chique. Que cʼariʼ, ri man etzelan ta, o ri xa man cʼo ta chupan ri etzelanic, man nitiquir ta nitzolin pe rucʼuʼx y man nicʼatzin ta cʼa ri kasanic chuxeʼ yaʼ chire.

23 Xa jariʼ jun tziʼenic chirij ri Dios, roma xa nuxilkʼotij ri rujoyovabal ri Cristo y ri ruchukʼaʼ ri Lokʼolej Ruxlabal y nucukubaʼ riʼ riqʼuin caminek tak samaj.

24 Can kitzij vi cʼa nucʼajol, man rucʼamon ta chi naban reʼ, roma ri tzolibel cʼuʼx xa nicʼatzin chique ri e cʼo pan etzelanic y chupan ri cʼajisabel ri niban roma ri rukʼajic ri pixaʼ.

25 Ri nabey retal richin ri tzolibel cʼuʼx jariʼ ri kasanic chuxeʼ yaʼ. Ri kasanic chuxeʼ ya nibanatej cʼa roma ri cukubabel cʼuʼx, richin queriʼ yetakex cʼa ri pixaʼ. Cʼa cʼariʼ, ri takenic niban chique ri pixaʼ nuqʼuen cʼa pe ri cuyubel mac.

26 Cʼa cʼariʼ, ri cuyubel mac riʼ nuqʼuen pe ri chʼuchʼujil y ri chʼutinirisan cʼuʼx. Roma cʼa ri chʼuchʼujil y ri chʼutinirisan cʼuʼx riʼ, nokaʼ cʼa pe ri Uxlabixel. Ja ri Lokʼolej Bochiʼinel riʼ ninojisan riqʼuin oyobenic pa tak kánima y chukaʼ riqʼuin tzʼaket ajovabel. Ri ajovabel riʼ nicochʼon roma nikatij kakʼij richin yojchʼo akʼanij riqʼuin ri Dios, cʼa tok xtapon ri ruqʼuisibel tok conojel ri chojlaxelaʼ xquecʼaseʼ riqʼuin ri Dios.

27 Vaveʼ cʼa nucʼajol, yin xtintzʼibaj chave jun bey chic vi man chaʼnin ta xquibe chiquij ri Lamaniʼ. Can ja cʼareʼ, ri itzel nimirinen quichin re nimalej tinamit reʼ, o pa jun chic chʼabel, quichin re vinakul reʼ, ri Nefiʼiʼ, ja cʼareʼ xtibanon richin xquevulatej cʼa, vi xa man xtitzolin ta pa quicʼuʼx.

28 Tacʼutuj cʼa akʼanij, nucʼajol, chire ri Dios chi titzolin cʼa pe quicʼuʼx. Man riqʼuin vi riʼ, can kitzij vi, ninxibij viʼ chi ri Uxlabel man cʼo ta chic quiqʼuin rijeʼ. Chupan re rutzʼakat ruvachʼulef reʼ, rijeʼ chukaʼ niquitij quikʼij richin niquikasaj ronojel ri uchukʼaʼ y ri kʼatbel tzij ri elenek pe riqʼuin ri Dios y can niquixilkʼotij vi ri Uxlabixel.

29 Vacami cʼa, nucʼajol, roma rijeʼ quixovan chic janíla etamabel, can xa jubaʼ chic man yevulatej, richin queriʼ xquekʼajer ri lokʼolej rutzijol y chukaʼ ri chʼabel ri can ja vi ri Kacolonel biyon can.

30 Quiriʼ cʼa nucʼajol, cʼa tok xtintzʼibaj chic jubaʼ chave o cʼa tok xtincʼul chic viʼ aviqʼuin. Amen.