1 Nucʼajol, ri at nucʼuʼxlan, yitzʼiban cʼa el jun chic bey chave richin queriʼ xtavetamaj chi cʼa in qʼues na. Man riqʼuin vi riʼ, nintzʼibaj jubaʼ chirij ri nuyaʼ nubis.

2 Can kitzij vi cʼa, yin nucʼovisan jun cʼayef chʼaʼoj quiqʼuin ri Lamaniʼ y roj man xojchʼacon ta. Ri Arcanteo xcamisex cʼa roma ri tzaqʼuibel. Que cʼa chukaʼ riʼ, ri Luram y ri Emron. Kitzij cʼa chi e kasachon e qʼuiy chique ri janíla utzilej tak koyovanelaʼ.

3 Vacami cʼa, nucʼajol, yin ninxibij viʼ roma xa riqʼuin jubaʼ ri Lamaniʼ xquequiqʼuis re vinakul reʼ. Roma rijeʼ xa man nitzolin ta pe quicʼuʼx y ri Satanás jutakel yerukʼakʼirisaj richin queriʼ yeʼoyover ka chiquivech.

4 Can kitzij vi cʼa, yin yisamej quiqʼuin rijeʼ jutakel. Tok ninchʼabalij ri ruchʼabel ri Dios chique rijeʼ riqʼuin vuchukʼaʼ, jariʼ tok yebaybot y yeʼoyover viqʼuin. Jacʼa tok man yichʼo ta riqʼuin vuchukʼaʼ, rijeʼ niquicʼovirisaj ri cánima chirij ri chʼabel riʼ. Roma cʼariʼ tok ninxibij viʼ, roma xa riqʼuin jubaʼ ri Ruxlabal ri Ajaf man nutij ta chic rukʼij quiqʼuin rijeʼ.

5 Janíla cʼa yeʼoyover y xa romariʼ tok yin ninojij chi man niquixibij ta chic quiʼ chuvech ri camic. Quereʼ cʼa chukaʼ, man nicajoʼ ta chic quiʼ. Xa jutakel niquimunij ri quiqʼuel y niquirayij niquitzolij ruqʼuexel ri itzel niban chique.

6 Vacami cʼa, nucʼajol, ri at nucʼuʼxlan, stapeʼ cʼa e covirisan chic chupan ri itzel, cʼa kojsamej na cʼa chi utzil. Roma vi nikatanabaʼ ri kasamaj, can xkojetzelex vi cʼa. Cʼo cʼa ri kasamaj ri rucʼamon nikaben tok cʼa oj cʼo na riqʼuin re chʼaculaj reʼ richin chʼabek ulef, richin queriʼ xtikasaj rukʼij ri nicʼulaʼan richin ronojel chojmilal y xkojuxlan cʼa chupan ri rajavaren ri Dios.

7 Vacami cʼa, nintzʼibaj chic jubaʼ chiquij ri kʼaxomal ri niquitij re vinakul reʼ. Ri rutzijol ri xincʼul cʼa riqʼuin ri Amoron nubij cʼa chi ri Lamaniʼ e quitzʼapin can e qʼuiy vinek ri xequichop pa ri tzʼurutzʼic jotolibel rubiniʼan Xeriza. Chiquicojol ri e quichapon e cʼo cʼa achiʼaʼ, ixokiʼ, y alcʼuala.

8 Xequicamisaj can ri achijilal y ri tataʼaj quichin ri ixokiʼ y ri alcʼualaʼ riʼ. Vacami cʼa, yequilij ri ixokiʼ riqʼuin ri quitijul ri cachijilal, y yequilij ri alcʼualaʼ riqʼuin ri quitijul ri quitataʼ. Cʼa cʼariʼ, xaxe jun ti nitz yaʼ niquiyaʼ chique.

9 Stapeʼ cʼa ri Lamaniʼ niquiben re nimalej etzelal reʼ, ri etzelal ri niquiben ri kavinakul roj ri e cʼo pa Moriantum can nicʼo vi ruviʼ chuvech reʼ. Can kitzij vi cʼa chi e quichapon e qʼuiy chique ri quimiʼal ri Lamaniʼ. Cʼa cʼariʼ, quelesan el chiquivech rijeʼ achique ri janíla niquipokonaj y niquilokʼokʼej chuvech xabachique chic. Jariʼ ri kʼopojil y ri chʼajchʼoj quinaʼoj.

10 Cʼariʼ, tok xquiben yan queriʼ, itzel camisanic xquiben chique. Roma xquiben cʼa ronojel ruvech soconic chique ri quichʼacul, cʼa tok xecom. Cʼa cʼariʼ tok queriʼ quibanon rijeʼ, xquitij ri quitijul achiʼel ri e aj pa kʼayis chicopiʼ, roma cʼa ri rucovil ri cánima. Ronojel cʼareʼ niquiben cʼa achiʼel vi ta jun retal richin ri cuchukʼaʼ.

11 Nucʼajol ri at nucʼuʼxlan, ¿achique cʼa roma tok jun vinakul queriʼ xa manek chic ri quinaʼoj?

12 Xaxe cʼa jun caʼiʼ oxiʼ junaʼ oc kʼaxinek can tok rijeʼ xa e jun choj y jebelilej vinakul.

13 Nucʼajol, ¿achique cami roma tok jun vinakul quereʼ janíla niquipalakisaj quiʼ xa riqʼuin ri nimalej etzelal?

14 ¿Achique cʼa banel richin nikanojij chi ri Dios man ta xtuyuk pe chikij roj ri rukʼaʼ riqʼuin kʼatoj tzij?

15 Can kitzij vi, ri vánima quereʼ nusiqʼuij: Joʼoc quivech re vinakul reʼ. Takʼataʼ cʼa tzij pa quiviʼ, rat ka Dios, y queʼavevaj cʼa chavech ri quimac y ri itzel quibanobal y ri quetzelal.

16 Nucʼajol, chukaʼ e qʼuiy malcaʼn ixokiʼ quiqʼuin ri cal xecanej can pa Xeriza. Chiriʼ cʼa, ri quikʼutun ri man xquicʼuaj ta el ri Lamaniʼ, can kitzij vi, xucʼuex cʼa el coma ri royovanela ri Zenefi. Queriʼ cʼa, xequimalij can ri ixokiʼ riʼ richin yebiyajlan xabacuchi chucanoxic quikʼutun, y e qʼuiy tak rijtaʼk ixokiʼ yekʼitej chuchiʼ ri bey y yecamiyaj ka.

17 Vacami cʼa, ri molaj oyovanelaʼ quichin ri Lamaniʼ e cʼo chikacojol roj riqʼuin ri tinamit Xeriza. Queriʼ cʼa, e jampeʼ na e animajinek cʼa quiqʼuin ri molaj oyovanelaʼ richin ri Aarón e tzakinek chic chupan ri cʼayevilej kʼaxomal ri yequibanalaʼ.

18 ¡Can janíla vi e tzʼil ri nuvinakul! Manek cʼa chic ri quichojlen, ni ta chukaʼ ri quijoyovabal. Can kitzij vi, yin xaxe in jun achin y xaxe cʼo viqʼuin ri ruchukʼaʼ juna achin y man yitiquir ta chic ninben chi niquinimaj nutzij.

19 Rijeʼ can e covirisan vi chic chupan ri quitzʼilol. E junan cʼa chupan ri quetzelal y manjun niquicol ta, ni ta ri alcʼualaʼ, ni ta ri e riʼj chic. Yequicot riqʼuin ronojel ri itzel, xaxe cʼa man riqʼuin ta ri utz. Ri kʼaxomal ri niquitij ri kixokiʼ y ri kalcʼual, chuvech chijun re ruvachʼulef reʼ, can janíla vi nim chuvech xabachique chic. Jaʼ, ri rakʼ jun vinek man nitiquir ta nutzijoj, chukaʼ manek banel nitzʼibex can ri niquicʼulvachij.

20 Vacami cʼa nucʼajol, man yitzijon ta chic chirij re cʼayevilej cʼulvachitajic reʼ. Can kitzij vi chi rat avetaman chic ruvech ri quetzelal re vinakul reʼ. Manek chic ri quichojmil y manjun chic niquinaʼ. Ri quitzelal rijeʼ can janíla vi nim chuvech ri quetzelal ri Lamaniʼ.

21 Can kitzij vi cʼa chi man yitiquir ta yenvuxkanej riqʼuin ri Dios, roma vi ta queriʼ, xa xtucʼajisaj ta nuvech.

22 Man riqʼuin vi riʼ, nucʼajol, yin yatinvuckanej rat riqʼuin ri Dios y nincukubaʼ viʼ riqʼuin ri Cristo chi xcacolotej. Nincʼutuj cʼa akʼanij chire ri Dios chi rijaʼ xtuyalojisaj cʼa ri acʼaslen, richin queriʼ xtatzʼet ri tzolitajic quichin re vinakul reʼ, o ri jumul quivulatajic. Yin vetaman cʼa chi cʼo chi yecom jumul vi man nitzolin ta pe quicʼuʼx y vi man yejel ta pe chic riqʼuin ri Dios.

23 Vi rijeʼ xquecom cʼa jumul, xa xtiquicʼulvachij cʼa achiʼel ri Jarediʼ roma ri retzelal ri cánima y roma niquicanoj ri quiqʼuel y ri ruqʼuexel ri etzelal niban chique.

24 Stapeʼ cʼa rijeʼ yevulatej cʼa, roj ketaman chi qʼuiy chique ri kachʼalal e benek chic quiqʼuin ri Lamaniʼ y e qʼuiy chukaʼ ri cʼa xquebe na quiqʼuin. Roma cʼariʼ, vi rat yacʼaseʼ na can y yin xa yicamisex y man yatintzʼet ta chic, tatzʼibaj cʼa jubaʼ. Jacʼa yin nincukubaʼ nucʼuʼx chi xa cʼa xcatintzʼet na jubaʼ chic apon. Cʼo cʼa viqʼuin ri lokʼolej tak retal banobel ri ninvajoʼ ninjech can chave.

25 Nucʼajol, tatakej cʼa chi utzil ri Cristo, y man tuben cʼa chi yabison ri nutzʼiban can, richin queriʼ man ta xcacom roma janíla ri abis. Xa caruyacaʼ cʼa chic ri Cristo y tuxlan cʼa ri anojibal benek ruvech roma rukʼaxomal, ri rucamic, y ri rujoyovabal rijaʼ, y roma xucʼut riʼ riqʼuin ri ruchʼacul chiquivech ri katataʼ. Chukaʼ cʼa, roma man chaʼnin ta noyover y roma ri oyobenic pan avánima riqʼuin ri rucʼojlemal y ri cʼaslen jumul.

26 Chukaʼ ticʼojeʼ cʼa can aviqʼuin y ticanej cʼa jutakel ri rutzil ri Dios ri Tataʼixel ri cʼo jun nimalej rutzʼuyulibel cʼanej akʼanij chicaj y chukaʼ ri rutzil ri Kajaf Jesucristo ri tzʼuyul pa rajquikʼaʼ ri ruchukʼaʼ ri Dios, cʼa tok ronojel nikasex ka pa rukʼaʼ rijaʼ. Amen.