1 Vaveʼ cʼa, yin Moroni yentzʼibaj jujun chique ri ruchʼabel ri nataʼ Mormon chiquij ri cukubabel cʼuʼx, ri oyobenic pa ánima, y ri lokʼokʼebel. Rijaʼ quereʼ cʼa xubij chique ri vinakiʼ tok rijaʼ xerutijoj rijeʼ chupan ri jay richin ri molojriʼil. Rijeʼ xquipabaʼ cʼa ri jay riʼ richin nicʼojeʼ jun cʼojlibel acuchi niquiyaʼ vi rukʼij ri Dios.

2 Vacami cʼa, yin Mormon yichʼo iviqʼuin rix, vachʼalal ri ix nucʼuʼxlan. Xaxe cʼa roma ri cutzil ri Dios ri Tataʼixel y ri Kajaf Jesucristo y ri lokʼolej rurayibal rijaʼ, y roma chukaʼ ri sipanic richin ri oyonic ri ruyaʼon chuve tok niyaʼox kʼij chuve richin yichʼo iviqʼuin vacami.

3 Queriʼ cʼa, ninvajoʼ yichʼo iviqʼuin rix ri ix cʼo chupan ri Kʼataj ri nitzekelbej chi utzil ri Cristo. Jacʼa rix ri icʼulun jun jebel oyobenic pan ivánima, achojiqʼuin yixtiquir yixcʼuluman vi riqʼuin ri uxlanibel richin ri Ajaf vacami yan, y chukaʼ tok xquixuxlan apon riqʼuin rijaʼ chilaʼ chicaj.

4 Vacami cʼa vachʼalal, yin queriʼ ninnojij chivij rix, roma xa riqʼuin ri uxlanibel cʼuʼx nicʼuaj iviʼ quiqʼuin ri calcʼual ri achiʼaʼ.

5 Yin nokaʼ chinucʼuʼx ri ruchʼabel ri Dios ri nubij quereʼ: Roma cʼa ri quibanobal, xtivetamaj quivech. Roma vi ri quibanobal e utz, can e utz vi chukaʼ rijeʼ.

6 Roma can kitzij vi chi ri Dios rubin can chi jun itzel achin man nitiquir ta nuben ri utz. Roma vi rijaʼ nusuj akʼanij jun sipanic, o nichʼo akʼanij riqʼuin ri Dios, vi man nuben ta riqʼuin choj rurayibal, xa manek chic rejkalen ri nuben.

7 Roma can kitzij vi chi ri rusipanic rijaʼ xa man choj ta xnojix chirij.

8 Roma cʼariʼ, vi jun itzel achin nuyaʼ jun sipanic, rijaʼ xa chek nuchʼij pa ránima richin nuben ri sipanic. Roma cʼariʼ, ninojix cʼa chirij rijaʼ achiʼel vi xa can man xuyaʼ ta ri sipanic. Roma cʼariʼ tok rucʼamon ninojix chi rijaʼ xa itzel chuvech ri Dios.

9 Que cʼa chukaʼ reʼ, ninojix cʼa chirij jun achin chi xa itzel, vi rijaʼ nichʼo akʼanij riqʼuin ri Dios, y xa man riqʼuin ta ronojel rurayibal ri ránima. Kitzij cʼa chi xa manek rejkalen ri nuben, roma ri Dios man yerucʼul ta ri yebanon quereʼ.

10 Roma cʼariʼ, jun itzel achin man nitiquir ta nuben ri utz. Chukaʼ can man vi xtuyaʼ ta jun utzilej sipanic.

11 Can kitzij vi cʼa chi jun qʼueyilej tzʼucubel yaʼ man nitiquir ta nuqʼuen pe utzilej yaʼ. Chukaʼ cʼa, jun utzilej tzʼucubel yaʼ man nitiquir ta nuqʼuen pe qʼueyilej yaʼ. Que cʼariʼ, vi jun achin xa jun rusamajel ri itzel vinek, man nitiquir ta cʼa nutzekelbej ri Cristo. Vi nutzekelbej cʼa ri Cristo, man nitiquir ta cʼa noc jun rusamajel ri itzel vinek.

12 Can que vi cʼariʼ, ronojel ri utz elenek cʼa pe riqʼuin ri Dios. Jacʼa ri itzel can elenek vi pe riqʼuin ri itzel vinek. Ri itzel vinek xa jun etzelanel richin ri Dios, y nicʼaxin chirij benek ruvech. Rijaʼ noyon y niyukʼun, richin queriʼ ri vinek nimacun y nuben ri itzel benek ruvech.

13 Kitzij cʼa, chi jacʼa ri Dios noyon pe y niyukʼun richin queriʼ ri vinek nuben ri utz benek ruvech. Roma cʼariʼ, can ronojel vi ri noyon y niyukʼun richin chi ri vinek nuben ri utz, y nrajoʼ cʼa ri Dios, y nusamajij rijaʼ, jariʼ can sakirisan vi pe roma ri Dios.

14 Roma cʼariʼ, tichajij cʼa iviʼ vachʼalal, ri ix nucʼuʼxlan, richin chi man ninojij ta chi ri itzel elenek vi pe riqʼuin ri Dios, o chi ri utz y ri ronojel ri richin ri Dios elenek vi pe riqʼuin ri itzel vinek.

15 Roma can kitzij vi, vachʼalal, chi yaʼon can kʼij chive richin ninicʼoj y nivetamaj ruvech ri utz y ri itzel. Ri rubanquil richin ninicʼoj can choj vi, richin queriʼ xtivetamaj riqʼuin choj etamabel, achiʼel cʼa ivetaman ruvech ri sakil pa kʼij y ri kʼekuʼm chakʼaʼ.

16 Can kitzij vi cʼa chi ri Ruxlabal ri Cristo niyaʼox chique checonojel ri vinakiʼ richin queriʼ yetiquir niquetamaj ruvech ri utz y ri itzel. Que cʼariʼ, ninkʼalajirisaj chivech ri rubaniquil richin ninicʼoj. Roma cʼa ronojel ri noyon richin chi ri vinek nuben ri utz y nuyukʼ richin nunimaj ri Cristo, can takon vi pe roma ri ruchukʼaʼ ri Cristo y ri lokʼolej rusipanic. Roma cʼariʼ, yixtiquir nivetamaj riqʼuin tzʼaket etamabel chi elenek vi pe riqʼuin ri Dios.

17 Jacʼa ronojel ri niyukʼun ri vinek richin nuben ri itzel, y man nunimaj ta ri Cristo, y nuxutuj can, y man nusamajij ta ri Dios, ja cʼariʼ tok yixtiquir nivetamaj riqʼuin tzʼaket etamabel chi xa elenek vi pe riqʼuin ri itzel vinek. Roma can que vi cʼariʼ nisamej ri itzel vinek, roma rijaʼ man nuyukʼ ta can manjun vi vinek richin nuben ri utz, ni ta stapeʼ vi xa ta jun. Can que vi chukaʼ riʼ ri rutakonaxelaʼ rijaʼ y chukaʼ ri niquikasaj quiʼ pa rukʼaʼ.

18 Vacami cʼa vachʼalal, ivetaman chic ruvech ri sakil, achojiqʼuin xtincʼoj vi, y jariʼ ri rusakil ri Cristo. Roma cʼariʼ, titijaʼ cʼa ikʼij richin queriʼ man xquixsachalan ta tok xtinicʼoj. Roma can riqʼuin vi ri nicʼobel achojiqʼuin yixnicʼon vi rix, can que vi chukaʼ riʼ ri nicʼobel xticusex chive rix.

19 Roma cʼariʼ yixinbochiʼij, vachʼalal, chi tinicʼoj cʼa chi utzil riqʼuin ri rusakil ri Cristo, richin queriʼ xtivetamaj ruvech ri utz y ri itzel. Cʼa cʼariʼ, vi nitun iviʼ riqʼuin ronojel ruvech utz y man nivetzelaj ta chic, can xquixoc vi ix ralcʼual ri Cristo.

20 Vacami cʼa vachʼalal, ¿achique cami banel richin nitun cʼa iviʼ riqʼuin ronojel ruvech utz?

21 Vacami cʼa xquichʼo chirij ri cukubabel cʼuʼx riʼ, achojchij xinbij vi chi xquibechʼo. Quereʼ cʼa xtinbij chive ri achique xtiben richin yixtiquir nitun iviʼ riqʼuin ronojel ruvech utz.

22 Can kitzij vi cʼa, ri Dios retaman ronojel, roma rijaʼ can cʼo vi pe jantapeʼ, y xticʼojeʼ na apon, tibe kʼij tibe sek. Xa roma cʼariʼ tok xerutek pe ri rutakonaxelaʼ richin niquiben lokʼolej samaj pa quiviʼ ri calcʼual ri achiʼaʼ richin niquikʼalajirisaj can ri rupetebal ri Cristo chiquivech. Y riqʼuin ri Cristo xtipe cʼa ronojel ruvech utz.

23 Ri Dios chukaʼ riqʼuin can ruchʼabel rijaʼ xukʼalajirisaj pe chiquivech ri e yaʼol lokʼolej rutzijol chi ri Cristo xtipe na.

24 Can kitzij vi cʼa, quiqʼuin jalajoj ruvech rubaniquil rijaʼ xerukʼalajirisaj chiquivech ri calcʼual ri achiʼaʼ ronojel ruvech utz. Ronojel cʼa ri utz xa elenek pe riqʼuin ri Cristo. Vi man ta queriʼ, e tzakinek ta ri vinakiʼ, y manek ta banel richin nipe manjun utz quiqʼuin.

25 Roma cʼariʼ, riqʼuin ri lokʼolej quisamaj ri takonaxelaʼ y riqʼuin ronojel chʼabel ri xeleyaj pe pa ri ruchiʼ ri Dios, ri vinakiʼ xquichop rusamajixic ri cukubabel cʼuʼx riqʼuin ri Cristo. Quereʼ cʼa riqʼuin ri cukubabel cʼuʼx riʼ, rijeʼ xquichop chiquitunic quiʼ riqʼuin ronojel ruvech utz y queriʼ xcʼulvachitej pe, cʼa tok xpe ri Cristo.

26 Cʼariʼ, tok rijaʼ petenek chic, ri vinakiʼ xecolotej chukaʼ roma ri cukubabel cʼuʼx riqʼuin ri rubiʼ rijaʼ, y riqʼuin ri cukubabel cʼuʼx, xeʼoc cʼa ralcʼual ri Dios. Can jic vi qʼues cʼa ri Cristo y que cʼa chukaʼ riʼ can jic vi chi rijaʼ xutzijoj re chʼabel reʼ chique ri katiʼt kamamaʼ, quereʼ xubij chique: Xabachique ri nicʼutuj chire ri Tataʼixel pa nubiʼ yin, vi can choj vi ri nicʼutuj y vi nicukubaʼ icʼuʼx chi xticʼul, can kitzij cʼa chi xtiyaʼox pe chive.

27 Que cʼariʼ vachʼalal ri ix nucʼuʼxlan, ¿la e manek chic cami ri meyel tak samaj xaxe roma ri Cristo xjoteʼ el chic chilaʼ chicaj? ¿La e tanaban cami ri meyel tak samaj xaxe roma xtzʼuyeʼ pa ri rajquikʼaʼ ri Dios, richin chi nuchʼojij pe riqʼuin ri Dios ri rukʼij richin rujoyovabal pa quiviʼ ri calcʼual ri achiʼaʼ?

28 Roma rijaʼ rubanon chi e kʼajirinek ri rurayibal ri pixaʼ y can yeruchʼojij vi pe ri niquicukubaʼ quicʼuʼx riqʼuin. Conojel cʼa ri niquicukubaʼ quicʼuʼx riqʼuin xquejeleyaj apon riqʼuin ronojel ruvech utz. Queriʼ cʼa, rijaʼ nucʼutuj pa quiviʼ ri calcʼual ri achiʼaʼ y nicʼaseʼ jumul chilaʼ chicaj.

29 Vachʼalal ri ix nucʼuʼxlan, xa roma cʼa rubanon can rijaʼ ronojel reʼ, ¿la e tanaban chic cami ri meyel tak samaj? Can kitzij vi ninbij chive chi mani. Chukaʼ ri takonaxelaʼ man quitanaban ta rubanic lokʼolej samaj chiquicojol ri calcʼual ri achiʼaʼ.

30 Roma can kitzij vi, rijeʼ e cʼo pa rukʼaʼ rijaʼ richin niquiben lokʼolej samaj, achiʼel cʼa nubij rijaʼ chique. Niquicʼut cʼa quiʼ chiquivech ri cʼo nimalej quicukubabel cʼuʼx y ri jiquiban can ri quinojibal riqʼuin ronojel rubaniquil ri lokʼobebel.

31 Ri rubaniquil ri lokʼolej quisamaj xa richin niquibij chique ri vinakiʼ chi titzolin pe quicʼuʼx. Cʼo cʼa chukaʼ chi niquiben ri samaj quichin ri cʼulanen tzij ri xuben can ri Tataʼixel quiqʼuin ri calcʼual ri achiʼaʼ y niquiben chi yekʼajer. Cʼo cʼa chi niquinucʼ apon ri rubeyal chiquivech ri calcʼual ri achiʼaʼ y romariʼ tok niquikʼalajirisaj ri ruchʼabel ri Cristo chiquivech ri e chaʼon samajelaʼ richin ri Ajaf, richin queriʼ xtiquijiquibaʼ chirij rijaʼ.

32 Can que vi cʼareʼ, ri Ajaf Dios nuchojmirisaj apon ri rubeyal, richin queriʼ ri rutzʼakat ri vinakiʼ xtiquicukubaʼ quicʼuʼx riquin ri Cristo, richin queriʼ ri Uxlabixel xticʼojeʼ na ri rucʼojlibal pa ri cánima, achiʼel cʼa ri ruchukʼaʼ ri quicukubabel cʼuʼx. Can que vi cʼariʼ ri Tataʼixel nuben chi yekʼajer ri rucʼulanen tzij ri xuben can rijaʼ quiqʼuin ri calcʼual ri achiʼaʼ.

33 Ri Cristo rubin can quereʼ: Vi xticukubaʼ cʼa icʼuʼx viqʼuin yin, xticʼojeʼ cʼa ivuchukʼaʼ richin niben xabachique ri utz nintzʼet yin.

34 Chukaʼ rubin can quereʼ: Titzolin cʼa pe icʼuʼx ivonojel rix ix cʼo cʼa pa tak ruchiʼ re ruvachʼulef, y quixkasex chuxeʼ yaʼ pa nubiʼ yin, y ticukubaʼ cʼa icʼuʼx viqʼuin yin, richin queriʼ xquixcolotej cʼa pe.

35 Vacami cʼa vachʼalal ri ix nucʼuʼxlan, e kitzij ri nuchʼabalin can chive, y ri Dios chukaʼ xtukʼalajirisaj chivech riqʼuin ruchukʼaʼ y nimalej rucʼojlemal chupan ri ruqʼuisibel kʼij chi can e kitzij vi. Vi xa e kitzij cʼa, vachʼalal, ¿la qʼuisinek chic cami ri kʼij quichin ri meyel tak samaj?

36 ¿La quikʼilon chic quiʼ cami ri takonaxelaʼ richin man ta chic niquicʼut quiʼ chiquivech ri calcʼual ri achiʼaʼ? ¿La revan can cami ri Dios ri ruchukʼaʼ ri Uxlabixel chiquivech rijeʼ? ¿La xtuben cami queriʼ tok cʼa benek na ri kʼij, o tok cʼa cʼo na re ruvachʼulef, o tok cʼa cʼo na jun achin chuvachʼulef richin nicol?

37 Can kitzij vi ninbij chive chi mani. Roma xa can roma vi ri cukubabel cʼuʼx tok yebanatej meyel tak samaj, y xa roma ri cukubabel cʼuʼx tok ri takonaxelaʼ niquicʼut quiʼ chiquivech ri vinakiʼ y niquiben lokʼolej samaj pa quiviʼ. Roma cʼariʼ, vi xa e tanaban re banobel reʼ, joʼoc quivech ri calcʼual ri achiʼaʼ, roma re banobel e tanaban ka xa roma man niquinimaj ta chi y ronojel can manek vi chic ri rejkalen.

38 Achiʼel cʼa nubij ri ruchʼabel ri Cristo, manjun vinek xtitiquir xticolotej, xaxe cʼa vi niquicukubaʼ quicʼuʼx riqʼuin ri rubiʼ. Roma cʼariʼ, vi e tanaban re banobel reʼ, ri cukubabel cʼuʼx xa tanaban chic chukaʼ, y can cʼayef vi rubanon ri vinek riʼ, roma xa e junan achiʼel vi man ta banatjinek cʼa ri colotajic.

39 Can kitzij vi cʼa, vachʼalal ri ix nucʼuʼxlan, yin nintzʼet chi man que ta riʼ iviqʼuin rix, roma yin nintzʼet chi cukul chic icʼuʼx riqʼuin ri Cristo, roma cʼa ri ichʼuchʼujil. Roma vi man ta cukul ri icʼuʼx riqʼuin rijaʼ, can man ta vi ix rucʼamon richin ix ajilan quiqʼuin ri vinakiʼ richin ri rukʼataj rijaʼ.

40 Vachʼalal ri ix nucʼuʼxlan, ninvajoʼ yichʼo iviqʼuin chʼakaʼ chirij ri oyobenic pan ivánima. ¿Achique cʼa banel tok cukul icʼuʼx, vi man yixoyoben ta pan ivánima?

41 ¿Achique cami cʼa xtivoyobej pan ivánima? Can kitzij ninbij chive chi xtivoyobej pan ivánima chi roma ri rutojbalil mac ri xuben ri Cristo y chukaʼ roma ri ruchukʼaʼ ri rucʼastajibel, rix xquixyacatej cʼa chupan ri cʼaslen richin jumul. Ronojel cʼareʼ xa roma cukul chic icʼuʼx riqʼuin rijaʼ, achiʼel cʼa nrajoʼ ri sujunic.

42 Roma cʼariʼ, vi jun achin cukul rucʼuʼx, cʼo chukaʼ chi nroyobej pa ránima, roma vi xa manek rucukubabel cʼuʼx xa manek cʼa chukaʼ oyobenic pa ránima.

43 Chukaʼ ninbij chive chi manek banel richin cukul cʼa rucʼuʼx, ni ta chukaʼ nroyobej pa ránima, vi man ta chʼuchʼuj rijaʼ y man ta ruchʼutinirisan chic ri rucʼuʼx.

44 Vi ta cʼo cʼa banel, ri rucukubabel cʼuʼx y ri oyobenic pa ránima xa manek ta quejkalen, roma ri vinek man utz ta nitzuʼun chuvech ri Dios, xaxe vi chʼuchʼuj rijaʼ y can ruchʼutinirisan vi chic rucʼuʼx. Vi jun achin chʼuchʼuj y ruchʼutinirisan chic rucʼuʼx y nukʼalajirisaj roma ri ruchukʼaʼ ri Uxlabixel chi ri Jesús can ja vi rijaʼ ri Cristo, can cʼo vi chi cʼo chukaʼ ri rulokʼokʼebel, xa manjun ta rijaʼ. Roma cʼariʼ, cʼo chi nicʼojeʼ ri rulokʼokʼebel.

45 Ri lokʼokʼebel janíla nicochʼon, y can utz vi ránima, man nixochʼin ta y man nibananen ta, y man nucanoj ta ri richin, man chaʼnin ta noyover, y man nunojij ta ri itzel, y man niquicot ta riqʼuin ri etzelal, xa niquicot cʼa riqʼuin ri kitzij. Nutij cʼa ronojel pokonal chi utzil, nunimaj ronojel, nroyobej ronojel pa ránima, y nucochʼ ronojel.

46 Roma cʼariʼ vachʼalal, ri ix nucʼuʼxlan, vi xa manek ilokʼokʼebel, can ix manjun vi rix, roma ri lokʼokʼebel manjun bey niqʼuis. Roma cʼariʼ, titunubaʼ iviʼ ri riqʼuin ri lokʼokʼebel ri can janíla vi nim chuvech ronojel chic, roma ronojel xa cʼo chi niqʼuis.

47 Jacʼa ri lokʼokʼebel jariʼ ri chʼajchʼoj rajovabal ri Cristo y can nicochʼon vi benek ruvech. Ri vinek ri cʼo ri lokʼokʼebel riqʼuin chupan ri ruqʼuisibel kʼij, can utz vi xtiban chire.

48 Roma cʼariʼ vachʼalal ri ix nucʼuʼxlan, ticʼutuj cʼa akʼanij chire ri Tataʼixel riqʼuin ronojel ri ruchukʼaʼ ri ivánima richin xquixnoj cʼa riqʼuin re ajovabel reʼ ri ruyaʼon can rijaʼ chique checonojel ri kitzij tzekelbenelaʼ richin ri Jesucristo, ri Rucʼajol. Riqʼuin cʼariʼ, xquixoc ri ralcʼual ri Dios. Riqʼuin cʼa chukaʼ riʼ, tok rijaʼ xtucʼut riʼ, roj xkojoc junan riqʼuin rijaʼ, roma xtikatzʼet rijaʼ riqʼuin cʼa ri kitzij rubaniquil. Que cʼareʼ chukaʼ, cʼo banel richin nikil ri oyobenic riʼ pa kánima y chukaʼ xkojchʼajchʼojirisex achiʼel cʼa rijaʼ chʼajchʼoj. Amen.