Capítulo 6
Aj tiʼ tka tuʼn tbant tiʼj biyabil, bix aj tuʼmal tzaʼn tuʼn txiʼ kʼot. Ke ley te glesya.
1. Bix jaʼla chin yolila tiʼj biyabil. Lutzan luʼ, biyaʼnmajke élderes, presbíteros bix xnaʼtzal; bix ntiʼ baj cybiyaʼn ka ntiʼ t-xiʼ cyyecʼan ox toc te baʼn tuʼn tkʼamanta que ax toc tbanal taʼ tuʼn cycʼam.
2. Ax mintiʼ tuʼn tcʼamet mijun tuj biyabil, ka miyaʼ ma tzul tucʼ jun tanma meba bix tucʼ jun t-xew otak tzʼajs tiʼj tnachal, bix tuʼn takʼ ax toc tiʼj glesya que ax toc otak tzʼajtz tiʼj tanma cyiʼj twitz til.
3. Bix mi jun kit tcʼamet tuʼn tbiyan, oʼcxtzala ka ma tcʼam tibaj aj tbi Cristo, tucʼ ajbil tuʼn tkʼon baʼn te asta oc tjapan baj twiʼ.
4. Bix octzan cycʼamet tuj biyabil, bix aj tipamal Xewbaj Sant otak bant tbinchben cyibaj bix otak chi baj txʼajoʼn, tons nchoctzan tajlal cyxol ke cyucʼal tuj Glesya te Cristo, bix octzan tcuʼx tzʼibat cybi, tuʼntzan tcyaj cyajlal tuj uʼj bix tuʼntzan t-xiʼ kʼot te cynebebil aj tyol Dios, tuʼntzan cyxiʼ cʼuʼt tuj be jikan bix tuʼn cyxiʼ bit tuj cy-orasyon miʼn baj, bix oʼcx tuʼn t-xiʼ keʼ cycʼuʼj tiʼj Cristo, que a binchal bix kʼol te cyocslabil.
5. Bix cuxiʼ oc tchmon tib glesya tuʼn cyapaʼn weʼyaj bix tuʼn cynan Dios, bix tuʼn cyyolan jun tucʼ juntl tiʼj tuʼn ten cyanma tuj baʼn.
6. Bix cuxiʼ toc cychmon cyib tuʼn cyneben tiʼj pan bix bin, te nabil te Kajaw Jesús.
7. Bix nim soc cycwentan tuʼntzan mi ten tnachal cyxol; bix octzan tcanet jun cyuʼn que otak bant jun nach tuʼn, kittzan tcub tsentens cywitz élderes tuʼn ox testiwa te glesya, bixka ntiʼ oc tjaw jolpaj mix tuʼn ttzaj tmaʼn twitz til, kit tjatz kʼuchat tbi, bix ntiʼ toc tajlal cyxol tnam te Cristo.
8. Per nok jteʼ elx oc tiʼj tanma, bix oc tkana najsbil tucʼ cyakil tcʼuʼj, kittzan tnajset.
9. Bix ajke tuj glesya kit cykʼin twitz tiʼj cychembil según aj oc ttzaj tyecʼan Xewbaj, bix tuʼn tipamal Xewbaj Sant; según aj oc tkʼamanta Xewbaj Sant cye, tuʼntzan t-xiʼ pacbal, ocsal, nal Dios, kanal te bixmo bitzal, cyjaʼtzan kit tbant.