1. Bix jaʼlatzan áyina, Moroni, cbel ntzʼibanake juʼn yol aj cyaj ttxʼolbaʼn nmana, tiʼj ocslabil, tuʼn tkeʼ kcʼuʼj bix xtalbil aj cʼujlabil; tuʼnj atzan tuʼmaljo aj t-xiʼ yolan cye tnam, myentras nyolantak tuj ja cyʼiwlaʼn aj otak baj binchan te nabil Dios:

2. Jaʼla ayina, Mormón, chin xel yolana cyucʼala, akeya wermaniya cʼujlaʼn; bix tchjonta Dios bix aj tajbil Dios aj Mambaj bix Kajaw Jesucristo, tuʼn tlaj toyaj aj ttxocbil saj tkʼoʼn wecyʼ, ntkiy tuʼn nyolana cyucʼala tuj tyemp luʼ.

3. Cyjaʼtzan jluʼ, wajbila tuʼn nyolana cyucʼala akaya te glesya, akeya t-xjalal Cristo cyajbil tiʼj tzalajibil, que maʼ chi cambana tiʼj tuʼn tkeʼ cycʼuʼja tuʼnjo chocax tuj ujlabil te Kajaw, biʼx jaʼla, asta oc tcanet ujlabil cyuʼna tucʼal tuj cyaʼj.

4. Bix cxel nmaʼna jluʼ cyiʼja, akeya wermaniya, nok tuʼn tlaj cynabila pur tzalajibil cyucʼ cycʼwaʼl xjal.

5. Tuʼnj cʼujlaʼnx wuʼna aj tyol Dios, chitzan cyjaʼw: nok cyiʼj cybinchben celal cynicyʼa tiʼj; tuʼnj ka tbanalke cybinchben, ax icyx cyejo.

6. Tuʼnj lutzan luʼ, oʼ tmanta Dios que aj xjal nach milay bant tbanal tuʼn; tuʼnj ka ma txiʼ toʼyan jun oyaj bixmo orasyon te Dios, oʼcxtzala ka mintiʼ ma bant tuʼn cyakil tnabil, ntiʼ tganar tiʼj.

7. Tuʼnj luluʼ, miyʼ toc tajlal tuj xtis.

8. Tuʼnj lutzan luʼ, ka jun xjal nach, ma tyecʼa jun oyaj nbant tuʼn tuʼn caba tcʼuʼj; cyjaʼtzan jluʼ nnoctzan tajlal lonxa icytzan otaj tzʼoc tacyeʼ oyaj tuʼn; cyjaʼtzan ax loʼn que nachjo tuj twitz Dios.

9. Ax icyx cocal tajlal tuj tnachal ka at jun xjal ma nan Dios bix miyaʼ ax toc miyaʼ tuʼn cyakil tcʼuʼj; icytzanjo, bix ntiʼ tganar tiʼj, tuʼnj ntiʼ ntcʼam Dios mi jun ajo.

10. Cyjaʼtzan jluʼ, aj xjal nach milay bant tbanal tuʼn; bix milay txiʼ tyecʼan jun oyaj tbanal wena.

11. Tuʼnj lutzan luʼ, aj jun tjawatz aʼ cʼa milay takʼ tbanal aʼ; mix jun tjawatz aʼ tbanal milay takʼ aʼ cʼa, cyjaʼtzan tuʼmal ka jun xjal tmajan dyablo, milay tzʼoc lapeʼ tiʼj Cristo; bix ka ma tzʼoc lapeʼ tiʼj Cristo, milay tzʼoc majan tucʼ dyablo.

12. Cyjaʼtzan, cyakil cosa baʼn tzajna tiʼj Dios, bix aj tnachal tzajna tiʼj dyablo; tuʼnj tajkʼoj Dios aj dyablo, bix cyjaʼtzan cucxix nkʼojl tucʼal, bix npayar tuʼn tbant twitz il bix tuʼn tbant tnachal aj miʼ tzʼel baj twiʼ.

13. Per lutzan luʼ, aj ka te Dios nkanan tiʼj tuʼn tbant tbanal; que atzan tuʼmal que cyakil aj nakanan tiʼj tuʼn tbant tbanal, bix tuʼn toc tcʼujlaʼn Dios, tuʼnkʼa ntzaj tkʼamaʼnkʼa te.

14. Tenx tcwenta, pwes, akiya wermaniya cʼujlaʼn, tuʼn mi txiʼ cymaʼna que aj tnachal tzajna tiʼj Dios, bixmo aj tbanal bix te Dios tzajnajo tiʼj dyablo.

15. Tuʼnj lutzan luʼ, ke wermaniya, cxel kʼot cyeya tuʼn cyxtisana, tuʼntzan tel cynicyʼa tiʼj tbanal bix tnachal; bix claro taʼ tuʼmal tuʼn t-xtisat, tuʼntzan tel cynicyʼa tiʼj tuj ttxolal wena tuj cyximbila, lonxa icytzan spicyʼan tuj kʼij ax icy te klolj te konicyʼan.

16. Pwes lutzan luʼ, cye cyakil xjal nxiʼ kʼot t-Xew Cristo tuʼntzan tel tnicyʼ tiʼj tbanal tiʼj tnachal; cyjaʼtzan jluʼ, nxiʼ nyecʼana tuʼmal tiʼj xtisbil; tuʼnj cyakil aj nkanan tiʼj tuʼn tbant tbanal bix ntkana tuʼn tocx ocslat Cristo, ntzaj samaʼnjo tuʼn tipamal bix cyaj tiʼj Cristo; bix cyjaʼtzan celalxix cynicyʼa tiʼj, te Dios jo.

17. Per alcyej nkanan tiʼj cye xjal tuʼn tbant tnachal cyuʼn, bix tuʼn mi tocx cyocslaʼn tiʼj Cristo, bix tuʼn tel icʼat bix tuʼn mi kserviʼran tucʼ Dios, tons jaʼca tzʼel cynicyʼa tiʼj, tucʼ jun ximbitz ax toc, que a dyablajo; tuʼnj atzan tuʼmal nbantte dyablo tbinchben, tuʼn ntiʼ nkana cye xjal tuʼn tbant tbanal, ntiʼ, mix te junx tjunalx; mix nbant cyuʼn t-ángel, mixkej teʼ tuj tcwent.

18. Jaʼlatzan, akiya wermaniya, loʼn cyuʼna aj spicyʼan, aj al uʼn chi xtisala, que a tspicyʼamal Cristo, atx cycwenta tiʼj tuʼn min cyxstisna miyaʼ tuj ttxolal; tuʼnj ax sentens aj ma t-txiʼ cybinchaʼna ax icyx chi cha-cwela tuj sentens.

19. Cyjaʼtzan jluʼ, cxel w-ocsaʼna cyeya, wermaniye, tuʼn cyjayona ttxolal según tspicyʼamal Cristo, tuʼntzan tel cynicyʼa tiʼj baʼn tiʼj tnachal; bix ka ma chi pona cyiʼj cyakil tbanal, bix mi ma chi kʼona sentens, ax toc tcʼwaʼl Cristo keya.

20. Pero, akiya wermaniya, ¿Alcye tuʼmal jaʼca chi pona tiʼj cyakil tbanal?

21. Jaʼlatzan kopoltzan tiʼj ocslabil aj xiʼ nmaʼna cye tiʼjjo chin yolala; bix cxel nmaʼna tuʼmal aj tzaʼn tuʼn cytena nakaʼyin tiʼj cyakil tbanal.

22. Tuʼn lutzan luʼ, loʼn tuʼn Dios cyakilke cosas, que te junmajx tuj te junmajx, luluʼ, ma chi tzaj tsamaʼn ángel tuʼn tbant takʼan baʼn te cycʼwaʼl xjal, kʼamal te tiʼjxax tuʼn tul Cristo; bix que tiʼj Cristo tzul cyakilcaj baʼn.

23. Bix ax xiʼ ttxʼolbaʼn Dios cye profetas, tuʼn tex ttziʼ, que tzul Cristo.

24. Bix lutzan luʼ, cyuj nimca tuʼmal xiʼ tyecʼan cosas baʼn te cycʼwaʼl xjal; bix cyakilkaj cosas baʼn tzajna tiʼj Cristo; tuj juntl tuʼmal, ajke xjal jaʼca chiten tuj jun tuʼmal tuʼn cycub tzʼak, bix mijun cosa baʼn jaʼca canan cyiʼj.

25. Que tuʼntzan jluʼ tuʼn onbil cye ángel bix tuʼn cyakil yol nnetz tuj ttziʼ Dios, keʼ cyuʼn xjal tuʼn ten cyocslabil tiʼj Cristo; bix icytzanjo, nok tuʼn ocslabil, ma chi cyajten nakaʼyan cyiʼj cosa baʼn; bix cyjaʼtzanjo baj asta tul Cristo.

26. Bix tulxatzan, ax i coletke xjaltl nok tuʼn ocslabil tuj tbi; bix tuʼn ocslabil ma choc tcʼwaʼl Dios. Bix toc que n-ankʼin Cristo lonxa icytzan o tma kej yol luʼ cye kman, cyjaʼw: Nok nicyʼpunx cosa ma cykaniya te Mambaj tuj nbicyʼa, ka baʼn, bix ocslaʼn tuʼn cyakil cycʼuʼja oc ctzajal kʼoʼn, lutzan luʼ, oc tzul kʼoʼn cyeya.

27. Cyjaʼtzan ten jluʼ, akeya wermaniya nim ncʼuʼja cyiʼja, ¿Maʼ chi weʼke binchben nim tipamal, tuʼnj oʼ jax Cristo tuj cyaʼj bix oʼ cub tutzeʼ tuj tbankʼaj Dios tuʼn tkanan te Mambaj aj xtalbil cyibaj cycʼwaʼl xjal?

28. Tuʼnj maʼ tzʼelkʼa twitz aj tnabil ley, bix nkanan cyiʼj cyakilka at cyocslabil tiʼjkʼa; bix ajka at cyocslabil tiʼjkʼa, oc chi pol tiʼj aj cyakil baʼn; cyjaʼtzan jluʼ, ncolankʼa tiʼj tuʼmal te cycʼwaʼl xjal; bix c-ankʼil te junmajx tuj cyaʼj.

29. Bix tuʼntzanj oʼ bant tuʼn j-ajo, ¿Oʼ chi weʼke binchben nim cyipamal? Lutzan luʼ, cxel nmaʼna cyeya que miʼn; bix naʼnx t-xiʼ cycoʼlan ángel tuʼn tbant cyakʼan cyxol cycʼwaʼl xjal.

30. Tuʼnj lutzan luʼ, teʼ tuj tcwentkʼa tuʼn tbant takʼan según aj tekʼa nxiʼ tmaʼnkʼa, bix ncub tyecʼan tib cywitz kej at jun cyocslabil n-ankʼin bix jun cyxew twaban tib wena tuj cyakil tuʼmal ix sakxax wena.

31. Bix aj tuʼmal takʼan atzanj tuʼn cytxaquet xjal tiʼj tuʼn cyjaw jolpaj tajtz tiʼj cyanma tiʼj tnachal; bix tuʼn cyel twitz ajke binchben bann tiʼj tuʼn Mambaj cyucʼ cycʼwaʼl xjal; bix tuʼn tbant tten be cyxol cycʼwaʼl xjal, tuʼn t-xiʼ txʼolbet tyol Cristo cyeke xjal sicʼoʼnka te Mambaj, tuʼntzan cymanta ax toc tiʼjkʼa.

32. Bix tuʼntzan cybant binchben tuj tuʼmal j-ajo, aj Kajaw Dios cbajal tbinchan be te cyocslabil tiʼj Cristo ajke ttxʼaban xjal, tuʼntzan ten tcubil Xewbaj Sant tuj cyanma, ax aj tipamal; cyjaʼtzan nnel Mambaj cywitzj bann tiʼj cyucʼ cycʼwaʼl xjal.

33. Bix oʼ tma Cristo: ka at cyocslabila wiʼja, at cyipamala tuʼn cybant nok alxcyex cosa aj baʼn tuj nwitza.

34. Bix oʼ tkʼamantakʼa: Cyiʼn ajs cyanma tiʼj tnachal, cyakilkaya, tuj ttxaʼmla txʼotxʼ; cytzaja wiʼja bix chi biyana tuj nbicyʼa bix tenx cyocslabila wiʼja tuʼntzan cycoleta.

35. Cyjaʼtzan jluʼ, akiya wermaniya cʼujlaʼn wuʼna, ka ax toc tuʼmal cyiʼj cosas nchin yolana tiʼj cyeya — bix tuj twiʼpan kʼij oc ctzajel tyecʼan Dios cyeya tuʼn tipamal bix tucʼ matij ttzalajibil que ax tocke — bix ka ax tocke, ¿Oʼnla chel baj ke kʼij tuʼn cybant binchben nim cyipamal?

36. Bixmo ¿Oʼ txiʼ cycoʼlan ángeles tuʼn tcub cyyecʼan cyib cywitz cycʼwaʼl xjal? bixmo ¿Oʼ tmaket aj tipamal Xewbaj Sant? ¿Cbantel tuʼn, myentras n-nel tyemp, bixmo myentras atx txʼotxʼ, bixmo cyjelten twitz txʼotxʼ jun xjal aj ccoletal?

37. Lutzan luʼ, cxel nmaʼna que miʼn; porque tuʼn ocslabil aj nchi bant binchben nim tipamal, bix tuʼn ocslabil nchi jaw let ángel bix nbant cyakʼan te baʼn cye xjal; cyjaʼtzan jluʼ, ka maʼ chi weʼ jluʼ, ¡Becyʼbil cywitz cycʼwaʼl xjal, porque tuʼntzanj ntiʼ cyocslabil, bix cyakiljo nok gana!

38. Tuʼntzanj, según tyol Cristo, mijun xjal jaʼca colet oʼcxtzanj ka at tocslabil tiʼj tex tbi; que aj tuʼmal ka maʼ chi weʼkaj cosas ajo ax maʼ weʼ ocslabiltl; bix junmajx nach tuʼmal xjal, tuʼnj ncyajtzan lonxa icytzan ntiʼ otak bant jun colbil.

39. Per lutzan luʼ, akeya wermaniya cʼujlaʼn wuʼna, chin ayola tiʼj ke cosas tbanaltl cyiʼja, tuʼn nxiʼ nxiʼmana que at cyocslabila tiʼj Cristo nok tuʼn tlaj aj ncub cybecyʼbiliʼn cywitza, tuʼnj ka ntiʼ cyocslabila tiʼjkʼa, tons miyaʼ tbanalkeya tuʼn cyoca tajlal cyxol tnam te glesya.

40. Bix txkantl, akeya wermaniya cʼujlaʼnkeya wuʼna, wajbila tuʼn nyolana cyeya tiʼj tuʼn tkeʼ kcʼuʼj. Txaʼn tuʼn cycambana tiʼj ocslabil, ka ntiʼ tuʼn tkeʼ cycʼuʼja.

41. Bix ¿Ti tkal tuʼn tcub cyayoʼna? Lutzan luʼ, cxel nmaʼna que il tiʼj tuʼn tenj aj tuʼn tkeʼ cycʼuʼja, que nok tuʼn aj tcyimlen Cristo chjol twitz kil bix aj tipamal tjawlen itzʼjtl, oc chi jawal itzʼja tuj ankʼbil te junmajx, bix j-ajo nok tuʼn cyocslabila tiʼjkʼa, ictzan aj tziybil.

42. Que aj tuʼmal cyjaʼw que ka at tocslabil jun xjal, il tiʼj tuʼn ten aj tuʼn tkeʼ tcʼuʼj; tuʼnj ka ntiʼ tocslabil ax milay ten aj tuʼn tkeʼ cʼuʼjbaj.

43. Bix lutzan luʼ, ax cxel nmaʼna que ax milay ten tocslabil jun xjal mix tuʼn tkeʼ tcʼuʼj, oʼcxtzala ka mans bix tuj becyʼbil taʼ tanma.

44. Katzan miʼn, aj tocslabil bix aj nkeʼ tcʼuʼj nok ganakajo, tuʼn mijun cʼamoʼn tuʼn Dios oʼcxkaj mans bix becyʼbil taʼ tanma; bix ka aj jun xjal mans bix tuj becyʼbil taʼ tanma, bix ma tkʼamanta tuʼn tipamal Xewbaj Sant que a Jesús aj Cristo, il tiʼj tuʼn tten t-xtalbil; tuʼnj ka ntiʼj ajo mitiʼ ti tkal til; cyjaʼtzan jluʼ, il tiʼj tuʼn ten tucʼal aj cʼujlabil.

45. Nim taʼw tiʼj xtalbil aj cʼujlabil, bix puro tbanal, ntiʼ kʼoj tuj, ntiʼ nxiʼ mal kanma, ntiʼn tjoy aj te jun nok teca, ntiʼ nt-xiʼma tnachal, ntiʼ ntzalaj tiʼj tnachal, sino tuj ax toc, ntapaʼnte cyakil taʼw tiʼj, cyakil ntocslanta, cyakil ntayonta, cyakil nnicyʼ taʼw tuʼn.

46. Cyjaʼtzan jluʼ, akeya wermaniya cʼujlaʼn, ka ntiʼ cyxtalbila aj cʼujlabil, ntiʼ ti tkal cyxilena, tuʼnj mi jtoj tuʼn tcyaj xtalbil aj cʼujlabil aj miyaʼ xtalbil, que ajo matij twitz cyakil, tuʼnj cyakilka cosas oc chi najal.

47. Pero aj xtalbil aj cʼujlabil ajo puro tchi-al te Cristo, bix ax ctel te junmajx; bix alcyej kʼiʼn tuʼn tuj twiʼpan kʼij, baʼn cxel tiʼj.

48. Bix txkantltzan, akeya wermaniya cʼujlaʼn, cykananxa te Mambaj tuʼn cyakil tipamal cyanmiya, que oʼ tzaj tkʼoʼn tuʼn t-xiʼ mal aj tzalajibil ajo cyeke t-xjalal ax toc te tCʼwaʼl, Jesucristo; tuʼn cyoca tcʼwaʼl Dios; que octzan tjaw canetkʼa, icyx koʼ icytzan akʼa, tuʼnj kocx queyiʼn tzaʼnxax nqueʼyin que tuʼn ten aj tuʼn tkeʼ kcʼuʼj; tuʼn koc ax toc tbanal lonxa icytzan, pur tbanal. Icytzan tenjo.