1 Ug karon ako, si Moroni, mosulat og pipila sa mga pulong sa akong amahan nga si Mormon, diin gipamulong niya ang kabahin sa pagtuo, paglaom, ug gugmang putli; kay sa ingon niini nga paagi siya namulong ngadto sa katawhan, samtang nagtudlo siya kanila didto sa sinagoga nga ilang gitukod alang sa dapit nga ampoanan.

2 Ug karon ako, si Mormon, mamulong kaninyo, hinigugma ko nga kaigsoonan; ug kini pinaagi sa grasya sa Dios nga Amahan, ug sa atong Ginoong Jesukristo, ug sa iyang balaan nga kabubut-on, tungod sa gasa sa iyang pagtawag kanako, nga ako gitugotan nga mamulong kaninyo niining higayona.

3 Mao nga, mamulong ako kaninyo nga anaa sa simbahan, nga malinawong mga sumusunod ni Kristo, ug nga nakabaton sa igo nga paglaom diin kamo makasulod sa kapahulayan sa Ginoo, gikan karon hangtod nga kamo mopahulay uban kaniya didto sa langit.

4 Ug karon akong kaigsoonan, mihukom ako niining mga butang mahitungod kaninyo tungod sa inyong malinawon nga pagpakabuhi uban sa katawhan.

5 Kay nahinumdom ako sa pulong sa Dios nga nag-ingon nga pinaagi sa ilang mga buhat kamo makaila kanila; kay kon ang ilang mga buhat maayo, nan sila maayo usab.

6 Kay tan-awa, ang Dios miingon nga ang usa ka tawo nga daotan dili makahimo niana nga matarong; kay kon mohalad siya og usa ka gasa, o mag-ampo sa Dios, gawas kon siya mohimo niini uban ang tinuod nga katuyoan kini dili makahatag kaniya og kaayohan.

7 Kay tan-awa, kini dili iphon ngadto kaniya nga buhat sa pagkamatarong.

8 Kay tan-awa, kon ang tawo nga daotan mohatag og gasa, himoon niya kini uban sa daotan nga buot; mao nga pagaiphon kini ngadto kaniya nga sama og nagpabilin ra kaniya ang gasa; mao nga pagaisipon siya nga daotan sa atubangan sa Dios.

9 Ug sa ingon niana usab pagaiphon kini nga daotan ngadto sa usa ka tawo, kon siya mag-ampo ug dili uban sa tinuod nga katuyoan sa kasingkasing; oo, ug kini dili makahatag kaniya og kaayohan, kay ang Dios dili modawat sa ingon niana.

10 Mao nga, ang usa ka tawo nga daotan dili makahimo nianang matarong; ni siya makahatag og maayo nga gasa.

11 Kay tan-awa, ang usa ka pait nga tubod dili makahatag og maayo nga tubig; ni ang usa ka maayo nga tubod makahatag og pait nga tubig; mao nga, ang usa ka tawo nga sulugoon sa yawa dili makasunod ni Kristo; ug kon mosunod siya ni Kristo dili siya mahimo nga sulugoon sa yawa.

12 Mao nga, ang tanan nga butang nga maayo nagagikan sa Dios; ug kana nga daotan nagagikan sa yawa; kay ang yawa kaaway sa Dios, ug nakig-away batok kaniya sa kanunay, ug nagdapit ug nagdani sa pagpakasala, ug sa pagbuhat niana nga daotan sa kanunay.

13 Apan tan-awa, kana nga iya sa Dios nagdapit ug nagdani sa paghimo og maayo sa kanunay; mao nga, ang matag butang nga magdapit ug magdani sa pagbuhat og maayo, ug sa paghigugma sa Dios, ug sa pag-alagad kaniya, dinasig sa Dios.

14 Mao nga, pagbantay, akong hinigugma nga kaigsoonan, nga dili ninyo hukman kanang daotan nga iya sa Dios, o kanang maayo ug iya sa Dios nga gikan sa yawa.

15 Kay tan-awa, akong kaigsoonan, gitugotan kamo sa paghukom, nga kamo masayod sa maayo gikan sa daotan; ug ang paagi sa paghukom sama ra kasayon gamit ang hingpit nga kahibalo sama sa pag-ila sa hayag nga adlaw gikan sa ngitngit nga kagabhion.

16 Kay tan-awa, ang Espiritu ni Kristo gihatag ngadto sa matag tawo, nga siya masayod sa maayo gikan sa daotan; mao nga, ipakita ko kaninyo ang paagi sa paghukom; kay ang matag butang nga modapit sa paghimo og maayo, ug sa pagdani sa pagtuo diha kang Kristo, gipadala pinaagi sa gahom ug gasa ni Kristo; mao nga kamo mahimo nga masayod uban sa hingpit nga kasayoran nga kini gikan sa Dios.

17 Apan bisan unsa nga butang nga magdani sa mga tawo sa pagbuhat og daotan, ug sa dili pagtuo kang Kristo, ug sa paglimod kaniya, ug sa dili pag-alagad sa Dios, kon ingon man niana kamo masayod uban sa hingpit nga kasayoran nga kini gikan sa yawa; kay sa ingon niini nga paagi molihok ang yawa; kay dili siya modani sa tawo sa pagbuhat og matarong, dili, bisan og usa, ni ang iyang mga anghel; ni sila kinsa nagpaulipon sa ilang kaugalingon ngadto kaniya.

18 Ug karon, akong kaigsoonan, tungod sa kamatuoran nga nahibaloan ninyo ang kahayag diin kamo mahimo nga mohukom, kansang kahayag mao ang kahayag ni Kristo, seguroa nga dili kamo mohukom sa sayop nga paagi; kay uban nianang sama nga paghukom kamo usab pagahukman.

19 Mao nga, mohangyo ako kaninyo, kaigsoonan, nga kamo magmakugihon sa pagpangita pinaagi sa kahayag ni Kristo nga kamo masayod sa maayo gikan sa daotan; ug kon kamo maghupot sa matag maayo nga butang, ug dili kini ipanghimaraot, sa pagkatinuod mahimo kamo nga anak ni Kristo.

20 Ug karon, akong kaigsoonan, unsaon sa paghimong posible nga kamo makahupot sa matag maayo nga butang?

21 Ug karon akong hisgotan kana nga pagtuo, nga akong giingon nga akong ipamulong; ug sultihan ko kamo sa paagi diin kamo makahupot sa matag maayo nga butang.

22 Kay tan-awa, ang Dios nga nasayod sa tanan nga butang, kay siya gikan sa walay kataposan ngadto sa walay kataposan, tan-awa, nagpadala siya og mga anghel aron sa pagpangalagad ngadto sa katawhan, aron ikapahibalo ang kabahin sa pag-anhi ni Kristo; ug diha kang Kristo kinahanglan magagikan ang matag maayo nga butang.

23 Ug ang Dios usab tataw nga mipahibalo ngadto sa mga propeta, pinaagi sa iyang kaugalingong ba-ba, nga si Kristo moabot gayod.

24 Ug tan-awa, dihay nagkalainlaing paagi sa iyang pagpadayag sa mga butang ngadto sa katawhan, nga mga maayo; ug ang tanan nga maayong butang nagagikan kang Kristo; kay kon dili, ang mga tawo napukan, ug walay maayong mga butang nga modangat kanila.

25 Mao nga, pinaagi sa pagpangalagad sa mga anghel, ug pinaagi sa matag pulong nga migula gikan sa ba-ba sa Dios, ang mga tawo nagsugod sa paggamit og pagtuo kang Kristo; ug sa ingon niana pinaagi sa pagtuo, sila makahupot sa matag maayo nga mga butang; ug ingon niana hangtod sa pag-anhi ni Kristo.

26 Ug human sa iyang pag-anhi ang mga tawo usab maluwas pinaagi sa pagtuo sa iyang ngalan; ug pinaagi sa pagtuo, mahimo silang mga anak sa Dios. Ug sama ka segurado nga si Kristo buhi siya namulong niini nga mga pulong ngadto sa atong mga amahan, nga nag-ingon: Bisan unsa nga butang ang inyong pangayoon sa Amahan pinaagi sa akong ngalan, nga maayo, gamit ang pagtuo ug masaligon nga kamo makadawat, tan-awa, kini ihatag nganha kaninyo.

27 Mao nga, hinigugma kong kaigsoonan, nahunong ba ang mga milagro tungod sa pagkayab ni Kristo ngadto sa langit, ug milingkod dapit sa tuo nga kamot sa Dios, aron sa pagpangayo gikan sa Amahan sa iyang mga kahigayonan sa kaluoy nga anaa kaniya diha sa katawhan?

28 Kay natuman niya ang tibuok katuyoan sa balaod, ug nag-angkon siya sa tanan niadto nga adunay pagtuo diha kaniya; ug sila kinsa adunay pagtuo diha kaniya mohupot sa matag maayo nga butang; mao nga gilabanan niya ang kaayohan sa katawhan; ug nagpuyo siya sa kahangtoran ngadto sa kalangitan.

29 Ug kay nahimo niya kini, akong hinigugma nga kaigsoonan, ang mga milagro nahunong ba? Tan-awa sultihan ko kamo, Wala; ni ang mga anghel mihunong sa pagpangalagad ngadto sa katawhan.

30 Kay tan-awa, ubos sila sa iyang katungod sa papangalagad sumala sa pulong sa iyang pagmando, nagpakita sa ilang kaugalingon ngadto kanila pinaagi sa hugot nga pagtuo ug lig-on nga panghunahuna sa tanang matang sa pagkadiosnon.

31 Ug ang ilang katungdanan sa pagpangalagad mao ang pagtawag sa mga tawo ngadto sa paghinulsol, ug pagtuman ug paghimo sa buhat sa mga pakigsaad sa Amahan, nga iyang gihimo ngadto sa katawhan, sa pag-andam sa agianan sa mga anak sa katawhan, pinaagi sa pagpadayag sa pulong ni Kristo ngadto sa mga pinili nga sulugoon sa Ginoo, aron sila magpamatuod kaniya.

32 Ug sa paghimo niini, ang Ginoong Dios miandam sa agianan nga ang nahibilin sa mga tawo makabaton og pagtuo kang Kristo, nga ang Espiritu Santo maadunay dapit sa ilang mga kasingkasing, sumala sa gahom niini; ug subay niini nga pamaagi gituman sa Amahan ang mga pakigsaad nga iyang gihimo ngadto sa mga anak sa katawhan.

33 Ug si Kristo miingon: Kon kamo adunay pagtuo kanako makabaton kamo og gahom sa pagbuhat sa bisan unsang butang nga maayo ngari kanako.

34 Ug miingon siya: Paghinulsol kamong tanan nga lumulupyo sa yuta, ug duol kanako, ug pagpabunyag sa akong ngalan, ug pagbaton og pagtuo kanako, nga kamo maluwas.

35 Ug karon, akong hinigugma nga kaigsoonan, kon mahitabo man nga tinuod kining mga butang nga akong gipamulong kaninyo, ug ang Dios mopakita kaninyo, uban sa gahom ug dako nga himaya sa kataposang adlaw, nga kini tinuod, ug kon tinuod man kini, nahunong ba ang adlaw sa mga milagro?

36 O ang mga anghel mihunong na ba sa pagpakita ngadto sa mga anak sa katawhan? O siya mipugong ba sa gahom sa Espiritu Santo gikan kanila? O motugot ba siya, samtang ang panahon mohangtod, o ang yuta mobarog, o adunay usa ka tawo ibabaw niini nga pagaluwason?

37 Tan-awa sultihan ko kamo, Dili; kay pinaagi sa pagtuo ang mga milagro mahimo; ug pinaagi sa pagtuo ang mga anghel mopakita ug mangalagad sa mga tawo; mao nga, kon mahunong kining mga butanga alaot ang mga anak sa katawhan, kay kini tungod sa pagkawalay pagtuo, ug ang tanan kawang.

38 Kay walay tawo nga maluwas, sumala sa mga pulong ni Kristo, gawas kon sila magbaton og pagtuo sa iyang ngalan; mao nga, kon mahunong kining mga butanga, niana ang pagtuo mahunong usab; ug makaluluoy ang kahimtang sa tawo, kay sama nga walay gihimong katubsanan kanila.

39 Apan tan-awa, hinigugma kong kaigsoonan, magahukom ako og maayong mga butang bahin kaninyo, kay mohukom ako nga kamo adunay pagtuo kang Kristo tungod sa inyong kaaghop; kay kon kamo walay pagtuo kaniya nan dili kamo angay nga pagaiphon taliwala sa katawhan sa iyang simbahan.

40 Ug usab, hinigugma kong kaigsoonan, mamulong ako kaninyo mahitungod sa paglaom. Unsaon ninyo sa pag-angkon og pagtuo, gawas kon kamo magbaton og paglaom?

41 Ug unsa kanang inyong gilaoman? Tan-awa sultihan ko kamo nga kamo magbaton og paglaom pinaagi sa pag-ula ni Kristo ug sa gahom sa iyang pagkabanhaw, aron mabanhaw ngadto sa kinabuhing dayon, ug kini tungod sa inyong pagtuo kaniya sumala sa saad.

42 Mao nga, kon ang usa ka tawo adunay pagtuo siya kinahanglan nga magbaton og paglaom; kay kon walay pagtuo, walay paglaom.

43 Ug usab, sultihan ko kamo nga dili siya makabaton og pagtuo ug paglaom, gawas kon siya magmaaghop, ug magmapainubsanon sa kasingkasing.

44 Kon mao, ang iyang pagtuo ug paglaom kawang, kay walay madawat sa atubangan sa Dios, gawas sa maaghop ug mapainubsanon nga kasingkasing; ug kon ang tawo magmaaghop ug magmapainubsanon sa kasingkasing, ug mokompisal pinaagi sa gahom sa Espiritu Santo nga si Jesus mao ang Kristo, siya kinahanglan gayod nga adunay gugmang putli; kay kon siya walay gugmang putli, siya walay kapuslanan; mao nga kinahanglan gayod nga makabaton siya og gugmang putli.

45 Ug ang gugmang putli mainantoson, ug mabination, ug dili masinahon, ug dili manghambog, dili mangita alang sa iyang kaugalingon, dili dali nga masuko, dili maghunahuna og daotan, ug dili magmaya sa pagkadaotan apan magmaya sa kamatuoran, mainantoson sa tanan nga butang, matuohon sa tanan nga butang, molaom sa tanan nga butang, ug molahutay sa tanan nga butang.

46 Mao nga, hinigugma kong kaigsoonan, kon kamo walay gugmang putli, kamo walay kapuslanan, kay ang gugmang putli dili mapakyas. Mao nga, hupot ngadto sa gugmang putli, nga mao ang labing mahinungdanon sa tanan, kay ang tanan nga butang mapakyas gayod—

47 Apan ang gugmang putli mao ang tiunay nga gugma ni Kristo, ug molahutay kini sa kahangtoran; ug bisan kinsa nga makaplagan nga aduna niini sa kataposang adlaw, kini makaayo kaniya.

48 Mao nga, hinigugma kong kaigsoonan, pag-ampo ngadto sa Amahan uban sa tibuok kusog sa kasingkasing, nga kamo mapuno niini nga gugma, nga iyang gitugyan diha sa tanan kinsa tinuod nga mga sumusunod sa iyang Anak nga si Jesukristo; aron mahimo kamong mga anak sa Dios; nga kon siya moabot, kita mahimong sama kaniya, kay kita makakita kaniya nga mao gihapon; nga kita makabaton niini nga paglaom; aron mahimo kita nga putli ingon nga siya putli. Amen.