1 Ana reta tamau are Moomon, are e koreaki nakoiu, Moronaai; ao e koreaki nakoiu n te tai ae e aki maan i mwin weteau nakon te mwakuri ni mitinare. Ao ibukin aio ao e koroboki nakoiu, ni kangai:

2 Natiu te mwaane ae ko tangiraki irou, Moronaai, e korakora kimwareireiu ibukina bwa e a tia n tabeakiniko am Uea are Iesu Kristo, ao e a tia ni weteiko nakon ana mwakuri, ao nakon ana mwakuri ae mimitong.

3 I aki toki n uringko i nanon au tataro, n aki toki n tataro nakon te Atua te Tama n aran Natina are e Mimitong, are Iesu bwa rinanon ana raoiroi ao ana akoi ae aki totoki, e na kawakiniko ma n teimatoan onimakinan arana ni karokoa te toki.

4 Ao ngkai, natiu te mwaane, I taetae nakoimi ni kaineti ma te bwai are e korakora iai rawawatan nanou; bwa e rawawata nanou ngkai iai kakauntaeka aika rikirake i buakomi.

5 Bwa, I a tia ni karekea te koaua, bwa iai te kakauntaeka i buakomi ibukin bwabetitoakiia ami ataei aika a uarereke.

6 Ao ngkai, natiu te mwaane, I tangiria bwa ko na beku ma te botumwaaka, bwa e na kanakoaki te kairua ae kamwaraa aio mai buakomi; ao aio bukin ae I korea te reta aio.

7 Bwa n te tai naba are I atai bwaai aikai mai iroum ao I kakaea mai iroun te Uea ni kaineti ma te bwai aio. Ao e roko ana taeka te Uea nakoiu ni mwaakan te Tamnei are e Raoiroi, ni kangai:

8 Kakauongo nakon ana taeka Kristo, te Tia Kaboingkami, ami Uea ao Atuami. Nooria, I roko nakon te aonaba tiaki bwa N na weteia aika a raoiroi ma n na weteia taan bure nakon te rairannano; naake aki aoraki aki kainnanoa te taokita, ma a kainnanoia naake a aoraki; ngaia are, ataei aika a uarereke a bon aki aoraki, bwa a bon aki kona ni karaoa te bure; ngaia are e anaaki te rekenikai mai iroun Atam irou, ao akea korakorana i aoia; ao I a katoka tuan te korotobibiaki.

9 Ao aio aron kaotan ana taeka te Atua nakoiu iroun te Tamnei are e Raoiroi; ngaia are, natiu te mwaane ae moan te tangiraki, I ataia bwa bon te bwainingare ae matoatoa imatan te Atua, bwa kam na bwabetitoia ataei aika a uarereke.

10 Nooria, I kangai nakoim bwa aio ae ko na reiakinna—te rairannano ao te bwabetito nakoia ake a kona ni bukinaki ao ake a kona karaoan te bure; eng, reireinia kaaro bwa a na rairinanoia ma n bwabetitoaki, ma n kananorinanoia n aekaia ataei aika a uarereke, ao a na bon kamaiuaki ma aia ataei aika a uarereke.

11 Ao natia aika a uarereke a bon aki kainnanoa te rairannano ao te bwabetito naba. Nooria, te bwabetito bon ibukin te rairannano nakon kakoroan taian tua ibukin kamaunaan bure.

12 Ma ataei aika a uarereke a bon maiu iroun Kristo, ni moa ma ni moan te aonaba; bwa ngke e aki, ao te Atua e inanonano, ao te Atua naba ae bibitaki, ao e kakaokoroia aomata; bwa ai mwaitira ataei aika a tia ni mate n aki bwabetitoaki!

13 Ngaia are, ngkana arona bwa aki kona ni kamaiuaki ataei aikai n akea te bwabetito, ao a bon tia ngkanne n nako moone are aki totoki.

14 Nooria, I taku nakoim, bwa ane e iangoia i nanona bwa ataei aika a uarereke a kainnanoa te bwabetito e mena n te aro ae moan te kananokawaki ae mao ao e mena n ana kabaebae te bure; bwa akea irouna te onimaki, te kantaninga, ao te tangira ae kororaoi, ngaia are e na riai ni kanakoaki i nanon ana tai n iango, e na riai n nako moone.

15 Bwa e boni kamwaraa ma ni buakaka iangoan are te Atua e na kamaiua te tei temanna n te bwabetito ao e na mate are temanna ibukina bwa e aki bwabetito.

16 Te maraia nakoia naake a kabwaoua ana kawai te Uea n te aro aei, bwa a na bon mate ngkana aki rairinanoia. Nooria, I taetae ma te ninikoria n iai te kariaiakaki mai iroun te Atua; ao I aki maaka te bwai are e na karaoia te aomata; bwa te tangira are e kororaoi e kakioa nako te maaku ni kabane.

17 Ao I a kaonaki n te tangira ae kororaoi, are bon te tangira are aki totoki; ngaia are, titebo ataei ni kabane irou; ngaia are, I tangiriia ataei aika a uarereke ma te tangira ae kororaoi; ao titebo ni kabane ao taan katoonga te kamaiuaki.

18 Bwa I ataia bwa te Atua e aki nanonano, ao tiaki naba te aomata ae bibitaki; ma e bon aki bibitaki ma n akea tokina nakon akea tokina.

19 Ataei aika a uarereke a bon aki kona n rairinanoia; ngaia are bon te buakaka ae kamwaraa kaakean ana nanoanga ae itiaki te Atua nakoia, bwa a bane ni maiu irouna ibukin ana nanoanga.

20 Ao ane e taku bwa ataei aika a uarereke a kainnanoa te bwabetito a kaakea ana nanoanga Kristo, ao a kaakea bongan ana mwakuri ni kamaiu teuarei ao mwaakan ana kabomwi.

21 Te maraia nakoia bwa, a na kona ni mate, nako moone ao ni mena n te kammarakaki ae aki totoki. I taekinna ma te ninikoria: e a tia te Atua n tuangai. Kakauongo irouia ao oongo, bwa mwiina ao a na tei bwa bwaai ni kaaitarai ngkami n ana kaintekateka ni motikitaeka Kristo.

22 Bwa nooria, ataei ni kabane aika a uarereke a bane ni maiu iroun Kristo, ao ai aroia naba ake a maiu n akea te tua nakoia. Bwa mwaakan te kabomwi e roko nakoia aomata ni kabane ake a bon aki karekea te tua; ngaia are, ane e aki kabuakakaki, ke are e aki mena i aan te kabuakakaki e bon aki kona n rairananona; ao akea manenan te bwabetito nakoia aekaki aikai.

23 Ma bon te bwainingare i matan te Atua, kaakean ana nanoanga Kristo, ao mwaakan Tamneina ae Tabu, ao ma n onimakin mwakuri aika a mate.

24 Nooria, natiu te mwaane, e riai n aki riki te bwai aio; bwa te rairannano bon ibukiia ake a mena i aan te kabuakakaki ao te rekenikai ibukin te tua are e uruakaki.

25 Ao moan uaan te rairannano bon te bwabetito; ao te bwabetito e roko man te onimaki nakon kakoroan taian tua ni kabane; ao kakoroan taian tua e uota kamaunaan bure.

26 Ao kamaunaan bure e uota te nimamannei, te nanorinano n te nano; ao ibukin te nimamannei ao te nanorinano n te nano ao e roko te Tamnei ae Raoiroi, are te Tia Karaunano are e onrake n te kantaninga ao te tangira ae kororaoi, are te tangira are e teimatoa n te botumwaaka n tataro, ni karokoa e a roko te toki, are a na bane aomata aika itiaki ni maeka ma te Atua.

27 Nooria, natiu te mwaane, N na koroboki riki nakoim ngkana I aki waekoa n otinako ni kaaitaraia Reimwanaite; Nooria, a na kainikatonga te botanaomata aio, ke te botanaomata ae Nibwaite e na riki bwa kamaunakia ngkana aki rairinanoia.

28 Tataro ibukiia, natiu te mwaane bwa e na roko te rairannano nakoia. Bwa nooria, I maaku bwa mwiina ao e a tia n aki mena te Tamnei irouia; ao ni mwakoron te aba aio ao a ukoukora naba kabwakan te mwaaka ao te kariaiakaki are e roko mai iroun te Atua; ao a kaakea te Tamnei are e Raoiroi.

29 Ao i mwin totokoan te ataibwai ae korakora, natiu te mwaane, a na bon waekoa ni mate, ma n kakoroi bukin taeka ni burabeti ake a taekinaki irouia burabeti, n ikotaki ma ana taeka ara Tia Kamaiu.

30 Tiabo, natiu te mwaane, ni karokoa ae I a manga koroboki nakoim, ke ni karokoa ae ti a manga kaitibo riki. Amen.