1 Krataa a m’egya kyerɛwee dze brɛɛ emi, Moroni; na wɔdze brɛɛ me wɔ aber a medze moho akɛhɛn ɔsomdwuma no mu. Na iyi na ɔkyerɛwee bɛkãa kyerɛɛ me:

2 Mo dɔba, Moroni, midzi dɛw kɛse dɛ w’Ewuradze Jesus Christ adwen woho, na ɔafrɛ wo aba ne somdwuma mu nye n’edwuma krɔnkrɔn mu.

3 Mekaa wo daa wɔ me mpaabɔ mu, na da biara mobɔ mpaa ma Egya Nyankopɔn no wɔ ne Ba Krɔnkrɔn Jesus ne dzin mu, ama oeedua ne papayɛ a ɔmmbɔadze da nye n’adom a wɔto no abaw a onnhyia no do, akora wo do ma eegyina pintsinn wɔ gyedzi a ɔwɔ ne dzin mu no dze asɔw ekodu ewiei.

4 Na afei, merekã adze a ɔyɛ me awerɛhow kɛse akyerɛ wo; ɔyɛ me awerɛhow dodow kɛse dɛ ekyingye pii bɔsoɛr wɔ hom mu.

5 Na sɛ nokwar noara na metsee dze a, dɛ ekyingye pii epue hom mu a ɔfa hom mbofra nkakraba hɔn enuma ho.

6 Na afei, me ba, mepɛ dɛ eyɛ edwuma enyiberdo, ama woeeyi dɛm mfomdo kɛse yi efi hom mu; na iyi ho ntsi na m’akyerɛw dɛm krataa yi.

7 Na ber a metsee dɛm nsɛm yi wɔ homho ara, nna ntsɛmara mibisaa Ewuradze wɔ dza ɔfa iyi ho. Na Ewuradze n’asɛm nam Sunsum Krɔnkrɔn no tum do baa mo hɔ dɛ:

8 Tsie Christ wo Pomfo, w’Ewuradze, nye wo Nyankopɔn n’asɛm. Hwɛ, mammba wiadze yi mu dɛ merebɛfrɛ atseneneefo na mbom ama ndzebɔnyɛfo enya nnuho; nyia odzi mu no nnhia oduyɛfo, mbom hɔn a wɔyar no na wohia; dɛm ntsi mbofra nkakraba dzi mu, osiandɛ wonntum nnyɛ bɔn; dɛm ntsi woeyi Adam no ndom no efi hɔn do wɔ mo mu, na onnyi tum wɔ hɔn do; na twatsiatwa ho mbra no so woeyi efi hɔ wɔ mo mu.

9 Na dɛm kwan yi do na Sunsum Krɔnkrɔn no dze daa Nyankopɔn n’asɛm edzi kyerɛɛ me; dɛm ntsi, mo dɔba, minyim dɛ iyi yɛ enyidahɔ atwetwesi mapa wɔ Nyame enyim, dɛ hom bonuma mbofraba.

10 Hwɛ mese wo dɛ dɛm adze yi na fa kyerɛkyerɛ—nnuho na enuma a wɔdze ma hɔn a woedu nkontaabuber na wotum yɛ bɔn; nyew, kyerɛkyerɛ awofo dɛ ɔsɛ dɛ wonu hɔnho na wonuma hɔn, na wɔbrɛ hɔnho adze dɛ hɔn mbofra nkakraba no ama wɔagye hɔn nye hɔn mbofra nkakraba nyina nkwã.

11 Na hɔn mbofra nkakraba no nnhia nnuho, anaa enuma. Hwɛ, nnuho na ɔdze enuma ba ama ɔaahyɛ mbrasɛm no mã, dze akɔ bɔnfakyɛ mu.

12 Mbom mbofra nkakraba wɔ nkwa wɔ Christ mu, fitsi wiadze ne fapem mpo; na sɛ ɔnntse dɛm a, nna Nyankopɔn nndzi pɛrpɛr; na ɔyɛ Nyame a ɔsesa so, na ɔhwɛ nyimpa enyim; na mbofra nkakraba ahen na woewu a woennuma hɔn!

13 Dɛm ntsi, sɛ worunntum nngye mbofra nkakraba a wonnumaa hɔn no nkwa a, nna hɔn nyinara kɔ hɛl a onnyi ewiei.

14 Hwɛ mese wo dɛ, nyia osusu dɛ mbofra nkakraba hia enuma no hyɛ bɔnwen wenwen mu nye emumuyɛ nkyehoma mu, na onnyi gyedzi, enyidado, anaa ayamuyie; dɛm ntsi ber a ɔwɔ dɛm adwen no, sɛ owu a ɔbɔkɔ hɛl.

15 Na ɔyɛ emumuyɛdze koraa dɛ wobosusu dɛ Nyankopɔn gye abofra kor nkwa osian enuma ntsi, na osian enuma ntsi ɔma kor so hera.

16 Hɔn a wɔyɛ dɛm ndzɛmba yi dze kontom Ewuradze n’akwan no ndue, na wɔbɛhera, gyedɛ wonu hɔnho. Hwɛ mekasa akokodur mu, na tumdzi no fi Nyankopɔn; na munnsuro dza ɔdasanyi botum ayɛ; osiandɛ ɔdɔ a odzi mu tu suro nyina.

17 Na ayamuyie ahyɛ me mã, a ɔyɛ ɔdɔ a ɔwɔ hɔ daapem a; dɛm ntsi mbofra nyina yɛ adze kor dze ma me; dɛm ntsi, medze ɔdɔ a odzi mu dɔ mbofra nkakraba nyina; na hɔn nyina yɛ adze kor na wɔwɔ kyɛfã wɔ nkwagye mu.

18 Na minyim dɛ Nyankopɔn nnyɛ Nyame a onndzi pɛrpɛr, nna ɔnnyɛ obi a ɔsakyer; mbom ɔnnsakyer da fi mbersantsen nyina kesi mbersantsen nyina.

19 Mbofra nkakraba runntum nnu hɔnho; dɛm ntsi ɔyɛ emumuyɛdze kɛse dɛ Nyankopɔn ne tsenenee ehumbɔbɔr no wɔdze bakam hɔn, osiandɛ hɔn nyinara wɔ nkwa wɔ no mu osian n’ehumbɔbɔr ntsi.

20 Na nyia ɔkã dɛ mbofraba yi hia enuma no pow Christ n’ehumbɔbɔr, na obu no werdambɔ na no ɔpon no tum no egyangyandze.

21 Hɔn a wɔtse dɛm no wondue, osiandɛ wɔwɔ owu n’esian mu, nye hɛl, nye ahohyehye a onnyi ewiei mu. Mekã no akokodur mu; Nyankopɔn na ɔahyɛ me dɛ menkã. Tsie dza merekã yi na dzi do, annyɛ dɛm a wobetsia wo wɔ Christ n’atsɛmbu egua no enyim.

22 Na hu dɛ mbofra nkakraba nyinara wɔ nkwa wɔ Christ mu, nye hɔn a wonnyi mbra so. Na ɔpon no tum no ba hɔn a wonnyi mbra no nyinara do; dɛm ntsi, nyia wommbu no fɔ, anaadɛ ɔnnhyɛ afɔbu ase no runntum nnu noho; na dɛm nkorɔfo no, enuma ho nnyi mfaso biara ma hɔn—

23 Mbom ɔyɛ atwetwesi wɔ Nyame enyim dɛ wɔbɔpow Christ n’ehumbɔbɔr nye Sunsum Krɔnkrɔn no tum, na wɔdze werɛ bɔtwer ndwuma ewui mu.

24 Hwɛ, me ba, dɛm adze yi onnyi dɛ osi; osiandɛ nnuho wɔ hɔ ma hɔn a wɔhyɛ afɔdzi nye mbrato no ndom ase.

25 Na nnuho n’eduaba a odzi kan nye enuma; na enuma fi gyedzi mu ba ama mbrasɛm no aahyɛ mã; na mbrasɛm ne mãhyɛ no na ɔdze bɔnfakyɛ ba;

26 Na bɔnfakyɛ dze ɔdwe nye botooyɛ akoma ba; na osian ɔdwe nye botooyɛ akoma no ntsi Sunsum Krɔnkrɔn a ɔyɛ Ɔwerɛkyekyefo no dze enyidado nye ɔdɔ a odzi mu bɔsoɛ no mu, ɔdɔ mapa a ogyina pintsinn wɔ mpaabɔ mu, kodu dɛ ewiei no bɛba, ma ahotseweefo akɔ nye Nyankopɔn akɛtsena.

27 Hwɛ, me ba, sɛ mannkɔ dɛ menye Lamanfo rokɔkõ enyimenyim yi a mebɛkyerɛw wo bio. Hwɛ, ɔman yi, anaadɛ Nephifo, hɔn ahantan ama hɔn nsɛɛ ho kwan gyedɛ wonu hɔnho.

28 Bɔ mpaa ma hɔn, me ba, ama woeenya nnuho. Mbom hwɛ, musuro dɛ binkɔhwɛ a Sunsum Krɔnkrɔn no egyaa dɛ ɔnye hɔn ridzi aper; na asaase ha dze wɔrohwehwɛ abrɛ tum na tumdzi a ofi Nyankopɔn hɔ ba no adze; na wɔropow Sunsum Krɔnkrɔn no so.

29 Na ber a wɔropow nyimdzee kɛse a ɔtse dɛm yi, me ba, ɔrennkyɛr na wɔahera, ma wɔahyɛ nkɔnhyɛfo no hɔn nsɛm nye hɛn Agyenkwa noara so ne nsɛm no mã.

30 Da yie, me ba, kesi dɛ mebɛkyerɛw wo, anaadɛ mubohu wo bio. Amen.