1 Ita napasamak nga adu kadagiti tumantanor a kaputotan ti saan a makaawat kadagiti balikas ni ari Benjamin, ta babassitda pay nga ubbing iti panawen a panangibagana kadagiti taona; ket saanda patien ti kannawidan dagiti ammada.

2 Saanda mamati iti naibagan maipanggep iti panagungar dagiti natay, kasta met a saanda mamati iti maipanggep iti yaay ni Cristo.

3 Ket ita gapu iti kinaawan ti pammatida saanda maawatan ti balikas ti Dios; ket natangken ti panagpuspusoda.

4 Ket saanda a kayat a mabuniagan; wenno makikappeng iti simbaan. Ket naisinada a tao maipanggep iti pammatida, ken nagpatuloyda a kastoy, uray pay iti nailubongan ken managbasol a kasasaadda; agsipud ta saanda immawag iti Apo a Diosda.

5 Ket ita iti panagturay ni Mosiah saanda pay a makagudua iti bilang dagiti tattao ti Dios; ngem gapu iti panagsusuppiat dagiti agkakabsat nagbalinda nga ad-adu.

6 Ta napasamak nga adu ti inallilawda nga adda iti simbaan babaen iti pammatiray-ok a balikasda, ket insagmakda ida nga agbasol; ngarud nagbalin a rumbeng kadagiti nagbasol, nga adda iti simbaan, a nasken a ballaagan ti simbaan.

7 Ket napasamak a naisaklangda kadagiti saserdote, ket babaen kadagiti mannursuro naiyawatda kadagiti saserdote; ket indatag dagiti saserdote iti sanguanan ni Alma, nga kangatuan a saserdote.

8 Ita inikkan ni ari Mosiah ni Alma iti turay a mangiturong iti simbaan.

9 Ket napasamak a saan nga ammo ni Alma ti maipanggep kadakuada; ngem adu ti saksi a maibusor kadakuada; wen, nagtakder dagiti tattao ket pinaneknekanda ti napalalo a kinadangkesda.

10 Ita awan pay ti kasta a napasamak idi iti simbaan; ngarud kasta unay a nariribuk ti espiritu ni Alma, ket imbilina a nasken a maidatagda iti sanguanan ti ari.

11 Ket kinunana iti ari: Kitaen, dagitoy dagiti adu nga inyegmi iti sanguanam, a pinabasol dagiti kabsatda; wen, natiliwda a nagaramid iti nadumaduma a kinadangkes. Ket saanda nga agbabawi kadagiti kinadangkesda; ngarud inyegmi iti sanguanam, tapno mabalinmo nga ukomen ida a mayannurot kadagiti basolda.

12 Ngem kinuna ni ari Mosiah ken ni Alma: Kitaen, saanko a kedngan ida; ngarud yawatko ida kenka tapno kedngam.

13 Ket ita nariribukan manen ti espiritu ni Alma; ket napan ken nagdamag iti Apo no ania ti aramidenna maipanggep kadaytoy a banag, agsipud ta mabuteng a makaaramid iti biddut iti imatang ti Dios.

14 Ket napasamak a kalpasan ti panangibukbokna iti kaungganna iti Dios, immay ti timek ti Apo kenkuana, a nagkuna:

15 Naparaburanka, Alma, ken naparaburan dagiti nabuniagan iti danum ti Mormon. Naparaburanka gapu iti aglaplapusanan a pammatim kadagiti balikas laeng ti katulongak a ni Abinadi.

16 Ken naparaburanda agsipud iti aglaplapusanan a pammatida kadagiti balikas laeng nga imbagam kadakuada.

17 Ken nagasatka gapu ta binangonmo ti simbaan kadagitoy a tao; ket mabangonda, ket agbalindanto a taok.

18 Wen, nagasat dagitoy a tao a siaayat nga umawat iti naganko; agsipud ta maawagandanto iti naganko; ket kukuak ida.

19 Ket gapu ta nagdamagka kaniak maipanggep kadagiti managbasol, nagasatka.

20 Sika ti katulongak; ket itulagko kenka a maaddaanka iti biag nga agnanayon; ket pagserbiannak ket aggunaykanto babaen ti naganko, ket ummongemto a sangsangkamaysa dagiti karnerok.

21 Ket isu a dumngegto iti timekko isunto ti karnerok; ket awatemto iti simbaan, ket awatekto met.

22 Agsipud ta kitaen, daytoy ti simbaanko; asino man a mabuniagan mabuniaganto iti panagbabawi. Ket mamatinto iti naganko ti asino man nga awatem; ket siwawayanto a pakawanek.

23 Agsipud ta siak ti mangbaklay kadagiti basol ti lubong; agsipud ta siak ti nangparsua kadakuada; ken siak ti mangted kenkuana a mamati agingga iti kanibusanan ti puesto iti makanawanko.

24 Ta kitaen, maawaganda iti naganko; ket no ammodak umasidegda, ket addanto agnanayon a puestoda iti makanawanko.

25 Ket napasamakto nga inton aguni ti maikadua a trumpeta umayton dagiti saan a pulos a nakaam-ammo kaniak ket agtakderdanto iti imatangko.

26 Ket maammuandanton a siak ti Apo a Diosda, a siak ti Mannubbotda; ngem saandanto a masubbot.

27 Ket kalpasanna ipudnokto kadakuada a pulos a saanko am-ammo ida; ket mapandanto iti agnanayon nga apuy a naisagana para iti sairo ken dagiti anghelna.

28 Ngarud kunak kenka, ta isu a saan a dumngeg iti timekko, isu met laeng ti saanmo nga awaten iti simbaanko, agsipud ta isunto ti saanko nga awaten iti maudi nga aldaw.

29 Ngarud kunak kenka, Mapanka; ket asino man ti aglabsing kaniak, ukomemto a segun kadagiti basol nga inaramidna; ket no agkonpesar ti basbasolna kenka ken kaniak, ken agbabawi iti kinapasnek ti pusona, pakawanemto, ket pakawanekto met isuna.

30 Wen, ket kas iti masansan ti panagbabawi dagiti tattaok ti panangpakawanko iti naglabsinganda kaniak.

31 Ket pakawanenyonto met ti naglabsingan ti tunggal maysa kadakayo; agsipud ta pudno kunak kenka, ti saan a mamakawan ti basbasol ti padana a tao no kunana nga agbabawi, isu met la ti nangipan ti bukodna iti pannakailunod.

32 Ita kunak kenka, Mapanka; ket asino man a saan nga agbabawi iti basbasolna isunto met ti saan a maibilang kadagiti tattaok; ket masurotto daytoy manipud ita.

33 Ket napasamak nga idi nangngeg ni Alma dagitoy a balikas insuratna ida tapno maalana ida, ken tapno maukomna dagiti tattao iti dayta a simbaan a mayannurot kadagiti bilin ti Dios.

34 Ket napasamak a napan ni Alma ket inukomna dagiti natiliw a nagaramid ti kinadangkes, a mayannurot iti balikas ti Apo.

35 Ket asino man a nagbabawi iti basbasolda ken ipudnoda ida, maibilangda kadagiti tattao ti simbaan;

36 Ket dagiti saan a mangipudno iti basbasolda ken saan nga agbabawi iti kinadangkesda, isuda dagiti saan a maibilang kadagiti tattao ti simbaan, ket dagiti naganda ket mapunas.

37 Ket napasamak a tinimbeng ni Alma dagiti aramid iti simbaan; ket nangrugi manen a naaddaanda iti kappia ken rimmang-ayda a napalaus kadagiti aramid iti simbaan, siaannad a magmagna iti sanguanan ti Dios, umaw-awat iti adu, ken mangbumbuniag iti adu.

38 Ket ita inaramid ni Alma ken dagiti kaduana a trabahador a mangmunmuno iti simbaan iti amin dagitoy a bambanag, a buyogen iti amin a kinagaget, mangisursuro iti balikas ti Dios iti amin a bambanag, agsagsagaba iti amin a kita dagiti panagrigrigat, nga idadanes dagiti amin a saan a kameng ti simbaan ti Dios.

39 Ket binagbagaanda dagiti kabsatda; ken kasta met a nabagbagaanda, ti tunggal maysa babaen ti balikas ti Dios, a mayannatup iti basbasolna, wenno iti basbasol a naaramidna, ta imbilin ti Dios nga agkararag nga awan ressatna, ken agyaman iti amin a bambanag.