1 Karon nahitabo nga human mabuhat sa mga anak nga lalaki ni Mosiah kining mga butanga, nagdala sila og diyotay nga gidaghanon uban kanila ug mibalik ngadto sa ilang amahan, ang hari, ug mihangyo kaniya nga sila tugotan niya nga sila unta, uban kanila nga ilang gipili, motungas ngadto sa yuta sa Nephi nga sila unta makasangyaw sa mga butang nga ilang nadungog, ug nga sila unta makapahibalo sa pulong sa Dios ngadto sa ilang kaigsoonan, ang mga Lamanita—

2 Nga basin pa og sila madala nila ngadto sa kahibalo mahitungod sa Ginoo nga ilang Dios, ug makombinser sila mahitungod sa pagkadaotan sa ilang mga amahan; ug basin pa og mahupay nila ang ilang pagdumot ngadto sa mga Nephita, nga sila usab madala ngadto sa kalipay sa Ginoo nga ilang Dios, nga sila mahimo nga mahigalaon sa usag usa, ug nga wala nay mga panagbingkil sa tanang yuta nga gihatag kanila sa Ginoo nga ilang Dios.

3 Karon nagtinguha sila nga ang kaluwasan kinahanglan ipadayag ngadto sa matag nilalang, kay dili nila maagwanta nga bisan usa ka kalag sa tawo malaglag; oo, gani ang paghunahuna nga bisan usa lang ka kalag mag-antos sa walay kataposan nga hilabihang pagsakit miuyog ug mipakurog kanila.

4 Ug sa ingon ang Espiritu sa Ginoo milihok diha kanila, kay sila mao ang labing mangil-ad nga mga makasasala. Ug ang Ginoo nakakita pinaagi sa iyang walay kinutoban nga kaluoy nga angay silang luwason; bisan pa niana nag-antos sila sa tumang kaguol sa kalag tungod sa ilang mga pagkadaotan, nag-antos pag-ayo ug nahadlok nga sila kinahanglan isalikway sa kahangtoran.

5 Ug nahitabo nga nagpakilooy sila sa ilang amahan sa daghan nga mga adlaw nga sila unta makatungas ngadto sa yuta sa Nephi.

6 Ug si hari Mosiah miadto og nangutana sa Ginoo kon tugotan ba niya ang iyang mga anak nga lalaki sa pagtungas ngadto sa mga Lamanita aron sa pagsangyaw sa pulong.

7 Ug ang Ginoo miingon ngadto kang Mosiah: Tugoti sila nga motungas, kay daghan ang motuo sa ilang mga pulong, ug sila makaangkon og kinabuhing dayon; ug akong luwason ang imong mga anak nga lalaki gikan sa mga kamot sa mga Lamanita.

8 Ug nahitabo nga si Mosiah mitugot nga sila moadto ug mobuhat sumala sa ilang hangyo.

9 Ug miadto sila sa kamingawan aron motungas sa pagsangyaw sa pulong taliwala sa mga Lamanita; ug mohatag ko og asoy sa ilang mga kahimoan human niini.

10 Karon si hari Mosiah walay usa nga katugyanan sa gingharian, kay walay bisan usa sa iyang mga anak nga lalaki kinsa modawat sa gingharian.

11 Busa gikuha niya ang mga talaan nga gikulit sa mga palid nga tumbaga, ug usab ang mga palid ni Nephi, ug ang tanan nga mga butang nga gisulat ug gitipigan sumala sa mga sugo sa Dios, human makahubad ug misugo sa pagsulat sa mga talaan nga anaa sa mga palid nga bulawan nga nakaplagan sa mga katawhan ni Limhi, nga gihatag nganha kaniya pinaagi sa kamot ni Limhi;

12 Ug gibuhat niya kini tungod sa dako nga kabalaka sa iyang katawhan; kay hilabihan ang ilang tinguha nga masayod kabahin niadto nga katawhan nga nalaglag.

13 Ug karon gihubad niya kini pinaagi niadtong duha ka bato nga gitapot ngadto sa duha ka lingin nga bayanan.

14 Karon giandam kini nga mga butang gikan pa sa sinugdanan, ug gipasa latas sa tanang henerasyon, alang sa katuyoan sa paghubad sa mga pinulongan;

15 Ug giampingan ug gitipigan kini pinaagi sa kamot sa Ginoo, nga iyang mapakita ang mga pagkadaotan ug mga pagkasalawayon sa iyang katawhan ngadto sa matag linalang kinsa makapanag-iya sa yuta;

16 Ug si bisan kinsa nga aduna niining mga butanga pagatawagon nga manalagna, subay sa pamaagi sa karaang mga panahon.

17 Karon human matapos ni Mosiah ang paghubad niini nga mga talaan, tan-awa, kini mihatag og usa ka asoy sa katawhan nga nalaglag, gikan sa panahon nga nalaglag sila balik ngadto sa pagtukod sa dako nga tore, sa panahon nga ang Ginoo milibog sa pinulongan sa katawhan ug nagkatibulaag sila sa tanan nga dapit sa ibabaw sa tibuok yuta, oo, ug gani gikan niadtong panahona balik ngadto sa paglalang ni Adan.

18 Karon tungod niini nga asoy ang katawhan ni Mosiah nagbangotan sa hilabihan, oo, napuno sila sa kasubo; bisan pa niana kini nakahatag kanila og daghan nga kahibalo, diin sila nagmaya.

19 Ug kini nga asoy isulat human niini; kay tan-awa, gikinahanglan nga ang tanang katawhan masayod sa mga butang nga nahisulat dinhi niini nga asoy.

20 Ug karon, sama sa akong gisulti kaninyo, nga human si hari Mosiah makabuhat niini nga mga butang, gikuha niya ang mga palid nga tumbaga, ug ang tanang butang nga iyang gitipigan, ug gitugyan kini ngadto kang Alma, kinsa mao ang anak nga lalaki ni Alma; oo, ang tanang talaan, ug usab ang mga ighuhubad, ug gitugyan kini ngadto kaniya, ug gisugo siya nga kinahanglan iya kining tipigan ug panalipdan, ug usab mohimo og talaan sa katawhan, ipasa kini gikan sa usa ka kaliwatan ngadto sa laing kaliwatan, gani sama nga kini gipasa gikan sa panahon nga si Lehi mibiya sa Jerusalem.