Egetabu Kia Mosaya

1. Erio egaika engaki ekero Mosaya akorire buna ise abete okomochika, naboigo korwa okoraria ense yonsi, ng’a abanto bebeke amo boka ase ense yonsi, erinde banyare kogenda ase ekalu koigwa amang’ana y, omorwoti Benjamini arabe ogokwana ase bare.

2. Na nigo orenge omobaro omonge na barenge abange mono abwe batanyarete kobabara; erio bakamenteka mono na gosarara mono ase ense eria.

3. Na bakaira chitugo chintngi korwa ase amaicho abo, ase okorwa ekeng’wanso korengana nogochika kwa Musa;

4. Naende boigo ng’a banyare komoakera ng’a mbuya Omonene Nyasae obo, oria obarusetie ase ense ya Yerusremu, na oria obakonyete korwa ase amaboko ya ababisa babo, na ochorete abanto abachenu koba aborokia babo, na omonto boigo omochenu Koba omoruoti obo. Oria otigete omorembe ase ense ya Zarahemula, na oria oborokereitie koyarenda amachiko a Nyasae, erinde nario barabe nomogoko na goichorwa n’obwanchani ase Nyasae na abanto bonsi.

5. Erio egaika engaki bagotira gochia ase ekalu, nakoagacha koreng’ana n’omochi one, naboigo namokaye, abamura baye, nabaiseke baye, nabana abamura babo, nabaiseke babo, korwa omonene goika omoke, nakera omochi bwatananegete korwa ase oyonde.

6. Erio bakaagacha eema yabo abwe ange n’Ekalu, kera oyomo akaagacha eema yaye ebwate egesieri kerigereretie ase Ekaru, erinde abwe ang’e nario baranyare Koigwa amang’ana y’omorwoti Benjamini arabe ogokwana ase bare;

7. Asengencho omoganda orenge omonene oyio omorwoti Benjamini atare konyara kworokereria, aria ase chinyasi chi’ekalu erio akagera omonaro koagachwa, erinde imeo abanto baye banyare koigwa amang’ana aye.

8. Erio egaika engaki agokwana ase abanto baye korwa ase ekoroba; naboigo tibanyara koigwa buya amang’ana aye onsi ase engencho yomoganda orenge omonge mono; erio agateba amang’ana aye arikwe erinde anyare gotomwa ase baria bataigwete eriogi riaye, ng’a babe bakoigwa amang’ana aye.

9. Na aya naro amang’ana akwanete na ayatebete arikwe; nagoteba ng’a: abaminto, inwe mwensi mwasangererekanire amo, abwe moranyare koigwa amang’ana ane ayio ingochia gokwana ase more rituko riarero; na tinabete inkobachika gocha igaa ase okoigwa amang’ana ingokwana, korende mobe mokong’igwa, na igora amato aino na monyare koigwa, naboigo chinkoro chiaino erinde monyare komanya, na ebirengererio biaino, erinde nario obobisi bwa Nyasae boraigorwe ase more.

10. Timbachigeti gocha igaa ng’a nario moranyare konyoboa, gose ng’a morengererie ng’a inde oyoigoro mono kobua monto onde bwonsi.

11. Korende nigo imbabwekaine inwe, obwate ngencho chinde chionsi; chi’omobere oye na ebirengererio; gotatiga nachorirwe na abanto aba, na kobekwa ang’e na tata, na koimokigwa n’okoboko kw’Omonene ng’a goika imbe omorai na omorwoti ase abanto aba; na narendirwe nakogachwa ase chinguru chiaye, Kobakorera nokobua kwane gwonsi, ebirengererio na chinguru chiane chiria Omonene ang’eire.

12. Nigo inkobatebia ng’a Nabeire n’gochandeka ase okoira amatuko ane ase emeremo yaino, goika nonya mbono, na tinanya gosaba chithahabu gose chifetha gose ngencho ende yonsi yobonda korwa ase more;

13. Gose kobabeka ase oboakong’u, gose gokora abande baino abasomba, gose monyare goita gose kogenka, gose koiba, gose gotomana, gose kobachika gokora obobe bonde bwonsi, na nabeire inkoborokereria ng’a mobe mokorenda amachiko y’Omonene, ase onsi aria abete okobachika –

14. Nonya ninche, omonyene, nakorire emeremo na amaboko ane ng’a nario indabakorere, na timbeba negurube yechibango, na ng’a kende gionsi tigecha ase more kere ekiogochanda gokebogoria – – na ebinto ebi bionsi nabeire ingokwana, inwe abanyene nigo more birori ase rituko eri.

15. Korende abaminto, tinkoreti ebinto ebi ng’a imbe inkweimokereria igoro, na tintebeti ebinto ebi ase okobasoera; korende nigo inkobatebia ebinto nario moramanye ng’a nimbe inkoiraneria nobong’aini ase obosio bwa Nyasae rituko eri.

16. Rigereria, nigo inkobatebia ng’a ase engencho nakwanete ase more ng’a nabeire inkoira amatuko ane amange ase okobakorera inwe tinganetie kweimokereria igoro, gotatiga nabeire rioka ase emeremo ya Nyasae.

17. Rigereria nigo nabatebirie ebinto ebi erinde monyare kweorokia chisemi; naboigo mweorokie ng’a ekero more ase ogokorera oyomino nigo more ase okomokorera Omonene bweka.

18. Rigereria mwandokire omorwoti oino; naende onye inche, oyo mwarokire omorwoti oino, ngokora emeremo ase okobakorera, aseigo inaki motari kobakorera abande inwe ase inwe?

19. Na rigereria naende, onye inche, oyomokoroka omorwoti oino, oyoirire amatuko aye ase okomokorera Nyasae, timokorwa ogoakera ng’a mbuya mono, o inaki eganeirie ase more komoakera ng’a mbuya mono ase omorwoti oino oigoro!

20. Nigo inkobatebia, abaminto, ng’a onye ndiria mwarwa amasikani aino onsi na komotogia Nyasae amo nomoyo oino bwonsi nabwate chinguru gochiira ase Nyasae oria obatongete, na obarendire na kobatuga, na otebire ng’a imobe mokogoka, na obekire ng’a goika momenye n’omorembe inwe ase inwe.

21. Nigo inkobatebia ng’a kamoramokorere ere oyobatongete korwa omochakano, naende nere obarendete rituko ase rituko, ase okobakora koeyana, ng’a nario moramanye na gokora koreng’ana nokobua kweino abanyene, nigo inkobatebia ng’a kamoramokorere amo nomoyo oino bwonsi, nigo morabe abasomba bogokonya.

22. Na rigereria, onsi aria atagete korwa ase more nokoyarenda amachiko aye; na obariereire eira ng’a kamorayarende amachiko aye imobe mokomenteka ase ensei na takweba korwa ase aria abeire okoyakwana; aseigo kamorayarende amachiko aye nabe okobasesenia na kobamenta.

23. Na bono aase yeritang’ani, agagotonga, na gokoa obogima na kwabeire gokoba ime yaye.

24. Eriakabere, agakoganeria okore buna agochigete; onye gogokora bo, nabe bwango ogosesenia, na ogoakanire. Na bono boigo obarire koba oyoye, na aya nigo arabe ayakare na kare; Aseigo ninki oranyare kweimokereria igoro?

25. Na nigo inkoboria inee mbweroke oyoo omonyene? Tiga inkoiranerie yaya. Timokonyara goteba ng’a nigo more abaya kobua amaraba y’ense; na nigo mwatongetwe korwa ase amaroba y’ense; aseigo rora ng’a nigo bionsi bire ebiaye ere oyobatongete.

26. Nonya ninche, oyo mokoroka omorwoti oino, tindi omuya kobua buna more; naboigo nigo inde oyobwamaroba. Na rora nagotire, na nabeire aiga koyoirania omobere oyo ase ng’ina oyio ore amaroba.

27. Aseigo buna nabatebirie ng’a nabeire nkobakorera, inde norogendo oruya ase Nyasae, nonya nase engaki eye nigo inkobatebia ng’a mobe amo, nario intanyorekane nokomocha, erinde amanyinga aino taba igoro yane; ekero indatenene ase ekina kia Nyasae igoro y’ebinto anchigete igoro yaino.

28. Nabatebirie ng’a mobe amo inwe ase inwe erinde inyare koringa chiganchwa korwa ase amanyinga, ase engaki eye yobogotu inde ang’e kogenda ase embera yane, ng’a nario indagende inse buya nomorembe, na omoika one obe ogosoa ase abateri baigoro na gotera ase okomotogia Nyasae bwekeene.

29. Nonya naboigo, nigo ingoteba ng’a mobe amo, erinde inyare kobamanyia ase omorwoti oino.

30. Nonya nase engaki eye, omobere one nigo ogotengechigwa mono ekero nkogania gokwana ase more; korende Omonene Nyasae nigo akondemia, na nigo anchigete ng’a imbe ingokwana ase more, na aganchika ng’a imbatebie rituko eri, ng’a omwana one Mosaya nere omorwoti ase more na omogambi ase more.

31. Ase bono abaminto, nigo inganetie ng’a mokore buna eganeire ekorwe buna mwayarendire amachiko ane naboigo amachiko a Tata, na komenteka, na koyarenda botambe korwa ase amaboko ya ababisa, naboigo komorayarende amachiko y’omwana one, gose amachiko a Nyasae ayio ararwegwe ase more nene, imomenteke ime ase ense, na babisa baino tibakobagambera.

32. Korende, abanto bane, mwerende kero kende nabo ogoetena korabe egati yaino, na mobaise koigwera omoika bwebirecha, oyio okwanetwe na tata one Mosaya.

33. Rigereria okoragererigwa gwatebirwe ase oria orang’uswe n’omoika oria omobe; onye aigwera na gotigara nagokwa ase ebibe biaye, naboigo ogotinda ase enkoro yaye; erio akanyora eng’eria yaye y’egesusuro gia kare nakare, ase engencho y’ogosaria amachiko a Nyasae engaki ase engaki ase obong’aini bwaye.

34. Nabatebirie ng’a onde tari egati yaino, gotatiga abana baino baria batororokererigwa igoro ya amang’ana aya, korende egento imanyete nigo mobarire ase Tata oita oigoro, ase okorwa keria gionsi mobwate na more nakio: naboigo nabeire inkworokia igoro ya amariko aria abwate obobani boria bwabeire bogokwanwa amo n’ababani abachenu, nonya nkorwa ase engaki ya tata oito Lehi ayetigete Yerusaremu;

35. Naboigo aria onsi abeire agokwanwa nabatata baito goika bono. Na rigereria nigo bakwanete keria babete bagochikwa n’Omonene; aseigo nigo bare abachenu na abekeene.

36. Nabono nigo inkobatebia inwe abaminto ng’a buna mwaigure na mworokigwe aya onsi, onye mokwanga nakogenda mamincha ya amang’ana aya akwanirwe, nigo moretugute korwa ase omoika bw’Omonene, na nigo erabe motabwati aase akobarenda ase obong’aini na gose ase ogoseseneka, nakorendwa –

37. Nigo inkobatebia ng’a monto onde bwensi orakore aya, naboigo nigo erabe bamoeneneire Nyasae; aseigo obeire okoigwera omoika obirecha, nakoba omobisa bw’ekeene; asayio, Omonene tabwati aase ase are, ekiagera tari komenya ime ase ekaru yebibe.

38. Aseigo onye omonto oria takoangamia, korende abe otigarete ase ogokwa na omobisa oNyasae, ekerengererio ekiya kia Nyasae nkebokie omoyo oye ase obogima nakomanya obobe bwaye, obwe bwamokorete gotama korwa ase Omonene, nakoigwa ore nobobe, na obosareru, na oboakong’u, bonga buna obwo omorero otakorima, oyio oiretwe igoro kare nakare.

39. Naende nabatebirie, ng’a mabera taiyio ase omonto oria; aseigo omoerio oye n’okoremereria ase omochando oyo otakoera okare na kare.

40. O inwe mwensi abagaka abakoro, nainwe abasae abake, mainwe abana abake morabe mokoigwa amang’ana ane, nakwanire ase more ase obuya ng’a monyare koigwa, nasabire ng’a moinyore na kobokia okoinyora kwaino igoro y’obobe bwa abanto baria bagwete ase ogosaria.

41. Na nonya naboigo, nigo naganirie ng’a mobe nokogania ase ogoseseneka ase engencho ya baria barendete amachiko a’Nyasae. Rigereria nigo basesenirie ase kera egento, ase omobere na omoika; na onye bakobogoria okwegena goika omoerio, mbairwe igoro, aase baramenye na Nyasae ase obomenyo botakoera na omogoko otakoera. O moinyore, moinyore ng’a amang’ana aya nayekeene; ekiagera Omonene Nyasae abaire okoyakwana.