1. Naende abaminto, narangeirie ebirengererio biaino, nimbwate amang’ana make ingokwana ase more; Rigereria, nimbwate ebinto gete igoro ya keria kegocha.

2. Na ebinto biria ingochia kobatebia nigo biaretwa ase inde n’omomaraika o’Nyasae. Na agantebia ng’a: Boka, na inkaboka, na rigereria agatenena ase obosio bwane.

3. Na agantebia ng’a: Boka, na oigwe amang’ana ngochia gogotebia; rigereria nachire koorokia ase ore amang’ara amaya y’omogoko.

4. Omonene oigure amasabo ao, na obeire okorigereria obochenu bwao, na ontomire koorokia ase ore ng’a nobe gokogoka; na ayio noyaorokie ase abanto, erinde nabarobwo baichorwe n’omogoko.

5. Rigereria engaki ngochere, na tari are mono, ase chinguru omonene omonyanguru oria okogamba, oria arengeo, na nigo are korwa kare goika kare nakare, nabe ogocha korwa igoro goika inse egati y’abana bamwanyabanto, na amenye ase eema ya amaroba na abe ogoetanana ase abanto bonsi ogokora ebikone ebinene, koreng’ana buna okogwenia abarwaire, kobokia abakure, gokora ebirema kogenda, emeuko korora, na emetino koigwa, na kogwenia ngencho ende yonsi y’amarwaire.

6. Naende nabiserie ebirecha, gose emeika ya birecha eria emenyete ase abana bamwanyabanto.

7. Naboigo Nachandeke ase amatemwa, na obosareru bw’omobere, enchara, erang’o, okorosa, kobua buna omonto agochandeka, goika ogokwa; aseigo rigereria amanyinga akarwa kera ase ebosi y’omobere, naboigo erabe ase ogochandeka kwaye ase ngencho y’ebibe bia abonto baye.

8. Nere narokwe Yeso Kristo, Omwana oNyasae, Tata oigoro na ense, omotongi bwebinto bionsi korwa omochakano; na ng’ina narokwe Mariamu.

9. Narora nigo agocha ase abanto baye, erinde ogotoreka konyare kobachera abana bamwanyabanto nonya nase okwegena ase erieta riaye; nonya naya kaerire mbamoroke omonto, na goteba ng’a nabwate ekerecha, na imbamobwate, na komobamba.

10. Nere naboke korwa ase amakweri rituko riagatato; na rigereria natenene koyenachera ense; na rigereria ng’a aya onsi nigo agokorekana erindi ekina egechenu kenyare gocha ase abana bamwanyabanto.

11. Na rigereria boigo amanyinga aye naiteke y’okoboria ebibe bia baria bagure ase ogosaria gwa Adamu, abwo bakure batamanyeti okobua kw’Omonene Nyasae igoro yabarobwo, gose baria basaririe batamanyeti.

12. Korende oragererigwe ere oria omanyete ng’a nigo amoenenerete Nyasae nogwancha’ ekiagera ogotoreka ngochetie ase bosa korende ase okoangama na okwegena ase Yeso Kristo.

13. Na Omonene Nyasae obeire okobatoma ababani baye abachenu ase abana bonsi bamwanyabanto, koyateba amang’ana aya ase kera egesaku, chinse, na chimeme ao ao, ng’a monto onde bwonsi oregene ng’a Kristo nache, oyio nanyore okwaberwa kwebibe na kogoka amo n’omogoko omonene, buna oria oichire ase bare.

14. Korende Omenene Nyasae akarora ng’a abanto baye nigo bare aboro, naboigo akarwa amachiko ase bare, nonya namachiko amusa.

15. Na ebirage ebinge, na amakumia, na chingencho, na ebiriria bikorokigwa ase bare; igoro y’ogocha kwaye; naboigo ababani abange mbakwanete igoro y’ogocha kwaye; korende bagakong’ia chinkoro chiabo, na tibaigwa ng’a amachiko amusa tebwate gokonya konde gwonsi gotatiga goetera ase ekengwanso kiamanyinga aye.

16. Nonya yare koba ng’a nomwana omokere ogokora ebibe tubare gotoreka; kerende nabatebirie ng’a mbasesenirie; rigeria, koreng’ana buna Adamu, gose omobere bakagwa, manya namanyinga a Kristo aitegete ase okoboria igoro y’ebibe biabo.

17. Nonya naboigo nabatebirie rieta rinde tiriri rirure gose enchera ende, gose ande onsi ogotoreka koranyare konyorekana goche ase abana bamwanyabanto, gotatiga ase erieta ria Kristo, Omonene na omonyanguru.

18. Na rigereria nigo akonachera, na ekina kiaye negiekeene; na ekeng’werere tigegosira egiakure ase obong’werere korende abanto banywa ekina ase omioyo yabo gotatiga bebekire inse buna abana abake, na kwegena ng’a ogotoreka ngwachete, na nkoreo, na nkegenderere kobao, ase ekengwanso kia amanyinga a Kristo, Omonene na omonyanguru.

19. Omonto bwomobere nomobisa ase Nyasae, na obeire korwa Adamu, na nabe boigo goika kare na kare, gotatiga bwebekire ase okobua kw’Omoika Omochenu, na kobeka are ekemobere na koba omochenu ase ekeng’wanso kia Kristo Omonene, na koba buna omwana, omong’werere, omwororo, omoremereria oyobwate obwanchani boisanegete, ore ang’e koigwera kera ring’ana riria Omonene aratebe rigiya gocha ase are, koreng’ana buna omwana are omoigweri ase ise.

20. Naboigo natebire ase more, ng’a eng’aki neike ekero chisemi chiomotoria chirasiarerwe kera ase ense, egesaku, na chimeme ao ao, na abanto ao ao.

21. Na rigereria ekero engaki eyio egoika, onde taiyo otanyorekane n’okomocha ase Omonene, Nyasae, gotatiga abana abake, goetera ase okoangama na okwegena erieta ri’Omonene Nyasae omonyanguru.

22. Nonya mbono, ekero oraborokie abanto bao ebinto biria Omonene Nyasae agochigete, na tibanyorekana nakemoa ase obosio bwa Nyasae, rioka koreng’ana na amang’ana nabeire ingokwana ase ore.

23. Nabono nayakwanire amang’ana aria Omonene Nyasae anchigete.

24. Na otebire Omonene ng’a: Nigo baratenene buna oborori bokomesa mamincha ya abanto, ase rituko riekina; ekero barabe bakogambigwa kera omonto n’ogokora kwaye, gose nigo bare nebibe.

25. Na onye bakonyorekana nebibe nigo barabarwe buna okogechia kw’ogosaria kwabo, okwe kwabarusetie ase obosio bw’Omonene gocha aase abe na yogochandeka gotakoera, korwa abwe batanyare koirana naende; aseigo banyure ekina ase emioyo yabo.

26. Aseigo banyure korwa ase egekombe kiendamwanu ya Nyasae, ekio obokeene botanyare gokana ase bare kanga mbwakanete ase Adamu baria bagwete ase engencho y’okoria amatunda y’omote oria okanetwe; aseigo, amabera tare koba ase bare kare na kare.

27. Na ogochandeka kwabo nigo konga buna enyancha y’omorero, oyio amasaaria aye atanyare korimigwa, na oyio erioki riaye ritirete gochia igoro kare na kare. Naboigo Omonene abete ogonchika. Amina.