1 Ug karon, nahitabo nga dihang gitapos na ni hari Benjamin ang iyang pagpamulong sa mga pulong nga gisulti kaniya sa anghel sa Ginoo, mitan-aw siya sa palibot sa pundok sa katawhan, ug nakita nga nanghapa sila sa yuta, kay mipatigbabaw kanila ang kahadlok ngadto sa Ginoo.

2 Ug nakita nila ang ilang mga kaugalingon nga anaa sa kalibotanong kahimtang, gani ubos pa kay sa abog sa yuta. Ug misinggit silang tanan sa kusog nga tingog, nga nag-ingon: O kaluy-i, ug gamita ang maulaon nga dugo ni Kristo aron among madawat ang kapasayloan sa among mga sala, ug maputli ang among kasingkasing; kay nagatuo kami kang Jesukristo, ang anak sa Dios, kinsa milalang sa langit ug sa yuta, ug sa tanang butang; kinsa manaog dinhi uban sa anak sa mga tawo.

3 Ug nahitabo nga human sila makapamulong niini ang Espiritu sa Ginoo mianha kanila, ug napuno sila sa kamaya, kay nakadawat og kapasayloan sa ilang mga sala, ug nakabaton og kalinaw sa tanlag, tungod sa ilang naghingapin nga pagtuo kang Jesukristo kinsa moanhi, sumala sa mga gipamulong ni hari Benjamin ngadto kanila.

4 Ug gibuka pag-usab ni hari Benjamin ang iyang ba-ba ug misugod sa pagpamulong ngadto kanila, nga nag-ingon: Akong mga higala ug akong kaigsoonan, akong kaliwatan ug akong katawhan, manawagan na usab ako sa inyong pagtagad, aron inyong mabati ug masabtan ang nahibilin nga bahin sa akong mga pulong nga akong isulti kaninyo.

5 Kay tan-awa, kon ang kahibalo bahin sa kamaayo sa Dios niining higayona mipahigmata kaninyo sa usa ka pagbati sa inyong pagkawalay kapuslanan, ug sa inyong kawalay bili ug sa inyong napukan nga kahimtang—

6 Sultihan ko kamo, kon inyong nakab-ot ang kahibalo bahin sa kaayo sa Dios, ug sa iyang dili hitupngan nga gahom, ug sa iyang kaalam, ug sa iyang pailob, ug sa iyang pagkamainantoson ngadto sa anak sa mga tawo; ug usab, sa pag-ula nga giandam gikan sa katukoran sa kalibotan, aron pinaagi niana ang kaluwasan modangat ngadto kaniya kinsa mobutang sa iyang pagsalig sa Ginoo, ug magmakugihon sa pagtuman sa iyang mga sugo, ug magpadayon sa pagtuo gani hangtod sa kataposan sa iyang kinabuhi, ang buot nakong ipasabot ang mortal nga kinabuhi—

7 Moingon ako, nga mao kining tawhana ang makadawat sa kaluwasan, pinaagi sa pag-ula nga giandam gikan pa sa katukoran sa kalibotan alang sa tanang katawhan, nga diha na sukad sa pagkapukan ni Adan, o kinsa ania karon, kinsa moabot, bisan hangtod sa kataposan sa kalibotan.

8 Ug mao kini ang paagi nga ang kaluwasan moabot. Ug walay laing kaluwasan gawas niini nga gipamulong na; ni walay laing gikinahanglan diin ang tawo maluwas gawas lamang sa mga gikinahanglan nga akong gisulti kaninyo.

9 Tuohi ang Dios; tuohi nga siya mao gayod, ug nga siya ang milalang sa tanang butang, lakip sa langit ug sa yuta; tuohi nga anaa kaniya ang tanang kaalam, ug ang tanang gahom, lakip sa langit ug sa yuta; tuohi nga dili masabtan sa tawo ang tanang butang nga masabtan sa Ginoo.

10 Ug usab, tuohi nga kamo kinahanglan maghinulsol sa inyong mga sala ug mobiya niini, ug magpaubos sa inyong mga kaugalingon sa atubangan sa Dios; ug mohangyo sa kinasingkasing nga siya mopasaylo kaninyo; ug karon, kon kamo motuo sa tanan niining mga butanga seguroha nga buhaton ninyo kini.

11 Ug usab sultihan ko kamo sama sa akong gisulti na kaniadto, nga kon nakab-ot na ninyo ang kahibalo sa himaya sa Dios, o kon nakasinati na kamo sa iyang kaayo ug nakatagamtam sa iyang gugma, ug nakadawat sa kapasayloan sa inyong mga sala, nga maoy hinungdan sa hilabihang kamaya sa inyong mga kalag, mao usab nga nagtinguha ako nga kamo mahinumdom, ug sa kanunay magpabilin sa inyong panumdoman, ang pagkahalangdon sa Dios, ug ang inyong kaugalingon nga pagkawalay kapuslanan, ug ang iyang kaayo ug ang pagkamainantoson nganha kaninyo, nga dili takos nga mga binuhat, ug pagpaubos sa inyong kaugalingon bisan ngadto sa kinahiladman sa pagkamapainubsanon, pagtawag sa ngalan sa Ginoo matag adlaw, ug pagbarog nga makanunayon diha sa pagtuo niana nga moabot, nga gipamulong pinaagi sa ba-ba sa anghel.

12 Ug tan-awa, sultihan ko kamo nga kon buhaton ninyo kini magmaya kamo sa kanunay, ug mapuno sa gugma sa Dios, ug sa kanunay makabaton sa kapasayloan sa inyong mga sala; ug magtubo kamo sa kahibalo sa himaya kaniya nga naglalang kaninyo, o sa kahibalo niana nga makiangayon ug tinuod.

13 Ug dili kamo maghunahuna nga pasakitan ang usag usa, apan magpakabuhi nga malinawon, ug mohatag sa matag tawo sumala sa iyang gikinahanglan.

14 Ug dili ninyo tugotan ang inyong mga anak nga magutman sila, o hubo; ni dili kamo motugot nga malapas nila ang mga balaod sa Dios, ug mag-away ug maglalis sa usag usa, ug moalagad sa yawa, kinsa mao ang agalon sa sala, o kinsa mao ang daotang espiritu nga gipamulong sa atong mga amahan, siya nga kaaway sa tanang pagkamatarong.

15 Apan tudloan ninyo sila sa paglakaw sa mga dalan sa kamatuoran ug kaligdong; tudloan ninyo sila sa paghigugma sa usag usa, ug sa pag-alagad sa usag usa.

16 Ug usab, kamo mismo motabang niadtong nagkinahanglan sa inyong tabang; ipangalagad ninyo ang inyong kabtangan ngadto kaniya nga nagkinahanglan; ug dili kamo motugot nga ang pagpakiluoy sa makililimos diha kaninyo makawang, ug isalikway siya aron mamatay.

17 Tingali moingon kamo: Kanang tawhana maoy sad-an sa iyang pagkauyamot; mao nga akong pugngan ang akong kamot, ug dili mohatag kaniya sa akong pagkaon, ni mohatag kaniya sa akong kabtangan aron dili siya mag-antos, kay ang iyang mga silot makiangayon—

18 Apan sultihan ko kamo, O tawo, si kinsa kadtong mobuhat niini mao ang tawo nga nagkinahanglan kaayo nga maghinulsol; ug gawas kon maghinulsol siya nianang iyang gibuhat malaglag siya sa kahangtoran, ug dili makaangkon og dapit sa gingharian sa Dios.

19 Kay tan-awa, dili ba kitang tanan makililimos? Kitang tanan wala ba magsalig sa sama nga Binuhat, gani sa Dios, sa tanan nga kabtangan nga atong naangkon, sa pagkaon ug panapot, ug sa bulawan, ug sa pilak, ug sa tanang matang sa katigayonan nga atong naangkon?

20 Ug tan-awa, gani niining mga gutloa, kamo nagpanawag sa iyang ngalan, ug nagpakiluoy alang sa kapasayloan sa inyong mga sala. Ug gitugot ba niya nga makawang ang inyong gihangyo? Wala; gibu-bo niya ang iyang Espiritu nganha kaninyo, ug gihimo ang inyong kasingkasing nga mapuno sa kamaya, ug gihimo ang inyong mga ba-ba nga matak-om aron dili na kamo makapamulong, mao nga hilabihan ka dako ang inyong kamaya.

21 Ug karon, kon ang Dios, kinsa milalang kaninyo, nga maoy inyong gisaligan sa inyong kinabuhi ug sa tanan nga anaa kaninyo ug naangkon, mohatag ninyo sa bisan unsang matarong nga inyong gipangayo, pinaagi sa pagtuo, nagtuo nga kamo makadawat, O kon mao kana, gikinahanglan gayod kaayo nga ipakigbahin ninyo sa usag usa ang kabtangan nga inyong naangkon.

22 Ug kon hukman ninyo ang tawo kinsa nagpakiluoy kaninyo alang sa inyong kabtangan aron dili siya mamatay, ug ipanghimaraot siya, labaw pa kamakiangayon ang panghimaraot kaninyo tungod kay inyong gihikaw ang inyong kabtangan, nga dili inyo apan sa Dios, nga mao usab ang nanag-iya sa inyong kinabuhi; ug bisan pa niana kamo wala man magpakiluoy, ni maghinulsol sa butang nga inyong nabuhat.

23 Sultihan ko kamo, alaot kana nga tawo, kay ang iyang kabtangan mahanaw ra uban kaniya; ug karon, akong gisulti kining mga butanga alang niadtong mga adunahan kalabot sa mga butang niini nga kalibotan.

24 Ug usab, sultihan ko ang mga kabos, kamo nga wala apan adunay igo, padayon kamo sa matag adlaw; ang buot nakong ipasabot kamo nga mihikaw sa makililimos, tungod kay wala kamo; gusto ko nga moingon kamo sa inyong kasingkasing nga: wala ko mohatag tungod kay wala ko, apan kon duna pa unta ko mohatag ko.

25 Ug karon, kon kamo moingon niini sa inyong kasingkasing magpabilin kamong walay sala, kondili panghimaraoton kamo; ug ang inyong panghimaraot makiangayon kay gikaibgan man ninyo ang wala ninyo madawat.

26 Ug karon, alang sa katuyoan niining mga butanga nga akong gipamulong kaninyo—nga, tungod og alang sa pagbaton og kapasayloan sa inyong mga sala sa matag adlaw, aron maglakaw kamo nga walay sala atubangan sa Dios—Ako manghinaot nga kamo mopakigbahin sa inyong kabtangan ngadto sa mga kabos, matag tawo sumala sa unsay anaa kaniya, sama sa pagpakaon sa gigutom, pagsinina sa hubo, pagduaw sa mga masakiton ug pagpangalagad alang sa ilang kahupayan, sa espiritwal ug temporal, sumala sa ilang panginahanglan.

27 Ug seguroha nga tanan niining mga butanga mahimo sa kaalam ug kahusay; kay wala kinahanglana nga ang tawo modagan labaw pa kay sa iyang kusog. Ug sa gihapon, kinahanglan usab nga magkugi siya, aron sa ingon niana maangkon niya ang ganti; mao nga, ang tanang butang kinahanglan nga buhaton diha sa kahusay.

28 Ug manghinaot ko nga kamo mahinumdom, nga si bisan kinsa man kaninyo ang manghulam sa inyong silingan kinahanglan nga mouli sa butang nga iyang gihulaman, sumala sa iyang pag-uyon, kay kondili, makasala kamo; ug tingali kamo usab ang hinungdan nga makasala ang inyong silingan.

29 Ug sa kataposan, dili ako makasulti kaninyo sa tanang butang kon asang dapita kamo mahimong makasala; kay adunay daghang paagi ug hinungdan, gani hilabihan kadaghan nga ako dili makaihap niini.

30 Apan mao lamang kini ang akong ikasulti kaninyo, nga kon dili kamo magbantay sa inyong kaugalingon, ug sa inyong mga hunahuna, ug sa inyong mga pulong, ug sa inyong mga buhat, ug mosunod sa mga sugo sa Dios, ug magpadayon sa pagtuo sa inyong nadungog kabahin sa pag-anhi sa atong Ginoo, gani hangtod sa kataposan sa inyong kinabuhi, kamo gayod mangamatay. Ug karon, O tawo, hinumdomi, ug ayaw pagkamatay.