1 Ug karon, naghunahuna si hari Benjamin nga kinahanglan, human nakapamulong sa katawhan, nga iyang ilista ang mga ngalan sa tanan niadtong misulod sa pakigsaad sa Dios aron motuman sa iyang mga sugo.

2 Ug nahitabo nga walay usa ka kalag, gawas sa gagmayng mga bata, nga wala mosulod sa pakigsaad ug midala nganha kanila sa ngalan ni Kristo.

3 Ug usab, nahitabo nga dihang gitapos ni hari Benjamin kining tanang mga butanga, ug nakapahinungod sa iyang anak nga si Mosiah aron mahimong usa ka magmamando ug hari sa iyang katawhan, ug mihatag kaniya sa tanang panudlo kabahin sa gingharian, ug mitudlo usab og mga pari aron magtudlo sa katawhan, nga pinaagi niana unta makadungog sila ug masayod sa mga sugo sa Dios, ug aron magdasig kanila nga mahinumdom sa panumpa nga ilang gihimo, gipapauli niya ang pundok sa katawhan, ug namauli sila, matag usa, kauban sa ilang mga pamilya, sa kaugalingon nilang mga balay.

4 Ug gisugdan ni Mosiah ang paghari puli sa iyang amahan. Ug nagsugod siya sa paghari sa ikakatloan nga tuig sa iyang panuigon, naglangkob sa kinatibuk-an, sa gibana-bana nga upat ka gatos ug kapitoan og unom ka tuig sukad sa panahon nga si Lehi mibiya sa Jerusalem.

5 Ug si hari Benjamin nabuhi pa og tulo ka tuig ug siya namatay.

6 Ug nahitabo nga gisunod ni hari Mosiah ang mga pamaagi sa Ginoo, ug mipatalinghog sa iyang mga paghukom ug sa iyang mga pamalaod, ug mituman sa iyang mga sugo sa tanang butang bisan unsa nga iyang gisugo kaniya.

7 Ug gisugo ni hari Mosiah ang iyang katawhan nga kinahanglan magtikad sila sa yuta. Ug siya usab, mismo, mitikad sa yuta, aron dili siya mahimong palas-anon sa iyang katawhan, aron mahimo niya ang susama sa nahimo sa iyang amahan sa tanang butang. Ug walay panagbingkil taliwala sa tanan niyang katawhan sulod sa tulo ka tuig.