Te Tuatua A Nga Kite Toko Toru

Kia kite oki to te au basileia ravarai, e te au kopu, te au reo, e te au tangata katoatoa, te ngai e taeaiaʼi e teia puka nei, ko matou oki, na roto i te aroa ua o to tatou Metua Atua, e to tatou Atu ia Iesu Mesia, kua kite i te au papa, no reira mai teia nei akapapaanga. Ko te akapapaanga te reira, o te au tangata o Niphai, e te ngati Lamana oki, to ratou ai taeake e te au tangata o Iareta tei aere mai mei te patu teitei, mei tei tuatuaia ake nei. E te kite nei matou e, kua uriia teia nei tuatua, na roto i te aroa e te mana o te Atua, kua akakiteia mai oki te reira kia matou e tona uaorai reo, na te reira i akapapu kia matou i te tika o teia angaanga, e te rauka nei ia matou kia akapapu meitaki e, kua kite tikai matou i te au kotikotianga i runga i teia au papa nei, e kua akaariia mai te reira kia matou e te mana o te Atua, auraka oki i to te tangata. E te tuatua nei matou ma te akapapu e, kua eke mai tetai angela a te Atua mei te rangi mai, e kua apai mai aia, e kua tuku ki mua i to matou mata i taua papa ra tei kotikotiia ki te au tataanga, kia akara tikai to matou mata i te reira. E te kite nei matou e, na te aroa ua ïa o to tatou Metua Atua, e to tatou Atu ko Iesu Mesia, i akaraʼi matou, e i raukaʼi ia matou, kia tuatua e, e tika tikai teia au mea nei. E mea umere oki teia ki to matou mata, kua akaue mai ra te reo o te Atua kia matou, e kia tuatua ua atu matou i te reira. E teianei, kia akono i te au akaueanga a te Atua, te akakite nei matou i te tika o teia au mea nei. E te kite nei matou me ka tinamou to matou akarongo i roto i te Mesia, ka ma to matou kakau i te toto o te au tangata rava rai e ka tu matou ki mua i te akavaanga a te Mesia ma te titoutou kore, e ma te noo tinamou atu kiaia i te rangi e mutu kore ua atu. Ei te Metua oki te ngateitei, e te Tamaiti, e te Vaerua Tapu okotai ïa Atua. Amene.