Wase 100
Na veika sa vakatakilai vei Josefa Simici na Parofita kei Sidini Rikitoni, mai Perisibaqi, Niu Ioka, ena 12 ni Okotova 1833. Erau sa biuta tu vakadede na nodrau veivale na lewe rua oqo, ka rau sa nanumi ira vakalevu.
1–4, Me rau vunautaka yani na kosipeli ko Josefa kei Sidini me ra vakabulai kina na yalo; 5–8, Ena vakatakilai vei rau na ka me rau tukuna ena kena auwa; 9–12, Sa na gusu ni vosa vei rau ko Sidini, ia ko Josefa me dauvakatakila ka na laulau sara na nona ivakadinadina; 13–17, Ena vakatubura cake na Turaga e dua na matatamata savasava, ka ra na vakabulai ko ira sa talairawarawa.
1 Raica sa kaya vakaidina vakaoqo na Turaga vei kemudrau Sidini kei Josefa na wekaqu, era sa bula vinaka tiko na nomudrau matavuvale; io era sa tiko ena qeteqete ni ligaqu, ka’u na vakayacora vei ira na veika sa dodonu vei au; raica sa tu vei au na kaukauwa kecega.
2 O koya mo drau muri au, ka rogoca na noqu ivakasala vei kemudrau.
3 Raica, ka rogoca, era sa lewe vuqa sara na noqu tamata ena vanua oqo, kei na veiyasana vakavolivolita; ia ena dolavi e dua na katuba sa yaga vakalevu ena vanua oqo kei na veiyasana vakavolivolita kei na veivanua ki na tokalau oqo.
4 Ia, koi Au na Turaga, au sa lewa mo drau lako mai ki na vanua oqo; raica sa kilikili kei au mo drau lako mai ki ke me ra vakabulai kina na yalodra.
5 O koya, au sa kaya kina vakaidina vei kemudrau, drau tabalaka cake na domomudrau vei ira na tamata oqo; drau tukuna yani na ka au sa vakatakila ki lomamudrau, ia drau na sega ni vakamaduataki e matadra na tamata;
6 Raica ena soli vei kemudrau ena auwa ko ya, io ena gauna sara ga ko ya, na veika mo drau tukuna.
7 Ia au sa solia vei kemudrau e dua na ivakaro, mo drau tukuna na veika kecega drau na tukuna ena yacaqu, ena yalo e dina, ena yalomalua, ena veika kecega.
8 Kau na solia kina na yalayala oqo, ni kevaka drau na vakayacora vakakina, ena cakacaka yaco na Yalo Tabu me vakadinadinataka na veika kece drau sa vosataka.
9 Ka sa kilikili kina vei au, mo sa na gusu ni vosa vei ira na tamata oqo, ko iko Sidini na noqu tamata; io, au na tabaki iko ki na ilesilesi oqo, mo tukuna na vosa i Josefa na noqu tamata.
10 Ia au na vakaukauwataki koya ka na laulau sara na nona ivakadinadina.
11 Kau na vakaukauwataki iko tale ga me laulau sara na nomu vunautaka na ivolanikalou kecega, mo nona gusu ni vosa kina, ka me na nomu dauvakatakila ko koya, mo na kila kina na veika kece e baleta na noqu matanitu e vuravura.
12 O koya, mo drau tomana na nomudrau ilakolako, ka me reki tiko na lomamudrau; ia raica ka rogoca, au na tiko vata kei kemudrau me yacova na ivakataotioti.
13 Ia oqo au na tukuna vei kemudrau na ka e baleti Saioni. Raica ena vueti vakaidina ko Saioni, e dina ga ni sa cudruvi vakalekaleka ko koya.
14 Ia koi rau na nomudrau itokani, ka noqu tamata ko Osoni Aidi kei Joni Qulu, erau sa tiko tale ga ena qeteqete ni ligaqu; ia kevaka erau sa muria na noqu vunau, erau na vakabulai.
15 O koya, me vakacegu kina na lomamudrau; raica sa veivuke na ka kecega me ra vinaka kina ko ira era sa lako vakadodonu, me vakatabui kina na lotu.
16 Raica au na vakatubura cake vei au e dua na matatamata savasava sara, ka ra na qaravi au ena buladodonu;
17 Ia ko ira kecega sa masuta na yaca ni Turaga ka muria na nona ivakaro, era na vakabulai. Io ena vakakina. Emeni.