1 Ena siga oqo eratou a soqoni vata kina ena vale nei Josefa Simici Lailai e lewe ruasagavulukava na bete levu ena dua na matabose raraba, me vaka na ivakatakila, e ratou a tauyavutaka kina na matabose e cake ni lotu i Karisito, me ratou na lewena e lewe tinikarua na bete levu, ia me na dua se tolu na peresitedi, me vaka e ganita.

2 Sa lesi na matabose e cake ena ivakatakila me baleta na kena qaravi na veika dredre ena tubu mai ena lotu, na kena ena sega ni rawa me walia na lotu se na matabose nei bisopi me ra vakacegui o ira kece era okati kina.

3 Era sa domovata na lewe ni bose ka digitaki ko Josefa Simici Lailai, Sidini Rikitoni kei Veretariki G. Viliame me ratou peresitedi; ia eratou sa digitaki tale ga ko Josefa Simici Levu, Joni Simici, Josefa Kou, Joni Jonesoni, Matini Erisi, Joni S. Kata, Jereti Kata, Oliva Kaudari, Samuela H. Simici, Osoni Aidi, Silivesita Simici kei Luke Jonesoni, o ira na bete levu, me ratou lewe ni matabose tudei ni lotu, io era sa domovata kece kina na lewe ni bose.

4 Eratou a qai tarogi na lewe ni bose sa cavuti oqori na yacadratou, se ratou sa ciqoma na ilesilesi ko ya, ka ratou na vakayacora na kena ilesilesi me vaka na lawa ni lomalagi, eratou a sauma ka kaya ni ratou sa ciqoma kece na ilesilesi, ka ratou na vakayacora na nodratou itavi me vaka na loloma soli wale sa solia na Kalou vei iratou.

5 Na kedra iwiliwili na matabose, era a laveliga ena vuku kei na yaca ni lotu ena nodratou lesi na lewe ni matabose sa cavuti e cake na yacadratou e vasagavulu katolu, me vakaoqo: e ciwa na bete levu, tinikavitu na italatala qase, era lewe va na bete, ka lewe tinikatolu na lewe ni lotu.

6 Era sa duavata ni: na sega na kaukauwa ki na matabose e cake me cakacaka kevaka eratou sega ni tiko rawa e lewe vitu na lewe ni bose sa cavuti e cake na yacadratou, se eratou sega ni tiko na kedratou isosomi ka ra dau kacivi ena veigauna eso.

7 Ena tu vei iratou na lewe vitu oqori na kaukauwa me ratou lesia eso tale na bete levu kilikili me ra veisosomitaki vei ira na lewe ni bose era sega ni tiko.

8 Era sa duavata ni: kevaka sa na vakalalai e dua na itutu ena vuku ni mate, sivo ena talaidredre, se sa toki ki na dua tale na vanua, e dua vei ira na lewe ni matabose sa cavuti e cake, me na qai vakatawani tale ena nona digidigi na peresitedi se o iratou na peresitedi, ka me ra qai domovata na matabose raraba ni bete levu, ka kacivi vakatabakidua ena vuku ni inaki ko ya, me ra vakaitavi ena yaca ni lotu.

9 Na peresitedi ni lotu, ka peresitedi tale ga ni matabose oya, e lesi ena ivakatakila, ka tokoni ena nona veiqaravi mai na nodra domovata na lewe ni lotu.

10 Raica sa kilikili sara kei na nona ilesilesi dokai oqori, me liutaka na matabose levu ni lotu; ka sa nona galala me rau vukei koya e rua tale na peresitedi ka rau digitaki ena ivakarau vata ga e digitaki kina ko koya.

11 Ia kevaka e yali e dua se o rau ruarua ka rau sa lesi me rau nona ivukevuke, sa tu na kaukauwa vua na peresitedi me liutaka ga na matabose ka sega e vukei koya kina; ia ke mani yali ko koya, sa tu na kaukauwa vei rau na rua na peresitedi oya me dua vei rau e liutaka na bose, se koi rau ruarua.

12 Ena veigauna kece e dabe kina na matabose e cake ni lotu i Karisito ena kena ivakarau sa tuvai koto e cake, sa nodra itavi na lewe ni matabose e le tinikarua me ratou tara naba me macala kina na veitarataravi ni nodratou vosa, ena vosa e liu ko koya e tara na naba dua qai veitarataravi tiko me la’ki tinia ko koya ka tara na naba tinikarua.

13 Ia ni sa kacivi na matabose me veivosakitaka e dua na ka, me ratou qai vakatulewataka na lewe ni bose e le tinikarua se ka bibi se sega; kevaka e sega soti ni ka bibi, me rau vosa wale ga kina e lewe rua, ia me muri na kena ivakarau e tukuni e cake.

14 Ia kevaka e nanumi ni ka bibi, me ratou lesi e lewe va; kevaka e bibi sara toka, me ratou lewe ono; ia ena sega ni dua na kisi me sivia na lewe ono e lesi me ratou vosa kina.

15 Sa nona dodonu na tamata beitaki ena veikisi kece, me ratou vosa ena vukuna e dua na veimama ni lewe ni matabose, me ratou raica me kakua na veivakacacani kei na vosa sega ni dodonu.

16 Me ratou na vakaraitaka na kisi na lewe ni matabose eratou sa lesi me ratou vosa, ni sa vakadikevi oti na ivakadinadina, ka kilai na kena dodonu ena matabose; me ratou sa na qai vosa na lewe ni matabose, io me vosa na tamata yadua ena dodonu kei na savasava.

17 Ia ko iratou na lewe ni matabose ka ratou tara na fika imatau, ko ya na 2, 4, 6, 8, 10 kei na 12, me ratou vosa ena vukuna na tamata beitaki, io me ratou raica me kakua na veivakacacani kei na vosa sega ni dodonu.

18 Ena veikisi kece sara sa dodonu me soli na galala vei koya e veibeitaki, kei koya ka beitaki me rau vakamacala ki na matabose, ni sa rogoci na ivakadinadina ka ratou sa vosa oti na lewe ni matabose eratou lesi me ratou vosa ena kisi.

19 Ni sa rogoci oti na ivakadinadina, ka ra sa vosa oti na lewe ni matabose, ko koya e veibeitaki kei koya e beitaki, sa na qai vakatauca na nona lewa na peresitedi, me vaka na ka e rogoca ka kila ena kisi ko ya, ka kerei iratou na lewe ni matabose e tinikarua me ratou tokona na lewa oqori ena nodratou laveta na ligadratou.

20 Ia kevaka e dua vei ira na lewe ni matabose, ka se bera ni vosa, se dua ga vei ira, ni oti na nona rogoca na ivakadinadina kei na vakatakekere, ka se bera ni lewa rawa na vanua me tu kina, qai raica e dua na cala ena nona vakatulewa na peresitedi, e rawa ni vakaraitaka, ka na rogoci tale na kisi.

21 Ia kevaka, ni sa oti na kena rogoci tale vakavinaka ka qai vakacilavi mai eso tale na ikuri ni rarama ena vuku ni kisi, me qai veisautaki na lewa me veiganiti kaya.

22 Ia kevaka e sega ni vakacilavi mai e dua na ikuri ni rarama, sa na dei tiko ga na lewa sa tau oti, sa na tu na kaukauwa vei iratou na iwase levu ni matabose me ratou vakatauca na lewa oqori.

23 Ia kevaka e basika na dredre ena vuku ni ivunau kei na ivakavuvuli, kevaka e sega ni veirauti na veika e volai me vakacegui kina na yalodra na lewe ni matabose, me qai kerea ka rogoca o peresitedi, na loma ni Turaga ena ivakatakila.

24 Ia kevaka era tu tani na bete levu, sa soli vei ira na kaukauwa me ra kaciva ka tauyavutaka e dua na matabose me vaka na kena ivakarau sa tukuni oti, io me ra walia na veika e leqa tu, kevaka e kerei mai na yasana ruarua, se dua ga vei rau e kerea mai.

25 Ia sa tiko ena matabose ni bete levu ko ya na kaukauwa me lesia e dua ga vei ira me liutaka na mataqali matabose vakaoqori ena gauna ko ya.

26 Sa itavi ni matabose ko ya me vakauta kusarawa yani e dua na ilavelave ni itukutuku ni veika e vakayacori, vata kei na dua na itukutuku taucoko ni ivakadinadina ka tokona na lewa sa tau, ki na matabose e cake ena nodratou idabedabe na Mataveiliutaki Taumada ni Lotu.

27 Ia kevaka e rau sega ni duavata na ilawalawa ruarua se dua vei rau ena lewa sa tauca na matabose oqo, sa rawa me ratou vakarogoya cake na nodratou ile ki na matabose e cake ni Mataveiliutaki Taumada ni Lotu, ka na rogoci tale e kea, me vaka na kena ivakarau sa tukuni toka e cake, io me vaka ga ni se sega mada ni rogoci oti e liu.

28 Raica ena qai kacivi walega na matabose ni bete levu e veivanua tani ena veikisi dredre ni veika vakalotu; ka na sega ni kacivi na mataqali matabose vakaoqo ena veika lalai ka sega soti ni bibi.

29 Sa tu tale ga na kaukauwa vei ira na bete levu era veilakoyaki tiko e veivanua se o ira era tu e veivanua tani ena nodra ilesilesi, me ra lewa se ganita me kacivi e dua na matabose vakaoqo se sega.

30 E koto na kedrau duidui na matabose e cake se o ira na bete levu dau veisiko ki vanua tani, kei na matabose e cake dau veilakoyaki ka ratou lewena na iapositolo le tinikarua.

31 Na nodratou lewa na kena imatai e rawa ni kerei me rogoci tale; ia na nodratou lewa na kena ikarua e sega ni rawa.

32 Na kena ikarua ena rawa walega ni tarogi mai vei ira na vakaitutu raraba ni lotu kevaka e baleta na talaidredre.

33 Sa vakadonui me: Soli na kaukauwa vua na peresitedi se ko iratou na peresitedi ena idabedabe ni Mataveiliutaki Taumada me ratou vakatulewa kevaka e ganita me rogoci tale e dua na kisi e kerei mai me dikevi tale, ni oti na nodratou dikeva na kerekere, na ivakadinadina, kei na itukutuku e sala vata kaya mai.

34 Ia eratou a qai tatara naba na lewe ni matabose e le tinikarua me macala kina na veitarataravi ni nodratou vosa; a qai vakaoqo na naba eratou dui tara: 1, Oliva Kaudari; 2, Josefa Kou; 3, Samuela H. Simici; 4, Luke Jonesoni; 5, Joni S. Kata; 6, Silivesita Simici; 7, Joni Jonesoni; 8, Osoni Aidi; 9, Jereti Kata; 10, Josefa Simici Levu; 11, Joni Simici; 12, Matini Erisi.Ia ni sa oti na masu sa qai rube na bose.