Vaega 103
Faaaliga na tuuina mai e ala ia Iosefa Samita le Perofeta, i Katelani, Ohaio, i le aso 24 o Fepuari, 1834. Na maua lenei faaaliga ina ua maea ona taunuu mai i Katelani, Ohaio, Pale P. Palate ma Laimani Uaite, o e na malaga mai Misuri e talanoa ma le Perofeta e uiga i se fesoasoani ma le toefuataiga o le Au Paia i o latou laueleele i le Itumalo o Siakisone.
1–4, O le pogai na tuu ai e le Alii le Au Paia i Misuri ina ia sauaina; 5–10, O le a manumalo le Au Paia pe afai latou te tausia poloaiga; 11–20, O le laveaiina o Siona o le a oo mai e ala i le mana, ma o le a afio atu le Alii e muamua atu i Lona nuu; 21–28, E tatau ona faapotopoto le Au Paia i Siona, ma o i latou o e e tuuina atu o latou ola o le a latou toe mauaina; 29–40, Ua valaaulia ni uso eseese e faatulaga le Tolauapiga a Siona ma o atu i Siona; ua folafola mai ia te i latou le manumalo pe afai latou te faamaoni.
1 E Moni Ou te fai atu ia te outou, a’u uo e, faauta, o le a Ou tuu atu ia te outou se faaaliga ma se poloaiga, ina ia outou iloa le ala e amio ai i le faataunuuina o o outou tiute e faatatau i le faaolataga ma le togiolaina o o outou uso, o e ua faataapeapeina i luga o le laueleele o Siona;
2 Aua ua tulia ma taia i lima o o’u fili, o e o le a Ou sasaa atu i ai i luga lo’u ita e lē mafuatia i lo’u lava taimi e tatau ai.
3 Aua ua faapea ona Ou tuu atu ia te i latou e oo mai i lenei taimi, ina ia latou faatumuina le fuataga o a latou amioletonu, ina ia tumu la latou ipu;
4 Ma ina ia mafai ona aoaiina i latou o e ua ta’ua i latou lava i lo’u igoa mo se vaitau itiiti i se aoaiga tiga ma mamafa, aua sa latou lē faalogo atoa mai i faatonuga ma poloaiga na Ou tuu atu ia te i latou.
5 Peitai e moni Ou te fai atu ia te outou, ua Ou folafolaina se folafolaga, lea o le a maua e lo’u nuu, pe afai latou te faalogo mai i lenei lava itula i le fautuaga o le a tuu atu e A’u, o le Alii lo latou Atua, ia te i latou.
6 Faauta, ona ua Ou folafolaina, o le a amata atu mai lenei lava itula ona latou manumalo e faasaga i o’u fili.
7 Ma o le faaeteete e tausi i upu uma o le a tautala atu ai A’u, o le Alii lo latou Atua, ia te i latou, o le a lē taofia ai lava ona latou manumalo seia oo ina faatoilaloina malo o le lalolagi i lalo o o’u vae, ma tuuina atu le lalolagi i le au paia, e fai mo i latou e faavavau ma faavavau lava.
8 Ae afai latou te lē tausia a’u poloaiga, ma lē faalogo e tausi i a’u upu uma, o le a manumalo malo o le lalolagi e faasaga ia te i latou.
9 Aua sa faatutu mai i latou e avea ma malamalama i le lalolagi, ma avea ma faaola o tagata;
10 Ma e tusa ai ma le lē avea o i latou ma faaola o tagata, e pei i latou o le masima ua magalo, ma e leai se mea e toe aoga i ai mai lena taimi ma le agai i luma, ae nao le lafoaiina i fafo ma solia i lalo o vae o tagata.
11 Peitai e moni Ou te fai atu ia te outou, ua Ou folafola o le a toe foi mai o outou uso ua faataapeapeina i laueleele o o latou tofi, ma o le a latou atia’e nofoaga tuufua o Siona.
12 Aua a mavae puapuaga e tele, e pei ona Ou fai atu ai ia te outou i se poloaiga ua mavae, ona oo mai lea o le faamanuiaga.
13 Faauta, o le faamanuiaga lenei na Ou folafola atu pe a mavae o outou puapuaga, ma puapuaga o o outou uso—o le laveaiina lea o outou, ma le laveaiina o o outou uso, o lo latou toefuataiga lava lea i le laueleele o Siona, e faamautuina, e lē toe lafoina i lalo.
14 Ae ui i lea, afai latou te faaeleelea o latou tofi, o le a lafoina i latou i lalo; ona o le a Ou lē faasaoina i latou pe afai latou te faaeleelea o latou tofi.
15 Faauta, Ou te fai atu ia te outou, o le laveaiina o Siona e ao ina oo mai e ala i le mana;
16 O lea, o le a Ou faatuina a’e i lo’u nuu se tagata, o lē o le a taitaia i latou e pei ona sa taitaia e Mose le fanauga a Isaraelu.
17 Aua o outou o fanau a Isaraelu, ma o le fanau a Aperaamo, ma e ao ina taitai ese outou mai le nofo pologa i le mana, ma le aao faaloaloa atu.
18 Ma e pei ona sa taitaiina muamua o outou tamā, o le a faapea lava le laveaiina o Siona.
19 O lea, ia lē tuu atu o outou loto ia faavaivai, aua Ou te lē fai atu ia te outou e pei ona sa Ou fai atu i o outou tamā: O le a alu atu la’u agelu e muamua atu ia te outou, ae lē o lo’u mamalu.
20 Ae Ou te fai atu ia te outou: O le a o atu a’u agelu e muamua atu ia te outou, ma lo’u mamalu foi, ma o le a outou maua le laueleele lelei i se taimi.
21 E moni, e moni Ou te fai atu ia te outou, o la’u auauna o Iosefa Samita, Le Itiiti, o le tagata lea ua Ou faatusa i ai le auauna o lē na fetalai atu i ai le Alii o le tovine i le faataoto lea na Ou tuu atu ia te outou.
22 O lea ia tuu atu ai i la’u auauna o Iosefa Samita, Le Itiiti, e fai atu i le malosi o lo’u fale, o a’u alii talavou ma faamatuā-tagata—Ia outou faapotopoto faatasi outou lava i le laueleele o Siona, i luga o le laueleele lea na Ou faatau mai i tupe na faapaia mai ia te a’u.
23 Ma ia tuu atu i aulotu uma e auina atu i luga tagata atamamai ma a latou tupe, ma faatau mai laueleele e pei ona sa Ou poloaiina ai i latou.
24 Ma e tusa ai ma le o mai o o’u fili e faasaga mai ia te outou e tutuli ese outou mai lo’u laueleele lelei, lea ua Ou faapaiaina e avea ma laueleele o Siona, e mai i o outou lava laueleele ina ua mavae ia molimau, ia na outou aumai i o’u luma e faasaga ia te i latou, ia outou fetuu i latou;
25 Ma o soo se tasi tou te fetuu, o le a Ou fetuuina, ma ia outou taui ma sui atu i o’u fili.
26 Ma o le a faatasi lo’u mamalu ma outou i le taui ma sui atu i o’u fili, e oo atu i le tupulaga e tolu ma le fa o i latou o e e inoino mai ia te a’u.
27 Ia leai se tagata e fefe e tuu atu lona ola ona o a’u; aua o lē e tuu atu lona ola ona o a’u o le a toe maua e ia.
28 Ma ’ai se e lē loto e tuu atu lona ola ona o a’u e lē o so’u soo o ia.
29 O lo’u loto ia siitia a’e e la’u auauna o Sini Rikitone lona leo i faapotopotoga i itu-laueleele i sasa’e, i le sauniuniga o aulotu e tausi i poloaiga ua Ou tuuina atu ia te i latou e faatatau i le toefuataiga ma le laveaiina o Siona.
30 O lo’u loto o la’u auauna o Parley P. Pratt ma la’u auauna o Laimani Uaite e lē tatau ona foi atu i le laueleele o o la uso, seia la maua ni vaega o tagata e o atu i luga i le laueleele o Siona, e taitoasefulu, pe taitoaluasefulu, pe taitoalimagafulu, pe taitoaselau, seia la maua le aofai e lima selau o le malosi o lo’u fale.
31 Faauta o lo’u loto lea; ole mai ma o le a outou maua ai; peitai e lē faia e tagata lo’u loto i taimi uma.
32 O lea, afai e lē mafai ona outou maua le lima selau, ia saili ma le filiga atonu e mafai ona outou maua se tolu selau.
33 Ma afai e lē mafai ona outou maua le tolu selau, ia saili ma le filiga atonu e mafai ona outou maua se tasi selau.
34 Peitai e moni Ou te fai atu ia te outou, Ou te tuu atu ia te outou se poloaiga, ia outou lē o a’e i le laueleele o Siona seia outou maua se toaselau o le malosi o lo’u fale, e o atu faatasi ma outou i le laueleele o Siona.
35 O lea, e pei ona Ou fai atu ia te outou, ole mai ma o le a outou maua ai, tatalo ma le faatauanau atonu e mafai e la’u auauna o Iosefa Samita, Le Itiiti, ona alu atu faatasi ma outou, ma pulefaamalumalu i totonu o lo’u nuu, ma faatulaga lo’u malo i luga o le laueleele ua faapaiaina, ma faamautu fanau a Siona i luga o tulafono ma poloaiga ua tuu atu ma o le a tuuina atu ia te outou.
36 O manumalo ma le mamalu uma e aumai ia te outou e ala i lo outou filiga, faamaoni, ma tatalo o le faatuatua.
37 Ia tuu atu i la’u auauna o Parley P. Pratt e malaga atu faatasi ma la’u auauna o Iosefa Samita, Le Itiiti.
38 Ia tuu atu i la’u auauna o Lyman Wight e malaga atu faatasi ma la’u auauna o Sini Rikitone.
39 Ia tuu atu i la’u auauna o Ailama Samita e malaga atu faatasi ma la’u auauna o Frederick G. Williams.
40 Ia tuu atu i la’u auauna o Orson Hyde e malaga atu faatasi ma la’u auauna o Orson Pratt, i soo se mea e fautuaina ai i laua e la’u auauna o Iosefa Samita, Le Itiiti, i le mauaina o le faataunuuga o nei poloaiga ua Ou tuuina atu ia te outou, ma taatia mai mea o totoe i o’u lima. E faapea lava. Amene.