1 Pudno kunak kadakayo, gagayyemko, itedko kadakayo ti balakad, ken bilin, maipanggep kadagiti amin a sanikua a kukua ti timpuyog nga imbilinko a mabukel ken mabangon, nga agbalin a sangsangkamaysa a timpuyog, ken ti agnanayon a timpuyog para iti pagimbagan ti simbaan, ken iti pannakaisalakan dagiti tao agingga nga umayak—

2 Babaen ti di maibabawi ken di mabaliwan a kari, ad-adunto nga amang ti bendision nga awaten dagiti binilinko no la ketdi agtalinaedda a napudno;

3 Ngem no saanda nga agtalinaed a napudno awan duadua a mailunodda.

4 Ngarud, gapu ta adda dagiti katulongak a di nagtungpal iti bilin, ngem linabsingda ti katulagan babaen ti kinaagum, ken kadagiti naalas a balikas, inlunodko ida iti nasaem ken nakaro a lunod.

5 Ta siak, ti Apo, inkarik iti pusok, nga asino man a tao a kameng ti timpuyog ti makitanto a managbasol, wenno, iti ababa a pannao, aglabsing iti katulagan a nakaikappenganyo, mailunodto iti unos ti panagbiagna, ket mailudekludekto a kas iti pagayatak;

6 Ta siak, ti Apo, saanak a marabrabak kadagitoy a banag—

7 Ket amin dagitoy maaramidto saan a makedngan dagiti awanan iti basol a kadua dagiti killo; ken tapno saan a makaliklik dagiti nagbasol kadakayo; ta siak, ti Apo, inkariankayo iti korona ti gloria iti makanawanko.

8 Ngarud, no maduktalankayo a nagbasol, diyo maliklikan ti pungtotko iti unos ti panagbiagyo.

9 No naisinakayon gapu iti basol, diyo maliklikanen ti pagrennekan ni Satanas agingga iti aldaw ti pannakasubbot.

10 Ket ikkankayo ita iti bileg manipud iti daytoy nga oras, a no asino man kadakayo, iti timpuyog, ti mapaneknekan a nagbasol ken saanna nga ibabawi ti dakes nga aramidna, yawatyonto a pagrennekan ni Satanas; ket awanto ti bilegna a mangyasideg iti dakes kadakayo.

11 Nainsiriban kaniak daytoy; ngarud, bilinenkayo, a mangurnos iti bagbagiyo ket ikkanyo ti tunggal tao iti imatonanna;

12 Tapno pakaammuannak ti tunggal tao iti panagaywan a naituding kenkuana.

13 Ta nasken unay a siak, ti Apo, pagsungbatek ti tunggal tao, kas agaywan kadagiti naindagaan a bendision, nga inaramid ken insaganak a para kadagiti parsuak.

14 Siak, ti Apo, pinalawak ti langit, ken binukelko ti daga, ti kangrunaan a putarko; ket kukuak amin a nagunegna.

15 Ket panggepko nga ited ti kasapulan dagiti santok, ta kukuak amin a banag.

16 Ngem nasken a maaramid iti bukodko a wagas; ket adtoy daytoy ti wagas a siak, ti Apo, impaulogko a mangted iti kasapulan dagiti santok, tapno maitan-okto dagiti nakurapay, ket iti kasta maibaba dagiti nabaknang.

17 Ta napno ti daga, ket adda umdas ken maispal; wen, insaganak ti amin a banag, ket impalubosko kadagiti annak ti tattao nga isuda ti agtignay iti bagbagida.

18 Ngarud, no pukawen ti asino man a tao ti pinarnuayko a kinaabunaw, ket dina ibinglay ti bingayna, a maibatay iti paglintegan ti ebangheliok, kadagiti nakuparay ken makasapul, yangadnanto, a kaduana dagiti nadangkes, dagiti matana iti impierno, a maparparigat.

19 Ket ita, pudno kunak kadakayo, maipanggep kadagiti pagsanikuaan ti timpuyog—

20 Paitudingyo iti katulongak a ni Sidney Rigdon ti lugar a pagyananna ita, ken ti aywanna a solar a pagkortian, para iti abastona bayat ti panagtrabahona iti bangkagko, a kas iti pagayatak, no bilinekto isuna.

21 Ket maaramid koma amin a banag a maibatay iti balakad ti timpuyog, ken sangsangkamaysa a pammalubos wenno timek ti timpuyog, nga agindeg iti daga ti Kirtland.

22 Ket daytoy a panangaywan ken bendision, siak, ti Apo, ipatalgedko iti katulongak a ni Sidney Rigdon ti bendisionko, ken ti bukelna kenkuana;

23 Ket paaduekto ti bendisionna, no la ket napakumbaba kaniak.

24 Ket manen, alaen koma ni katulongak a Martin Harris, nga aywanan, ti solar a naala ni katulongak a John Johnson a sukat ti sigud a tawidna, para kenkuana ken ti bukelna a sumarsaruno.

25 Ket no la ketdi napudno, paaduekto ti bendisionko kenkuana ken ti bukelna a sumarsaruno.

26 Ket busbosen koma ni katulongak a Martin Harris ti kuartana iti pannakaipakdaar dagiti balikasko, maibatay iti panangiwanwan ni katulongak a Joseph Smith, Jun.

27 Ket manen, adda koma lugar ni katulongak a Frederick G. Williams iti pagindeganna ita.

28 Ket alaen koma ni katulongak nga Oliver Cowdery ti solar a kadarapat ti balay, nga agbalin nga opisina ti pagimalditan, nga isu ti umuna a solar, ken isu met ti solar a pagyanan ti amana.

29 Ket alaen koma da katulongak a Frederick G. Williams ken Oliver Cowdery ti opisina ti pagimalditan ken amin a banag a maipanggep iti daytoy.

30 Ket daytoyto ti aywananda a maituding kadakuada.

31 Ket no la ketdi napudnoda, adtoy bendisionakto, ken paaduek ti bendisionda.

32 Ket daytoy ti pangrugian ti panagaywan nga intudingko kadakuada, para kadakuada ken ti bukelda a sumarsaruno.

33 Ket, no la ketdi napudnoda, paaduekto ti bendisionda ken kadagiti bukelda a sumarsaruno kadakuada, uray nakaad-adu a bendision.

34 Ket manen, alaen koma ni katulongak a John Johnson ti balay a pagnaedanna, ken ti tawid, amin malaksid ti disso a nailatang a pakabangonan dagiti balayko, a maipanggep iti dayta a tawid, ken dagiti solar a nainagan iti katulongak a ni Oliver Cowdery.

35 Ket no la ketdi napudno isuna, paaduekto ti bendisionna.

36 Ket pagayatak nga ilakona dagiti solar a naisangrat a pakabangonan ti siudad dagiti santok, no la ketdi maipakaammo kenkuana babaen ti timek ti Espiritu, ken maibatay iti balakad ti timpuyog, ken babaen ti timek ti timpuyog.

37 Ket daytoy ti pangrugian ti panangaywan nga intudingko kenkuana, a bendisionna ken dagiti bukelna a sumarsaruno kenkuana.

38 Ket no la ketdi napudno isuna, paaduekto ti nakaad-adu a bendisionko kenkuana.

39 Ket manen, maituding koma iti katulongak a ni Newel K. Whitney dagiti balay ken solar a pagnanaedanna ita, ken ti solar ken pasdek ken ti nagtakderan ti pagtagilakuan, ken kasta met ti solar nga adda iti suli nga abagatan ti pagtagilakuan, ken kasta met ti solar a yan ti paguringan.

40 Ket intudingko amin dagitoy nga aywanan ni katulongak a Newel K. Whitney, a pakabendisionanna ken ti bukel a sumarsaruno kenkuana, para iti pagimbagan ti pagtagilakuan ti timpuyogko a binangonko para iti istakak iti daga ti Kirtland.

41 Wen, pudno, daytoy ti panangaywan nga intudingko ken ti katulongak a ni N. K. Whitney, nga isu daytoy sangabukel a pagtagilakuan, isu ken ti pannakabagina, ken ti bukelna a sumarsaruno.

42 Ket no la ketdi napudno nga agtungpal kadagiti bilinko, nga intedko kenkuana, paaduekto ti bendisionna ken ti bukel a sumarsaruno kenkuana, iti nakaad-adu a bendision.

43 Ket manen, ituding koma ni katulongak a Joseph Smith, Jun., iti bagina ti solar a naisangrat a pakabangonan ti balayko, nga agatiddog iti dua-gasut-ket-maysa a metro ken agakaba iti nasurok nga innem-a-pulo, ken kasta met ti tawid a pagnanaedan ti amana.

44 Ket daytoy ti pangrugian ti panagaywan nga intudingko kenkuana, a bendision kenkuana, ken iti amana.

45 Ta adtoy, adda tawid nga insaganak iti amana, nga abastona; ngarud maibilangto iti balay ni katulongak a Joseph Smith, Jun.

46 Ket paaduekto ti bendision iti balay ni katulongak a Joseph Smith, Jun., no la ketdi napudno, uray nakaad-adu a bendision.

47 Ket ita, itedko kadakayo ti bendision maipanggep iti Zion, a saankayon a kameng iti sangsangkamaysa a timpuyog kadagiti kabsatyo iti Zion, iti daytoy laeng a banag—

48 Kalpasan ti pannakabukelyo, maawagankayonto iti Sangsangkamaysa a Timpuyog ti Istaka ti Zion, ti Siudad ti Kirtland. Ket dagiti kabsatyo, kalpasan ti pannakabukelda, maawagandanto iti Sangsangkamaysa a Timpuyog iti Siudad ti Zion.

49 Ket mabukeldanto iti bukodda a nagnagan, ken iti bukodda a nagan; ket aramidendanto ti aramidda iti bukodda a nagan, ken iti bukodda a nagnagan;

50 Ket aramidenyonto ti aramidyo iti bukodyo a nagan, ken iti bukodyo a nagnagan.

51 Ket imbilinko a maaramid daytoy para iti pannakaisalakanyo, ken kasta met ti pannakaisalakanda, a bunga ti pannakapapanawda ken iti dumteng.

52 Dagiti katulagan a nalabsing babaen ti basol, babaen ti agum ken narugit a balikas—

53 Ngarud, mawarakayo a kas sangsangkamaysa a timpuyog kadagiti kabsatyo, tapno saankayo a maikappeng kadakuada nga agingga laeng iti daytoy nga oras, agingga laeng ita, a kas nasaokon, babaen ti utang a kas napagnanamingan iti daytoy a timpuyog ti konseho, a kas awaten ti kasapulanyo ken iturong ti timek ti konseho.

54 Ket manen, itedko kadakayo ti bilin maipanggep iti panagaywan nga intudingko kadakayo.

55 Adtoy, kukuak amin dagitoy, wenno awan ti kapay-an ti pammatiyo, ket makitadakayo a managpammarang, ket nalabsing ti katulagan nga inaramidyo kaniak;

56 Ket no kukuak dagiti sanikua, dakayo ngarud ti agaywan; no saan saankayo nga agaywan.

57 Ngem, pudno kunak kadakayo, tinudingankayo nga agaywan iti balayko, a kas ngarud agaywan.

58 Ket gapu iti daytoy binilinkayo nga urnosenyo ti bagbagiyo, a mangimaldit kadagiti balikasko, ti pakabuklan dagiti nasantuan a kasuratak, dagiti paltiing nga intedko kadakayo, ken itedkonto, kalpasanna, kadakayo manen ken manen—

59 Iti panggep a pannakabangon ti simbaanko ken pagariak iti daga, ken mangisagana kadagiti taok para iti kanito a panagtaengkonto kadakuada, nga asidegen.

60 Ket isaganaanyo ti bagbagiyo iti pagyanan ti tesoreria, ket ikkan-pategyo iti naganko.

61 Ket mangtudingkayo iti maysa kadakayo a mangaywan iti tesoreria, ket maordenanto iti daytoy a bendision.

62 Ket addanto rikep daytoy a tesoreria, ket maipanto amin dagiti sagrado a banag iti tesoreria, ket awanto ti asino man kadakayo nga agkuna a kukuana, wenno ti pasetna, ta dakayonto amin ti pagpaayanna.

63 Ket itedko kadakayo manipud iti daytoy nga oras; ket ita kitaenyo, a mapankayo ket aramidenyo ti panagaywan nga intudingko kadakayo, kadagiti laeng sagrado a banag, para iti panggep a pannakaimaldit dagitoy sagrado a banag a kas nasaok.

64 Ket ti magunggona kadagiti sagrado a banag addanto iti tesoreria, ket maikkanto iti rikep; ket saanto a maaramat wenno mairuar ti asino man, wenno uray no maikkat ti rikepna a maikabilto, tinto la timek ti timpuyog, wenno babaen ti bilin.

65 Ket kastoyto ti pannakataginayon dagiti gunggona kadagiti sagrado a banag iti tesoreria, a para iti sagrado ken dagiti nasantuan a panggep.

66 Ket maawaganto daytoy iti sagrado a tesoreria ti Apo; ket maikkanto iti rikep tapno agbalin a nasantuan ken maikkan-pateg iti Apo.

67 Ket manen, addanto sabali a maisagana a tesoreria, ket addanto matudingan a tesorero nga agaywan iti tesoreria, ket maikkanto iti rikepna;

68 Ket amin a kuarta a maawatyo iti panagaywanyo, babaen ti panangpasayaatyo kadagiti sanikua nga intudingko kadakayo, kadagiti balay, wenno kadagiti daga, wenno kadagiti dinguen, wenno amin a banag malaksid kadagiti nailangitan ken sagrado a sinurat, a tinaginayonko kaniak para iti nasantuan ken sagrado a panggep, maikabilto iti tesoreria a kas iti kapartak ti pannakaawatyo iti kuarta, a ginasut, wenno saglilimapulo, wenno sagduduapulo, wenno sagsangapulo, wenno saglilima.

69 Wenno iti sabali a pannao, asino man kadakayo ti umawat iti lima a doliar paikabilyo kenkuana iti tesoreria; wenno makagun-od iti sangapulo, wenno duapulo, wenno limapulo, wenno sangagasut, kasta met ti paaramidyo;

70 Ket awan koma kadakayo ti agkuna a kukuana; ta saannanto a kukua, wenno paset daytoy.

71 Ket awanto ti pasetna a maaramat, wenno mairuar iti tesoreria, babaen laeng ti timek ken sangsangkamaysa a pammalubos ti timpuyog.

72 Ket daytoyto ti timek ken sangsangkamaysa a pammalubos ti timpuyog—nga asino man nga agkuna iti tesorero: Kasapulak daytoy a mangtulong kaniak iti panagaywanko—

73 No lima a doliar, wenno sangapulo a doliar, wenno duapulo, wenno limapulo, wenno sangagasut, ited kenkuana ti tesorero ti kantidad a kasapulanna iti panagaywanna—

74 Agingga a maduktalan a nagbasol, ket maipalgak iti imatang ti konseho ti timpuyog a nalawag a saan a napudno ken saan a mapagtalkan nga agaywan.

75 Ngem agingga a naan-anay ti pannakisinningedna, ken napudno ken nasayaat ti panagaywanna, daytoyto ti tandana iti tesorero tapno saan a pagkedkedan ti tesorero.

76 Ngem no bilang adda panagbasol, ti tesorero ti agsungbat iti konseho ken timek ti timpuyog.

77 Ket no bilang maduktalan a saan a napudno ti tesorero ken saan a nasayaat nga agaywan, agsungbatto iti konseho ken iti timek ti timpuyog, ket maikkatto iti akemna, ket addanto sabali a matudingan a sukatna.

78 Ket manen, pudno kunak kadakayo, maipanggep kadagiti utangyo—adtoy pagayatak a bayadanyo amin nga utangyo.

79 Ken pagayatak nga agpakumbabakayo kaniak, ken gun-odenyo daytoy a bendision babaen ti kinaregta ken kinapakumbabayo ken iti kararag ti pammati.

80 Ket no la ketdi naganetget ken napakumbabakayo, ken sursurotenyo ti kararag ti pammati, adtoy, paluknengek ti puspuso dagiti nakautanganyo, agingga a mangipatulodakto kadakayo iti pakaruk-atanyo.

81 Ngarud agsuratkayo a dagus idiay Nueva York ket isuratyo ti maibatay iti ibaganto ti Espirituk; ket paluknengek ti puspuso dagiti nakautanganyo, tapno maikkatto iti panunotda ti panggep a mangdangran kadakayo.

82 Ket no la ketdi napakumbaba ken napudnokayo ken umawagkayo iti naganko, adtoy, itdekto kadakayo ti balligi.

83 Ikarik kadakayo, a mawayawayaankayonto a dagus iti pannakaadipenyo.

84 No la ketdi maikkankayo iti gundaway nga umutang iti ginasut a kuarta, wenno rinibu, agingga a makautangkayo iti umdas a mangwayawaya kadakayo iti pannakaadipen karbenganyo dayta.

85 Ket ikariyo dagiti sanikua nga impaimak kadakayo, a mamimpinsan, babaen ti panangyawatyo iti naganyo iti sangsangkamaysa a pammalubos wenno no saan, kas iti mabalinto a pagsayaatanyonto.

86 Itdek kadakayo daytoy a karbengan, a mamimpinsan; ket adtoy, no ituloyyo nga aramiden dagiti banag nga indatagko kadakayo, a maibatay kadagiti bilinko, kukuak amin dagitoy a banag, ket dakayo ti agaywanko, ket saanto nga ipalubos ti amo a madadael ti balayna. Pudno a kasta. Amen.