Vaega 110
Faaaliga vaaia na faaali mai ia Iosefa Samita le Perofeta ma Oliva Kaotui i le Malumalu i Katelani, Ohaio, i le aso 3 o Aperila, 1836. O le mea na faia o se sauniga i le aso Sapati. Ua faapea mai le talafaasolopito a Iosefa Samita: “I le aoauli, sa ou fesoasoani atu i isi Peresitene i le tufatufaina atu o le Taumafataga a le Alii i le Ekalesia, ina ua uma ona maua mai i le Toasefululua, o e sa ā latou le avanoa e galulue ai i le la’o’ai paia i le aso lea. Ina ua uma ona faia o lenei galuega mo o’u uso, sa ou tuumuli atu i le pulelaa, ona sa tuu i lalo veli, ma ou punou ifo, faatasi ma Oliva Kaotui, i se tatalo mamalu ma lē leoa. Ina ua mavae ona ma tutu a’e mai i le tatalo, sa tatala mai le faaaliga vaaia lenei ia i ma’ua uma.”
1–10, Ua afio mai le Alii o Ieova i le mamalu ma talia le Malumalu o Katelani o Sona maota; 11–12, Ua oo mai taitoatasi Mose ma Elaia ma tuu mai a laua ki ma tisipenisione; 13–16, Ua toe foi mai Elia ma tuu mai ki o lana tisipenisione e pei ona folafola mai e Malaki.
1 Sa aveesea le veli mai i o ma’ua mafaufau, ma sa tatalaina mata o o ma’ua malamalama.
2 Sa ma vaai i le Alii o tulai mai i luga o le si’ofatafata o le pulelaa, i o maua luma; ma o lalo ifo o ona aao sa teuteuina i le auro mao’i, i le lanu e pei e mūmū sesega.
3 O ona fofoga sa pei o se afi mumū; o lauao o lona ao sa papa’e e pei o le kiona mamā; o ona fofoga sa susulu e sili atu i lo le pupula o le la; ma o lona siufofoga sa pei o le leo o le tafe-taalili o vai tetele, o le siufofoga lava o Ieova, ua fetalai mai:
4 O A’u o lē muamua ma lē mulimuli; o A’u o lē o ola, o A’u o lē na fasia; o A’u o lo oulua fautua i le Tamā.
5 Faauta, ua faamagaloina a oulua agasala mai ia te oulua; ua oulua mamā i o’u luma; o lea, ia siitia a’e i luga o oulua ulu ma olioli.
6 Ia olioli loto o o oulua uso, ma ia olioli loto o lo’u nuu uma, o e na latou fausia lenei fale i lo’u igoa, ma lo latou malosi.
7 Aua faauta, ua Ou talia lenei fale, ma o le a i ai iinei lo’u igoa; ma o le a Ou faaali atu a’u lava i lo’u nuu i lenei fale i le alofa mutimutivale.
8 Ioe, o le a Ou oo atu i a’u auauna, ma tautala atu ia te i latou i lo’u lava leo, pe afai e tausi lo’u nuu i a’u poloaiga, ma ia lē faaeleeleaina lenei fale paia.
9 Ioe o le a matua olioli tele lava loto o afe ma sefulu o afe ona o faamanuiaga o le a liligi atu, ma le faaeega ua faaeeina ai a’u auauna i lenei fale.
10 Ma o le a salalau atu le ta’uta’ua o lenei fale i atunuu ese; ma o le amataga lenei o le faamanuiaga o le a liligi mai i luga o ulu o lo’u nuu. E faapea lava. Amene.
11 Ina ua tapunia lenei faaaliga vaaia, sa toe tatala mai le lagi ia i ma’ua; ma sa oo mai Mose i o ma’ua luma, ma tuu mai ia i ma’ua ki o le faapotopotoina o Isaraelu mai vaega e fa o le lalolagi, ma le taitaiga mai o ituaiga e sefulu mai le laueleele i matu.
12 Ina ua mavae lea, sa oo mai Elaia, ma tuu mai le tisipenisione o le talalelei a Aperaamo, fai mai o le a faamanuiaina i ma’ua ma a ma’ua fanau, tupulaga uma mulimuli mai pe a mavae atu i ma’ua.
13 Ina ua tapunia lenei faaaliga vaaia, sa oo mai i o ma’ua luga se isi faaaliga vaaia tele ma le mamalu; ona sa tulai mai i o ma’ua luma Elia le perofeta, o lē na aveina i le lagi e aunoa ma le tofo i le oti, ma fetalai mai:
14 Faauta, ua oo atoa mai le taimi, lea na fetalaia e le fofoga o Malaki—na molimau mai e tatau ona auina mai o ia [Elia], ae lei oo mai le aso tele ma le mata’utia o le Alii—
15 E liliu loto o tamā i fanau, ma fanau i tamā, ne’i taia le lalolagi atoa i se fetuu—
16 O lea, ua tuu atu i o oulua lima ki o lenei tisipenisione; ma o lenei mea o le a mafai ona outou iloa ai ua lata mai lava le aso tele ma le mata’utia o le Alii, ua i faitotoa lava.