1 Sa kaya vakaidina vakaoqo na Turaga vei iko Tomasi na noqu tamata: Au sa rogoca na nomu masu; ia na nomudou soli ka ni loloma sa lako cake mai vei au meu dau nanuma tiko, ena vukudra na wekamu, era a digitaki me ra vakadinadinataka na yacaqu ka kauta yani ki na veivanua tani vei ira na veimatanitu, veimataqali, duivosavosa, kei ira na tamata, ka tabaki mai vei ira na noqu tamata.

2 Au sa kaya vakaidina vei iko, e vica na ka e tu e lomamu ka tu vei iko, au sega ni taleitaka koi Au na Turaga.

3 Ia me vaka ni ko sa vakamalumalumutaki iko ko na vakacerecerei; o koya, sa vosoti kece kina na nomu ivalavala ca.

4 Me marau na lomamu e mataqu; ka mo tukuna yani na yacaqu, sega walega vei ira na Matanitu Tani, ia vei ira talega na Jiu; ko na vunautaka yani na noqu vosa ki na iyalayala kei vuravura.

5 Mo dau veivosakitaka, ena veimataka; kei na veisiga, me lako yani na domo ni veivunauci; ia ni sa bogi mai mo ia tiko ga na vunau me vakayadrati ira na tamata.

6 Ia me kilai mai Saioni na nomu itikotiko, io mo kakua ni toki tani mai na nomu vale; raica koi Au na Turaga, au sa vakarautaka e dua na cakacaka levu mo cakava, mo vunautaka yani na yacaqu vei ira na luve ni tamata.

7 O koya, mo vakadreta na ivau ni tolomu me baleta na cakacaka oqo. Me vakaivava tale ga na yavamu, ni ko sa digitaki ko iko, ka sa koto na nomu sala ena veiulunivanua ni veimatanitu.

8 Ia ena nomu vosa era na vakalolovirataki kina e vuqa na ka cecere, kei na nomu vosa era na vakacerecerei kina e vuqa na ka lolovira.

9 Na domomuni era na vunauci kina na dau talaidredre; io na nomuni veivunauci sa muduka kina na nona vosa vakacaca na yame daukakase.

10 Mo yalomalumalumu; ena tuberi iko e ligamu na Turaga na nomu Kalou, ka sauma vei iko na nomu masu.

11 Au sa kila na lomamu, ka rogoca na nomu masu ena vukudra na wekamu. Mo kakua ni lomani iratou vakalevu cake mai vei ira na kena vo, ia mo lomani ira kecega me vaka ko sa lomani iko; mo lomana vakatautauvata na tamata kecega; kei ira kecega sa vakabauta na yacaqu.

12 Ka dau masulaki iratou na wekamu na Le Tinikarua. Mo vunauci iratou vakaukauwa ena vuku ni yacaqu, me ratou vunauci ena vuku ni nodratou ivalavala ca kece sara, ka mo yalodina tiko ga vei au kei na yacaqu.

13 Ia ni sa oti na nodra vakatovolei, kei na nodra vakararawataki, raica, koi Au na Turaga, au na qai lako yani vei iratou ka vakataudeitaki iratou, ia kevaka eratou na sega ni vakaukauwataka na lomadratou, ka vakadomoqataki iratou vei au, eratou na saumaki mai, ka’u na vakabulai iratou.

14 Oqo, au sa kaya vei iko, ia na veika au sa kaya vei iko, au sa kaya talega vei iratou taucoko na Le Tinikarua: Tucake ka vakadreta na ivau ni tolomu, colata na nomu kauveilatai, muri au, ka vakania na noqu sipi.

15 Dou kakua ni vakalevulevui kemudou; dou kakua ni vorati Josefa na noqu tamata; niu sa kaya vakaidina vei kemudou, Au na tiko ga kei koya, ka na vakarurugi koya na ligaqu; ia na kaukauwa kei na lewa au sa solia vua, ka vakakina vei kemudou, ena sega ni kau tani mai vua me yacova ni’u sa lesu tale mai.

16 Au sa kaya vakaidina vei iko, I Tomasi na noqu tamata, sai iko na tamata au sa digitaka mo taura na idola ni noqu matanitu, ena vuku ni Le Tinikarua, ki veivanua tani ena veimatanitu kecega—

17 Mo noqu tamata ena kena dolavi na katuba ni matanitu ena veivanua kece eratou na sega ni rawa ni lako kina na noqu tamata ko Josefa, kei na noqu tamata ko Sidini, kei na noqu tamata ko Airame;

18 Niu sa vakacolata vei iratou na cakacaka ni veisoqosoqo ni lotu kecega ena loma ni dua na gauna lekaleka.

19 Ia, mo lako ki na vanua kecega eratou sa talai iko kina, raica au na sala vata tiko kei iko; ia na veivanua kecega ko sa vunautaka kina na yacaqu ena dolavi kina vei iko e dua na katuba, me ra ciqoma kina na noqu vosa.

20 Ko koya sa ciqoma na noqu vosa sa ciqomi au, ia ko koya sa ciqomi au, sa ciqomi iratou, na Mataveiliutaki Taumada, au sa tala yani, ko iratou ka’u sa digitaka me ratou nomuni daunivakasala ena vuku ni yacaqu.

21 Kei na dua tale, au sa kaya vei kemudou, ko koya dou sa tala ena vuku ni yacaqu, ena nomudou domovata na Le Tinikarua, sa vakaturi ka vakadonui ena kena ivalavala dodonu mai vei kemudou, sa na tu vua na kaukauwa me dolava na katuba ni noqu matanitu ki na veimatanitu kecega dou sa talai koya kina—

22 Kevaka era sa vakayalomalumalumutaki ira vei au, ka muria na noqu vosa, ka vakatudaligadra ki na domo ni Yaloqu.

23 E dina, e dina au sa kaya vei kemudou, sa ubi vuravura na butobuto, ia na butobuto loaloa ena nodra vakanananu na tamata, ka sa ca kina na tamata kecega e mataqu.

24 Raica, ena yaco kusarawa na siga ni veisausaumi vei ira na lewei vuravura, e dua na siga ni veicudruvi, na siga ni vakamakama, na siga ni rarawa, na siga ni tagi, na tagiyaso, kei na lele; ia ena lako sobu mai me vaka na covulaca ki na delai vuravura taucoko, sa kaya na Turaga.

25 Ia ena tekivu ena noqu vale, ka na qai tete yani mai na noqu vale, sa kaya na Turaga;

26 Ena taumada vei ira vei kemudou, sa kaya na Turaga, era tusanaka ni ra kila na yacaqu ka qai sega ni kilai au, ka vosa vakacacataki au ena kedra maliwa na noqu lewe ni matavuvale, sa kaya na Turaga.

27 O koya, mo dou raica kina mo dou kakua ni lomaocaocataka na veika ni noqu lotu ena vanua oqo, sa kaya na Turaga.

28 Ia dou vakasavasavataka na lomamudou e mataqu; ka mo dou lako yani ki vuravura taucoko ka vunautaka na noqu kosipeli vei ira na tamata kecega era se bera ni ciqoma;

29 Ia ko koya sa vakabauta ka papitaiso ena vakabulai, ia ko koya sa sega ni vakabauta, ka sega ni papitaiso, ena cudruvi.

30 Ni sa soli vei kemudou, na Le Tinikarua, kei iratou, na Mataveiliutaki Taumada, ko iratou eratou sa lesi me ratou nomudou daunivakasala ka iliuliu, na kaukauwa ni matabete oqo, ena veisiga mai muri kei na iotioti ni gauna, sai koya na itabagauna ni taucoko ni gauna,

31 Na kaukauwa vata oqo sa tu vei kemudou, vata kei ira kece era sa ciqoma oti e dua na itabagauna ena dua ga na gauna me tekivu mai na gauna ni veibuli;

32 Niu sa kaya vakaidina vei kemudou, na idola ni itabagauna dou sa ciqoma, sa vakadewataki sobu mai vei ira na qase, io me kena ilutua sa isolisoli mai lomalagi vei kemudou.

33 Au sa kaya vakaidina vei kemudou, raica na kena cecere na nomudou ilesilesi. Dou vakasavasavataka na lomamudou kei na nomudou isulu, ia kevaka e sega, ena tarogi vei kemudou na nodra dra na itabatamata oqo.

34 Mo dou yalodina tiko ga me yacova ni’u sa lesu tale mai, ni’u na lako kusarawa mai; ka sa noqu itavi me’u sauma vei ira na tamata kecega me vaka na nodra ivalavala. Koi au na Alifa kei na Omeka. Emeni.