Benneg 115
Paltiing a naited babaen ni Joseph Smith a Propeta, iti Far West, Missouri, idi 26 ti Abril 1838, a pannakaipakaammo ti pagayatan ti Dios maipanggep iti pannakaipasdek iti dayta a lugar ken iti balay ti Apo (History of the Church, 3:23–25). Maiturong daytoy a paltiing kadagiti mangimatmaton a dadaulo ti Simbaan.
1–4, Naganan ti Apo ti simbaanna iti Ti Simbaan ni Jesucristo dagiti Santo iti Ud-udina nga Aldaw; 5–6, Ti Zion ken dagiti istakana ti lugar a salakan ken kamang dagiti Santo; 7–16, Mabilin dagiti Santo a mangbangon iti balay ti Apo iti Far West; 17–19, Iggem ni Joseph Smith dagiti tulbek ti pagarian ti Dios iti daga.
1 Pudno kastoy ti kuna ti Apo kenka, katulongak a Joseph Smith, Jun., ken kasta met iti katulongak a ni Sidney Rigdon, ken kasta met iti katulongak a ni Hyrum Smith, ken dagiti mamagbagayo a natudingan ken matudinganto kalpasanna;
2 Ken kasta met kenka, katulongak nga Edward Partridge, ken dagiti mamagbaga;
3 Ken kasta met kadagiti napudno a katulongak nga adda iti nangato a konseho ti simbaanko iti Zion, ta kastoyto ti pannakaawagda, ken kadagiti amin nga elder ken tattao ti kuak a Simbaan ni Jesucristo dagiti Santo iti Ud-udina nga Aldaw, a nagsaknap iti sangalubongan;
4 Ta kastoyto ti pannakaawag ti simbaanko kadagiti ud-udina nga aldaw, nga isu Ti Simbaan ni Jesucristo dagiti Santo iti Ud-udina nga Aldaw.
5 Pudno kunak kadakayo amin: Tumakderkayo ket agrimatkayo, tapno ti silawyo agbalin a wagayway kadagiti pagilian;
6 Ken tapno ti panaguummong a sangsangkamaysa iti daga ti Zion, ken kadagiti istakana, agbalin a salakan, ken pagkamangan no agbagyo, ken no maibukbok ti pungtot nga awan lalaokna iti intero a daga.
7 Agbalin koma ti siudad, ti Far West, a nasantuan ken maikkan-pateg kaniak; ket maawaganto iti kasantuan, ta nasantuan ti daga a pagtaktakderanyo.
8 Ngarud, bilinenkayo a mangbangon iti balay a para kaniak, a paguummongan a sangsangkamaysa dagiti santok tapno agdaydayawda kaniak.
9 Ket adda koma pangirugian iti daytoy nga aramid, ken pamuon, ken panangisagana a trabaho, iti sumuno a kalgaw;
10 Ket marugian koma iti maikapat nga aldaw ti sumuno a Hulio; ket manipud iti dayta nga aldaw a pagtrabahuen koma a sireregta dagiti taok a mangbangon iti balay a mainagan kaniak;
11 Ket baliwandanto koma manen ti mangikabil iti pamuon ti balayko kalpasan ti makatawen manipud ita nga aldaw.
12 Isu nga agtrabahoda koma a sireregta manipud iti dayta nga aldaw agingga a malpas, manipud iti panulina agingga iti tuktokna, agingga nga awanen ti nabati a di pay nalpas.
13 Pudno kunak kadakayo, saan koman nga umutang ni katulongak a Joseph, wenno ni katulongak a Sidney, wenno ni katulongak a Hyrum, para iti pannakabangon ti balay a mainagan kaniak;
14 Ngem mabangon koma ti balay a mainagan kaniak a maibatay iti pagtuladan nga ipakitakto kadakuada.
15 Ket no bangonen dagiti taok a saan a maibatay iti pagtuladan nga ipakitakto iti panguluenda, diakto awaten manipud kadakuada.
16 Ngem no bangonen dagiti taok a maibatay iti pagtuladan nga ipakitakto iti panguluenda, a ni katulongak a Joseph ken dagiti mamalbalakadna, awatekto manipud kadagiti ima dagiti taok.
17 Ket manen, pudno kunak kadakayo, pagayatak a maidaras ti pannakabangon ti siudad ti Far West babaen ti panaguummong dagiti santok;
18 Ken kasta met a nasken nga adda maituding a luglugar para kadagiti istaka iti luglugar iti aglawlaw, a maipakitanto iti katulongak a ni Joseph, manen ken manen.
19 Ta adtoy, addaakto kenkuana, ket pasantuekto iti imatang dagiti tao; ta isu ti nangyawatak kadagiti tulbek daytoy a pagarian ken panagserbi. Pudno a kasta. Amen.