Wase 11
Na ivakatakila sa soli yani mai vei Josefa Simici na Parofita ki vua na tuakana ko Airame Simici, e Amoni, Penisilivenia, Me, 1829. Na ivakatakila oqo a ciqomi mai na Urimi kei na Cumimi me isau ni vakatataro kei na vakatakekere i Josefa. Na iTukutuku Makawa kei Josefa Simici e tukuna ni ivakatakila oqo a ciqomi ni oti na vakalesui mai ni Matabete i Eroni.
1–6, Era na vakabulai na dautatamusuki ena were ni vaini; 7–14, Vakasaqara na yalomatua, vunautaka na veivutuni, vakabauta na Yalo; 15–22, Muria na ivakaro, ka vulica na vosa ni Turaga; 23–27, Kakua ni cakitaka na yalo ni vakatakila kei na parofisai; 28–30, Ko ira sa vakabauti Karisito era sa yaco me ra luve ni Kalou.
1 Sa vakarau yaco e dua na cakacaka levu ka veivakurabuitaki vei ira na luve ni tamata.
2 Raica, koi Au na Kalou; mo rogoca matua na noqu vosa, ni sa bula ka kaukauwa; sa gata vakalevu ka mucu ga na iseleiwau batirua, sa wasea rua na isema kei na uto ni sui; o koya mo rogoca matua kina na noqu vosa.
3 Raica, sa matua tu na were ka sa vakarau na tatamusuki; ia, ko koya sa gadreva me tatamusuki me curumaka na nona isele takelo ena nona igu, ka ia na tatamusuki ni sa siga toka, me kumuna vata ki yalona na veivakabulai tawavakaiyalayala ena matanitu ni Kalou.
4 Io, ko koya yadua sa curumaka na nona isele takelo ka tatamusuki, sa kacivi dina mai vua na Kalou ko koya.
5 O koya oqo, kevaka dou na kerea vei au, ena soli vei kemudou; kevaka dou na tukituki ena dolavi vei kemudou.
6 Ia oqo, me vaka na nomudou kerekere, raica, au sa kaya vei kemudou, mo dou muria na noqu ivakaro, ka segata mo dou tura ka yavutaka na inaki kei Saioni.
7 Dou kakua ni vakasaqara na iyau, ia na yalomatua ga; ka raica, ena qai vakatakilai vei kemudou na veika vuni ni Kalou, ka oti dou sa na qai vakavutuniyautaki. Raica, ko koya sa rawata na bula tawamudu sa vutuniyau.
8 E dina, e dina, au sa kaya vei kemudou, me vaka dou sa gadreva mai vei au sa vakadina kina vei kemudou; ka kevaka dou sa gadreva, dou sa na idewadewa ni veika yaga e vuqa ena itabatamata oqo.
9 Me kakua tale ni dua na ka mo tukuna ia na veivutuni ga ena itabatamata oqo. Muria na noqu ivunau, ka veivuke ena kena vakayacori na noqu cakacaka, me vaka na noqu ivakaro, ia ko na vakalougatataki.
10 Raica, sa tiko vei iko e dua na isolisoli, se ko na rawata e dua na isolisoli kevaka ko sa gadreva mai vei au ena vakabauta, kei na yalodina, ka vakabauta na kaukauwa i Jisu Karisito, se ena noqu kaukauwa ka a vosa tiko vei iko;
11 Ia, raica, sai Au ga sa vosa tiko; raica, koi Au ga na rarama sa cilava na butobuto, io na noqu kaukauwa kau sa tukuna kina vei iko na veika oqo.
12 Ia oqo, e dina, e dina, au sa kaya vei iko, mo vakararavi ki na Yalo ka na veiliutaki ki na caka dodonu—io, mo kitaka na veika vinaka, mo lako ena yalomalumalumu, ka lewa vakadodonu; raica oqori ga na Yaloqu.
13 E dina, e dina au sa kaya vei iko, au na solia vei iko na Yaloqu, ia ena vakararamataka na nomu vakasama, ka na vakasinaiti na yalomu ena reki;
14 Ka oti ko sa na qai kila, se ena ka oqo ko na kila kina, na veika kecega ko na gadreva mai vei au, ka tiki ni veika ni yalododonu, ena vakabauta kei na yalodina ni ko na ciqoma.
15 Raica, au sa vakaroti iko mo kakua ni nanuma ni ko sa kacivi mo vunau me yacova ni ko sa kacivi vakaidina.
16 Mo tei wawa tale mada vakalailai, me yacova ni ko sa kila na noqu vosa, na noqu uluvatu, na noqu lotu, kei na noqu kosipeli, ka mo kila vakaidina na noqu ivunau.
17 Ka oti, raica, me vaka ko sa gadreva, io, me vaka na nomu vakabauta ena vakayacori vakakina vei iko.
18 Muria na noqu ivakaro; ka toka lo mada; vakatakekere ki vua na Yaloqu;
19 Io, mo kabiti au sara ena lomamu taucoko, mo na veivuke ena kena vakacilavi yani na veika sa tukuni tiko—io, na vakadewataki ni noqu vosa; ia mo vosota tiko me yacova ni ko sa vakacavara.
20 Raica, oqo na nomu cakacaka, mo muria na noqu ivakaro, io, ena nomu igu, nomu vakasama kei na nomu kaukauwa taucoko.
21 Mo kakua ni segata mo vunautaka na noqu vosa, ia mo segata taumada mo vulica na noqu vosa, sa na qai sereki na wa ni yamemu; ka oti, kevaka ko sa gadreva, sa na qai soli vei iko na Yaloqu kei na noqu vosa, io, na kaukauwa ni Kalou me vakabauta kina na tamata.
22 Ia oqo mo se toka lo mada; mo vulica matua na noqu vosa ka sa tu ena kedra maliwa na luve ni tamata, ka mo vulica tale ga na noqu vosa ka na vakatakilai mai ena kedra maliwa na luve ni tamata, se me vaka sa vakadewataki tiko oqo, io, me yacova ni ko sa rawata na veika kece kau sa vakatara ki na luve ni tamata ena itabatamata oqo, ena qai vakaikuritaki ena veika kecega.
23 Raica ko iko ko Airame, na luvequ; mo vakasaqara na matanitu ni Kalou, na veika kecega e ganita ena qai soli me kena ikuri.
24 Mo tauyavu ena noqu uluvatu, sai koya na noqu kosipeli;
25 Mo kakua ni cakitaka na yalo ni vakatakila, me kakua talega na yalo ni parofisai, ni na ca ko koya sa cakitaka na veika oqo;
26 O koya, mo tugana sara ki lomamu me yacova na gauna au nanuma mo na qai gole kina.
27 Raica, au sa tukuna na ka oqo vei ira kece era sa gadreva na ka vinaka, ka ra sa curumaka na nodra isele takelo me ra tatamusuki.
28 Raica, koi Au ko Jisu Karisito, na Luve ni Kalou. Koi au na vu-ni-bula kei na rarama kei vuravura.
29 Sai Au ga sa lako mai vei ira na kai noqu, ka ra qai sega ni ciqomi au na kai noqu;
30 Ia e dina, e dina, au sa kaya vei kemudou, ko ira kecega era sa ciqomi au, au na solia vei ira na kaukauwa me ra yaco me ra luve ni Kalou, ia ko ira mada ga era vakabauta na yacaqu. Emeni.