1 Ibukina te Uea e tia ni kaotia nakoiu bwa au kairiribai, i Missouri ao te Mwakoro n Aba aei, a manga rimwiiai; ao ngkana a teimatoa n rimwiai n akea bukina, ao n akea teutana nuun ke karan te motiraoi ke te eti n aia itera n tabekan aia kateitei n te tua ni kaitaraai; ao ngkana e teimatoa aia bukibuki ni boto i aon te kewe ae karanaki n te kara ae e rang roroo, I a tia n iangoia bwa e riai ao ni wanawana irou bwa N na kitana te tabo n te tai ae uarereke, ibukin manou ao manoia aomata aikai. N na tuangiia ni kabane naake I mwakuri ma ngaia, bwa I a tia ni katikui au mwakuri irouia taan tei ao kiraka ake a na karaoi mwakuri ni kabane n te aro ae e tawe ao n eti, ao n nooria bwa ni kabane au tarau a na kamaunaaki n te tai ae e riai, man kanakoan bwaai, ke n angana tabeua, n aron kainanoana, ke n aron riaina. Ngkana I karekea rongorongona bwa e a toki raoi angibuaka, ngkanne N na manga oki nakoimi.

2 Ao ni kaineti ma kaangaanga are I a tia ni weteaki bwa N na rinanoi, a taraa ni uarereke irou, ibukina bwa aia bakantang ao uniia aomata bon te aroaro ae I taneiai ni bongin maiu ni kabane; ao tera bukina e tara n rang ni kamiimi, ma tii ngkana I katabuaki mai i mwain karikan te aonaba ibukin ae raoiroi, ke e buakaka, n aron ae ko kona n rineia bwa ko na aranna. Motika taekan anne i bon iroumi. Te Atua e atai bwaai ni kabane, bwa e raoiroi ke e buakaka. Ma e ngae n anne, te ran ae e nano I taneiai n uaua iai. A riki irou ni kabane bwa irian aroarou, ao I namakinna, n aekan Bauro, ni kimwareirei n te rawawata; bwa ni karokoa te bong aei e a tia Atuaia au bakatibu ni kamaiuai mai irouia ni kabane, ao e na kamaiuai man te tai aei; bwa nooria, ao taraia, N na tokanikai i aoia ni kabane au kairiribai, bwa te Uea ae te Atua e a tia n taekinna.

3 Mangaia are a riai aomata aika a itiaki ni kabane ni kimwareirei, ao n rianako kukureia; bwa Atuaia Iteraera bon Atuaia, ao e na baireia ni kabwakaa kanuangaia aika a eti i aon atuuia ni kabane taan karawawataia.

4 Ao teuana riki, e koaua ae e taku te Uea: E riai mwakurin au tembora, ao ni kabane mwakuri ake I a tia n rinei nakoimi, n reitinako ao n aki toki; ao e riai ami nanomatoa, ao ami mwakuri mwaaka, ao te taotaonakin nano, ao ami mwakuri ni kataboroaki, ao kam na bon aki kabua kanuangami, e taku aia Uea Taanga ni Buaka. Ao ngkana a bwainikiriningkami, ao ni bwainikiriniia burabeti ao aomata aika a raoiroi ake i mwaimi. Bwa ibukin aei ni kabane iai te kanuanga i karawa.

5 Ao teuana riki, I anganingkami te taeka ni kaineti nakon te bwabetito ibukiia ami mate.

6 E koaua, ae taku te Uea nakoimi ni kaineti ma ami mate: Ngkana iai mai iroumi ae na bwabetitoaki ibukiia ami mate, e riai n iai te tia taumwin rongorongo, ao e riai n riki bwa te tia kakoaua ae e nooria ni matana n ami bwabetito; e riai n ongo n taningana, bwa e aonga ni kakoaua te koaua, e taku te Uea;

7 Bwa n ami tau rongorongo ni kabane e aonga n tauaki mwiina i karawa; ane kam kabaea i aon te aba, e na kabaeaki i karawa; ane kam kabwara i aon te aba, e na kabwaraaki i karawa;

8 Bwa N nang kaokii bwaai aika mwaiti nakon te aonaba, ni kaineti nakon te nakoanibonga, e taku aia Uea Taanga ni Buaka.

9 Ao teuana riki, a riai ni kabane tauan mwin rongorongo ni baireaki raoi, bwa a aonga ni kaakaki n te tabo ni kawakin rongorongo n au tembora ae e tabu, ni kawakinaki bwa te kanuringa man te roro teuana nakon te roro teuana, e taku aia Uea Taanga ni Buaka.

10 N na kangai nakoia ni kabane aomata aika a itiaki, bwa I tangiria, ma te nano ae moan te korakora, n tia n tuangiia man te tabo ni kabwarabwara taekan te bwabetito ibukiia maate, n te Tabati are i mwina. Ma ibukina tiaki mwaakau ni karaoia, N na korea ana taeka te Uea man te tai teuana nakon te tai teuana, i aon anne, ao ni kanakoa nakoimi n te meeri, ni ikotaki naba ma bwaai riki tabeua aika mwaiti.

11 Ngkai I kaina au reta n te tai aei, ibukin tangiran riki te tai; bwa te tia kairiribai e a tauraoi, ao n aron ae e taku te Tia Kamaiu, natin uean te aonaba aei e a roko, ma akea mwaakana i aou.

12 Nooria, au tataro nakon te Atua bwa kam aonga ni kamaiuaki ni kabane. Ao I korea arau ae ami tia mwakuri i nanon te Uea, te burabeti ao te tia mamata n Ana Ekaretia Iesu Kristo Ibukiia aika Itiaki ni Boong aika Kaitira.